Deoteronomia 25
25
Fitsarana marina
1Raha misy olona manana ady ka mankeo amin’ny fitsarana mba ho tsarain’ny mpitsara dia aoka hohamarininy izay marina ary hohelohiny kosa izay meloka. 2Raha tokony hokapohina ny meloka dia aoka hampandrian’ny mpitsara izy ka hokapohina eo anatrehany, ary hatao araka ny helony ny isan’ny kapoka hatao aminy. 3Hatramin’ny efapolo no kapoka azo atao aminy, fa tsy azo atao mihoatra; fandrao raha mihoatra noho izany dia ho toy ny tsinontsinona eo imasonao ny rahalahinao.
Ny omby miasa
4Aza manakombona ny vavan’ny omby manosihosy vary.
Lalàna ny amin’ny vady loloha
5Raha misy mpirahalahy miara-monina ka maty momba ny iray dia aoka tsy hanambady vahiny any ivelany ny vadin’ny maty; fa ny rahalahin’ny vadiny ihany no aoka hanambady azy ka hitondra loloha azy. 6Ny lahimatoa izay haterany dia hitondra ny anaran’ilay rahalahiny izay efa maty mba tsy ho faty maso eo amin’ny Israely izy io. 7Ary raha tsy ankasitrahin-dRalehilahy ny hitondra loloha ny vadin’ny rahalahiny dia aoka hankeo amin’ny vavahady ho eo amin’ny loholona Ravehivavy ka hiteny hoe: Ny rahalahin’ny vadiko dia tsy mety mamelo-maso ny rahalahiny, fa tsy mety mitondra loloha ahy. 8Dia antsoin’ny loholona ao amin’ny tanàna Ralehilahy ka adininy; ary raha mikiry izy ka miteny hoe: Tsy sitrako ny hanambady azy, 9dia hanatona azy eo anatrehan’ny loholona ny vadin’ny rahalahiny ka hanala ny kapa amin’ny tongo-dRalehilahy, dia handrora amin’ny tavany ka hiteny hoe: Toy izany no hatao amin’izay olona tsy mety mamelo-maso ny rahalahiny. 10Ary ny anaran-dRalehilahy dia hatao eo amin’ny Israely hoe Fianakavian’ilay nalana kapa.
Fihetsika tsy azo atao amin’ny fifandirana
11Raha misy olona miady ka manatona hamonjy ny vadiny amin’ny tanan’izay mamely azy ny vadin’ny iray, ary manatsotra ny tanany ka mandray azy amin’ny ankasarotana, 12dia hotapahinao ny tanany; fa tsy hiantra azy ny masonao.
Fahamarinana amin’ny varotra
13Aoka tsy hisy vato roa samihafa, lehibe sy kely, ao anatin’ny kitaponao. 14Aoka tsy hisy famarana mihoatra sy latsaka ao an-tranonao. 15Vato feno lanja sady marina ary famarana tonga ohatra sady marina no aoka hotananao mba ho maro andro ianao any amin’ny tany izay omen’NY TOMPO Andriamanitrao anao. 16Fa fahavetavetana eo imason’NY TOMPO Andriamanitrao izay rehetra mahavita ireo zavatra ireo, dia izay rehetra manao ny tsy marina.
Ny Amalekita, fahavalo amin’ny taranaka mifandimby
17Tsarovy izay nataon’ny Amalekita taminao teny an-dalana tamin’ny nivoahanareo avy tany Ejipta, 18dia ny nitsenany anao teny an-dalana sy ny namelezany ny vodilalanao, dia izay rehetra tsy afaka teo aoriananao, raha reraka sy sasatra ianao; fa tsy natahotra an’Andriamanitra izy. 19Rehefa omen’NY TOMPO Andriamanitrao fitsaharana amin’ny fahavalonao rehetra manodidina ianao any amin’ny tany izay omen’NY TOMPO Andriamanitrao anao ho lovanao dia hovonoinao tsy ho eo ambanin’ny lanitra intsony ny fahatsiarovana ny Amalekita; aza hadinoinao izany.
Sélection en cours:
Deoteronomia 25: MRV
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© La Société Biblique Malgache 2011
