Dányál 5

Diwálay nebeshtah

1Bádsháh Belsházará baláhén dáwaté dát. Wati hazár mir o mehteri mehmán kort o esháni démá sharábi wárt. 2Wahdé Belsházará sharábay tám chasht, hokmi dát ke hamá teláh o nograhén darp árag bebant ke áiay pirok Nebukadnezará cha Urshalimay mazanén parasteshgáhá, cha Hodáay lógá áwortagatant tánke bádsháh, áiay mir o mehter, áiay jan o soriat#5:2 Soriat, dáshtaw, hamá janén ke bé nekáhá lógá dáraga bit. esháni tahá benóshant. 3Gorhá hamá teláhén darpesh áwortant ke cha Urshalimá, cha Hodáay parasteshgáhá áwár#5:3 Áwár, bezán janagay tahá lotth o pol kortagén mál o mardom. janag butagatant. Bádsháh, áiay mir o mehterán, áiay janán o soriatán esháni tahá sharáb wárt. 4Áyán sharáb wárt o teláh, nograh, brenj, ásen, dár o sengén hodáyáni satá kort.

5Anágahá mardomi dastéay lankok záher butant o cherágdánay domi némagá, sháhi kalátay diwálay dónay#5:5 Dón, bezán gacch, palestar. sará nebeshtah kanagá laggetant. Bádsháhá nebeshtah kanókén dastay posht dist. 6Nun bádsháhay dém zard tarret o áiá anchén torsé delá kapt ke srénay band o bógi shol butant o kóndhi anchó larzetant ke gón yakdomiá laggetant. 7Bádsháhá kukkár kort o hokm dát ke sáher, nojumi o estárzántán byárét. Gón Bábelay dánáyán gwashti: “Hamá kas ke é nebeshtahá bwánit o máná bekant, á jamurangén#5:7 Jamu, rangé ke Pársiá banafsh o Orduá banafshi gwashanti. god o teláhén háré gwará dayaga bit o bádsháhiay sayomi hokmrán kanaga bit#5:7 Molkay bádsháh Nábonáid at ke Belsházaray pet at. Awali hokmrán hamá at. Á ke edá nabut, molkay master Belsházar at, bezán domi hokmrán ke é ham bádsháh gwashaga but. Paméshká gwashit “sayomi hokmrán”, bezán cha mani petá o cha man rand masterén hokmrán..”

8Gorhá bádsháhay sajjahén dánáén mardom átkant, bale kassá nebeshtah wánt o pa bádsháhá máná kort nakort. 9Nun bádsháh Belsházar géshter paréshán but. Áiay dém géshter zard tarret. Áiay mir o mehter hayrán butant.

10Shahbánoká#5:10 Buta kant ke é shahbánok, Nábonáid yá ke Nebukadnezaray jan butag chéá ke kwahnén hálána zánt. wahdé bádsháh o áiay hásén mardománi tawár eshkot, diwánjáhá átk o gón bádsháhá gwashti: “Oo bádsháh! Modám zendag bátay. Watá paréshán makan o wati démá zard matarrén. 11Tai bádsháhiá mardé hast ke áiá pákén hodáyáni ruh mán ent o tai pirokay dawrá gendag butag ke áiá báteni rozhnái, sarpadi o hekmat o hodáyáni dhawlén dánáié gón. Tai bádsháhén pirok, Nebukadnezará é mard jáduger, sáher, nojumi o estárzántáni master kortagat, 12chéá ke é Dányál, ke bádsháhá áiay nám Beltesházar kortag, eshiá ajabén ruhé, zánt o sarpadié hastat. Á wáb o chácháni#5:12 Chách, bezán chistán, ráz o ramzi habar. máná kanag o gránén jérhaháni gisshénagá sakk balad at. Dányálá lótháén, hamá tará eshiay mánáyá gwashta kant.”

13Gorhá Dányál, bádsháhay démá árag but. Bádsháhá gón Dányálá gwasht: “Taw hamá Dányál ay ke cha Yahudáay darándhéhán ent, hamá ke mani bádsháhén piroká cha Yahudáyá áwortagant? 14Man annun sahig butagán ke tará hodáyáni ruhé mán ent o tará báteni rozhnái, sarpadi o ajabén hekmaté hast. 15Mani démá annun dáná o sáher árag butagant ke é nebeshtahá bwánant o pa man máná bekanant, bale áyán máná kort nakort. 16Bale man tai bárawá eshkotag ke taw máná korta kanay o jérhaháni gissh o giwárá balad ay. Agan taw é nebeshtahá wánt o máná kort bekanay, tará jamurangén god o teláhén háré gwará dayaga bit o taw bádsháhiay sayomi hokmrán kanaga bay.”

Nebeshtahay máná

17Gorhá Dányálá gón bádsháhá gwasht: “Wati théki o tohpahán wati kerrá kan o dádán pa dega kaséá ér kan. Man é nebeshtahá chónahá wánán o pa tawe bádsháhá máná kanán. 18Oo bádsháh! Borzén arshay Hodáyá, Nebukadnezar bezán tai pirok, bádsháhi, mazani, shán o sharap dátagat. 19Hamá mazaniay sawabá ke Hodáyá dátagat, sajjahén kawm o ráj o har zobánay mardom cha torsá tai pirokay démá larzetant. Kasé ke áiá koshaga lóthet, koshti o kasé ke áiá koshaga nalóthet, nakoshti. Kasé ke áiá mazani dayaga lóthet, mazaniia dát o kasé ke áiá kamsharap kanaga lóthet, kamsharapia kort. 20Bale wahdé áiay del porkebr o arwáh cha gorunákiá porr but, cha bádsháhi tahtá ér géjag o shán o shawkati pach gerag but. 21Á, cha ensánáni darnyámá gallénag but o áiay del jánwari delé jór kanag but. Jangali haráni nyámá jahmenend but, pas o gókáni dhawlá káh o bucch wárénaga but o cha ásmánay nódán áiay badan tarr kanaga but, tán hamá wahdá ke zánti ke borzén arshay Hodá ensáni bádsháhiáni sará hokmrán ent o hamá mardomá esháni sará hokmrána kant ke wata lóthit.

22Bale oo Belsházar, Nebukadnezaray nomásag! É sajjahén chizzet zántant o angat ham gorunákiet cha wati delá dar nakort. 23Taw watárá ásmáni Hodáwanday démá borz zánt o léket#5:23 Lékag, bezán hesáb árag. o hokmet kort ke Hodáay lógay darp tai démá árag bebant. Taw o tai mir o mehterán, tai janán o soriatán é darpáni tahá sharáb wárt o taw nograh, teláh, brenj, ásen, dár o sengén hodá satá kortant ke na gendant, na eshkonant o na sarpada bant. Bale taw hamá Hodá shán o shawkat nadát ke tai sáh o tai sajjahén ráh áiay dastá ant. 24Paméshká é dast, cha hamá Hodáay némagá dém dayag butag o é labz nebeshtah kanag butagant.

25Nebeshtah esh ent: ‘Mené, mené, tekel, pársin.’ 26É labzáni máná esh ant: ‘Mené’ bezán Hodáyá tai bádsháhiay róch hesáb kortag o halás kortagant. 27‘Tekel’ bezán taw sháhémá#5:27 Sháhém, bezán tór, tarázu. wazn kanag butagay o é habar zánag butag ke taw sobakk ay. 28‘Peres’#5:28 Peres o pársin yakkén labz ent ke band bist o panchá ham átkag. “Peres” yakk ent o “pársin” jam ent. bezán tai bádsháhi bahr kanag o Mád o Pársán dayag butag.” 29Gorhá Belsházará hokm dát o Dányálesh jamurangén god o teláhén háré gwará dát o Dányál, bádsháhiay sayomi hokmrán jórh kanag but. 30Hamá shapay shap Bábeliáni bádsháh, Belsházar koshag but. 31Gorhá bádsháhi Mádén Dáryushá#5:31 Dáryush: lahtén zántkáray hayál hamesh ent ke é Dáryush, Kurosh ent. raset. É wahdá Dáryushay omr kesás shast o do sál at.

Sélection en cours:

Dányál 5: HPKB

Surbrillance

Copier