Yôhan 5

Yêsu Pơsuaih Mơnuih Rơwen Ƀơi Ia Dơnao Bêtesda

1Tơdơi kơ anŭn hmâo hrơi phĕt ƀing ană Yuđa, Yêsu đĭ nao pơ plei Yêrusalem. 2Amăng plei Yêrusalem jĕ amăng jang Triu hmâo sa dơnao ia hmâo rơma boh adring, amăng tơlơi Hêbrơ arăng iâu Bêtesda.#5:2 Bêtesda: Đơđa Hră Ơi Adai Pơhiăp so đưm pơblang jing: Bêtsatha. 3Ƀơi khul adring anŭn hmâo lu mơnuih duăm ruă dŏ đih, hmâo mơnuih bum mơta, đŭt tơkai, rơwen rơwo.#5:3 Đơđa Hră Ơi Adai Pơhiăp so đưm thim jơlan 3b-4: Gơñu dŏ tơguan ia tơglăk; 4 yua kơ ƀơi anŏ ñu hmâo sa čô ling jang Khua Yang trŭn amăng ia dơnao hăng pah pŭng ia; laih anŭn hlơi pô trŭn blŭng hlâo hlăk ia tơglăk anŭn ñu suaih yơh mơ̆ng hơgĕt mơta tơlơi ñu ruă. 5Ƀơi anŭn hmâo sa čô đah rơkơi ruă klâo pluh sapăn thŭn laih. 6Yêsu ƀuh ñu hăng thâo kơ ñu dŏ đih pơ anŭn sui thŭn laih, hnŭn yơh Yêsu tơña kơ ñu: “Ih kiăng suaih mơ̆?”

7Mơnuih ruă anŭn laĭ glaĭ: “Ơ Khua, hlăk ia tơglăk kâo ƀu hmâo ôh mơnuih djru glŏm kâo amăng dơnao ia; tơdang kâo gir trŭn hmâo laih mơnuih pơkŏn trŭn hlâo kơ kâo.”

8Yêsu laĭ kơ ñu: “Tơgŭ bĕ, mă kiao ih hăng rơbat nao.” 9Mơnuih anŭn suaih mơtam yơh. Ñu mă kiao hăng rơbat nao.

Hlăk anŭn jing hrơi Saƀat. 10Tui anŭn ƀing Yuđa laĭ kơ mơnuih phrâo suaih anŭn: “Hrơi anai jing hrơi Saƀat, ih ƀu dưi glăm ba kiao ih ôh.”#Nêh 13:19; Yêr 17:21.

11Samơ̆ pô anŭn laĭ glaĭ: “Pô pơsuaih kâo laĭ kơ kâo: ‘Mă ba kiao ih hăng rơbat nao bĕ.’”

12Gơñu tơña kơ gơ̆: “Hlơi laĭ kơ ih ‘glăm ba kiao ih hăng rơbat nao?’”

13Mơnuih phrâo suaih anŭn ƀu thâo krăn ôh hlơi pô hmâo pơsuaih ñu, yua kơ Yêsu hmâo sek mŭt amăng mơnuih lu pơ anŭn.

14Sui ƀiă kơ anŭn Yêsu bưp pô anŭn amăng sang kơkuh pơpŭ, hăng laĭ kơ ñu: “Hơi, ih hmâo suaih laih. Anăm ngă soh dơ̆ng ôh, hwĭ kơ hmâo tơlơi răm hloh dơ̆ng truh kơ ih.”

15Pô anŭn nao laĭ pơthâo kơ ƀing Yuđa, Yêsu yơh hmâo pơsuaih ñu. 16Ƀing Yuđa čơdơ̆ng ngă sat kơ Yêsu yua kơ Ñu hmâo pơsuaih mơnuih amăng hrơi saƀat. 17Samơ̆ Yêsu laĭ glaĭ kơ gơñu: “Ama Kâo ăt mă bruă truh pơ ră anai, Kâo ăt mă bruă tui anŭn mơ̆n.”

18Yua kơ tơlơi anŭn yơh, ƀing Yuđa jai kơtang hloh hơduah jơlan kiăng pơdjai Ñu, yua kơ ƀu djơ̆ kơnơ̆ng Ñu gao hrơi saƀat đôč ôh samơ̆ wơ̆t yua kơ Ñu iâu Ơi Adai jing Ama Ñu, Ñu yap Ñu pô bơmơđơr hăng Ơi Adai.

Tơlơi Dưi Ană Ơi Adai

19Tui anŭn Yêsu laĭ kơ gơñu: “Kâo laĭ kơ ƀing gih sĭt biă mă, Ană ƀu dưi ngă sa mơta bruă tui hăng Ñu pô kiăng ôh, samơ̆ kơnơ̆ng ngă tơlơi Ñu ƀuh Ama ngă. Yua kơ bruă hơgĕt Ama ngă, Ană ăt ngă kar kaĭ mơ̆n. 20Yua kơ Ama khăp kơ Ană hăng pơrơđah brơi Ană abih bang bruă Ñu ngă. Laih anŭn Ñu či pơrơđah kơ Ană bruă prŏng hloh kơ khul bruă anai dơ̆ng, kiăng kơ ƀing gih kơtuă hling. 21Kar hăng Ama hmâo pơhơdip glaĭ ƀing mơnuih djai hăng brơi tơlơi hơdip kơ gơñu, ăt kar hăng anŭn mơ̆n Ană brơi tơlơi hơdip kơ hlơi pô Ñu kiăng. 22Ama ƀu phat kơđi kơ hlơi hlơi ôh, samơ̆ Ñu hmâo jao abih tơlơi phat kơđi anŭn kơ Ană Ñu, 23kiăng kơ abih bang mơnuih leng kơ pơpŭ kơ Ană, kar hăng gơñu pơpŭ kơ Ama mơ̆n. Hlơi pô ƀu pơpŭ kơ Ană, kŏn pơpŭ kơ Ama lơi, jing Pô hmâo pơkiaŏ rai Ñu.”

24“Kâo laĭ kơ ƀing gih sĭt biă mă, hlơi pô hmư̆ boh pơhiăp Kâo hăng đaŏ kơ pô pơkiaŏ rai Kâo, ñu anŭn hmâo tơlơi hơdip hlŏng lar; ñu ƀu či tŭ tơlơi phat kơđi ôh, samơ̆ ñu găn tơlơi djai laih anŭn mŭt amăng tơlơi hơdip. 25Kâo laĭ kơ ƀing gih sĭt biă mă, mông jĕ truh, laih anŭn hmâo truh laih, tơ ƀing djai či hmư̆ hiăp Ană Ơi Adai; laih anŭn ƀing hmư̆ hiăp Ñu či hơdip. 26Yua kơ kar hăng Ama hmâo tơlơi hơdip amăng Ñu Pô, kar hăng anŭn mơ̆n Ñu brơi kơ Ană hmâo tơlơi hơdip amăng Ñu Pô. 27Laih anŭn Ama hmâo brơi kơ Ană tơlơi dưi phat kơđi, yua kơ Gơ̆ jing Ană Mơnuih. 28Anăm kơtuă hling ôh kơ tơlơi anŭn; yua kơ mông či truh tơ abih bang ƀing dŏ amăng pơsat či hmư̆ hiăp Ñu 29laih anŭn tơbiă. Hlơi pô ngă hiam či hơdip glaĭ pioh kơ hơdip, samơ̆ hlơi pô ngă sat či hơdip glaĭ pioh kơ tơlơi phat kơđi.”#Đaniel 12:2.

Tơlơi Pơsĭt Yêsu Jing Ană Ơi Adai

30“Kâo ƀu dưi ngă hơgĕt bruă mơ̆ng Kâo pô ôh. Kâo phat kơđi tui hăng tơlơi Kâo hmư̆; laih anŭn tơlơi Kâo phat kơđi jing tơpă hơnơ̆ng, yua kơ Kâo ƀu hơduah tơlơi Kâo pô kiăng ôh, samơ̆ tui hăng tơlơi kiăng pô pơkiaŏ rai Kâo.”

31“Tơdah Kâo ngă gơ̆ng jơlan pơsĭt kơ Kâo pô, tơlơi Kâo ngă gơ̆ng jơlan anŭn ƀu sĭt ôh. 32Hmâo pô pơkŏn ngă gơ̆ng jơlan pơsĭt kơ Kâo, laih anŭn Kâo thâo tơlơi ñu ngă gơ̆ng jơlan pơsĭt kơ Kâo jing sĭt yơh. 33Ƀing gih hmâo pơkiaŏ pô pơala gih nao tơña Yôhan, laih anŭn ñu ngă gơ̆ng jơlan pơsĭt kơ tơlơi sĭt.#Yô 1:19-27; 3:27-30. 34Ƀu djơ̆ ôh Kâo kiăng kơnang tơlơi gơ̆ng jơlan mơ̆ng mơnuih. Samơ̆ Kâo laĭ tơlơi anŭn kiăng kơ ƀing gih dưi klaih. 35Yôhan jing apui kơđen dŏ jă hăng pơčrang rơđah, laih anŭn ƀing gih tŭ mơak jang jai amăng tơlơi rơđah ñu. 36Samơ̆ Kâo hmâo tơlơi ngă gơ̆ng jơlan prŏng hloh kơ tơlơi Yôhan gơ̆ng jơlan; yua kơ khul bruă Ama jao brơi Kâo khŏm ngă pơgiơ̆ng, khul bruă anŭn Kâo hlăk ngă ră anai, ngă gơ̆ng jơlan kơ Kâo kơ tơlơi Ama hmâo pơkiaŏ rai Kâo. 37Laih anŭn Ama, Pô hmâo pơkiaŏ rai Kâo, ăt ngă gơ̆ng jơlan kơ Kâo. Ƀing gih aka hmư̆ djơ̆ ôh hiăp Ñu, kŏn ƀuh djơ̆ rup drơi jan Ñu lơi,#Mat 3:17; Mar 1:11; Luk 3:22. 38laih anŭn boh pơhiăp Ñu ƀu dŏ amăng ƀing gih ôh, yua kơ ƀing gih ƀu đaŏ ôh kơ pô Ñu hmâo pơkiaŏ rai. 39Ƀing gih kơtuai sem Hră Ơi Adai Pơhiăp, yua kơ ƀing gih pơmĭn amăng anŭn hmâo tơlơi hơdip hlŏng lar. Tơlơi Ơi Adai Pơhiăp anŭn yơh ngă gơ̆ng jơlan kơ Kâo. 40Samơ̆ ƀing gih hơngah ƀu kiăng rai pơ Kâo ôh kiăng hmâo tơlơi hơdip.

41Kâo ƀu sem hơduah tơlơi guh kơang mơ̆ng mơnuih mơnam ôh. 42Samơ̆ Kâo thâo ƀing gih ƀu hmâo tơlơi khăp Ơi Adai dŏ amăng ƀing gih ôh. 43Kâo hmâo rai laih amăng anăn Ama Kâo, samơ̆ ƀing gih ƀu tŭ jum Kâo ôh; tơdah pô pơkŏn rai amăng anăn ñu pô ƀing gih či tŭ jum ñu yơh. 44Ƀing gih khăp mă tŭ tơlơi guh kơang mơ̆ng tơdruă samơ̆ gih ƀu hơduah ôh tơlơi ư-ang rai mơ̆ng hơjăn Ơi Adai. Tui anŭn hyư̆m ƀing gih dưi đaŏ lĕ? 45Anăm pơmĭn ôh Kâo či phong ƀing gih ƀơi anăp Ama. Môis yơh jing pô či phong kơ ƀing gih, ƀơi ñu yơh ƀing gih čang rơmang. 46Tơdah ƀing gih hmâo đaŏ kơ Môis, ăt ƀing gih či đaŏ kơ Kâo mơ̆n, yua kơ ñu hmâo čih djơ̆ kơ Kâo. 47Samơ̆ tơdah ƀing gih ƀu đaŏ ôh kơ tơlơi ñu čih, hyư̆m ƀing gih dưi đaŏ kơ tơlơi Kâo pơhiăp?”

Sélection en cours:

Yôhan 5: JRA2016

Surbrillance

Copier