INṬANNA 25
25
Keturaa inthawka Abraham thlahai
(1 Chr 1.32-33)
1Abraham chun nuhmei dang a nei a, a hming chu Ketura a nih.
2Ama chun Zimran, Joksan, Medan, Midian, Ishbak le Suah a neipêk a.
3Joksan chun naupasal Sheba le Dedan a nei a. Dedan naupasalhai chu Assurim, Letusim le Leummim an nih.
4Midian naupasalhai chu Epha, Epher, Hanok, Abida le Eldaa an nih. Chuong po po chu Ketura nauhai an nih.
5Abraham chun a nei po po Isak kuomah a pêk a.
6A thaikêm naupasalhai kuoma ruok chun lâwmmanhai a pêk a; chun, ama la dam lai ngei chun a naupa Isak kuoma inthawk chun, saktieng, khawsak ramah, ân fe hmangtir tâwl ta a.
Abraham thina le phûma a um thu
7Abraham dam sûng chu kum za khat le sâwmsari le panga a nih.
8Abraham chun a thlarau ân thla ta a, a lua kêlsam ṭo hiela tartakin, tarkûna damin a thi ta a, a chipuihai kuoma ṭhuoiin a um ve ta a.
9A naupasalhai Isak le Ismael chun Hit mi Zohar naupa Ephron loa, Mamre zâwna Makpelaa pûka chun an vui ta a;
10chu lo chu Abrahamin Hit mihaia inthawka ân châwk kha a nih. Chutaka chun Abraham chu an phûm a, a nuhmei Sara le khan.
11Abraham thi hnung chun Pathienin a naupa Isak chu mal a sâwm a; chu Isak chu Beer-lahai-roi kâwla chun a um a.
Ismael thlahai
(1 Chr 1.26-31)
12Hieng hi Abraham naupa Ismael, Sara suoknu Aigupta mi Hagarin Abraham a neipêk thlahai chu an nih.
13 #
1 Chr 1.29-31
Hieng hi an pieng dân indawt ang peia Ismael naupasalhai hming chu a nih: Ismael nau lutîr chu Nebaioth a nih, chu dawta chun Kedar, Adbeel, Mibsam,
14Misma, Duma, Massa,
15Hadad, Tema, Jetur, Naphis le Kedema an nih.
16Chuong chu Ismael naupasalhai an nih, an khuo ang pei le an riebûk ang peia an hming ziek a nih: an chi ang pei chun lal sâwm le pahni an nih.
17Chun, Ismael dam sûng kum chu hi hi a nih, kum za le sâwmthum pasari hi: chun, a thlarau ân thla a, a thi ta a, a chipuihai kuoma ṭhuoiin a um ve ta a.
18Chun, a thlahai chu Havilaa inthawkin Assuria pan zâwngin Aigupta zâwn Sur chenin an um a, a unau po po epa chun a um a.
Esau le Jakob pieng thu
19Chun, hieng hi Abraham naupa Isak thlahai chu an nih:
20Abraham chun naupasal Isak a nei a, Isak chu Paddan-aram rama Suria mi Bethuel naunu, Suria mi Laban farnu Rebeka chu nuhmeia a nei lai chun kum sâwmli mi a nih.
21Chun, a nuhmei chu a ching leiin, Isak chun Lalpa kuomah a ngênpêk a, Lalpain a hnina chu a lo ngaipêk a; chuongchun, a nuhmei Rebeka chu ân rai ta a.
22A nau vawnhai chu phîng sûnga chun an insuol a; ama chun, “Hieng ang hi a ni si chun iengdinga ka dam zing am a na?” tiin Lalpa indawn dingin a fe ta a.
23Chun, Lalpain a kuomah,
“I sula chun chi hni an um a,
I phîng sûnga inthawk ngei chun hnam hni inṭhêng an ta,
Hnam pakhat chu hnam pakhat nêk chun hrât lem a ta;
A upa lemin a naupang lem rawng chu bâwl a tih,” a ta.
24Chun, a nau nei a hun chun, ngai ta, a sula chun inphîr an lo um a,
25a hmasa lem chu sentakin, puon inhmul anga inhmul thuopin a hung suok a; chuongchun, a hmingah Esau an sak ta a.
26Chu zoa chun a unaupa chu a hung suok a, a kutin Esau kekhawng chu a chel zing a; chuongchun, a hmingah Jakob#Lântu an sak a: Rebekain anni a nei lai chun Isak chu kum sâwmruk mi a nih.
Esauin a upa nina a zawr
27Chun, naupanghai chu an hung inṭhang lien a, Esau chu sapêl thiemtak, ramsuok mi tak a nih; Jakob ruok chu mi totak, puon in dâma um mi a nih.
28Isak chun a sakhi sa a fâk hlak leiin Esau chu a ngaina hle a; Rebeka ruok chun Jakob chu a ngaina lem a.
29Vawikhat chu Jakob chun iengkhat a lo suonghruoi a, Esau chu rama inthawkin a hung a, a châu hle a.
30Esau chun Jakob kuomah, “Lunginsiettakin i iengkhat sen suong hruoi kha, kha ngei kha mîn fâktir raw khai, ka ṭâm êm el,” a ta (chuleiin, a hming chu Edom an ti a nih).
31Jakob chun, “I nau lutîr nina mîn châwktir zet la tie,” a ta.
32Chun, Esau chun, “Ni e, ka thi vâng vâng a ni si a, nau lutir nina el hi ka ta dingin ieng am ṭhahnem chuong a ta?” a ta.
33Jakob chun, “Ka kuomah inkhâm zet raw le,” a ti a: chun, a kuoma chun ân khâm ta a, a nau lutîr nina chu Jakob kuoma chun a zawr ta a.
34Chun, Jakob chun Esau chu bei le havai suong hruoi chu a pêk a; chuongchun, a fâkin a dâwn a, a tho a, a fe ta a. Chuong ang chun Esau chun a nau lutîr nina chu a ngainêp a nih.
Sélection en cours:
INṬANNA 25: HMOVBSI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
