Zohan 18
18
Isuo ei Ānsūrna
Mt 26:47-56; Mk 14:43-50; Lk 22:47-53
1 #
2Sa 15:23; Mt 21:1; 26:36 Isuo'n hiva chong ngāi a ril suona, a zolāi ngāi le han Kidron tiva varāla a suok u na. Hava han rahuon khat a om a, ama lē a zolāi ngāi hava han a lūt u na. 2#Lk 21:37Ama ānsūr rang pū Zuda'n um hava mun ha a riat a. Asik chu Isuo'n a zolāi ngāi chu hava muna han anmūpui chok a. 3#Kui 1:16Zuda'n sipaiphom angkhat lē chāizūng ulian ngāi lē Farisāi ngāi kōm ātā tempul sipai senkhat a ruoi a, lēmton, moiser, kuttuk tin le hava han a hong u na. 4Hasikhan, Isuo'n a chunga ātung rang dōra a lei riat a. A va pan a, a kōm u na, “Tū mo nei ravān u?” a tī na. 5#Mk 1:24Amānī'n a kōma, “Nazaret-a Isuo,” tīna a masang u na. Isuo'n a kōm u na, “Koi hi kā ni,” a tī na. Zuda, ama ānsūr rang pū'm amāni bila anding a. 6Amā'n amāni kōma, “Koi hi kā ni,” a ti le chu, anūk ankei u na, phila anluoi u na. 7Amā'n a kōm u na, “Tū mo nei ravān u?” tīna a rakel a. Amānī'n, “Nazaret-a Isuo,” a ti u na. 8Isuo'n, “Koi hi kā ni, tīna ka na manthei u zei hale. Hasikhan, nangnī'n koi hi nei na ravān a ni u ten, hiva ngāi hi mansē u ta ro,” a tī na. 9A chongril, “Nangin nei na pēk ngāi angkhattē ngal pei mak ung,” tī ha ei kip theina rang a ni. 10Simon Peter-in a khendāi dōn a lāk a, chāizūng ulian khīt a suok, a chang kuor a tukpē ving a. Hava suok raming chu Malka a ni. 11#Mt 20:22Isuo'n Peter a kōma, “Na khendāi chu a koka thāl ro. Ka Pā'n ei na pēk khuri hi kei buong rang ni mak mo?” a tī na.
Anna Matona Isuo
Mt 26:57-58; Mk 14:53-65; Lk 22:54
12Hatuka sipaiphom ngāi, sipai ruoipu ulian lē tempula Zehudi sipai ngāiin Isuo chu asūra a khit u na. 13#Mt 26:3Anna kōma a ruoi mānsa u na. Ama hi Kaiafa a tarpū, hava kuma chāizūng ulian khīt a ni. 14Hiva Kaiafa hi a ni, mipui rathūla mī khat ei thī chu asa tīna Zehudi ngāi kōma huongvār āpēkpū chu.
Peter-in Isuo ei Maniang Voi Khatna
Mt 26:69-70; Mk 14:66-68; Lk 22:55-57
15 #
Mt 26:3, 58; Mk 14:54; Lk 22:54 Simon Peter lē a zolāi atei khatin Isuo a zī u na. Hava zolāi ha chāizūng ulian khīt mēlriat a ni. Ama chu chāizūng ulian khīt a tuomāia Isuo bila a vā lūt a. 16Tenchu Peter chu apanga suokkhār kōla anding a. Hatuka zolāi ateipū, chāizūng ulian khīt a mēlriat ha apanga a vā suok a, suokkhār angāk nupang a vā chongpui a, Peter chu insūnga a ruoi a. 17Suokkhār angāk nupangin Peter kōma, “Nang um hiva mī a zolāi ngāi bila angkhat ni mak che mo?” a tī na. Amā'n, “Ni mak ung,” a tī na. 18#Mk 14:54, 67Ei dāi sika han suok ngāi lē tempul sipai ngāi chu moirohol le han moi athōna hava han andinga ansuo u na. Peter um amāni bila andinga moi an-uo na.
Chāizūng Ulianin Isuo ei Rakelna
Mt 26:59-66; Mk 14:55-64; Lk 22:66-71
19Chāizūng ulian khītin Isuo chu a zolāi ngāi rui lē a mi manchūna rui a rakel a. 20#Mt 26:55Isuo'n a masang a, “Vāngtāng riata maniapūr kōma chong ka ril chachak a. Sinagog ngāia lē tempula, Zehudi ngāi ei āntong una muna ka manchū chachak a. Maruka kei tī ītē om mak. 21Ichang mo nei na rakel u? Ka chongril āriat ngāi kōma rakel u ro. Amānī'n kei ril ngāi chu a riat u.” 22#Mt 16:21Amā'n hiva chong ngāi a ril suona, a kōla ānding sipai ruoipu ngāi bila angkhatin a mazā le Isuo ā bēn a. Amā'n, “Chāizūng ulian khīt chu hantin han nei masang mo?” a tī na. 23#Mt 5:39; Kui 23:2-5Isuo'n a kōma, “Āsiat kei ril a ni ten, ei siatna mandang ro. Tenchu āsa kei ril a ni ten, ichanga mo nei na zēm?” tīna a masang a. 24Hatuka Anna'n ama chu ankhit chunga chāizūng ulian khīt Kaiafa kōma a mathuon a.
Peter-in Isuo ei Maniang Voi Annina lē Voi Anthumna
Mt 26:71-75; Mk 14:69-72; Lk 22:58-62
25Simon Peter chu anding chunga moi an-uo na. Hatuka amānī'n a kōma, “Nang um a zolāi ngāi bila angkhat ni mak chē mo?” a ti u na. Amā'n maham mak a, “Ni mak ung,” a tī na. 26Chāizūng ulian khīt a suok khat, Peter-in a kuor ei tanpē ving a ūnāiin, “Ama bila rahuona kei na mū ni mak mo ha?” a tī na. 27Peter-in maham rēt mak a, ār chu a khuong len a.
Isuo Pilat a Kōma Anbetōk
Mt 27:1-2; Mk 15:1-5; Lk 23:1-7
28 #
Mt 27:2
Hatuka ārkhuona Isuo chu Kaiafa kōm ātā ramoppū ruirilna ina a ruoi u na. Amāni chu ei ānnim u nōkna ranga ramoppū ruirilna ina lūt u mak a. A lūt u ten Kallēn Pāntāna vāipōltāp chu sāk thei u nō ni. 29Pilat chu amāni kōma a vā suok a. Amā'n, “Hiva miring aduia hong nōntāk mo nei hong chōi u?” a tī na. 30Amānī'n a kōma, “Ama hi āsiat āthōpū ni nō sela chu, na kōma hong betōk nō ma ni?” tīna a masang u na. 31Pilat-in a kōm u na, “Nangnī'n ruoi u tānla, na dān u anga a chunga ruiril u ro,” a tī na. Hasikhan, Zehudi ngāiin a kōma, “Mī that ranga dānin koini na phal mak,” a ti u na. 32#Mt 20:19Isuo'n ei thi rang dān rui a lei ril ha, ei hong kip theina rang a ni.
33 #
Mt 2:2; Lk 23:3 Hatuka Pilat chu ramoppū ruirilna ina a vā lūt rēt a, Isuo a pāi a, kōma, “Nang hi Zehudi ngāi rēng mo nā ni?” a tī na. 34Isuo'n a kōma, “Hiva rui hi na ninga nei tī mo ole mīteiin ka rui ei na rila nei tī mo?” a tī na. 35Pilat-in, “Koi hi Zehudi mo kā ni? Na nam ngāi lē chāizūng ulian ngāi kēng ka kōma a nā'n betōk u. Hong mo nei thō a ni zei?” tīna a masang a. 36#Mt 3:2; 26:53; Lk 17:21Isuo'n, “Ka rēngram chu hi maniapūra ni mak. Ka rēngram chu maniapūra ni sela, anbetōka kei om nōkna ranga, ka suok ngāiin Zehudi ngāi anduipui u'n ti. Tenchu atun hin ka rēngram chu hiva hin ni mak,” tīna a masang a. 37#1Zn 4:6Pilat-in a kōma, “Hanōkten rēng mo nā ni?” a tī na. Isuo'n, “Nei tī a dik, rēng kā ni. Hiva sika hin kei hong ānzir, hiva sika hin maniapūra kei hong a ni, atak anriat ranga a ni. Tūkareng ataka om chu ka rōl a rangāi u chachak,” tīna a masang a.
Mipuiin Barabba ā Thang
38 #
Lk 23:4
Pilat-in a kōma, “Hong mo chongtak?” a tī na. Hava a ti suona, Zehudi ngāi kōma a vā suok rēt a. Amāni kōma, “Koiin ei siatna ītē mu mak ung. 39Tenchu Kallēn Pāntāna hin mī khat nangni ranga kei mazōk rang dān nā dōn u na. Hasikhan nangni ranga Zehudi ngāi rēng kei mazōk rang nā zōt u mo?” a tī na.
40 #
Kui 3:14
Alom una ankhēk rēt u na, “Hiva mī hi ni mak, tenchu Barabba kēng,” a ti u na. Barabba chu mīsuompū a ni.
Tällä hetkellä valittuna:
Zohan 18: RNL
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Bible in Ranglong, © Bibles International, the Bible society of Baptist Mid-Missions, 2024.
