Mateus 2
2
Adoraçon puls Magos
1Apuis de Jasus nacer, an Belen de la Judeia, al tiempo de l rei Harodes, houbo uns magos que benírun a Jarusalen 2i preguntórun: «Adonde stá l Rei de ls judius nacido por estes dies? Nós bimos la sue streilha ne l Ouriente i benimos pa lo adorar.»
3Quando fui sabedor destas cousas, l rei Harodes quedou mui albrotado i, cumo el, toda la cidade de Jarusalen. 4Anton, mandou ajuntar todos ls xefes de ls saçardotes i ls scribas de l pobo i preguntou-le adonde iba a nacer l Messias. 5Eilhes respundírun-le: «An Belen de la Judeia, cunsante fui screbido pul porfeta: 6I tu, Belen, tierra de Judá, nun cuides que sós la más pequeinha antre las prencipales cidades de Judá, pus de ti bai a salir un Xefe que guiará l miu pobo, Eisrael.»
7Anton Harodes mandou chamar, daparte, ls magos, para saber al cierto quando le habie aparecido la streilha. 8Apuis, ambiou-los a Belen, dezindo-le: «Ide i anformai-bos bien subre l menino. Quando lo achardes abisai-me lhougo para you ir tamien alhá a adorá-lo.»
9Apuis que oubírun l rei, botórun-se al camino. I la streilha, que habien bido ne l Ouriente, iba delantre deilhes, até parar mesmo porriba l sítio adonde staba l Nino. 10Al ber outra beç la streilha, ls magos quedórun mui cuntentos. 11Quando antrórun na casa bírun l Nino cula mai del, Marie, drobórun-se até la tierra delantre del i adorórun-lo. Apuis, abrírun ls sous tesouros i ouferecírun-le ouro, ansénsio i mirra. 12Habendo sido abisados an suonhos pa que nun tornáran por casa de Harodes, eilhes bolbírun pa la sue tierra por outro camino.
Scapada pa l Eigito
13Apuis de eilhes se habéren ido ambora, un anjo de l Senhor apareciu-le a Jesé nun suonho i dixo-le: «Alhebanta-te, agarra l nino i la mai del, scapa-te pa l Eigito i queda alhá até que you te diga, puis Harodes ha de ir a saber de l nino pa l matar.» 14El agarrou cul nino i la mai del i scapou-se pa l Eigito pul meio la nuite 15i quedou alhá até que Harodes se morriu, para que se cumprira l que l Senhor habie dezido pul porfeta: De l Eigito chamei l miu filho.
Matáncia de ls einocentes an Belen
16Harodes, al ber que habie sido anganhado puls magos, quedou mui anrabiado i mandou matar todos ls ninos, de dous anhos para baixo, que habie an Belen i an todo l sou termo, cunsante l tiempo que ousmara pula anformaçon de ls magos. 17Ende cumpriu-se l que fura dezido pul porfeta Jeremias:
18 Oubiu-se ũa boç an Rama,
un choro i un grande delor:
Raquel chora puls sous filhos
i nun quier ser cunselada
porque eilhes yá nun eisísten.
Benida de l Eigito
19Apuis de se morrer Harodes, l anjo de l Senhor apareciu-le a Jesé, nun suonho, ne l Eigito, 20i dixo-le: «Alhebanta-te, agarra cul nino i la mai del i torna pa la tierra d’Eisrael, puis yá se morrírun ls que le querien tirar la bida al nino.» 21El alhebantou-se, agarrou l nino i la mai del i tornou pa la tierra d’Eisrael. 22Mas al oubir dezir que era Arquelau que reinaba na Judeia apuis la muorte de l pai, Harodes, tubo miedo de tornar para alhá. Anton, nun suonho, recebiu nuobas ordes de Dius i fui-se pa la region de la Galileia. 23Quedórun ende a morar, nũa tierra chamada Nazaré. Assi se cumpriu l dito de ls porfetas: El ha de se chamar Nazareno.
Sélection en cours:
Mateus 2: EM14
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Evangelhos em Mirandês © Sociedade Bíblica, 2014.
