Luk 7

Yesu ŵamposisye jwakutumicila jwa jwamkulungwa jwa asilikali ŵa Ciloma

(Mat 8:5-13)

1Sambano Yesu* piŵamasile kuŵeceta yosopeyi kwa ŵandu ŵala, ŵapite ku Kapelenaumu. 2Jwamkulungwa jwine juŵalamulilaga likuga lya asilikali 100 ŵa Ciloma jwakwete jwamasengo juŵamnonyelaga mnope. Jwamasengojo jwalwalaga mwakuti jwaliji ciŵandika kuwa. 3Jwamkulungwajo piŵapikene ya Yesu, ŵatumile acakulungwa ŵane ŵa Ayuda kuti ajawule kukumŵenda Yesu kuti akamposye jwamasengo jwakwejo. 4Piŵayice kwa Yesu, acakulungwa ŵa Ayuda* ŵamcondelele jwalakwejo kuti, “Munduju akusoŵa cikamucisyo ca ŵalakwe. 5Jwalakweju akusalunonyela lukosyo lwetu soni atutaŵile nyumba jakupopelelamo.”

6Myoyo Yesu ŵalongene nawo ŵandu ŵala. Pandaŵi jiŵaŵandicile nyumba jakwe, jwamkulungwa jwa asilikali jwatumile acimjakwe kwa Yesu kukwasalila kuti, “Ambuje, nganguŵajilwa kose kuti ŵalakwe akajinjile m'nyumba jangu. 7Ali ni ligongo lyakwe naliweni namsyene kuti nganguŵajilwa kuti yice kwa wawo. Nambo agambe kuŵeceta liloŵepe nipo jwamasengo jwangu taŵe cenene. 8Unetu ngwete acakulungwakulungwa ŵakundamulila, nambo soni ngwete asilikali ŵingusinalamulila. Ngusatiji naga namsalile jumo kuti, ‘Mjawule’, akusajawula. Naga ngumsalila soni jwine kuti, ‘Myice’, akusayikaga, naga ngumsalila kuti, ‘Mtende camti’, jwalakwejo akusatenda.”

9Yesu piŵapikene maloŵega ŵasimonjile nago, ni ŵagalawucile ŵandu ŵaŵamkuyaga ŵala ni kwasalila kuti, “Ngumsalila jemanja kuti, une nganinacisimane cikulupi mpela celeci sikati ja Aisalaeli.”

10Ŵakutumidwa ŵala ŵawujile ku nyumba ni ŵasimene kuti jwamasengo jula ali alamile.

Yesu ŵamjimwisye mwanace jwa jwamkongwe jwa masije

11Kaneko#7:11 Kaneko: Malemba gane gakala gatite lisiku lyakuyicisya. Yesu ŵajile ku musi wine lina lyakwe Naini, pa ulendowo ŵalongene pamo ni ŵakulijiganya* ŵakwe kwisa soni ŵandu ŵane ŵajinji. 12Yesu piŵaŵandicile pa cipata cakwinjilila m'musimo ŵasimene nawo ŵandu ali anyakwile malilo. Jwakuwajo jwaliji mwanace jwamlume jwa jwamkongwe jujwaliji jwa masije. Ŵandu ŵajinji ŵa m'musimo ŵaliji pampepe ni jwamkongwejo. 13Ambuje piŵam'weni jwamkongwejo, ŵamkolele canasa, ni ŵamsalile kuti, “Mama, mkalila.” 14Yesu ŵayice pakuŵandika ni ŵacikwayiye cindanda pipaliji mundu jwam'wejo. Ŵandu ŵiŵanyakwile malilowo ŵajimi, nipo Yesu ŵatite, “M'mwe mcanda, ngumsalila kuti mjimuce!” 15Mundu jwam'we jula ŵajimwice ni kutama, kaneko ŵatandite kuŵeceta, kaneko Yesu ŵampelece mcandajo kwa mamagwe.

16Ŵandu wosope wakamwile woga, ni ŵatandite kumlumba Mlungu acitiji, “Jwakulocesya* jwamkulungwa atuwonecele pasikati petu. Mlungu ayice kukwakulupusya ŵandu ŵakwe.”

17Mbili ja Yesu jajenele mcilambo cosope ca Yudeya ni ku yilambo yosope yakusyungulila.

Yohane M'batisi ŵatumile ŵakulijiganya

(Mat 11:2-19)

18Ŵakulijiganya ŵa Yohane* ŵamsalile yosope yiyatendekweyo. Jwalakwejo ŵaŵilasile ŵakulijiganya ŵakwe ŵaŵili 19ni ŵatumile kuti ajawule kwa Ambuje kukuwusya kuti, “Ana ŵalakwe ali aŵala ŵele Yohane ŵaŵecetaga kuti taciyika kapena tujembeceleje ŵane?”

20Ŵakulijiganyawo piŵajile kwika kwa Yesu ŵamsalile jwalakwejo kuti, “Yohane M'batisi atutumile kukwawusya ŵalakwe naga ali awo ŵele ŵiŵatiji kuti taciyika kapena tujembeceleje ŵane?”

21Pandaŵi jelejo Yesu ŵaliji mkuposya yilwele yejinji yakulekanganalekangana ya ŵandu. Ŵaliji mkukoposya misimu jakusakala* soni ŵaliji mkwatendekasya ŵandu ŵangalola kuti alole. 22Myoyo Yesu ŵajanjile ŵakulijiganya ŵa Yohane ŵala kuti, “Mjawule mkasalile Yohane yosope yimyiweni ni kuyipikana. Ŵangalola akupakombola kulola, ŵalemale ngongolo akupakombola kwenda, ŵamatana akupola, ŵangapikana akupakombola kupikana, ŵane akwimusidwa kutyocela ku ŵawe, soni Ngani Syambone* syakwamba Yesu sikulalicidwa kwa ŵakulaga.#Yes 35:5-6; 61:1 23Jwana upile mundu jwangakusimana cakusawusya mwa une.”

24Piŵatyosile ŵa mitenga ŵa Yohane, Yesu ŵatandite kwawusya ŵandu ŵala kwambaga ya Yohane kuti, “Ana pimwajawulaga kuŵaliji Yohane mcipululu, mwatiji mkuja mkaciwone cici? Ana litete lyakutenganyika ni mbungo? 25Nambi mwatiji mkuja kulola cici? Ana mundu jwawete yakuwala yetependale? Iyayi ŵandu ŵakusawala mwamti myoyo, akusatama mu umi wangasoŵa cilicose soni akusatamaga m'majumba ga ucimwene. 26Musaliletu, nambi mwajile kukulola cici? Ana jwakulocesya? Yisyene nditu, nambo soni ngumsalila kuti mwajile kukumlola jwakumpunda jwakulocesya. 27Pakuti Yohane ni jwejula jwele Malemba gakuŵeceta ya jwalakweju kuti, ‘Mlole ngumtuma jwamtenga jwangu pasogolo penu, kuti akakolosye cile litala litimcipita m'mwejo.’#Mala 3:1 28Ngumsalila kuti, mwa ŵandu wosope ŵapagwile pa cilambo capasi pano, pangali ni jumo jose jwakumpunda Yohane. Nambo mundu jwali jwamnondi mu Ucimwene wa Mlungu* ali jwamkulungwa kumpunda Yohane.”

29Ŵandu wosope pamo ni ŵakomesya msongo ŵapikene maloŵe ga Yohane, nipo piŵaliji mkubatisidwa ni Yohanejo ŵajiticisye kuti Mlungu ali jwakulungama.#Mat 21:32; Luk 3:12 30Nambo Afalisi* ni aciŵalimu ŵa Malamusi* ga Ciyuda, piŵakanile kubatisidwa ni Yohane ni kuti jemanjajo ŵakanile acimsyene yiŵasakaga Mlungu kuti ŵatendele jemanjajo.

31Yesu ŵapitilisye kuŵeceta kuti, “Ana ŵandu ŵa mpago awunoŵa tinalandanicisye ni cici? Ana ali mpela cici? 32Ali mpela ŵanace ŵakutama pa msika, ni kusalilanaga jwine ni mjakwe kuti,

‘Twamjimbile nyimbo sya pa ulombela,

nambo nganimŵina

Twamjimbile nyimbo sya pa malilo

nambo nganimlila.’

33Piŵayice Yohane M'batisi,

ŵalijimaga yakulya soni nganamwaga finyo,

jemanja mwatiji kuti,

‘Akwete msimu wakusakala.’

34Mwanace jwa Mundu* jwayice,

jwalyaga ni kumwa kwakwe,

nipo jemanja mwatite kuti,

‘Mumlole, mundu jwakutunduka ni jwakolelwa,

m'mbusanga jwa ŵakomesya msongo ŵa ulemwa.’*

35Lunda lwa Mlungu lukusawoneka

kuti luli lwakuwona kwa wosope ŵakulupocela.”

Jwamkongwe jwa ulemwa ŵapakesye mawuta sajo sya Yesu

36Mundu jwine jwa mwikuga lya Afalisi ŵamŵilasile Yesu kuti akalye najo cakulya kumangwakwe. Yesu ŵapite nipo ŵajinjile m'nyumba ja Mfalisijo ni ŵatemi pasi kuti alye. 37M'misimo mwaliji mwana jwamkongwe juŵatamaga mu umi wa ulemwa. Jwalakwejo piŵapikene kuti Yesu akulya m'nyumba ja Mfalisi jula, jwalakwejo ŵayice ni libotolo lya alabasita lya mawuta gakununjila ga mtengo wapenani.#Mat 26:7; Mak 14:3; Yoh 12:3 38Kaneko ŵajile kutindiŵala ku nyuma kwa Yesu. Ŵalisile nipo kaneko ŵatandite kucapa sajo sya Yesu ni misosi jakwejo ni kusijumusya pakukamulisya masengo umbo syakwe jwamkongwejo. Jwamkongwejo jwakwayisye ni ngomo syakwe sajo sya Yesu ni kusipakasya mawuta gala.

39Mfalisi juŵaŵilasile Yesu jula piŵayiweni yeleyi, ŵatandite kuganisya kuti, “Munduju akaŵe jwakulocesya, akamanyilile ndamo syakusakala sya jwamkongweju kuti ali jwa cigwagwa.”

40Yesu ŵamsalile Mfalisi jula kuti, “Simoni* ngwete ngani jakuti nimsalile.”

Jwalakwejo ŵatite, “Aŵecete, Cemwalimu.”

41Yesu ŵatite, “Ŵapali ŵandu ŵaŵili ŵaŵakongwele mbiya kwa mundu jwine jwakukongosya mbiya. Jwine jwakongwele mbiya makumi msano, jwine mbiya msano. 42Ligongo lyakuti jemanjajo nganakola mbiya syakuti awusye, mkukongosyajo ŵakululucile jemanjajo ngongolejo. Ana sambano m'mwejo mkuganisya kuti mwa ŵaŵili ŵala, ŵani ŵitapunde kumnonyela mkukongosya mbiya jula?”

43Simoni ŵajanjile kuti, “Nguganisya kuti jwele juŵamkululucile mbiya syejinji jula.”

Yesu ŵamsalile Simoni kuti, “Mjanjile cenene.”

44Piŵatesile myoyo, Yesu ŵamgalawucile jwamkongwe jula, ni ŵamwusisye Simoni kuti, “Ana myiweni yatesile jwamkongweju? Une njinjile m'nyumba muno nambo nganimumba mesi gakucesela sajo syangu, nambo jwalakwejo ajojesye sajo syangu ni misosi jakwe soni asipukwite ni umbo syakwe. 45M'mwejo nganimungomasya ni ngomo, nambo aju cinjilile amuno nganaleka kungomasya ni ngomo pa sajo syangu. 46M'mwejo nganimumbakasya mawuta mu mtwe mwangu nambo jwalakweju apakesye mawuta gakununjila sajo syangu. 47Ali ni ligongo lyakwe ngumsalila kuti cinonyelo cekulungwa calosisye jwalakwejo, cikusimicisya kuti Mlungu akululucile ulemwa wa jwalakweju uwaliji wejinji. Nambo jwakululucidwe ya panandi akusamnonyela mwa panandi.”

48Kaneko ŵamsalile jwamkongwe jula kuti, “Ulemwa wenu ukululucidwe.”

49Ŵandu ŵane ŵaŵalyaga nawo ŵala, ŵatandite kuliwusya m'mitima mwawo kuti, “Ana ŵeleŵa ŵani, ŵamti mpaka kukululucila ulemwa?”

50Nambo Yesu ŵamsalile jwamkongwejo kuti, “Jawulagani mu mtendele, cikulupi cimkwete cimkulupwisye m'mwejo.”

Sélection en cours:

Luk 7: YAWO

Surbrillance

Copier