Lukahtar 2
2
E Hristohko bijandipe, sunetipe thaj igjaripe ande khangjiri. O Simeuno thaj e Ana. O dešudobršengo Isuso ande khangjiri. Lehko čhavor̄ipe ando Nazareto.
1Ande gola djivesa avilah o alav katar o thagar Avgusto te gjinen pe e manuša, savor̄e, thaj te zapišin pe, te ramon pe ande lila.
2Gava sah o anglutno gjinipe, kana sah o Kirino ande Sirija o šorutno.
3Thaj, dita, avile savor̄e, svako manuš ande piro foro.
4Ande gova vi o Josifo lijah te džal andar o foro Nazareto ande Galileja dži ke Judeja ando foro e Davidohko, savehko anav sah Vitlejemo, kaj vov sah andar o ćher e Davidohko.
5Te čhuven le ando lil pe jekh than e Marijaha, te zapišin len. Gaja bori sah manglini pala lehte thaj sah khamni.
6A kana von seha inćate, avilah lako djive e bijanimahko.
7Thaj voj bijandah pire jekhor̄e čhavor̄e, paćardah le ande patavor̄e thaj muklah le ando sulum, kaj naj sah aver than ando ćher e raćarimahko.
8Ande gova them seha varesave insaja save arakhena e jraćaha pire bakren.
9Thaj dikh, pe jekhvar, jekh angjelo e Devlehko ačhilah maškar lende, a e Devlehko sumnalipe čhutah e strafin, e jag pe lende, a von golehtar but daralje.
10A o angjelo e Devlehko phendah lengje: Ma daran! Ake me anav te sikavav e manušengje savor̄engje jekh dragostimahko alav.
11Kaj adjive bijandilah tumengje ando foro e Davidohko o spasiteljo, o Hristo, o Baro.
12Tumen le kam pindžaren agadija: Tumen kam arakhen jekhe murušune čhavore, paćarde ande faše, kaj pašljol po sulum.
13A dita, jekhvaratar ikliste but Devlehće džene gale angjeloha, thaj ašarde, hvalisarde e Devle, dindo vorba.
14Nek avel ašaripe e Devlehće po učipe ando del, a pe phuv nek avel lačhipe maškar e manuša save si šukare odjehće.
15Kana e angjelujra gjele tar lendar ando del, e čhave save arakhena e bakror̄en, dije vorba jekh e avrehće: Haj te džah tar dži ko Vitlejemo te dikhah so sah gova inća, so ćerdilah pe, sar phendah amee o Del.
16Thaj avile sigo, arakhle e Marija thaj e Josifo thaj e čhavor̄e kaj pašljol ande jaslengo sulum, ande faše.
17A kana von dikhle godova, phende sa so sah lengje vaćardino pala gov murušor̄o.
18A savor̄e save ašunde gala alava, čudisalje so von phende lengje.
19A e Marija sa gala alava garudah ande pi godji thaj ićardah len ande po odji.
20Thaj irisalje palpale e pastijra, ašarindo e Devle pala sa so ašunde thaj so dikhle, sar saha lengje mothodino.
21A o oh̄toto djive kana e čhavor̄e trubusardeha te ćhinen lehći morćhor̄i, te sunetin le, thode lehće anav Isuso, sar kaj o angjelo phendaha maj sig neg so bijandilah o čhavor̄o.
22Kana avilah o djive te džan te molin pe e Devlehće po zakoni, po krisi e Mojsijehko, igjarde le ando Jerusalimo te sikaven le angla o Del.
23Sar kaj si pišime, ramome, ande zakoni e Devlehko: Saijekh murušano čhavor̄o savo maj anglal putarel pe daći por̄, trubuj te posveti pe e Devlehće.
24Thaj te anen e Devlehće, sar si phendo, duje grlicen jal duje parne čirikljen, golubon.
25Thaj dikh, sah jekh manuš ando Jerusalimo, savehko anav sah Simeuno, a gova dženo sah manušvalo thaj čačimahko paša o Del. Vov ažućardah e maj lačhe djivesa e Izrailjehće thaj o Sumnalo Odji sah ande lehte.
26Thaj lehće phendah o Sumnalo Odji, kaj niči kam dikhel piro meripe dži kaj god niči dikhel e Hristo e Devlehćere.
27Thaj phendah lehće o Sumnalo Odji thaj vov avilo tar ande khangjiri. O dad thaj e dej igjarde e čhavor̄e Isuso te ćeren leha po zakoni, po krisi, so trubuj.
28Thaj vov lijah le ande pe va, ande pi angali, ašarindo, hvalindo e Devle thaj vaćarindo.
29Akana tu mukeh ćire sluga šukarimaha, sar kaj phendan.
30Kaj mrne jakha dikhen o soaso ćiro.
31Savo lačhardan angla o muj e savor̄e manušengo.
32O dićhipe te sikavel sa e manušen golen save niči džanen pala o Del, thaj te strafinisarel o baripe ćire manušengje e Izrailjehćerengje.
33O Josifo thaj lehći dej čudisalje golehće so dijah pe vorba pala lehte.
34Thaj o Simeuno blagoslovisardah len thaj phendah e Mari jaće, lehće daće: Ita, agava savo kathe pašljol, buten kam peravel thaj buten kam vazdel upre. Vov kam avel o znako proti savehte ka del pe vorba.
35A vi korkor̄e tuće kam phar̄adol odji e čhujraha te phučardon thaj te dićhon e mislurja e bute ilengje.
36Thaj sah nesavi doraćarni džeji, Ana, čhej e Fanujlohći, katar o ćher e Asirohko: Voj phurilah, a efta brš sah pire r̄omeha, sar avilah pala lehte sar čhej.
37Thaj sah bir̄omehći, phivli, oh̄tovardeš thaj štare bršengji. Voj niči iklela andar e khangjiri thaj ačhilah e Devleha, kandindo le e jrat thaj o djive, bokhalindo katar o posto, katar o šućaripe.
38Akana voj avilah thaj ašardah e Devle thaj dijah vorba lehtar savor̄engje golengje save ažućarde o spaso ando Jerusalimo.
39Thaj kana von sa ćerde po zakoni e e Devlehko, von irisalje palpale ande Galileja ande piro foro Nazareto.
40A o čhavor̄o cîra po cîra bajrola thaj zuraljah ando šoro thaj pherdinal ah e godjaha, thaj o lačhipe e Devlehko ačhilah pe lehte.
41A lehko dad thaj lehći dej džana saijekh brš ando Jerusalimo pe Pasha, pe Patrano Djive.
42Kana sah lehće dešuduj brš, von avile ando Jerusalimo sar kaj sah saik paša lende adeti.
43Kana e djivesa nakhle thaj von irisalje, ačhilah o čhavor̄o, o Isuso, ando Jerusalimo, a niči džangle pala godova ni lehko dad ni lehći dej.
44Von gîndisarde, ićarde kaj vov ačhilah varekaj pire amalenca, pa džando katar gova than sor̄o djive rodije le paša pe phrala thaj paša e pindžarde, e perutne.
45Thaj našti arakhle le thaj irisalje te roden le ando Jerusalimo.
46Kana nakhle trin djive, arakhle le ande khangjiri kaj bešel maškar e godjaver, sikamne manuša, sar ašunel len thaj phučel len.
47Thaj savor̄e gola save ašunde lehće alava, čudisalje lehće godjaće thaj lehće vorbaće.
48Thaj dikhindo le, von por̄ade pire jakha, a lehći dej phendah lehće: Ej, čhaveja, so ćerdan agadija amengje? Ake, me thaj ćo dad daraljam pala tute, rodindo tut.
49A vov phendah lengje: Sohtar rodijen ma? Zar tumen niči džanen kaj me trubuj te avav paša e bući mrne Dadehći?
50A von niči haćarde khanči so vov dijah len vorba.
51Thaj vov huljistah lenca tele thaj avilah ando Nazareto thaj sah lengje kandino. A lehći dej ićardah sa gala alava ande piro dji.
52A o Isuso bajrilah ande godji thaj vazdinaljah e bršenca thaj sah ando lačhipe paša o Del thaj paša e manuša.
Sélection en cours:
Lukahtar 2: GURB1938
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Englezongo thaj avere Themengo Biblijako Amalipe 1938.
