Матфейица бицараб Рохалил хабар 5
5
5 бетӏер
Гӏисал кӏудияб вагӏза
1Гӏемераб халкъ жинда хадуб бачӏунеб бихьидал, Гӏиса магӏарде вахана. Гьенив гӏодов чӏун гьев вукӏаго, тӏаде рачӏана гьесул муридал. 2Гьезие вагӏза гьабун, гьадин абуна Гӏисаца:
3– Гьардарал гурищ гьел, Аллагьасда цере жал мискинго рукӏин лъалел, –
гьезие бугелъул Зобалазул Парччахӏлъи.
4Гьардарал гурищ гьел, гӏодулел ругел, –
гьел рохизаризе ругелъул.
5Гьардарал гурищ гьел, хӏалимаб гӏамал бугел, –
гьезие щвезе бугелъул дуниялалъул кверщел.
6Гьардарал гурищ гьел, ритӏухълъиялъухъ ракъарал-къечарал, –
гьел гӏорцӏизе ругелъул.
7Гьардарал гурищ гьел, гурхӏел-рахӏму бугел, –
гьездаги гурхӏизе вугелъул.
8Гьардарал гурищ гьел, ракӏ бацӏцӏадго бугел, –
гьезда Аллагь вихьизе вугелъул.
9Гьардарал гурищ гьел, ракълие рачел къалел, –
гьезда Аллагьасул васалилан цӏар лъезеги бугелъул.
10Гьардарал гурищ гьел, ритӏухъго хьвадунилан гӏадамаз гӏакъуба кьолеб бугел, –
гьезие бугелъул Зобалазул Парччахӏлъи.
11Гьардарал гурищ нуж, – дун сабаблъун нужеда рогьо балеб мехалъги, нужее гӏакъуба кьолеб мехалъги, гьечӏеб рагӏи нужеде абулеб мехалъги – рохизе ругел.
12Роха-хинлъун рукӏа, разиго рукӏа,
Зобалазда кӏудияб шапакъат щвезе бугин нужее.
Цересел аварагзабазеги кьедал гӏадамаз гьедин гӏазабги гӏакъубаги.
13Нуж руго гьаб дуниялалъул цӏам. Амма гьелъул цӏамгӏаллъи холеб бугони, гьеб кин кӏиабизе цӏамгӏаллъизабилеб? Халкъалъ хӏатӏикь мерхьине гӏодобе бани гурони, сундуениги къваригӏунаро гьебмехалъ цӏам.
14Нуж руго дуниялалъе нур. Борхатаб магӏарда бугеб шагьар кин бахчизе кӏолеб? 15Кӏалагъоркье гьабун сахӏ тӏад лъезе гуро чирахъ бакулеб, рокъор ругел киназего канлъи кьезе борхатаб бакӏалда лъезейин. 16Гьедин нужер нуралъги канлъи кьеги гӏадамазе, нужер лъикӏал ишал гьезда рихьизе, зобалазда вугев нужер Инсуе гьез реццги гьабизе.
17Нужеда ракӏалде ккоге дун Мусал къанунги аварагзабазул динги хвезабизе вачӏарав чийилан. Гьел хвезаризе гурев, гьел щвалде щун тӏуразаризе вачӏун вуго дун. 18Хӏакълъун абулеб буго дица нужеда: зобалги ракьалги тӏагӏун инегӏан, къануналдаса цониги хӏучч, цониги тӏанкӏ тӏагӏине гьечӏо, Аллагьасул къадаралда рекъон кинабго тӏубазегӏан тӏагӏинаро гьеб. 19Гьединлъидал къануналъул бищунго гьитӏинабгицин амру жинцаго хвезабуравги гьеб хвезабизе гӏадамазда малъаравги бищунго гьитӏинавлъун рикӏкӏине вуго Зобалазул Парччахӏлъиялда. Амма тӏубазабулевги ва тӏубазабеян цогидазда малъулевги бищунго кӏудиявлъун рикӏкӏине вуго. 20Гьале дица нужеда абулеб буго: фарисеязулалдасаги диниял гӏалимзабазулалдасаги нужер ритӏухълъи цӏикӏкӏинчӏони, Зобалазул Парччахӏлъиялде кин рорчӏилел нуж?
21Нужеда лъала: некӏо рукӏарал гӏадамазеги Аллагьас амру гьабун букӏараблъи: «Чи чӏваге!» – ян ва: «Чи чӏварав чи судалде вачине вуго», – ян. 22Дицани нужеда абулеб буго: жиндирго вацасда#5:22 Вац – бокьарав чи, пуланав чи абураб магӏнаялда. ццин бахъаравги судалде вачине вуго. Жиндирго вацасда: «Рака! (Вахьна!)» – ян абуравги вачине вуго тӏадегӏанаб судалде. «Гӏабдал!» – ан абуравги жужахӏалъул цӏадаве ккезе бегьула.
23Къурбаналъе жоги бачун, къурбаналъул гьан лъолеб бакӏалде унаго, дуда ракӏалде щвани дуца вацасул ццин бахъинабун букӏараблъи, 24дурго къурбанги гьеб бакӏалда тун, мун а дов вацасулгун рекъел гьабизе, цинги нахъвуссун вачӏун хадуб хъве дуца къурбан. 25Дагӏбадулас вачун, судалде унаго, нухдаго рекъел-бакъалдалъун гьев тӏаса вихьизавизе гӏедегӏе. Гурони, гьес мун судиясухъе щвезавила, судияс гӏеласухъе кьела, цинги гвандиниве рехила. 26Хӏакълъун абулеб буго дица дуда: дур ахирисеб шагьи-пара лъугӏичӏого, гьениса къватӏивеги ворчӏиларо.
27Нужеда лъала: «зина гьабуге», – ян амру букӏараблъи. 28Дицани нужеда абулеб буго: чӏужугӏаданалъухъ хъублъи-хъахӏбалъи ракӏалде ккун валагьаравщинав чиясул рекӏелъ гьелдехун зина лъугьанин. 29Дур кваранаб бералъ мун мунагьалде цӏалев вугони, бахъун рехе гьеб. Цо лага камиго лъикӏ дуе, тӏолабго черх жужахӏалъул цӏадабе рехизегӏан. 30Дур кваранаб квералъ мун мунагьалде цӏалев вугони, къотӏун рехе гьеб. Цо лага камиго лъикӏ дуе, тӏолабго черх жужахӏалъул цӏадабе ккезегӏан. 31Чӏужу йиччан толев чияс гьелда цӏар тӏамиялъе нугӏлъи гьабулеб кагъат кье гьелъухъеян хъван букӏана. 32Дицани нужеда абулеб буго: хъахӏбалъи хутӏун, цогидаб гӏиллаялъе гӏоло чӏужу йиччан таравщинав чи ккола зинаялда хьвадизе гьей тӏамулев чилъун. Цогидас йиччан тарай гӏадан ячарав чиги зиначи ккола.
33Цоги нужеда лъала некӏо рукӏарал гӏадамазеги: «Бараб гьа биххуге, нагагь мун гьедани, Аллагьасукьа хӏинкъун гьеб гьа тӏубазабе» – ян амру букӏараблъи. 34Дицани нужеда абулеб буго: киданиги гьедаруге. Зобалхӏаянги гьедуге – зодисанин Аллагьасул амру рещтӏунеб. 35Ракьалхӏаянги гьедуге – ракьалдайин Аллагьасул кверщел тӏибитӏун бугеб. Иерусалималъул цӏаралдалъунги гьедуге – гьеб буго кӏудияв Парччахӏасул шагьар. 36«Дир бетӏералхӏа», – янги гьедуге, дурго бетӏералда цониги рас я хъахӏлъизабизе, я чӏегӏерлъизабизе кӏоларо дуда. 37Бугелда бугин абе, гьечӏелда гьечӏин абе, хутӏарабщинаб рагӏи илбисалдасан бачӏараб буго.
38Нужеда лъала: «Бералъухъ къисасалъе бер бахъе, гӏусалъухъ гӏус бахъе», – янги амру букӏараблъи. 39Дицани нужеда абулеб буго: квешлъи гьабурасда дандечӏоге. Дур кваранаб кӏаркьеналда кьабуни, квегӏаб кӏаркьенги ккве гьесда цебе. 40Къадиясухъе вачун, духъа гурде бахъизе бокьарасе, тӏаса бахъун дурго гӏабаги кье. 41Цо километралъ мун хӏалица вачарасда цадахъ кӏиго километралъги а. 42Гьарарасе гьарарабги кье, налъуда кьеян вачӏаравги нахъчӏваге.
43Нужеда лъала: «Дуда аскӏов вугев чи вокьа» – ян ва «дурго тушман риха», – ян амру букӏараблъи. 44Дицани нужеда абулеб буго: нужерго тушбаби рокьа, нужее гӏазаб-гӏакъуба кьолелги дугӏадулъ рехсе. 45Зобалазда вугев нужер Инсул васаллъун лъугьина нуж гьебмехалъ. Щайгурелъул гьес бакъ баккизабула лъикӏазеги квешазеги, гьес цӏад базабула рацӏцӏадазеги хъубазеги. 46Нуж рокьулел гӏадамал нужее рокьиялъул кири кинаб букӏинеб? Гьебго жо гурищ магъало бакӏарулел чагӏазгицин гьабулеб? 47Нужерго вацазе гурони нужеца салам кьолеб гьечӏони, кири кинаб букӏинеб? Гьебго жо гурищ Аллагь лъаларезги гьабулеб? 48Гьединлъидал нужги камилаллъун рукӏа, Зобалазда вугев нужер Эмен камилав вугев гӏадин.
Sélection en cours:
Матфейица бицараб Рохалил хабар 5: AvrNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Библия таржама гьабиялъул институт Москва 2008
