SOERA MOZE I. FAZA 2.
FAZA 2.
I. Fangoroiʼõ loeo wolombase andrõ. II. Fombõi niha. III. Nahia niha. IV. Oroisa. V. Famazõchi ira alawe. Fangoemaʼõ farongasa andrõ.
1I. Si manõ wangasiwai banoea si jaw̃a ba tanõ, awõ nõsi fefoe. 2Ba me loeo si fitoe iʼoʼozoei wombõinia andrõ Lowalangi, nifazõchinia andrõ; ba molombase ia me loeo si fitoe, me no awai wombõinia andrõ fefoe, nifazõchinia. (Moz. II. 20, 11. Moz. V. 5, 14. Heb. 4, 4). 3Ba ifahowoeʼõ Lowalangi loeo si fitoe, niʼamoniʼõ iw̃aʼõ, me no molombase ia ba daʼõ, me no awai halõw̃õnia andrõ fefoe, niwõwõinia ba nifazõchinia.
4II. Daʼõ mbõrõta mbanoea si jaw̃a, fabaja tanõ, me tefazõchi: Me loeo ifazõchi Jehowa Lowalangi danõ, awõ mbanoea si jaw̃a, 5ba lõ eoeʼeoe na ba mbenoea ba lõ sinanõ na ba mbolo mbenoea; lõʼõ na nifoteoe Jehowa Lowalangi tanõ, ba lõ niha na, sonowi menaʼõ. 6Ba saoe zi mõi mijaw̃a moroi ba danõ, inamoi goeli danõ maʼasagõrõ. 7Ba iwõwõi niha Jehowa Lowalangi, tanõ mbõrõta, nihalõ ba mbenoea ba iwoewoesi ba dõgi nichoenia hanoehanoe fangorifi ba tobali sonoso niha andrõ. (Kor. I. 15, 45. Job. 33, 4. Fangomb. 12, 7).
8III. Ba ifazõchi kaboe Jehowa Lowalangi, ba Gedena, tánõ ba gatoemboecha loeo, ba ifaʼaso ba daʼõ niha andrõ, nifazõchinia. 9Ba ifatoemboeʼõ moroi ba danõ ngawalõ geoe sowoea Lowalangi, eoe somasi ita famaigi ba sami boea, ba eoe fangorifi ba daloe kaboe ba eoe famotochi ba dõdõ si sõchi ba si lõ sõchi. (F. 3, 22. Fam. 2, 7; 22, 2). 10Ba sara nidanõ si otarai Gedena, ba wamoʼidanõ kaboe andrõ; ba si fabali dania ia, tobali õfa rozi; si sara, ba Fizona dõi; 11daʼõ zamasoei tanõ Hewila andrõ maʼafefoe, ba nisõndra balaki. 12Ba balaki ba danõ andrõ, ba no si sõchi. Ba tesõndra gõi ba daʼõ mbaloeri ba feremata oena. 13Ba tõi nidanõ si sara, ba Gihona, samasoei tanõ Goesi daʼõ. 14Ba si sara zoei, ba Hideke dõi, jaʼia fõnafõna danõ Asiria; ba si sara, ba Oiferati. 15Ba ihalõ niha no mege Jehowa Lowalangi, ifaʼaso ba kaboe Edena andrõ, ba wangehao ba ba wanaro.
16IV. Ba ibeʼe li ba niha Jehowa Lowalangi, imane: Õʼā saʼae mboea geoe ba kaboe fefoe, 17ba boea geoe famotochi ba dõdõ si sõchi ba si lõ sõchi, ba lõ tola õʼā; õʼā siʼaikõ daʼõ, ba mate ndraʼoegõ! (Rom. 5, 12).
18V. Ba imane Jehowa Lowalangi: Lõ sõchi ba niha, na ha jaʼijaʼia; daʼoefazõchi chõnia nawõ, si fabõbõ chõnia. 19Me noa saʼae ifazõchi Jehowa Lowalangi moroi ba danõ fefoe zaliw̃aliw̃a ba danõ, awõ wofo ba daloe mbanoea, ba iʼohe ba niha, enaʼõ ifaigi, hadia dõi ibeʼe, ba hadia siʼai nibeʼe niha tõi zonoso andrõ, daʼõ dõira dania. 20Ba ifotõi niha fefoe goerifõ niha, awõ wofo ba daloe mbanoea, awõ goetoe ndroeʼoe fefoe; ba ba niha, ba lõ faloecha nawõ, si fabõbõ chõnia. 21Ba ifafõrõ niha Jehowa Lowalangi, femõrõ sabõlõ, ba me no mõrõ ia, ba ihalõ zara dõla nosoenia ba ifoʼõsi nagole nahania. 22Ba ibaliʼõ ira alawe Jehowa Lowalangi dõla nosoe andrõ, nihalõnia ba niha, ba ifasao ba niha. 23Ba imane niha: Tõla fõfõ dõlagoe daʼõ ba nagole fõfõ nagolegoe; labeʼe tõinia ndra alawe, me no ba ndra matoea tehalõ ia. (Kor. I. 11, 8). 24Andrõ iʼerogõ ndra amania inania niha, ba molemba ia ba ngambatõnia, ba tobali ha samboea boto ira. (Mat. 19, 5. Kor. I. 6, 16. Efes. 5, 31). 25Ba si lõ noecha ira, daroea ira niha ngambatõnia, ba lõʼõ sa aila ira.
Sélection en cours:
SOERA MOZE I. FAZA 2.: NIA
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.