Matayo 4

Kutegigwa kwa Yesu

(Maluko 1:12-13; Luka 4:1-13)

1Kuboka penia Uhuke jwa Chwapi ngannongaleya Yesu mpaka kupongoti kupala alondoigwe na Mmaja. 2Ngapunga machoba alubaini kilo na mui pangalye kilebe chachoa pajomola ngajijoa njala. 3Mmaja nganhwikalila, ngannenge, “Anda mwenga Mamwana ba Nnoongo, magaamuliche mabwe aga gabe mikate.”

4Nambu Yesu ngajanga, “Iandikigwe Mumajandiko Gachwapi,

‘Mundu alama kukulye nkate tuje,

nambu ku kila lilobe elyalonge Nnoongo.’ ”

5Kuboka penia Mmaja ngantola Yesu mpaka kukilambo chu Kuyelusalemu, Kilambo cha Chwapi, ngammeka kunani pulengo gwa Nyumba ja Nnoongo, 6ngannenge, “Anda mwe Mamwana ba Nnoongo mikileke pae gambu andikigwe,

Nnoongo maamulicha akapakachi bakwe kuboka kumbengu kwa magambu ginumwe,

mabannyanganga kumaboko gabe,

kata mukikipotekaje mumaganga.”

7Kwa magambu genia Yesu ngajanga kulenga, uyo Mumajandiko Gachwapi, iandikigwe, “Makategaje Angwana ana Nnoongo binu.”

8Kuboka penia Mmaja ngantola Yesu mpaka kunani kukitombi kitandamau, ngannaya kingwana chi ilambo yoa ya padunia na gwambone gwakwe. 9Mmaja ngannenge, “Yenie yoa nhotwi kumpe mwe anda nkilakatile nu kung'ongalela.”

10Penia Yesu ngannenge, “Nnyabule mwe Malichetani! Iandikigwe Mumajandiko Gachwapi, ‘Magongalela Angwana ana Nnoongo binu na mabegelela benia jika jabe.’ ”

11Penia Mmaja nganneka Yesu, akapakachi kuboka kumbengu ngabaika ngabammegalela.

Yesu atumbu maengo gakwe Ku Galilaya

(Maluko 1:14-15; Luka 4:14-15)

12Yesu pajoa kita Yohana Mmatichi bantabite mukipungo ngajenda Kugalilaya. 13Ngaboka kilambo chuku Nazaleti ngajenda kukilambo chuku Kafalanaumu, kilambo chikibi umbwega ja lilaba lya Galilaya, mumpaka gwa kilambo cha Zabuloni na Naftali, ngatama kwenio. 14Yene pililenganila lilobe elyalongela Nnondoli Isaya,

15“Kilambo chuku Zabuloni na Kilambo chuku Naftali,

Kujenda kubaali kwiye julukemba lwa Yolidani,

ku Galilaya, kilambo cha bandu banga Akayahudi!

16Bandu abatama pulubendu

bijibweni ndaa.

Angweto abatama miwili ja kiu,

Lumuli lwamulakile.”

17Kuboka kingobu chenie Yesu ngatumbu kutangacha ngalenga, “Nnapange mabaja ginu, magambu Kingwana chu kumbengu kibandakile!”

Yesu bakemanga akalopoi ancheche

(Maluko 1:16-20; Luka 5:1-11)

18Yesu pakiba akatyanga umbwega ji lilaba lya Galilaya ngababona bandu abena alungolo akakoki, bandu benia bakiba Simoni ojwa konda Petulo na nnuna gwakwe Andulea bakakoka yamaki ku lipelele mulilaba. 19Yesu ngabalenge, “Ungengamange nenga manammekanga mme makakoki ba bandu.” 20Kingobu tu ngabagaleka mapelele gabe ngabankengama Yesu.

21Pajenda nnongi kachoko ngababona bange akalongo abena, Yakobo na Yohana, ingota ya Zebedayo. Bakiba muntumbwi pamwe na awamundu Zebedayo, batendekea mapelele gabe. Yesu ngabakema, 22benia kingobu tu ngubuleka ntumbwi pamwe na awamundu, ngabankengama Yesu.

Yesu babola bandu na kalamia akatamwe

(Luka 6:17-19)

23Yesu ngajenda kila paali mukilambo chu Kugalilaya kabolanga bandu mu nyumba ju kunng'ongale Nnoongo nu kutangacha Nhwalo Gwambone gu kingwana cha Nnoongo ngabalamia bandu itamwe yoa eibakiba nayo. 24Nhwalo gwakwe ngujoanika mukilambo chuku Silia, akatamwe boa bina itamwe ya kila aina nu kulaga, bandu bina michepela, akatamwe kiinduindu, na bandu abakiba bapolite mibele, ngabapeleka kwa Yesu, jwenio ngabalamia boa. 25Bandu ajingi ngabankengama kuboka kukilambo chuku Galilaya, kilambo echikibi ni ijiji komi, Kuyelusalemu na Kuyudea na kwie ja lukemba lwa Yolidani.

Sélection en cours:

Matayo 4: NNQNT

Surbrillance

Copier