Versets bibliques populaires de Isaya 58

Partager

Lino Jehova uyookweenzya lyoonse, akukatalusya moyo wako mumasena mayumu. Uyooabila zifuwa zyako inguzu, nkabela uyooba mbuli muunda uutuntulilwa, ambuli butoolo bwamaanzi buli amaanzi aatayuminini.

Sa kuliimya nkunjanda mebo takweensi kwaangununa zyaanzyo zyabubi, kusungulula intambo zyajokwe, kulubula bapengede kuti beende, akutyolaula majokwe oonse? Sa takweensi kwaabila basinzala cilyo cako, kunjizya bapengede batandidwe muŋanda yako, kusamika simudukwa nomubona, akutayuba kumeso aabantunyokwe?

Lino mumuni wako unoemunika mbuli bucedo, nkabela uyoofwambaana kuponezegwa. Bululami bwako buyookusololela, abulemu bwa-Jehova buyookusindikila.

Uyooita, nkabela Jehova uyoovuwa; wakwiila buyo, uyooamba kuti, Mpendi. Na wagwisya majokwe aali akati kanu, na waleka kutondesya munwe akwaamba bubi

na waabila basinzala zilyo zyako akukutya myoyo yabapengede, lino uyoocedwa mumuni mukati kamudima, aciindi cisia mbi ciyoosanduka kuba mbuli isikati.

Lino bana bako bayooyakulula matongo aaciindi; uyoobukulusya intalisyo zyamazyalani aakamana; nkabela uyootegwa kuti sikumama myaatuko, sikubukulusya meendelo aamakalilo.

Na wakasya maulu aako kusofwaazya Sabata, na waleka kucita ncoyanda omwini buyo mubuzuba bwangu busalala, na buzuba bwa-Sabata mbuyandisi mumeso aako, alimwi buzuba busalala bwa-Jehova mbulemu, na wabulemeka kukutatola inzila zyako omwini nikuba kulibotezya buyo nikuba kwaamba majwi aabuyo, lino unoolijanina busekelezi muli-Jehova, nkabela njookutansika amasena aasumpwidwe aanyika akukulisya caabilo causo Jakobo, nkaambo mbuboobo mbuuamba mulomo wa-Jehova.

Ma! Kuliimya kwanu kulabusya inkondo akukazyanya buyo, mane lumwi mulauma antuku zyanu zyabubi. Kuliimya obo mbumucita sunu takukonzyi kusisya majwi aanu kujulu pe. Sa kuliimya nkunjanda kuliboobo? Sa mbobuzuba muntu naapenzya moyo wakwe? Sa nceciindi cakukotamya mutwe wakwe mbuli itete akuliyalila zisani zyamasaka atwe? Sa nceeci ncimuyeeya kuti nkokuliimya kulya abuzuba butambulika mumeso aa-Jehova?