Luk 20

Ŵamwusisye Yesu ya Ulamusi wakwe

(Mat 21:23-27; Mak 11:27-33)

1Lisiku line Yesu* piŵaliji mkwiganya ŵandu m'Nyumba ja AMBUJE kwine acilalicilaga Ngani Syambone,* acakulungwa ŵa ŵakutaga mbopesi, aciŵalimu ŵa Malamusi,* pamo ni acakulungwa ŵa Ayuda* ŵayice kwa jwalakwejo. 2Ŵamwusisye kuti, “Mtusalile, ana ulamusi wumkutendela yeleyi mwawujigele kwapi? Ana ŵani ŵampele macili gelega?”

3Yesu ŵajanjile kuti, “Tinimwusye ciwusyo cimpepe. 4Yohane* M'batisi kuti abatisyeje, ana ulamusi wakwe watyocele kwapi, kwa Mlungu kapena kwa ŵandu?”

5Pa ndaŵi jiŵapikene ciwusyoci, jemanjajo ŵatandite kuŵecetana acimsyene acitiji kuti, Ana tujile cici? Jemanja jila ŵatandite kuŵecetana acimsyene acitiji kuti, “Naga tukuti ŵagajigele kwa Mlungu, jwalakwe jula tajile kuti, ‘Nambi ligongo cici nganimumkulupilila Yohane?’ 6Nambo soni naga tujile kuti, ‘Macili gakwe ŵagajigele kwa mundu,’ nikuti ŵandu wosopeŵa tatuponye uwe maganga, ligongo wosopeŵa akulupilile m'mitima mwawo kuti Yohane ali jwakulocesya* jusyesyene.” 7Myoyo ŵagambile kumjanga Yesujo kuti, jemanjajo ŵajanjile kuti, “Ngatukumanyilila kwele kuŵagajigele macili.”

8Jwalakwe jwatite, “Kwali, uwe ngatukumanyilila.” “None jwakwe soni sambano nganimsalila kwele kunajigele macili gakutendela yeleyi.”

Citagu ca ŵamasengo ŵakulima mu mgunda wa yisogosi ya mpeleya

(Mat 21:33-46; Mak 12:1-12)

9Yesu ŵasalile ŵandu citagu* acitiji kuti, “Mundu jwine jwalimile mgunda wa yisogosi ya mpeleya ni ŵawujasimisye kwa ŵandu ŵakulima. Msyene mgundajo jwatyosile ni kwawula ku cilambo cine kuŵatemiko ndaŵi jelewu.#Yes 5:1 10Pijakwanile ndaŵi jakukaŵa yisogosi, msyene jula ŵamtumile jwamasengo jwakwe kwa ŵakulima ŵala kuti akajigale mbuwa jakwe ja yisogosi ya mu mgunda mula. Nambo ŵakulima mu mgunda ŵala ŵamputile ni kumtopola ngampa kandu kalikose. 11Ŵamtumile soni jwamasengo jwine, nombe najo jwaputidwe ni ŵakulima ŵala ni kumtendela yindu ya cipongwe ni kumjawusya ali ŵangali kandu kalikose. 12Kaneko msyene mgunda jula ŵamtumile jwamasengo jwakwe jwatatu. Nombe najo jwaputidwe ni ŵakulima ŵala mpaka kumwulasya, kaneko ŵamponyisye kusa kwa mgundawo. 13Kaneko msyene jwa mgunda jula jwaliwusisye kuti, ‘Ana ndende cici sambano? Tinamtume mwanangu jungusinamnonyela jula, mwine jwelejo takamcimbicisye!’ 14Ŵakulima ŵala piŵam'weni jwalakwejo, ŵasalilene kuti, ‘Jweleju ni jutacimlecela cipanjeci. Kwende tumwulaje kuti ticiŵe cetu cipanjeci.’ 15Myoyo ŵamponyisye jwalakwejo kusa kwa mgundawo ni ŵamwuleje.”

Yesu ŵawusisye ŵandu ŵala kuti, “Ana mkuganisya kuti msyene mgunda wa mpeleya tacitenda cici pitaciyikapo?” 16“Yesu ŵapitilisye kuŵeceta kuti msyene mgundajo tacawulaga ŵakulima mgunda ŵala pa ndaŵi jitaciwuja jwalakwejo ni kwajasimisya ŵane mgundawo.”

Ŵandu ŵala piŵapikene yeleyi ŵatite kuti, “Alece kuŵeceta yeleyo.”

17Yesu ŵalolite ŵandu ŵala ni ŵawusisye kuti, “Ana gopolela kwa Malemba aga kuli cici gagakuti,#Mas 118:22

‘Liganga liŵalikanile amisili ŵakuŵaka nyumba,

lilyolyo lyaŵele liganga lyapandumba, lyakusosekwa mnope.’ 18Jwalijose jwagwila pa ligangapo taciliwulasya cilu cakwe, soni jwalijose jutilicimgwila ligangali tilicigamba kumswanya.”

Ciwusyo cakwamba kukoma msongo

(Mat 22:15-22; Mak 12:13-17)

19Aciŵalimu ŵa Malamusi ni acakulungwa ŵa ŵakutaga mbopesi ŵayimanyi kuti Yesu ŵaliji mkwagamba jemanjajo mcitaguci, pa ligongo lyeleli jemanjajo ŵalinjilile kuti amkamule Yesu ndaŵi jijojo nambo ŵajogopaga ŵandu. 20Myoyo ŵaliji kumlolecesya, ligongo jemanjajo ŵasakaga kumpeleka jwalakwejo kwa jwamkulungwa jwakulamulila upande wa ku Loma. Myoyo ŵatumile ŵandu ŵakumsonda uŵaliji mkulilosya mpela ŵakulupicika. Nambo jemanjaji ŵaliji ŵakusonda ŵasyesyene ŵiŵalinjililaga kuti akamjigale jwalakwejo maloŵe. 21Ŵakumsondawo ŵamsalile Yesu kuti, “Cemwalimu, tukumanyilila kuti ŵalakwe akusaŵeceta ni kwiganya cenene mwangali lusagu. Akusajiganya Malamusi ga Mlungu mu litala lyakuwona. 22Ana Malamusi ga Mlungu gakusatukunda kuti tukomeje msongo kwa Mwenye jwa ku Loma, kapena iyayi?”

23Nambo Yesu ŵasimanyi nganisyo sya ndale sya jemanjajo ni ŵasalile kuti, 24“Mundosye likobili. Ana ngopeji ni linali ya ŵani?”

Jemanjajo ŵajanjile kuti, “Yosopeyi yili ya Mwenye jwa ku Loma.”*

25Yesu ŵasalile jemanjajo kuti, “Sambano mpeleceje kwa mwenye yakwenela kupeleka kwa mwenye, soni mpeleceje kwa Mlungu yayili yakwe ya Mlungu.”

26Myoyo ŵalepele kumsapula mkamwa pameso pa ŵandu pa yele yiŵaŵecete jwalakwejo. Nombe nawo jemanjajo ŵagambile kuti jii, kusimonga ni maloŵe giŵaŵecete Yesu.

Ciwusyo cakwamba ya kwimuka ku ŵawe

(Mat 22:23-33; Mak 12:18-27)

27Ŵandu ŵane ŵa mwikuga lya ŵakutaga mbopesi ŵakolanjidwa Asaduki* ŵayice kwa Yesu. Jemanjajo ŵatiji kuti ŵawe ngasajimuka soni. Kaneko ŵamwusisye Yesu kuti,#Mase 23:8 28“Cemwalimu, Mose* ŵatulembele lilamusi lyakuti, ‘Naga jwamlume akuwa ni kumleka jwamkongwe jwakwe ali jwangali mwanace, mlongo mjakwe jwa mundu jwakuwajo amlombe jwamkongwejo kuti amŵelecele ŵanace mlongo mjakwe jula.’#Det 25:5 29Sambano ŵapali acalume msano ni ŵaŵili ŵa pa ulongo. Jwandanda ŵamlombile jwamkongwe nambo nganamŵelecela jwamkongwejo ŵanace. 30Jwamlume jwaŵili, ŵamlombile jwamkongwejo nambo nganamŵelecela ŵanace. 31Yeleyi yatendekwe soni kwa jwamlume jwatatu. Pambesi pakwe acalume ŵa pa ulongo wosope msano ni ŵaŵili ŵala ŵamlombile jwamkongwejo nambo ŵawile ngamŵelecela jwamkongwejo ŵanace. 32Pambesi pakwe nombe najo jwamkongwe jula jwawile. 33Sambano pa lisiku lyele Mlungu litacajimusya ŵandu ku ŵawe, ana jwamkongwe jweleju taciŵa jwa ŵani, pakuti acalume msano ni ŵaŵili ŵa pa ulongo ŵala ŵamlombile jwamkongwejo?”

34Yesu ŵajanjile jemanjajo kuti, “Acalume ni acakongwe ŵa pa cilambo capasi pano akusalombela ni kulombedwa, 35nambo acalume ni acakongwe ŵitaciŵa ŵakwenela kuŵa ni umi pitacijimuka ku ŵawe ngasalombela kapena kulombedwa. 36Jemanjajo taciŵa mpela malayika,* nipo ngasawa soni, jemanjajo ali ŵanace ŵa Mlungu ligongo lyakuti jemanjajo ŵajimusidwe ku ŵawe. 37Kupitila mu ngani ja liwukutu lyakukolela ni moto, Mose akutulosya uwe cenene kuti ŵandu tacijimuka ku ŵawe. Jwalakwejo jwatite kuti, ‘Ambuje ali Mlungu jwele Abulahamu,* Isaki ni Yakobo* ŵamlambilaga.’#Eks 3:6 38Jwalakwejo ali Mlungu jwa ŵandu ŵali cijumi ngaŵaga jwa ŵandu ŵawe, ali ni ligongo lyakwe kwa jwalakwejo ŵandu wosope ali ŵa cijumi.”

39Ŵane mwa aciŵalimu ŵa Malamusi ŵamsalile Yesu kuti, “Cemwalimu ajanjile cenene.” 40Ŵaŵecete myoyo ligongo Asaduki ŵala nganalimba mtima kumwusya jwalakwejo yiwusyo.

Ya Mkulupusyo

(Mat 22:41-46; Mak 12:35-37)

41Yesu ŵawusisye jemanjajo kuti, “Ana ligongo cici mkusatiji Klistu* ali mwanace jwa Daudi?* 42M'buku ja Masalimo msyene Daudi akuŵeceta kuti;#Mas 110:1

‘Ambuje ŵasalile Ambuje ŵangu,

Tamani ku mkono wangu wamlyo

43mpaka pitinjasandusya amagongo ŵenu,

kuŵa mpela cakuliŵatila sajo syenu.’

44“Myoyo jwalakwejo akusiŵakolanga Daudi kuti ‘Ambuje;’ nambi mpaka aŵe uli mwanace jwakwe?”

Yesu ŵakalamwisye ŵandu kwambaga ya aciŵalimu ŵa Malamusi

(Mat 23:1-36; Mak 12:38-40)

45Ŵandu wosope piŵaliji kumpikanila Yesu, jwalakwejo ŵasalile ŵakulijiganya* ŵakwe kuti, 46“Mkalamuce nawo aciŵalimu ŵa Malamusi. Akusanonyela kwenda ali awete mikanjo jelewu ni cakulinga cakuti ŵandu ŵakomasyeje jemanjajo mwa ulemu m'misika. Akusanonyela kutama pa malo ga ucimbicimbi m'Majumba gakupopelela ni soni ku yindimba. 47Akusiŵalambusya acakongwe ŵamasije* ni kupopelaga mapopelo gelewu. Ŵandu ŵeleŵa tacipegwa cilango kwa mnope kwapunda ŵane.”

Sélection en cours:

Luk 20: YAWO

Surbrillance

Copier