Isaia 8
8
Ilay zanak’Isaia izay manana anarana mifono hevi-dalina
1Hoy NY TOMPO tamiko: Makà fafana lehibe ka soraty eo araka ny fanoratry ny olona hoe: Mahera-Salala-Hasy-Baza, izany hoe: Avy haingana ny famaboana, mihazakazaka ny fandrobana! 2Ary haka vavolombelona mahatoky Aho, dia i Oria mpisorona sy i Zakaria, zanakalahin’i Jeberekia. 3Nanakaiky ny mpaminanivavy aho; dia nanana anaka izy ka niteraka zazalahy. Ary hoy NY TOMPO tamiko: Aoka ny anarany hataonao hoe Mahera-Salala-Hasy-Baza#8.3 Mahera-Salala-Hasy-Baza: Avy haingana ny famaboana, mihazakazaka ny fandrobana.. 4Satria raha tsy mbola mahatonona hoe: Dada! Neny! Io zazalahy io dia hoentina eo anatrehan’ny mpanjakan’i Asiria ny harenan’i Damaskosy sy ny fananan’i Samaria.
Ny fanafihan’ny Asiriana
5Mbola niteny tamiko indray NY TOMPO hoe:
6Satria mandà ny rano Siloa
izay misononoka ity firenena ity
ary mifaly amin’i Rezina
sy ny zanak’i Remalia
7dia indro, hampiakarin’ny Tompo
hanafotra azy
ny ranobe manonja amin’ny ony Eofrata,
dia ny mpanjakan’i Asiria sy ny voninahiny rehetra.
Ho tondraka ny renirano
ary hihoarany ny morony rehetra;
8dia hiriotra mafy izy ka hipaoka ny Joda
ary hanafotra sady mbola hisondrotra ihany
mandra-pahatongany havozona.
Ary ny fivelatry ny elany dia hanenika ny taninao, ry Imanoela ô#8.8 Zahao 7.14.!
Amintsika Andriamanitra
9Mangovita ianareo, ry firenena ô,
fa mbola ho ringana ianareo!
Mihainoa tsara,
ry tany lavitra rehetra!
Misikìna ianareo hiady,
nefa ho ringana ihany!
Eny, misikìna ianareo hiady,
nefa ho ringana tanteraka.
10Makà saina ianareo hanaovana vinavinan’asa,
nefa hofoanana izany!
Milazà teny iray;
fa tsy ho tanteraka tsy akory izany!
Fa aminay Andriamanitra.
NY TOMPO no tokony hatahoranareo
11Fa izao no nolazain’NY TOMPO tamiko raha nihazona ahy mafy ny tanany ka nanariny tsy handeha amin’ny falehan’ity firenena ity aho:
12Aza mba lazainareo ho tetika fikomiana
izay lazain’ity firenena ity ho tetika fikomiana;
aza matahotra izay atahorany ianareo
na mangorohoro noho ny aminy.
13Andriamanitra, Tompon’izao rehetra izao,
no hamasino;
Izy ihany no tokony hatahoranareo,
ary Izy ihany no tokony hampangovitra anareo.
14Dia ho fitoerana masina ho anareo Izy,
fa ho vato mahatafintohina
sy vatolampy mahasolafaka kosa
ho an’ny firenena roa amin’ny Israely,
sady ho fandrika sy tonta
ho an’ny mponin’i Jerosalema.
15Maro no ho tafintohina Aminy
sady ho lavo sy ho torotoro
ary ho voafandrika sy ho voasambotra.
Ny fiandrasana sy ny fanantenan’ny mpaminany
16Tehirizo ny teny vavolombelona,
ary asio tombo-kase ny lalàna eo amin’ny mpianatro.
17Hiandry NY TOMPO
izay manafina ny tavany amin’ny taranak’i Jakoba aho;
hanantena Azy ihany aho.
18Indreto izaho sy ireo zaza nomen’NY TOMPO ahy,
fambara sy fahagagana ao amin’ny Israely
avy amin’Andriamanitra, Tompon’izao rehetra izao,
izay monina ao amin’ny tendrombohitra Ziona*.
19Raha misy milaza aminareo hoe:
Makà saina amin’ny olona izay mpiantso ny fanahin’ny maty sy ny mpanandro,
izay mingonongonona sy miboredidredika!
Moa tsy Andriamaniny va no tokony hilan’ny olona saina?
Moa hila saina amin’ny maty ho an’ny velona va izy?
20Ho amin’ny lalàna sy ny teny vavolombelona ihany!
Raha tsy miteny araka izany teny izany izy
dia ho olona izay tsy hiposahan’ny fahazavan’ny maraina.
21Hivezivezy amin’ny tany amin’ny fahantrana sy ny mosary ny olona;
ary rehefa mosarena izy
dia ho sosotra
ka hanozona ny Mpanjakany sy Andriamaniny
ary hiandrandra izy.
22Hijery ny tany izy avy eo
ka indro, fahoriana sy fahamaizinana ary tebiteby mampanjombona no eo;
ary horoahina ho any amin’ny haizim-pito izy.
Ilay Andrianan’ny fiadanana
23Tsy hanjombona mandrakariva anefa
ilay efa niharam-pahoriana.
Taloha dia natao tsinontsinona
ny tany Zebolona sy ny tany Naftaly;
fa amin’ny ho avy kosa dia homeny voninahitra
ny lalana amoron-dranomasina, any andafin’i Jordana,
dia any Galilia, tanin’ny Jentilisa*.
Sélection en cours:
Isaia 8: MRV
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© La Société Biblique Malgache 2011
