Лука 6
6
«Инсандин КӀиркӀ – киш ягъанна ХӀаф э»
1Сагелай киш ягъа Ӏиса вей хьуная хуйиас. Гин ученикари алдартӀай кӀетӀар, тӀиршанди гъилиъ, Ӏелди хьуная. 2ФарисеяригӀас са Ӏудари пуная:
– Фи э чун аркьаяф? Киш ягъа ахттигьар адава лишттинттар акьас!#6:2 Киш ягъа, джугьутӀарин закунилди джумӀе ягъан рагъ учӀухаб киш ягъан рагъ учӀасттегьен кар акьас ахттигьар ахьуна адава. Фарисеяри, киш ягъа кӀетӀар алдатӀучира кехӀей, кар акьуб хӀисаб аркьай хьуная.
3Ӏисайи гебурис пуная:
– Чун хуруфтту, фикьуф ичин Давуда, учра учин инсанара гашила агуна? 4Давуда, ачушуна Аллагьдин хулади, гъушуна садакьайин гуни, учира ӀуьтӀуная, учин инсанарисра йиная. Амма ге гуни сайисра ӀуьтӀанас ахттигьар адава, са маллабурис дала.
5Ӏисайи гебурис пуная:
– Инсандин КӀиркӀ – киш ягъанна ХӀаф э.
ХӀуьрджал гъил рукъуна инсан
6Сасра киш ягъа Ӏиса адина дуьгӀебур хура хулади, ягӀар аркьай хьуная Аллагьдин гаф. Тисаъ ахьуная хӀуьрджал гъил рукъуна са инсан. 7Фарисеярна Ӏелимар алгъузуна ахьуная сагъ аркьайчугвас Ӏисайи ге инсан киш ягъа, хаб Ӏисайик тахсир кикӀас хьас. 8Ӏисайис ягӀай ахьуная гебурин фикирар. Ги пуная гъил рукъуна инсандис:
– Гъайш, шаб мич, яӀанилди.
Те гъайшина адиная. 9Ӏисайи гебурис пуная:
– Зун чвафас хабар гъуландея, фикьас ахттигьар ая киш ягъа: иджвел акьас эв хъара Ӏайвел акьас? Джан ухӀас эв хъара пуч акьас? 10Хъуттурфуна джаллабурихъ, Ӏисайи пуная ге инсандис:
– Дагъ гъил.
Ги дагъуная, гъил сагъ хьуная ге инсандин. 11Фарисеярисна Ӏелимарис хъел алгъадиная. Чиппин арайиъ гъургъай хьуная гебур, фиркьагьан агъай Ӏисайис.
Ӏисайин цӀеӀу вакил
12Гьете ягъари Ӏиса ушуная сувалди дуьгӀебур акьас, кӀилин Ӏуьштти илгуная Ге, Аллагьдис дуьгӀебур аркьай. 13Багамингагь хьегуна, унахъуная Ӏисайи учин ученикарис. ГӀаттивуна гебуригӀас цӀеӀуд, пуная гебурис вакилар. Гебур хьуная: 14Симон, Ӏисайи гил алихьуная Петтру пуна ттур, гин чу Андрей, Якьуб, ЯхӀъя, Филип, Варфаламей, 15Матфей, Фума, Алфеян кӀиркӀ Якьуб, Симон, гихъ хъитӀуна ахьуная Зилут, 16Якьубан кӀиркӀ Ягьуда, Ягьуда Искариут, хабди Ӏиса масса еф.
Иджвелин гафарна агьар
17Алайшуна гебурихъай ахтт, Ӏиса гъузуная майдандил. Гисал завал хьуная Ӏисайин ученикара, кӀилди Ягьудея дерейинна, хӀуьлин къирагъари хъая Сидуна Тир агъа шагьураринна Ерусалимдин ппара халкьра. 18Гебур адинаттар хьуная Ӏисайил юркӀв алиянас, чиппин итталара сагъ акьас. ГӀанаъ шейтӀан аяттара сагъ вей хьуная. 19Джаллабурис гъил кирхӀас кканди ахьуная Ӏисайик, Гиас аттвере кьувати джалла сагъ аркьахӀела. 20Ӏисайи, хъуланди Учин ученикарихъ, пуная:
– Бахттлубур э гӀеджизар!
Аллагьдин Паччагьвел чвефе.
21Бахттлубур э агьал гашила аяттар!
Аллагьди чун тухъ акьасе.
Бахттлубур э чун, агьал Ӏешаяттар! Чун элхъенди ахьасе.
22Бахттлубур э чун, инсанарис чвакес хъел адина, чун уджуз акьуна адикая гуна, чве ттур беябур аркьая гуна Инсандин КӀиркӀахъас.
23Шад ухь ге ягъа, бахил ухь!
Заварил чвас зурба пай ая.
Чун дакканттарин дадара, гьелиштти ахьуная пайгъамбарарихъайра.
24Язукъ э чве девлетлубур!
Чвас кӀукӀ алди хьуная иджвелар.
25Язукъ э чве, агьал фун ацӀунаттар!
Чун гашила ахьасе.
Язукъ э чве, агьал элхъендеттар!
Чун, ав алихьуна, Ӏешай ахьасе.
26Язукъ э чве, кӀилди инсанари чве хӀа гаф аркьагуна!
Дузди гьелиштти хӀа гаф аркьай хьуная чӀире пайгъамбарарина гьеле инсанарин дадари.
Ккан ухь чве душманара
27– Чвас, Заал юркӀв алийинаттарис, Зун агъая: Ккан ухь чве душманар, иджвел акье чун дакканттарис, 28иджвелин гаф уп, чвас рукъалар аркьаттарис, дуьгӀе акье чун уджуз аркьаттарис. 29Ве суратин са багулигӀас чӀепӀ гӀадивучин, джуьре багвра кичикӀ. Ве варттал але кан фаттивуттис, берхӀемра фачи. 30Вафас тӀалаб аркьаттарис, джаллабурис фачи, веф гъушуттис, хаб фаша магъа. 31Чвас джуьре инсанари чвас фиштти акьуна кканчин, гьегиштти чун гьегебурисра акье. 32Нагагь чвас Ӏаре те чун кканеттар идехаб кканеф, фи баркаллагь э чвас авеф? Гунагьар кеяттарисра те чаб кканеттар э кканеф. 33Нагагь чун иджвел аркьаф Ӏаре, те чвас иджвел аркьаттарис идехаб, фи баркаллагь э чвас авеф? Гунагьар кеяттарира гьегиштти аркьа. 34Нагагь чун бурджуни ирцӀанф Ӏаре те хаб ирцӀанттарис ичин, фи баркаллагь э чвас авеф? Гунагьар кеяттарира бурджуни ирцӀанде гунагьар кеяттарис, гебури хаб есе пуна. 35Чун гиштти маркьа! Ккан ухь чве душманар, иджвелар акье гебурис, бурджуни фачи, хаб зе есе пуна дагъузуна. Гьетегуна чвас зурба пай хьасе. Чун Варттал Алеттин шиникквар хьасе, Ли Учира баркаллагь адаттарисра кехӀей, Ӏаттарисра кехӀей иджвел аркьахӀела. 36Чве Заварин Дадан суман идже юркӀв, чвера ухь.
Сайинна диван маркьа, чвера акьасттава
37– Сайинна диван маркьа, чве диванна акьасттава. Сайикра тахсир кимикӀа, чвакра тахсир кикӀасттава. Гъил гъуршанди акье, чвааласра гъил гъушанасе. 38ИрцӀанди акье, чвасра есе. Чвас Ӏуьрджанди, кӀукӀ алди есе, багварихъас алархъай. Чун фишттин кьуларилди алцанчин, гьегишттинттарилди чвасра алцанасе.
39Ӏисайи ахъакьуная гебурис мишттин мисала:
– Хьасев сукъурафас сукъур гъас? Ӏудара къуйди архьастту гебур? 40Ученикдифас учин мегӀелимдилас хӀаф хьас верефттава, хуруна ккиркӀугуна дала, гифас агърукьасттава учин мегӀелим суманф хьас.
41Фас вас сасрайин улиъ ая са бицӀи чӀирхӀ аргвафе, веттиъ ая цӀагъун даргвай? 42Фиштти пас ве вафас сасрайис: «Нан зун ве улиъ ая чӀирхӀ аттивас», вас ве улиъ цӀагъун даргвахаб? Агь мезрухӀ! Сагелай ве улиас цӀагъун аттив – гьетегуна вас агвасе, фиштти аттивайчин чӀирхӀ сасрайин улиас.
Идже кӀуранил, идже емиш алгъавей
43Идже кӀуранил чӀирхӀе емишар алгъавейдава, утӀуф ке кӀуранил батӀар емишар алгъавейдава. 44Гьер кӀур ягӀарве учин емишарилди. МеркӀварилас инджирар завал аркьайдава, зазарилас тӀибитӀарин лукар алдартӀайдава. 45Идже инсандин юркӀураас иджвел э аттвереф, Ӏа инсандин юркӀураас Ӏайвел э аттвереф. Фитти юркӀв ацӀуна аячин, гьеге э инсандин мезурал алвеф.
Ӏу хандаг
46Фас чун Зас агъафе: «Е хӀаф, е хӀаф», Зун агъаттар даркьагуна. 47Те Заалди вереф, Зе гафарил юркӀв алихьуна, Зун пеф аркьаф гъинахъай фачикӀас хьасичин ягӀав? 48Те фачикӀас хьасе уьркӀе хандаг рукӀуна, дагьар ккея мукьуйил хал алихьу инсандихъай. ХӀа нецӀв адина хулалди алгъархьугуна, хал тӀушуна адава, мехӀкамди алихьунаф идехӀела.
49Те Зе гафарил юркӀв алихьуна, амма Зун петтар даркьаф фачикӀас хьасе хандаг дарукӀуна, джилил хал алихьу инсандихъай. Хулалди нецӀв алгъархьугуна, хал садпуна арчӀуная. Хулакес са арчӀу гъванарин пус э илгунаф.
Sélection en cours:
Лука 6: AGU
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© Библия тарджума аркьа институт, Москва, 2005