San Mateo 11

Juan chi õor por choomieu ich khapeen pʉitarr

(Lc. 7:18-35)

1Mag maach doce ich dʉi ogdʉba wenʉrraajerr khʉʉnag mag nem jaaudubwi, wetpi jaaubaawai, maar wetjim. Magbaawai jũrr ich deeum phobor nʉnʉidʉmʉg petajim, ich ag durr eepai, mamaam khʉʉnagjã agjo maach peerdʉajem iek jawaag.

2Ich maagwai Juanau cárcel deg simua Cristoou nem wau nʉrrʉm ũr sĩejim aajem. Magbaawai ich khapeen eem ãaur khʉʉn ich aig thʉ̃rkha auwi chi Jesús aar pʉijim aajem, 3i aar mawi, iita chadcha ich Ẽwandam i jaaumienau jaauwai Ẽwandamau pʉiju jaaujerrá wa ar khabam khai ich jãg nʉag a khap jeeumkhĩir. 4Mag beewi, chadcha ichig jeeubaicheewai, ich Jesuu amag, —Ereubaadewi Juanag jaaubaimat ajim anʉm, pãach jʉ̃gʉucha ũrnaa pãach daúacha mʉg oobarm. 5Irig, “Dau khaugba khekhed arr khʉʉn dau wajapha thʉnʉm” abat. “Bʉ wedʉ wedʉ sĩsid arr khʉʉnjã ya wajapha nʉrrjeem. Kach khĩsu sĩsid arr khʉʉnjã wajapha ũr sĩsidʉm. Chi meem arr khʉʉnjã deeu iiu nʉrrjeem, maimua aphʉʉm khʉʉnagjã ĩchab õor peerdʉajem iek jaau chirʉm” a jaaubaimat ajim. 6Magnaa ĩchab irig, “Chi mʉ iek ʉkhawi ogdʉba mʉ gaai ʉkha chirʉm wounan onee ich mag chitaju a jaaubaimat” ajim anʉm, mag ichig jeeuwimarr khʉʉnag.

7Mag chi Juan khapeen ich aig naawi deeu ereubaadeewai, ich aig narr khʉʉnagta Juan igwi iekhamamua amag magjim anʉm:

—Pãrau Jordán igaau woun Ẽwandam i jaau nʉrrʉm oon weetwai, ¿sĩi woun iek theeg chukhu phũu choomaar sõsõii jũurba ahau aajemjokhamta oon wetjierrá? Magʉm woun khabajim. 8Magan, ¿khanim wounta oon wetjĩma? ajim anʉm amag. ¿Woun khajũa wajapha jũa simta oojupii awi oon wetjierrá? Pãrau khaphʉ nʉmgui ajim anʉm, khajũa wajapha jũajem khʉʉnan sĩi phobor ee di ooimʉm eeta naajem, reinaan dʉi ãba. 9Mamʉ pãrau magjomta ooimabajierram. Pãrau ooimatarran woun ãb Ẽwandam i jaau nʉrrʉm ajim. Mamʉ pãade ũrbat: Juan chan warrgar Ẽwandam i jaaujerr khʉʉnjopai khaba, am khãaijã ʉ̃rpaita simgui ajim anaabá. 10I igwia Ẽwandamau ich i jaaumienag warrgarwe ich iek phãpitarr gaai jaauwai,

Jãata irua mʉ na pʉiju ajim, ichdeuta mʉ na mʉ maju ee õrag jaau peetwai thumaam khʉʉnau mʉ iek ũrm khõsi sĩi mʉ nʉ naamkhĩir. (Mal. 3:1)

11’Magua, mua pãrag mʉch imeerba jaau chirʉmgui ajim anʉm ich Jesuu: Warrgar Ẽwandam i jaaujerr khʉʉn eejã Juan chi õor por choomie khãai ʉ̃rʉʉcharam chan ãbjã chukhu ajim. Mamʉ chi mʉ iek ũrwia, mua nem waubarmjã khaphʉnaa, Ẽwandamta ich thãar ee au sim wounan chadau, maadeu nem igba khitawiajã, Juan khãyau khapcha ajugui ajim anʉm, jãga Ẽwandam ichdeu õor peerdʉ atham thãar ee sĩeicheejẽ.

12Mag jaaumamua, —Pãrag jaaukhimgui ajim anʉm: Juan sĩsierr aigmua ĩs ewagjã chadcha õor pom Ẽwandamagta amach thãar ajaug paapinaa amach Porkha aum khõchkha thʉnʉm. Pari amau mag ẽkha durrum dʉi ĩchab chi thethem khʉʉnau jũrr khajapham nemjo mag Ẽwandam amach Porkha auju iekta warre chugpaapʉiju ẽkhaajem. 13Warrgar Ẽwandam i jaaujerr khʉʉnau jaaujerr iek dʉi Moiseeu ley phã pʉatarran, sĩi Juan bee nʉm ora Ẽwandamauta mag õor thãar ajaug paanaa am Porkhaan beeju khap jawaag ajim. Magtarr aawai Juan beewi jaauchetarran mag warrgarwe mʉ igwi amau jaaujerrjo aadem ajim. 14Maagwai mag i iek ʉkham khõsi nʉm khʉʉnau khaphʉ ajugui ajim anʉm, Juanan warrgarm profeta Elías aajerr beeju jaaujerr kõit pʉiwiata jãg nʉrrajim.

15Magnaa ich Jesuupai, —Keena, jʉ̃g ʉ̃rʉʉnaa cha mua jaau chirʉm wajapha ũrbat ajim anʉm.

16Mag iekhakhagmamua, maach Por Jesuu aig narr khʉʉnag, —Mua pãrag jaaukhimgui ajim anʉm, pãar jãga nʉm abarí. Magnaa, Pãar ar Juan isegwi mʉjã iseg nʉm khʉʉnan, chaain jemkha nʉmua amach khapeen dʉi khĩir auphobaademjota nʉmgui ajim anʉm. Warm khʉʉn garmua, “Maar dʉi karris sir nʉm gaai onee jemkhabahut” aawaijã jemkhamapha nʉm. 17Maimua jũrr, “Magan sĩi okhĩirjuu õor mee wai nʉm aiguimjo ohood abat” aawaijã magjã khõchkhaba nʉmgui ajim anʉm. Paarjã magta naawai, ¿khani khõsi nʉmma? ajim anʉm. 18Pãar ee Juan chi õor por choomie nʉrraajeewai irua Ẽwandamag jewaag sʉrkhaajeejim, ajap thach khoba. Magʉm vino chará bʉ̃ʉrjã dobajim. Mamʉ mag oowi pãrau, “Jãan mepeer dʉi khapeerkha sĩewaita sĩi ich jãg aai thach khoba nʉrraajem” a iekhaajem pãrau. 19Mamʉ ĩs mʉch chi Emkhooi Iewaa chaar beewi, pãach dʉi parhooba thachdamjã khonaa vinodampa do khitaawai, jũrr magjã khõchkhaba warag pãrau mʉ eugar, thach bipom khonaa vino pigjã chitʉm aajem. Magnaa gobierno debpaar jeeu nʉmua õor khũguurjem khʉʉn dʉijã khapeerkhanaa pekau pom sĩsidʉm khʉʉn dʉipa khapeerkha chitʉm a iekhaajerramgui ajim anʉm, mʉjã iseg nʉm iekhau. Pari ar chi Ẽwandamau khĩirjug deetarraucha khĩirju nʉm khʉʉnau chan magba, amau chadcha khaphʉ nʉm, chijã khʉʉnta ich Ẽwandamaucha pʉitarr khʉʉn agá a iekhamajim aajem.

Jesuu ich nʉrraajerr phobor igwia iekhatarr

(Lc. 10:13-15)

20Jesuu oowai irua ʉ̃rcha ag na õrau nem ooba aajem nem waumatarr phobor eem khʉʉnauta bʉ̃ʉrjã Ẽwandam igba ni i iekjã ʉkhaba naajim anaabá. Magbaawai khĩesir iekhamamua makhʉʉn phobor eem khʉʉn igwiata magjim anʉm:

21—¡Eh, apdurr, Corazinpien! ¡Eh, apdurr, Betsaidapienjã agjo, Ẽwandamau am i agkham ed! Am ee nem ooba aajem nem wau nʉmua Ẽwandamau ich juapá oopitarr Tiro phobor eeta wa Sidón phobor ee khãijã wautarr amuan, nawe amau amach khĩirjug khaigbam isegwi sʉrkhakhamgui ajim anʉm. Magtarr amuan amau theerju theerwia, ʉ̃r jupnaa, putiu por borrnaa, khoopa nʉm khʉʉn sʉrkhaajemjo sʉrkhakham. Mag nʉmua amau amach mor ãsie ewag khĩirjuwia Ẽwandamag jeeukham, amach khaibag chugpamkhĩir. 22Pari cha mʉ iekha chirʉm iekhau Ẽwandamau mʉg durr i agkham ed Corazinpienta Betsaidapien dʉi irua am gaai masiicha waupʉijugui ajim anʉm, Tiropien dʉi Sidonpien khãaijã, amachdeu ũrtarrta ʉkhaba arr gaaimua. 23Maagwai Capernaumpien igwiajã, ¿khan abarju? ajim anʉm. Magnaa ichdeupai, ¡Eh! Amaun amach tho nʉmgui ajim anʉm, amachta chi wäjäaun awia. Amaun ʉ̃gthar paaukhabaimaajã amachta chi pornaan khajupii nʉm. Mamʉ jãkhʉʉn chan Ẽwandamau ich aar obeerpiba, khĩmie durrta warag barkhʉʉipʉijugui iekhamajim aajem. Sodoma phobor eeta jãg pãar ee õrau ooba aajem nem waumatarr wautarr amuan, jãg phobor agtha sĩerrakham, Ẽwandam iek ʉkhatarr gaaimua. 24Pari mʉ cha iekha chirʉm iekhau Ẽwandamau mʉg durr i agkham ed gaai, pãar gaaita Ẽwandamau athuucha mas deejugui ajim anʉm, Sodomapien khãaijã.

Jesuu, “Mʉ iekta ʉkhabat, mua pãar khĩir meeupiju” a iekhatarr

(Lc. 10:21-22)

25Ich mag jaar ĩchab ich Jesuu ich Ayag jeeumamua, —Tata, mua pʉrʉg ʉu ajim a chirʉmgui ajim anʉm, pʉchta ʉ̃gtharm magwe nem thum mʉg wejom Por aawai. Mʉ onee chirʉmgui ajim anʉm, õor amach khĩirjug khaug thowia, nem thum khaphʉm khaphʉm aajem khʉʉnaujã amach peerdʉju iek khaugba arrta, jũrr pua khĩirjugdam meraa chaainjo khitheem khʉʉnagta ʉu khaugpibaawai. 26Chadcha puata nem wajapha waaujem Tata, pʉchdeu juau am dʉi magju atarr aawai ajim aajem mag jeeumamua.

27Mag ich Ayag ʉu ajim awia jũrr aig narr khʉʉnagta, —Nem thum mʉg thʉnʉmʉn mʉ Ayau mʉrʉgta deejimgui ajim anʉm. Mamʉ ãbmuajã khaugba sim, khai agá i Iewaa. Ãba ich mʉ Ayaupaita khaphʉ sim, chadcha mʉ i Chaairau. Mʉg nʉm aig ãbmuajã khaugba sim, khai agá mʉ Aai. Ãba mʉch chi Chaairaupaita mʉch Aai khaphʉ chitʉm. Bigaaum khʉʉnau khaphʉ aju awiajã, mʉchdeu amag jaaubarm khʉʉnaupaita ĩchab khaphʉ aju aai nʉmgui ajim anʉm. 28Magua, muan pãragan, chadcha mʉ Aai khap am khõsi nʉm khai, mʉ iekta ʉkhabat a chirʉmgui ajim anʉm. Pãach pekau pomag khaphʉnaa okhĩirjugau gaai machaaga nʉm khʉʉn, mʉʉta pãrau pãach thãar ee aumʉn, muata pãar okhĩirjug meeupijugui ajim anʉm. 29Ideu mʉrʉgta ʉdʉraa pãachig nem jaaupibat; muan okhar ithũuta jaaumaajem. Pãrau mua jaau chirʉm ipierraata amʉn, ʉu pãar khĩir meeu nʉisiju. 30Mua nem jaau chirʉm chan atcha phithurg aawai pãrau podbajojoom khabam. Muan nem thum pãachdeu podju ayaam nemta jaaujemgui a jaaumajim aajem.

Sélection en cours:

San Mateo 11: noaA

Surbrillance

Copier