Zhan 7

Zhezü nɛ́n muan-ẅì hɔ̀n ke sɩ́ bú n'ankà kɛ tán ankaẅì

1Ndɔ lɔ n'ɛmɛẅi, Zhezü ci Galile kpɔsɔ wú; nɛ́n sɩ́ ji nɛ̀n yɛ́ Zhüde kpɔsɔ wú, ɔmuhi Zhüifɛ̀n-bɔ̀ cüìcüì hɔ̀n ke ji kè wri nɛ̀n nɔn. 2Zhüifɛ̀n-bɔ̀ Wɔ-mìrɛ̀n-wɔn koran bì lɔ kɛ́n eburi, 3kɩ Zhezü nɛ́n muan-ẅì hɔ̀n kɛ dɔ́ nɛ̀n le: “Cɔhɔ̀ ɛnu lɔ, hɔ̀n Zhüde kpɔsɔ wú, ô v'ɛsɛnkɛn-bɔ̀ lɔ kɛ̀ kán ɛci hɔ̀n léyi ɛ hán nɔn. 4Ɔwrɔn zriɛmɛ́n ke sɩ́ bán eci léyi nɛ hán ke dú kɛ ne ji le ye nyri nɛ̀n. Ɔmuhi, ɛ hán ɛci ɔmu hɔ̀n lɔ nɔn, ɛ̀ hán tán ô anwrɔn lɔ fɛn kɛ̀ kán mɛ́n.” 5Nɛ́n muan-ẅì hɔ̀n dùku mán ke sɩ́ bú n'ankà kɛ tán ankaẅì. 6Zhezü kɛ dɔ́ yɔ le: “M'ɛnvra kɛ vá cɔ̀. Nyɛ tɛn, ɛnvra lɔ fɛn zrɔ tán nyɛ̀n. 7Ɛnhibù kè sɩ̀ ẅɛ̀n ny'egbrì, tɛ́n ɛnhibù ke gbri mɛ̀n, ɔmuhi mɛ dɔ̀ le n'ɛci-hán-ci hɔ̀n lɔ krɛ-gbàn nɔn. 8Nyɛ tɛn, nyɛ́n hɔ́n ɔkoran mɛ̀n. Mɛ́n sɩ̀ hɔ́n ɔkoran ndɔ lɔ mɛ̀n ɔmuhi m'ɛnvra kɛ vá cɔ̀ nɔn.” 9Zhezü dɔ́ yɔ ankà ndɔ lɔ kɩ yɛ́ Galile kpɔsɔ wú.

Zhezü hɔ́n Ɔwɔ-mìrɛ̀n-wɔn koran lɔ mɛ̀n

10Ɛnvra léyi Zhezü nɛ́n muan-ẅì hɔ̀n hɔ́n dú ɔkoran lɔ mɛ̀n nɔn, Zhezü mán hɔ̀n, kɩ nɛ̀n sɩ̀ hàn tàn yɛ kán nɛ̀n. 11Zhüifɛ̀n-bɔ̀ cüìcüì hɔ̀n ke ji nɛ̀n ɔkoran bì lɔ mɛ̀n, kɩ ke yrɛ le: “Tɛyri nɛ́n dùɛ?” 12Yɛ dɔ́ n'ankà bobrebe fɛcüè lɔ mɛ̀n. “Nɛ̀n dú ɔwrɔn anvrɛnvrɛn”, dú anwrɔn janbɔ̀ anmùan mɛ̀n kɛ dɔ̀. “Ndɔ hɔ̀n kɛ dɔ̀ le, hɔ̂, nɛ frɛ́n anwrɔn.” 13Tɛ́n ɔwrɔn zriɛmɛ́n ke sɩ́ dɔ́ n'ankà kpetemɛ̀n, ɔmuhi yɔ sú Zhüifɛ̀n-bɔ̀ cüìcüì hɔ̀n nɔn.

14Ɔkoran lɔ kɛ hɔ́n ɔtrɔmɛ̀n ɛnvra léyi Zhezü bru ecice wɔn lɔ mɛ̀n kɩ ke yé yɔ ankà nɔn. 15Zhüifɛ̀n-bɔ̀ dú anvɛmɛ̀n-frɛ́n mɛ̀n kɩ kɛ dɔ̀ le: “Anwɔntan de ɔwrɔn ndɔ lɔ hán nyri ankà bobrebe, nɛ́n léyi nɛ̀n sɩ̀ vàn eci nɛ́n?”

16Zhezü mrɛ́n yɔ ɔmùan le: “Ankà-yé léyi mɛ tán nɔn kè sɩ̀ dù m'eyri kɛ̀ và, tɛ́n dú Ɔwɔ léyi wá mɛ̀n ɔkɔ̀hɔ̀n nɔn n'eyri và. 17Ɔwrɔn léyi krɔn kpehɛ́n kɛ̀ hán Ɔwɔ kɔrɛzì-ci nɔn, ke le nyrì ke dú kɛ m'ankà-yé lɔ dú Ɔwɔ yri và, kàle mɛ́n dùku de mɛ dɔ́ m'ɛkɔrɛ̀levri ankà nɔn. 18Ɔwrɔn léyi kɛ dɔ́ ankà nɛ́n zrí n'ɛkɔrɛ̀-levriemɛ̀n nɔn, ne ji n'eci-zrɔ. Tɛ́n ɔwrɔn léyi kɛ hán eci-zrɔ kɔ̀hɔ̀n tán ɔwrɔn léyi wá nɛ̀n ɔkɔ̀hɔ̀n nɔn, kɛ dɔ́ ankà annanwɔrɛ, kɩ ɛyɔ̀n ankà zriɛmɛ́n badà nɛ̀n ɛmɛ̀n. 19Mohizì tán nyɛ̀n ɛyanmàn, ke sɩ̀ dù yiɛ? Tɛ́n ɔwrɔn zriɛmɛ́n ny'ɛmɛ̀n lɔ ke sɩ́ hán ɛnyanmàn kɔrɛzì-ci. Cɛci kruhú kɛ nye ji nyɛ́n wri mɛ̀n hàn?” 20Fɛcüè mrɛ́n nɛ̀n ɔmùan le: “Ɛnhɛ́n gbàngbàn tɔ̀n dú mɛ́n edomɛ̀n! Antɔnwrɔn de ke ji ke wri mɛ́n nɛ́n?”

21Zhezü mrɛ́n yɔ ɔmùan le: “Eci-zri kɩ mɛ̀n hán, kɩ nyɛ lɛ fɛn nyɛ́n dú anvɛmɛ̀n-frɛ́n mɛ̀n! 22Ɔmuhi Mohizì tán nyɛ̀n ɛnyànmàn ô nyɛ́n wi wucɔ̀ edomɛ̀n nɔn, (kɩ kè sɩ̀ dù Mohizì de kè bùkru kɛ̀ hàn hɩ ci lɔ, tɛ́n nyɛ́n nancüi hɔ̀n) kɩ nye shrì kɩ nyɛ hán hɩ kɔhɔ̀n lɔ ɛnyanmán-bì vra lɔ. 23Ke dú kɛ ɛnyanmán-bì lɔ, ɛkɔrɛ̀-levri dù nyɛ lɛ hán wucɔ̀ domɛ̀n wí kɔ̀hɔ̀n tɛ̀, ô nyɛ́n bɩ́ fɔndɔn Mohizì nyanmàn lɔ, cɛci kruhú kɛ nye bɩ́ ɛmɛnhyì kú mɛ̀n ɛwú, ɔmuhi mɛ̀n kɔrɛ̀ ɔwrɔnẅì mumù lɔ ɛnyanmán-bì vra lɔ nɛ́n? 24Nyɛ́n bɩ́ ci ɛmrɛ̀n eci léyi nyɛ kàn nɔn hɩ wú. Nyɛ́n ci ɛmrɛ̀n ɛnyrɔnnan mɛ̀n.”

Zhezü dú Ebɩ̀die-wrɔn hán?

25Zherüzalɛmɛ̀n anmàn-bɔ̀ jan kɛ dɔ̀ le: “Ke sɩ̀ dù ɔwrɔn ndɔ lɔ de ye ji ewri yri nɛ́n? 26Nyɛ kàn: nɛ dɔ́ ankà anwrɔn mɛ̀n, kɩ ye sɩ́ dɔ́ nɛ̀n anka zriɛmɛ́n! Bɔ́ ɛcüìcüì-bɔ̀ lɔ nyri annanwɔrɛ mɛ̀n le, nɛ̀n dú Ebɩ̀die-wrɔn hàn? 27Tɛ́n, ɛnvra léyi Ebɩ̀die-wrɔn lɔ kɛ lɛ và nɔn, ɔwrɔn zriɛmɛ́n ke sì nyri ɛyri léyi nɛ́n dù nɛ và nɔn, kɩ bɔ́ tɛn, bɔ̀ nyri ɛyri léyi ɔwrɔn ndɔ lɔ dù kɛ và nɔn.” 28Zɛtɛn Zhezü ke yé Ankà Ɔwɔ-cice-wɔn lɔ mɛ̀n, kɩ sɩ́ ɔmùan ɛwú kɛ dɔ̀ le: “Annanwɔrɛ mɛ̀n lɔ nyɛ́n nyri ɔwrɔn léyi dú mɛ̀n, mán ɛyri léyi mɛ́n dù mɛ và nɛ́n? Mɛ̀n sɩ̀ và mɛ́n mumù m'ɛkɔrɛ̀levriemɛ̀n, tɛ́n ɔwrɔn léyi wá mɛ̀n ɔkɔhɔ̀n nɔn dú esɛ́ wrɔn. Nyɛ́n sɩ̀ nyri nɛ̀n. 29Mɛ tɛn, mɛ̀n nyri nɛ̀n, ɔmuhi n'ɛtɛ̀sɛ̀n de mɛ́n dù mɛ và nɔn, kɩ nɛ́n de nɛ̀n wá mɛ̀n ɔkɔ̀hɔ̀n nɔn.” 30Zɛtɛn Zhüifɛ̀n-bɔ̀ ke ji ɛyri ô kɛ̀ ẅɛ̀n nɛ̀n, kɩ ɔwrɔn zriɛmɛ́n ke sɩ̀ cɔ́ nɛ̀n ɛẅɛn yri, ɔmuhi n'ɛnvra kɛ vá cɔ̀ nɔn. 31Ɔmu tɛ̀kɩ, fɛcüè lɔ mɛ̀n, anwrɔn bobrebe bú n'ankà tán ankaẅì. Yɔ dɔ̀ le: “Ɛnvra léyi Ebɩ̀die-wrɔn lɔ kɛ lɛ và nɔn, nɛ lɛ hán anvɛmɛ̀n-frɛ́n-ci kɛ lɛ vrán ɔwrɔn ndɔ lɔa?”

Yɔ wá gɔliɛ-bɔ̀ ɔkɔhɔ̀n kɛ̀ hɔ̀n kɛ̀ ẅɛn Zhezü

32Ɔwɔ-nyanmàn-sùva-wá-bɔ̀ cɔ́ yá ankà léyi yɔ dɔ́ Zhezü wú fɛcüè mɛ̀n, esùva ɛnhisiemɛ̀n nɔn. Zɛtɛn Ɔwɔ-cice-bɔ̀ cüìcüì mán Ɔwɔ-nyanmàn-sùva-wá-bɔ̀ wá gɔliɛ-bɔ̀ ɔkɔ̀hɔ̀n kɛ̀ hɔ̀n kɛ̀ ẅɛn Zhezü. 33Zhezü kɛ dɔ̀ le: “Mɛ̀n vru mɛ̀n dú nyɛ̀n ɛmɛ̀n ɛnvra cá mɛ̀n, kɩ mɛ lɛ hɔ̀n cɔ́ ɔwrɔn léyi wá mɛ̀n ɔkɔhɔ̀n mɛ́n và nɔn. 34Nye le ji mɛ̀n, kɩ nyɛ́n sɩ̀ cɔ́ mɛ̀n, ɔmuhi ɛyri léyi mɛ lɛ hɔ̀n nɔn, nyɛ́n sɩ̀ hɔ̀n rɔ́.” 35Zhüifɛ̀n-bɔ̀ ke yrɛ y'edomɛ̀n le: “Tɛyri de nɛ lɛ hɔ̀n ô bɔ́ bɩ́ cɔ́ nɛ̀n nɛ́n? Nɛ lɛ hɔ̀n nɛ̀n cɔ́ Zhüifɛ̀n-bɔ̀ léyi bonyi Grɛkɛ̀n-bɔ̀ granmɛ̀n, ô nɛ̀n yé Grɛkɛ̀n-bɔ̀ ankà? 36Ankà ndɔ léyi nɛ́n dɔ̀ nɔn, n'ɛmɛ̀n dú tɛ́ tán: Nye ji mɛ̀n, kɩ nyɛ́n sɩ̀ cɔ́ mɛ̀n, ɔmuhi ɛyri léyi me le dù nɔn, nyɛ́n sɩ̀ hɔ̀n nanvrɛn lɔ rɔ́a?”

Màncüè shi hɔ̀n léyi kɛ tán ɛwúvà-kɔrɛ̀ nɔn

37Ɛmɛẅi trɔ koran bì lɔ dú ɛnbì léyi ẅɛn vɔ̀nshɛ́ nɔn. Ɛnbì lɔ, Zhezü nyɔn fɛcüè zìwú kɛ dɔ́ ɔmùan-ɛwú-sɩ́emɛ̀n le: “Ke dú kɛ ɔwrɔn tɔ̀n ɛnshi muanwù kɛ ẅɛ̀n hô, nɛ̀n vá m'eyri ô nɛ̀n mi ɛnshi. 38‘Ɔwrɔn léyi ke bú m'ankà kɛ tán ankaẅì nɔn, mancüe shi léyi kɛ tán ɛwúvà-kɔrɛ̀ nɔn, ke le dú n'ɛnbɔrɛ lɔ mɛ̀n kɛ̀ gbɛ́’, hán ɔmu le Owrú Prɔnprɔn ndɔ̀ nɔn hɔ́.” 39Zhezü kɛ dɔ́ Ɛnhɛ́n Prɔnprɔn léyi, anwrɔn hɔ̀n léyi ke bú n'ankà kɛ tán ankaẅì kɛ lɛ cɔ̀ nɔn yi ankà. Hɩ vra lɔ mɛ̀n, Ɛnhɛ́n Prɔnprɔn kɛ vá và, ɔmuhi Zhezü kɛ vá bru n'eci-zrɔ lɔ mɛ̀n nɔn.

Fɛcüè kɛ sɔnvɔ́n n'edomɛ̀n Zhezü kruhú

40Ɛnvra léyi yɛ yá ankà ndɔ hɔ̀n lɔ nɔn, anwrɔn janbɔ̀ dú fɛcüè mɛ̀n kɛ dɔ̀ le: “Annanwɔrɛ mɛ̀n lɔ ɔwrɔn ndɔ lɔ dú Ɔwɔ-mùanwú-ankà-dɔ́-wrɔn!” 41Anwrɔn ndɔ hɔ̀n kɛ dɔ̀ le: “Nɛ̀n dú Ebɩ̀die-wrɔn!” Tɛ́n, anwrɔn janbɔ̀ ke yrɛ le: “Ebɩ̀die-wrɔn ke le dú Galile kɛ̀ và? 42Owrú Prɔnprɔn kɛ dɔ̀ le, Ebɩ̀die-wrɔn ke le dú Davidɛ̀n mɛẅi wrɔn tɔ̀n, kɩ ne le dú Bɛtlehɛmɛ̀n nɛ̀n và, anmàn léyi Davidɛ̀n sɔ́n ebɩ́ nanvrɛn nɔn.” 43Fɛcüè sɔnvɔ́n n'edomɛ̀n Zhezü kruhú. 44Anwrɔn janbɔ̀ ke ji kɛ̀ ẅɛn nɛ̀n, tɛ́n ɔwrɔn zriɛmɛ́n kè sɩ̀ tɛ́ nɛ̀n ɛkɔrɛ̀.

Ankaẅì-bùtan léyi Zhüifɛ̀n-bɔ̀ cüìcüì hɔ̀n ke sɩ̀ ẅɛ̀n hàn nɔn

45Gɔliɛ-bɔ̀ lɔ vru ɛmɛẅi hɔ́n cɔ́ Ɔwɔ-cice-bɔ̀ cüìcüì hɔ̀n mán Ɔwɔ-nyanmàn-sùva-wá-bɔ̀, léyi ke yrɛ yɔ le: “Cɛci kruhú kɛ nyɛ́n sɩ̀ bɩ Zhezü nyɛ́n và?” 46Gɔliɛ-bɔ̀ mrɛ́n ɔmùan le: “Ɔwrɔnẅì zriɛmɛ́n kɛ vá dɔ́ ankà kɛ krɔn ɔwrɔn ndɔ lɔ mrìmrì!” 47Ɔwɔ-nyanmàn-sùva-wá-bɔ̀ lɔ ke yrɛ yɔ le: “Nyɛ́n mán nyɛ́n teze ny'edomɛ̀n yɛ frɛ́n nyɛ̀n hàn? 48Ɛcüìcüì-bɔ̀ lɔ mán Ɔwɔ-nyanmàn-sùva-wá-bɔ̀ lɔ, ɔtɔ̀n dú ɛmɛ̀n bú n'ankà tán ankaẅìɛ? 49Tɛ́n, anwrɔn ndɔ hɔ̀n lɔ ke sɩ̀ nyrì Mohizì nyànmàn, yɔ dú ɛẅiɛ̀-dá mɛ̀n!” 50Nikodɛmɛ̀n dú Ɔwɔ-nyanmàn-sùva-wá-wrɔn zri léyi kán ankà lɔ ɛyri nɔn: nɛ́n de nɛ́n gɔ́ hɔ̀n nɛ̀n kán Zhezü ɛnvra cá mɛ̀n. Nɛ dɔ́ yɔ le: 51“Bɔ́ ɛnyànmàn lɔ wú, bɔ́ sɩ̀ bɔ́ ɔwrɔn nwù rɔ́ ke dú kɛ bɔ̀ sɩ̀ yá n'anmùan mɛ̀n ankà, ô bɔ̀ nyrì eci léyi nɛ̀n hán nɔn.” 52Yɔ mrɛ́n nɛ̀n ɔmùan le: “Vɛ́n mán Galile wrɔn dú mɛ́n hɛ́n? Ɛ̀ nyan Owrú Prɔnprɔn lɔ kɩ ɛ lɛ kán ɔmu le, Ɔwɔ-mùanwú-ankà-dɔ́-wrɔn zriɛmɛ́n ke sɩ̀ dù Galile kɛ và mrìmrì.” [53Zɛtɛn, ɔwrɔnwrɔn hɔ́n n'ɛbemɛ̀n.

Sélection en cours:

Zhan 7: ƐAA03

Surbrillance

Copier