Matiu 12

Ibinbaan ki jiin likpakɔɔl paam

(Mag 2:23-28; Lug 6:1-5)

1Iyaayoo nmɔn Yisa nin u bɔɔnɔɔb nan chaa ki tan foo biyookpaab biba ni likpakɔɔl daal; le nkom jɔɔ u bɔɔnɔɔbin, le bi genn iyoo ki pur ki ŋma. 2Farasii yaab kaah kan man ni, le bi bei Yisa ke, “Lig! A bɔɔnɔɔb tun nan wee nsiim kaa chee sei nin ti li tun likpakɔɔl daal le.”

3Le u jiin ke, “Naa karin Defid kaah nan tun man n-yonn man wee nkom nan choo u ma nin u ninɔɔtabin naa? 4U nan kɔɔ iwonjiɛn niin n-yaan le, ki tan yuur kasi a boroboro-n#12:4 kasi a boroboro Ni nan ye iwonjiɛn niin a kaal le ke idaa biɛn bi yin ta boroboro kon piig nin ilee le ki tan paan iwonjiɛn niin a binbinlin bu, le nin wɔɔn Iziral yaab a bol piig nin ileen biɛn be. I nan paag man le ki tan kpaa kujɔɔg le kumanug a yudaan n ta ŋman. le u ma nin u ninɔɔtabin ŋman, amaa nsiim mu kaa nan chee sei nin bi ni uba n ŋman boroboro nmɔn ni, see Uwonbɔr a minmanib a binba. 5Bee naa karin nsiim a gbɔŋin, biminmanib kaah ti tun man likpakɔɔl daal biɛn, ki bii nsiimin, amaa wee kaa sin jɔɔ tibirin naa? 6N bei ni le ke, wan yab jon iwonjiɛn niin be do. 7Ni ye ni bi nyi ke ‘Uwonbɔr ban linyunyunbasanl le ki jon kumanug’#Hozaya 6:6 ke, naa bi li pag ki bii ban kaa jɔɔ biri. 8Nan bu-n Uninfosaal a Big le ye likpakɔɔl daal nmɔn a yudaau.”

Uja wan a nɔɔnkpaŋ nan kpo nan a bɔr

(Mag 3:1-6; Lug 6:6-11)

9Le Yisa nyan nin yaan ki jon tan kɔɔ bi wonjiɛndiigin, 10uja uba mu nan be niin, le u nɔɔnkpaŋ kpo. Le biba mu ban bin kan Yisa a bir le ki bii u; mambu, le bi baan u ke, “Ti siim chee sei nin uninfo li teb ubaar likpakɔɔl daal waa?”

11Le u mu ji labir ki baan bi ke, “Ni ye ni ni uba bi jɔɔ upee uba, wee ni ye upee nmɔn tan lu kinyunbuŋin likpakɔɔl daal ke, waa li don u likpakɔɔl daal nmɔn naa? 12Ni li nyi ke uninfosaal jɔɔ tinyɔɔr ki jon upeeu! Mambu, nsiim chee sei nin ti li tun itoon ŋan likpakɔɔl daala.”

13Le u bei uja-n ke, “Tann a nɔɔu.” Le u tann, le mi jir pɔɔg ke mi miɛnin ni. 14Amaa le Farasii yaabin nyan nkaafiin, ki lol baah li ŋa man ki ku Yisa.

Uwonbɔr a toontun gann kaag a bɔr

15Le Yisa biɛ bi lol nmɔn, ki nyan niin. Le bininfob takpem nɔɔ u bɔɔn. Le u che bibaarib biɛn kan kutebug, 16le ki kpaan bi ke bi laa ta u ki mɔɔn ni. 17U nan tun man le, ke nan wee ulinlenn Azaya nan sɔbin ngbeen.

18“N toontunnu sɔ, u ma le n gann,

wan wee n jiɛ, le n pool sɔɔn u bu.

N li ta n naaŋin ki ŋa u ni.

Le u li mɔɔn tibɔbamɔnn ki sei ibol biɛn.

19Waa na yin jɔɔ limɔkpeli bee ki mɔri.

Uba mu kaa li gbir u kukɔl isanjal bu.

20Waa na yin gen ligbingbaanl lan gen ki gbiɛ gbaari,

ki mu kaa ji na yin junn fila kan kaa gaan nbamɔm nan a ŋmiim ki gbaari.

Hali nin waah na li che tibɔbamɔnn nkan nyaŋim.

21U yinl bu le ibol biɛn nan na li jɔɔ tama.”#Azaya 42:1-4

Yisa nin Beelizebul a bɔr

(Mag 3:20-30; Lug 11:14-23)

22Le bi nan ŋmagin uja uba le nnaanbiim be u ni, ki ŋa u kubirug, ki ji ŋa u ujɔɔn, le Yisa che u kan kutebug, ki nin gaa ki sin pag. 23Le ni nan ŋa bininfobin ligaril, le bi baan tab ke, “U ma ye Defid a yaabilin naa?”

24Amaa Farasii yaabin ma kaah gbir man nmɔn, le bi len ke “Nnaanbiim a bɔru le sei u npɔɔn nmɔn, ke u li nyan nnaanbiim bininfobin.”

25Le Yisa biɛ baah tiɛr man, ki bei bi ke, “Ni ye nnaam nba a ninfob kɔn nin tab ke, bi naam nmɔn yin gab yɔli le. Le kitiŋ kiba a ninfob bee iniin iba a ninfob kɔn nin tab ke iniin nmɔn kaa yin siri. 26Ni ye Sintani ŋɔɔr Sintani ki nyan ke, ni wɔɔn ke u kɔn ki bɔgir u ba le nmɔn; ni yin ŋa nii wee u naam nmɔn n siraa? 27Ke ni ye ke Beelizebul le tenn nim npɔɔn ke n nyan nnaanbiim bininfobin ke, ke nim mu, ŋma sei ni ninfobin nsan ke bi li nyan nnaanbiim maa? Wee bin ŋa ni bɔjib. 28Amaa ni ye n nyann nnaanbiim, Uwonbɔr a Naaŋ bu ke, Uwonbɔr a naamin foon ni ban na.

29“Bee jigin, uba li ŋa niin ki fir kɔɔ lijawagidil a niin ki tan su u wan yɔɔr ki ta nya, see ke u yaa daan chinn ki lol u iŋmin, le ki nin fir kɔɔ ki tan su u wan yɔɔr.”

30“Wan kaa si n bɔɔn ke, u kɔnim le; le wan mu kaa lagin bininfob ki tenn min ke, u ŋɔɔ bi jaar le. 31Mambu le n bei ni nan, Uwonbɔr li jiɛn per bininfob a bir nin ban sugir Uwonbɔr nan biɛn; amaa wan sugir Kinaaŋ nan ke, Uwonbɔr kaa li nyi jiɛn per u daan ni. 32Wan pag tibɔbir ki tenn Uninfosaal a Big ke, Uwonbɔr li jiɛn per u; amaa wan pag tibɔbir ki tenn Kasi a Naaŋin ke, Uwonbɔr kaa li nyi jiɛn per u daan dulinya nan yaan ni, bee dulinya kan na yin dan nin yaan ni.”

Kisiig nin ki looi

(Lug 6:43-45)

33“Ŋa kisiig ki li ŋan na wee ki loon mu li ŋan, bee ŋa kisiig ki li bira wee ki loon mu li bir, nan bu-n kisiig a looi yin le bi biɛr ki. 34Nim iwaalab a buwaab nan, naah ye tininfobir man nan, ni yin ŋa nii wee tibɔŋann nfir nya ni mɔnn naa? Nan bu-n nan wee uninfo tiɛr u sufu ni, ni ma nya u mɔnn. 35Uninfo ŋan le tun itoon ŋan, nan bu-n u sufu ni ŋan le, le kuninfobirug mu tun titoonbir, nan bu-n u sufu bir le. 36Amaa n bei ni le, tibɔr a ji daal Uwonbɔr na li ji uninfo biɛn tibɔr nin baah pag tibɔyɔɔr tan biɛn nin bu. 37Nan bu-n uninfo biɛn a pipagir le na yin nyan u bee ki ku u.”

Ban ban bin kan limagil nan a bɔr

(Mag 8:11-12; Lug 11:29-32)

38Le ban wɔɔnn Uwonbɔr a siim nin Farasii yaab bei Yisa ke, “Wan wɔɔn, ti ban ti kan ligaril a toon le a ban.”

39Le u jiin bi ke, “Daandaan nan a ninfob ban ye titoonbirdam kaa si bogil liba nan ban bin kan ligaril a toon le; amaa n mu kaa yin ŋa ligaril a toonl liba ki wɔɔn bi; ulinlenn Jona a magilin a binba. 40Nan bu-n Jona kaah nan be ujan takpen a poolin ki tan kpaa iweehn itaa nin tinyiɛr titaa nan, man le Uninfosaal a Big mu na li be tum iweehn itaa nin tinyiɛr ti taa. 41Tibɔr a ji daal, Ninefa a tiŋ a ninfob na li sir ki galin daandaan nan a ninfob, nan bu-n Jona kaah nan mɔɔn Uwonbɔr a bɔri ki sei bi n ni bi nan jiɛn bi bira; liga, uba be ki jon Jona u. 42Tibɔr a ji daal Itopiya a Piibɔru na li nyann nnɔɔgan paam ki fii sir paab ki galin daandaan nan a ninfob, nin waah nan nyan kitiŋ a diɛtarig ki dan ke un nan gbir ubɔr Solomɔnn a lamgɔrikaam a bɔr, liga, uba be ki jon Solomɔnn na.

Kinaanbiig kaah jir kɔɔ uninfo ni man

(Lug 11:24-26)

43“Ni ye kinaanbiig nan nyan uninfo ni ke, ki choon yelin le ki jin kukunkɔɔg a paab ki ban lifooril a bol, le kaa ga. 44Mambu, u ti nan bei u ba le ke, ‘N li jir iniin yan wee n nan nyan ni.’ U jir ki tan foo, ki miin iniin nin dɔ yɔli wee bi tigin ki mann ni ke, 45ki yin jir nya le ki jo ki tan yin u nnaanbiim tab milile, ban bir ki jon u, ki ta bi dan, le bin kɔɔ ki lagin be, uninfo nmɔn a binbem li bir takpem ki jo waah nan chinn be man ni. Ni ma na yin dan daandaan nan a ninfobir nan bu.”

Yisa a watiib nin u na a bɔr

(Mag 3:31-35; Lug 8:19-21)

46Yisa kaah la nan be pag ki tenn kuninfogbaluŋin n-yonn man ni, le ki miin u na nin u watiib dan ki nan si nkaafiin, le ki ban bin kan u. 47Le uba bei u ke, “Lig a na nin a watiib si nkaafiin ki ban bin kaŋ.”

48Le Yisa baan uninfo wan bei win ke, “Ŋma ye n naa? Ke ŋmam ye n watiib baa?” 49Le u tann u nɔɔ ki wɔɔn u bɔɔnɔɔb ki len ke, “Lig n na nin n watiib sɔ. 50Nan bu-n wan tun n Baa wan be paab nan a bam ke, u ma ye n waal nin n ninsa nin n na.”

Sélection en cours:

Matiu 12: KUGL

Surbrillance

Copier