San Mateo 10
10
Jesús okitlapejpenij majtlaktli uan ome inomachtijkauan*
(Mr. 3.13-19; Lc. 6.12-16)
1Kemaj Jesús okinsentlalij on majtlaktli uan ome inomachtijkauan*, niman okinmakak poder para ma kitekixtilikan on xkuajkualtin espíritus niman para kipajtiskej nochi kech kokolistli* niman kualolistli.
2Ijkin intoka katkaj on majtlaktli uan ome apóstoles*: achtopa Simón, yejuan no itoka Pedro, niman Andrés on ikniu, Santiago niman Juan on iknijtin yejuan ikoneuan Zebedeo, 3Felipe, Bartolomé, Tomás, Mateo on yejuan tlacobrarojketl katka ikan impuestos, Santiago yejuan ikoneu Alfeo, Lebeo, yejuan no itoka Tadeo, 4Simón, on yejuan teuan tlapouajli katka intech on cananistas, niman Judas Iscariote, yejuan más sakin* okitemaktilij Jesús.
Jesús okintitlan on majtlaktli uan ome apóstoles*
(Mr. 6.7-13; Lc. 9.1-6)
5Jesús okintitlan on majtlaktli uan ome apóstoles*, niman ijkin okinnajnauatij:
—Maka nenyaskej kampa chantij on yejuan xhebreos*, nion ipan on kalpanmej de Samaria. 6Yej xuiyan ne kampa on hebreos* chantij. Yejuamej nemij ken iborreguitos Dios yejuan polijtokej. 7Xuiyan niman ijkin xkinmijlikan: “Ye uajlau on tonajli ijkuak Dios tlamandaros nikan tlaltikpak ken tlamandaroua ne iluikak.” 8Xkimpajtikan on yejuan kokoxkej niman on yejuan kipiyaj on kokolistli itoka lepra. Xkinyolitikan on mikatsitsimej. Xkintekixtilikan on xkuajkualtin espíritus. Nemejuamej xikan tomin nenkiseliaj yejua in poder, yejua ika xtekitiltikan niman maka xtecobrarokan.
9’Maka xkitkikan tomin. 10Maka xkitkikan nemotlakual para nenkuaskej ipan nemojui. Maka xkitkikan ome par nemotlaken, nion maka xkitkikan nemokakuan. Nion maka xkitkikan nemotopil*. Nochi in tlajtlamach* maka xkitkikan, pampa sen tekitketl kitocaroua kimakaskej itlaxtlauil.
11’Ijkuak nemejuamej nemajsiskej ipan sen ueyikalpan noso ipan sen kalpan, ompa xtejtemokan yakaj kuajli tlakatl yejuan nenueliskej itech nenkitlaliskej nemoyojlo, niman ichan xmokauakan hasta ijkuak okse kalpan nenyaskej. 12Ijkuak nenkalakiskej ipan sen kajli, ijkin xtetlajpalokan: “Xpiyakan yolseuilistli.” 13Tla on tlakamej yejuan chantij ipan on kajli kuajli mechseliaj, Dios kintiochiuas ikan yolseuilistli. Pero tla yejuamej xkuajli mechseliaj, Dios xkiminmakas yolseuilistli. 14Niman tla on yejuan chanejkej ipan on kajli noso ipan on kalpan xmechseliaj nion xkinekij mechkakiskej, tla ijkon xkisakan niman xtsejtselokan nemokxi de on tlalteutli. 15Ika tlen melauak nemechijlia ika ipan on tonajli ijkuak Dios teyolkuitis on chanejkej ipan on kalpan, más temojtij kiseliskej tlajtlakolmakalistli xken on tlakamej yejuan chantiyaj ne Sodoma niman Gomorra.
Jesús okinmachistij on iapóstoles* ika tlajyouiskej
16’¡Xkakikan! Nejua nemechtitlani intsajlan on xkuajkualtin tlakamej ken itlaj borreguitos yejuan kistinemij intsajlan on lobos. Yejua ika kuajli xmocuidarokan sano nemejuamej ken on kouamej* niman xyolyemankej* ken on palomas. 17Xmocuidarokan sano nemejuamej, pampa on tlakamej mechtemakaskej intech on tekiuajkej, niman no mechuijuitekiskej ipan insinagogas*. 18Mechuikaskej imixpan gobernadores niman reyes san pampa nennechneltokaj. Ijkuak ijkon nemopan nochiuas, xtenojnotsakan de nejua imixpan niman imixpan on yejuan xhebreos*. 19Niman ijkuak mechtemaktiliskej intech on tekiuajkej, maka sa xkomatstiakan tlinon nenkijtoskej noso kenijki nenkijtoskej, pampa ijkuak ajsis on hora para nentlajtoskej, Dios mechmakas tlinon nenkijtoskej. 20On tlajtoltin yejuan nenkijtoskej xnemotech kisas, yej on iEspíritu nemoTajtsin yejua mechmakas on tlajtoltin.
21’On tlakamej sano iminikniuan kintemakaskej ma kinmitikan, niman on tatajtin no kintemakaskej inkoneuan, niman on tekoneuan kintlauelixnamikiskej intajuan niman kintemakaskej ma kinmiktikan. Ijkon kinchiuiliskej pampa yejuamej nechneltokaj. 22Nochi tlakatl mechtlauelitas san pampa nennechneltokaj. Pero yejuan melajkanemis ikan itlaneltok hasta ijkuak nochi yopanok, Dios yejua kimakixtis. 23Ijkuak mechtlauelitaskej niman tlajtlamach* ika mechtlajyouiltiskej ipan sen kalpan, xuiyan ipan okse kalpan. Tej, ika tlen melauak nemechijlia ika nejua yejuan oninochiu Tlakatl niuajlas ijkuak nemejuamej xe tlami nenyauij ipan nochi inkalpanuan on hebreos*.
24’Xakaj nomachtijketl más ueyixtikaj xken on itemachtijkau, nion yakaj tekitketl más ueyixtikaj xken on iteko. 25On nomachtijketl ika onkaj no ijki kijyouis on tlajtlamach* yejuan kijyouiya on itemachtijkau, niman on tekitketl no ken yejua on iteko. Tla nejua nechtokayotiaj nidiablo*, tla ijkon, nemejuamej más mechtokayotiskej tlajtlamach* tlen xkuajli.
Jesús okinmachtij on iapóstoles* akinon kitocaroua kimakajsiskej
(Lc. 12.2-9)
26’Maka xkinmakajsikan on tlakamej. Tej, nochi on temachtijli yejuan iyantikaj panesis, niman nochi on temachtijli yejuan ichtaka* onkaj machiyas. 27Tlinon nejua nemechijlia kampa xakaj nemi, nemejuamej xtemachistikan ne kampa tojlan. Niman tlinon nejua nemechichtakaijlia, nochi tlakatl xpanextilikan. 28Maka xkinmakajsikan on yejuan uelis kimiktis nemotlalnakayo pero xuelis kimiktis nemoalma. Yej xmakajsikan Dios yejuan uelis kixoxotonis nemotlalnakayo niman kauas nemoalma ne miktlan kampa tetlajyouiltiloyan.
29’¿Tlen xvalerouaj san se tomin omemej tototsitsimej? Pero nion semej on tototsitsimej ueli uetsi tla on toTajtsin xkauilia. 30Tej, hasta on tsontli ipan nemotsontekon nochi onkaj tlapouajli cada se. 31Yejua ika tej, maka xmomojtikan. Nemejuamej más nenvalerouaj xken miyekej tototsitsimej.
Jesús okinmachtij iapóstoles* tlinon kichiuas on yejuan xkinenekiskej
(Lc. 12.8-9)
32’Nochimej on yejuan imixpan on tlakamej kijtoskej ika nechseliaj niman nechneltokaj ken intemakixtijkau, nejua no nikijtos ixpan noTajtsin iluikak chanej* ika nikinselia. 33Pero on yejuan nechnenekiskej* imixpan on tlakamej, nejua no nikinnenekis ixpan noTajtsin iluikak chanej.
Jesús okinmachtij iapóstoles* ika san ipampa on tlakamej noxexeloskej
(Lc. 12.51-53; 14.26-27)
34’Maka xnemilikan ika nejua onikuajkik yolseuilistli ipan tlaltikpaktli. Nejua tej, xonikuajkik yolseuilistli, yej onikuajkik nouijsokilistli. 35Oniuajlaj para noxexeloskej on tlakamej. Nopampa sen telpochtli kipiyas tlauejli iuan itataj, niman sen ichpochtli kipiyas tlauejli iuan inanaj, niman sen siuamontli kipiyas tlauejli iuan imonan. 36Ijkon tej, se kipiyas itlauelikniu sano ifamilia.
37’On yejuan más kitlajsojtlas* itataj noso inanaj xken nejua, xkitocaroua* nouikas nouan. Niman yejuan más kitlajsojtlas* itelpoch noso ichpoch xken nejua, xkitocaroua nouikas nouan. 38Niman on yejuan xkinekis kiselis on tlajyouilistli ipan inemilis niman xkinekis nouan yas, xkitocaroua nouikas nouan. 39On yejuan kimanauis inemilis para maka mikis nopampa, kipolos ialma. Pero on yejuan kipolos inemilis san nopampa, yejua kimakixtis ialma.
Jesús okinmachtij inomachtijkauan* ika on yejuan kiseliskej, kiseliskej intlaxtlauil
(Mr. 9.41)
40’On yejuan mechselia, sano ijki ken nejua nechseliskia. Niman yejuan nechselia no kiselia on yejuan onechajtitlan. 41Yejuan kiselia sen tiotlajtojketl pampa on tiotlajtojketl kichiua itekiu Dios, sano ijki kiselis itlaxtlauil ken kimakaj sen tiotlajtojketl. Niman yejuan kiselia sen kuajli tlakatl pampa yejua kuajli tlakatl, sano ijki kiselis itlaxtlauil ken kimakaj sen kuajli tlakatl. 42Niman san akinon yejuan kimakas maski se vaso asesek semej nonomachtijkauan, ika tlen melauak kipiyas itlaxtlauil.
Sélection en cours:
San Mateo 10: nguNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 1987, 2012 Wycliffe Bible Translators, Inc. All rights reserved.
