Deoteronomia INDRAY MIJERY
INDRAY MIJERY
Ny hoe Deoteronomia dia midika hoe Ny Lalàna faharoa, na Famerenan-teny. Io anarana io dia avy amin’ny Septanta, ilay dikanteny grika amin’ny Testamenta Taloha, izay milaza azy hoe Deuteronomion.
Ny votoatin’ny Boky
Ny Boky dia fananarana na toriteny lehibe telo, nataon’i Mosesy talohan’ny nidiran’ny Zanak’Israely tao amin’ny tany Kanana. Ampahatsiarovin’i Mosesy ny nitondran’Andriamanitra ny Israely tany an-tany efitra nandritra ny 40 taona, ny namonjeny azy tamin’ny loza sy ny fahavalo maro, ny nanomezany azy ny fanekena tamin’ny alalan’ny didy sy ny teny fampanantenana. Izany rehetra izany no nataon’Andriamanitra dia tsy noho ny fahamarinan’ny Israely fa noho ny fanekena izay nataon’Andriamanitra tamin’i Abrahama sy Isaka ary i Jakoba.
Koa fotokevitra lehibe ato amin’ity Boky ity ny fanekena: Noho izany fitiavana lehibe nasehon’Andriamanitra izany, ny Israely dia tokony ho tia sy hanompo NY TOMPO, Andriamanitra tokana, izay namonjy azy. Ny fananarana rehetra nataon’i Mosesy dia azo fintinina amin’ny Deo 6.4-6.
Ny fitoerana amin’ny fanekena, amin’ny fitandremana ny didy, no hahazoan’ny Israely fitahiana feno amin’ny fiainany manontolo, ary ao amin’ny tany Kanana izy no ho velona sambatra amin’izany fitahiana izany. Fa raha manitsakitsaka ny fanekena kosa izy, amin’ny fandikana ny didin’Andriamanitra, dia ozona no ho anjarany, ary hoentin’ny fahavalo ho babo any an-tany lavitra izy. Rehefa any anefa izy ka mahatsiaro miverina amin’NY TOMPO dia hampodin’NY TOMPO Andriamanitra izy ka hamindrany fo.
Ao amin’ny Testamenta Vaovao dia ny Deo 6.4-6 no anambaràna ny fotokevitry ny Didin’Andriamanitra (Mat 12.32; Mat 22.37), ary teny avy ao amin’ny Deoteronomia koa no nandresen’i Jesosy ny fakam-panahy tany an-tany efitra (Mat 4.4, 7, 10).
Ny fizaràna ao amin’ny Boky
Ny Boky dia ahitana lahateny lehibe telo nataon’i Mosesy, dia ny 1.1–4.44, ny 4.45–28.68 ary ny 28.69–30.20, ary mifarana amin’ny fitantarana ny fanaovam-beloma nataon’i Mosesy sy ny nahafatesany.
Fa toy izao koa no azo izaràna azy:
Tantaran’ny nitondran’Andriamanitra ny Israely hatreo Horeba ka hatrany andafin’i Jordana: 1–4
Fananarana sy fampitandremana: 5–11
Didy sy lalàna samihafa: 12–26
Fitahiana sy ozona: 27–28
Ny fanavaozana ny fanekena tao Moaba: 29–30
Fanaovam-beloma nataon’i Mosesy sy ny nahafatesany: 31–34
Sélection en cours:
Deoteronomia INDRAY MIJERY: MRV
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© La Société Biblique Malgache 2011