Luk 6

Arăng Tơña Kơ Hrơi Saƀat

(Mat 12:1-8; Mar 2:23-28)

1Sa hrơi Saƀat Yêsu găn hmua pơdai blê. Ƀing ding kơna Ñu ruač amŭng pơdai, pơpao hăng tơngan gơñu laih anŭn ƀơ̆ng.#Mơñă 23:25. 2Hmâo đơđa ƀing Pharisi laĭ: “Hyư̆m ƀing gih ngă tơlơi arăng ƀu dưi ngă ôh amăng hrơi Saƀat?”

3Yêsu laĭ glaĭ: “Ƀing gih aka đŏk ôh hă hơgĕt tơlơi Đawit hmâo ngă laih tơdang ñu hăng ƀing đuaĭ tui ñu rơpa?#I Sa 21:1-6. 4Ñu mŭt amăng sang Ơi Adai, mă ƀơ̆ng ƀañ tơpŭng pơyơr kơ Ơi Adai, laih anŭn brơi kơ ƀing nao hrŏm hơbĭt hăng ñu ƀơ̆ng mơ̆n. Wơ̆t dah ƀañ tơpŭng anŭn kơnơ̆ng pioh brơi kơ ƀing khua ngă yang đôč dưi ƀơ̆ng.”#Lêwi 24:9.

5Laih anŭn Yêsu laĭ kơ gơñu: “Ană Mơnuih jing Khua kơ hrơi Saƀat.”

Yêsu Pơsuaih Mơnuih Jo Tơngan

(Mat 12:9-14; Mar 3:1-6)

6Sa hrơi Saƀat pơkŏn, Yêsu mŭt amăng sang bơjơnum laih anŭn pơtô laĭ. Pơ anŭn hmâo sa čô mơnuih tơngan gah hơnuă ñu jo. 7Ƀing nai pơtô tơlơi juăt laih anŭn ƀing Pharisi krăp lăng sŭ Yêsu thâo dah Ñu či pơsuaih mơ̆ amăng hrơi Saƀat, kiăng kơ hmâo tơlơi phong kơ Ñu. 8Samơ̆ Yêsu thâo tơlơi pơmĭn gơñu laih anŭn laĭ kơ mơnuih jo tơngan: “Rai dŏ dơ̆ng ƀơi anai.” Ñu tơgŭ hăng dŏ dơ̆ng pơ anŭn. 9Yêsu laĭ kơ gơñu: “Kâo tơña ƀing gih: Hơgĕt tơlơi juăt tŭ ư brơi ƀing ta dưi ngă amăng hrơi Saƀat, ngă bruă hiam ƀôdah ngă bruă sat, pơklaih mơnuih ƀôdah pơdjai mơnuih?” 10Yêsu lăng kơ abih bang ƀing jum dar laih anŭn laĭ kơ gơ̆: “Yơr tơngan ih bĕ.” Gơ̆ yơr, laih anŭn tơngan ñu suaih mơtam.

11Gơñu bă hăng tơlơi hil laih anŭn črŏng sai tơdruă gơñu kiăng sem hơgĕt tơlơi gơñu dưi ngă kơ Yêsu.

Yêsu Ruah Mă Pluh Dua Čô Khua Ding Kơna

(Mat 10:1-4; Mar 3:13-19)

12Hlăk anŭn Yêsu tơbiă nao đĭ pơ čư̆ kiăng iâu laĭ, laih anŭn ñu dŏ iâu laĭ hăng Ơi Adai abih sa mlam. 13Tơ mơguah hrơi tơdơi, Yêsu iâu ƀing ding kơna Ñu laih anŭn ruah mă pluh dua čô mơ̆ng ƀing gơñu. Kơ ƀing anŭn Ñu pia jing khua ding kơna: 14Simôn pô Ñu pơanăn dơ̆ng Pêtrôs, Andrê adơi Pêtrôs, Yakơ, Yôhan, Philip, Bartêlômi. 15Mathiơ, Thômas, Yakơ ană đah rơkơi Alphê, Simôn arăng iâu dơ̆ng Sêlôt,#6:15 Sêlôt: Tơpul krŭ Israel. 16Yudas ană Yakơ, laih anŭn Yudas Iskariôt jing pô pơblư̆ lui Yêsu.

Yêsu Pơtô Hăng Pơsuaih Ƀing Duăm Ruă

(Mat 4:23-25)

17Yêsu trŭn hrŏm hăng ƀing ding kơna Ñu laih anŭn dŏ ƀơi sa anih lŏn daŏ. Hmâo lu ƀing ding kơna Ñu laih anŭn ƀing ană plei pla mơ̆ng tar ƀar čar Yuđa, mơ̆ng plei Yêrusalem, laih anŭn mơ̆ng čar hang ia rơsĭ plei Tir hăng plei Sidôn. 18Ƀing mơnuih yang bơngăt grĭ hơƀak ngă ăt dưi suaih mơ̆n. 19Abih bang mơnuih lu hơduah jơlan kiăng ruaih Ñu, yua kơ tơlơi dưi mơyang tơbiă mơ̆ng Ñu laih anŭn pơsuaih abih ƀing gơñu.

Tơlơi Mơak Hăng Tơlơi Rơngot

(Mat 5:1-12)

20Yêsu lăng kơ ƀing ding kơna hăng laĭ:

“Mơyun hiam yơh kơ ƀing gih jing ƀing mơnuih ƀun rin,

Yua kơ Dêh Čar Pơtao Ơi Adai lơ̆m kơ ƀing gih.

21Mơyun hiam yơh kơ ƀing gih jing ƀing dŏ rơpa ră anai,

Yua kơ ƀing gih či trơi.

Mơyun hiam kơ ƀing gih jing ƀing dŏ čŏk hia ră anai,

Yua kơ ƀing gih či klao hơ̆k.

22Mơyun hiam yơh kơ ƀing gih tơdah yua kơ Ană Mơnuih; arăng bơrơmŭt kơ ƀing gih, arăng ƀu jum ƀing gih, hơtoh djraĭ ƀing gih, laih anŭn hơngah anăn ƀing gih kar hăng pô sat!#I Pê 4:14. 23Amăng hrơi anŭn ƀing gih hơ̆k mơak bĕ hăng plŏng kơdăt, yua kơ pri apah kơ ƀing gih amăng adai prŏng biă mă; yua kơ ƀing ơi adon gơñu ăt ngă laih kơ ƀing pô laĭ lui hlâo kar hăng anŭn mơ̆n.#II Čih 36:16; Bruă 7:52.

24Samơ̆ tơnap tap yơh kơ ƀing gih jing ƀing pơdrŏng,

Yua kơ ƀing gih hmâo laih tơlơi pơalum.

25Tơnap tap yơh kơ ƀing gih jing ƀing dŏ trơi ră anai,

Yua kơ ƀing gih či rơpa!

Tơnap tap yơh ƀing gih jing ƀing dŏ klao ră anai,

Yua kơ ƀing gih či kơ-ŭ rơngot laih anŭn čŏk hia!

26Tơnap tap yơh kơ ƀing gih, tơ abih bang mơnuih pơhiăp bơni hiam kơ ƀing gih,

Yua kơ kar hăng anŭn mơ̆n ƀing ơi adon gơñu ngă kơ ƀing pô laĭ lui hlâo ƀlor!”

Khăp Bĕ Kơ Ayăt

(Mat 5:38-48; 7:12a)

27“Samơ̆ Kâo laĭ ƀing gih ƀing dŏ hmư̆, khăp bĕ ƀing ayăt kơ ƀing gih, ngă hiam bĕ kơ ƀing bơrơmŭt kơ ƀing gih. 28Hơơč mơyun bĕ tơlơi hiam kơ ƀing hơtơ̆m pah ƀing gih, laih anŭn iâu laĭ brơi bĕ kơ ƀing ngă sat kơ ƀing gih. 29Tơdah arăng pah meng ƀing gih gah anai, brơi bĕ gơñu pah meng gah adih mơ̆n. Tơdah arăng mă ao phyung ih, brơi ñu mă wơ̆t ao amăng lăm mơ̆n. 30Pha brơi bĕ kơ hlơi pô rơkâo gơnam ih, laih anŭn anăm rơkâo glaĭ ôh gơnam ih mơ̆ng pô sua mă laih. 31Ƀing gih kiăng kơ arăng ngă brơi kơ ƀing gih hyư̆m pă, brơi ƀing gih ngă brơi kơ arăng kar hăng anŭn mơ̆n.#Mat 7:12.

32Tơdah ƀing gih khăp kơ ƀing mơnuih khăp kơ ƀing gih, hơgĕt tơlơi mơyun hiam ƀing gih hmâo? Yua kơ ƀing soh ăt khăp kơ ƀing mơnuih khăp kơ gơñu mơ̆n. 33Tơdah ƀing gih ngă hiam kơ ƀing ngă hiam kơ ƀing gih, hơgĕt tơlơi mơyun hiam ƀing gih hmâo? Yua kơ ƀing soh ăt ngă kar hăng anŭn mơ̆n. 34Tơdah ƀing gih kơnơ̆ng brơi čan kơ ƀing mơnuih ƀing gih čang rơmang gơñu brơi glaĭ, hơgĕt tơlơi mơyun hiam ƀing gih hmâo? Wơ̆t kơ ƀing soh ăt brơi mơ̆n kơ ƀing soh čan, kiăng kơ dưi tŭ glaĭ djŏp mrô hơđăp. 35Samơ̆ khăp bĕ kơ ƀing ayăt ƀing gih. Ngă hiam laih anŭn brơi arăng čan bĕ, anăm čang rơmang kơ tơlơi ba glaĭ dơ̆ng ôh. Tui anŭn pri apah ƀing gih či prŏng biă mă, laih anŭn ƀing gih či jing ƀing ană Pô Glông Hloh; yua kơ Ñu ngă hiam kơ ƀing ƀu thâo hơdơr tơngia laih anŭn kơ ƀing sat ƀai. 36Brơi ƀing gih thâo pap kar hăng Ama ƀing gih thâo pap.”

Anăm Sem Soh Arăng

(Mat 7:1-5)

37“Anăm phat kơđi arăng, tui anŭn Ơi Adai ƀu či phat kơđi kơ ƀing gih ôh. Anăm klă kơđi kơ arăng kiăng kơ Ơi Adai ƀu klă kơđi kơ ih. Pap brơi kơ arăng bĕ, tui anŭn Ơi Adai či pap brơi kơ ƀing gih. 38Pha brơi bĕ kơ arăng, tui anŭn Ơi Adai či pha brơi glaĭ kơ ƀing gih. Ơi Adai či tuh brơi kơ ƀing gih hăng hơnơ̆ng pơkă hiam, Ñu rơyuh hăng gư̆ tơl bă blai. Yua kơ Ơi Adai či pơkă tui hăng hơnơ̆ng ƀing gih hmâo pơkă brơi laih kơ arăng.”

39Laih anŭn Yêsu pơhiăp sa tơlơi bơhmutu kơ gơñu: “Dưi mơ̆ mơnuih bum mơta atăt ba mơnuih bum mơta? Ƀu djơ̆ ôh hă abih dua gơñu či lĕ amăng luh?#Mat 15:14. 40Ding kơna ƀu prŏng hloh kơ nai pơtô ñu ôh, samơ̆ tơdah rĭm čô ding kơna hmâo hrăm tum laih, gơñu či jing hrup hăng nai pơtô gơñu.#Mat 10:24-25; Yô 13:16; 15:20.

41Hyư̆m ih ƀuh ƀruih amăng mơta adơi ayŏng ih, samơ̆ ƀu ƀuh ôh tơda amăng mơta ih pô? 42Ƀôdah hyư̆m ih dưi laĭ kơ adơi ayŏng ih: ‘Ơ ayŏng brơi kâo mă hĭ ƀruih mơ̆ng mơta ih,’ tơdang anŭn ih ƀu ƀuh ôh tơda amăng mơta ih pô? Ơ mơnuih pơrup mă, blŭng hlâo mă hĭ tơda mơ̆ng mơta ih pô, laih anŭn kah ih či ƀuh rơđah dưi mă hĭ ƀruih mơ̆ng mơta adơi ayŏng ih.”

Phŭn Kơyâo Hăng Boh Ñu

(Mat 7:16-20; 12:33-35)

43“Yua kơ phŭn kơyâo hiam ƀu dưi mơboh kơ boh sat ôh, phŭn kơyâo sat ƀu dưi mơboh kơ boh hiam lơi. 44Yua kơ arăng thâo krăn rĭm phŭn kơyâo tui hăng boh ñu. Arăng ƀu pĕ ôh boh hra mơ̆ng hrĕ drơi, arăng kŏn pĕ lơi boh kơƀâu mơ̆ng pum drơi.#Mat 12:33. 45Mơnuih hiam yua mơ̆ng pran jua hiam, ñu tơbiă rai tơlơi hiam; laih anŭn mơnuih sat yua mơ̆ng pran jua sat, ñu tơbiă rai tơlơi sat; yua mơ̆ng tơlơi bă blai amăng lăm pran jua hnŭn yơh amăng bah tơbiă rai tơlơi pơhiăp.”#Mat 12:34.

Dua Čô Mơnuih Ngă Sang

(Mat 7:24-27)

46“Hyư̆m ƀing gih iâu Kâo: ‘Ơ Khua Yang, Khua Yang,’ samơ̆ ƀu ngă ôh tui hăng tơlơi Kâo laĭ kơ ƀing gih? 47Kơ rĭm čô hlơi pô rai pơ Kâo hmư̆ hiăp Kâo laih anŭn gưt tui Kâo, Kâo či pơrơđah brơi kơ ƀing gih hyư̆m pô anŭn jing, 48Ñu anŭn jing kar hăng sa čô mơnuih pơdơ̆ng sang, ñu klơi luh dlam, laih anŭn pơdơ̆ng atur ƀơi ngŏ boh pơtâo. Tơ ia lip truh, ia ro kơtang klă sang anŭn samơ̆ ñu ƀu pơgơi ôh, yua kơ arăng pơdơ̆ng ñu kơjăp biă mă. 49Samơ̆ hlơi pô hmư̆ laih anŭn ƀu gưt tui ôh tơlơi Kâo pơhiăp, pô anŭn jing kar hăng sa čô mơnuih pơdơ̆ng sang ƀơi lŏn, ƀu hmâo atur ôh. Ia juar klă sang anŭn, sang anŭn tơglưh mơtam laih anŭn răm rai prŏng biă mă.”

Sélection en cours:

Luk 6: JRA2016

Surbrillance

Copier