Matiu 7

Tab a bɔr a Jim

(Lug 6:37-38,41-42)

1“Ni laa ji tab tibɔri, naa ye man ke Uwonbɔr mu li ji ni tibɔr. 2Nan bu-n naah ji tab a bɔr man ni, man mu le bi na yin ji ni bɔr, kiyiikpoŋ kan wee ni jɔɔ magir ki tenn ni tabin, ki ma le bi na yin ta mag ki jiin ni.

3“A ŋa nii kan lidabul lan be a kpiɛg a numbim ni naa, wee kaa kan lidagenl lan be a numbilin naa? 4Ke a yin ŋa nii ki bei a kpiɛg ke, ‘Che n nyan lidabul lan be a numbilin nan,’ wee isaŋ biɛn lidagenl be a tɔɔl a numbilin naa? 5Fin ulinlaril nan, chinn nyan lidagenl lan be a tɔɔl numbilin ni na, wee ki ni fir kan nbamɔm ki nyan lidabul lan be a kpiɛg a numbilin ni.

6“Ni laa ta niwann nan be kasi ki sei ibɔ, ni laa ta nan ye tinyɔɔr a wann ke salima-n ki gab idooli. Ni ye a ŋa man ke bi li ta bi taafar ki ta i bu ki jin labir ki tɔr tɔriŋ.

Li Miɛ, ki li Baan, ki li Kpaara

(Lug 11:9-13)

7“Li miɛu ke bi li ta seiŋ; li ban na, ke a li kan; li kpaar linaanganla, ke li li loor ki seiŋ. 8Nan bu-n wan biɛn miɛ ke u gaan le; le wan biɛn mu ban ke u li kan; le wan kpaar linaanganl le li loor tenn.

9“Ni ŋma, wee ni ye ke u big miɛ u boroboro ke, un ta litangbagil ki sei waa? 10Bee u miɛ ujan ke un ta liwaalabil ki sei waa? 11Ke ni ye nim ban ye tibirdam nan nyi ipiin ŋan ni ta sei ni buwaab ke, ni Baa Uwonbɔr wan be paab nan ma kaa nyi nan ŋan kag ki li ta sei ban miɛ waa! 12Nan wee a ban a kpiɛg li tun ki tenn niŋin, a mu li tun man ki tenn a kpiɛtiiba, nan bu-n Moziz a siim nin Bilinlem a wɔɔnimin wɔɔn man le.

Ntimansanmɔnn man kaa yalin a bɔr

(Lug 13:24)

13“Kɔɔm ntimansanmɔnn man kaa yalin nan yaan; nan bu-n ntimansanmɔnn man yalin chaa nŋmi-n le, le bininfob takpem kɔɔ niin, nan bu-n nsan man chaa niin ni yalin le. 14Limiɛfol a timansanmɔnn n ma kaa yalin ni, le mi sanchonl pɔɔ nin nnɔɔm, mambu che bininfob wama nan le kan mi.

Kisiig nin ki Looi a bɔr

(Lug 6:43-44)

15“Ni li nyi tibɔkar a linlem nan bu, ban chaan ni ban ki nann ipee, wee ki sin ye igbingbel bamɔn nan. 16Bi loon yin le ni li biɛ baah ye ban. Bininfob ker igbiin bikunkom a sub buu, bee bi ker ikinkan kujagorug buu? 17Kisiŋaŋ biɛn lo iloon ŋan le; amaa kisibiig biɛn mu lo tiloonbir le. 18Kisiŋaŋ kaa li fir lo iloon biri; kisibiig mu kaa li fir lo iloon ŋan ni. 19Bisib ban biɛn kaa lo iloon ŋan ke bi li ga bi jaa le ki ta bi gab nŋmi-n. 20Mambu, bi looi yin le ni li biɛ bi.

Yisa na li bei bininfob biba ke, ‘Maa nyi ni kolibi’

(Lug 13:25-27)

21“Naa ye ban biɛn beim ke, ‘Uyudaan, Uyudaan,’ li na li kɔɔ paab a naamin ni, amaa wan chee ki tun n Baa wan be paab a bamin. 22Lidaal nmɔn nan foo ke, bininfob takpem na yin yim le ki ke, ‘Uyudaan, Uyudaan, taa nan pag ilinlen leen a yinl buu? Naa ye a yinl bu le ti nan nyan nnaanbiim bininfobin, ki ji tun ligaril a toon yin naa?’ 23Iyaayoo nmɔn le n mu na li bei bi npaan ni ke, ‘Maa nyi ni, nim titoonbirdam nan, ni fɔr n ban na!’

Biniinmaab bilee a bɔr

(Lug 6:47-49)

24“Mambu, wan biɛn gbir n bɔr wee ki ŋmag ti nbamɔm ke, u nann ulandaan wan nan maa u niin ki tɔɔn kutanpiig bu-n le. 25Le utaal nan nun, le ikpen gbee, le nfaam daa, ki piɛr iniin nmɔn a dikakpin; amaa yaa nan lu, nan bu-n i fiɛl nan tɔɔ kutanpiig bu le. 26Amaa wan biɛn gbir n bɔr nan, wee kaa ŋmag ti ke, u nann kujajɔrug kan nan maa u niin litanbiiril ni le. 27Le utaal nan nun, le ikpen gbee, le nfaam daa, ki piɛr iniin nmɔn a dikakpin, le iniin nmɔn lu ki weeh weeh.”

Yisa a Ninkper a Pɔɔm

28Yisa kaah nan pag imɔbon nan ki diɛ n-yonn man ni, le u wɔɔnim nmɔn nan gar kuninfogbaluŋin, 29nan bu-n u nan wɔɔn bi waah jɔɔ tininkper a pɔɔmin le, kaa nann bi yaa ninfob ban wɔɔnn Uwonbɔr a siimin ni.

Sélection en cours:

Matiu 7: KUGL

Surbrillance

Copier