Mateghusi 9
9
Merukitho ghamurume ghokughara
(Mark 2:1–12; Luk 5:17–26)
1Jesusi gha peramine muwato no gha tjinaghanine dikuruviya, gha huke kudighumbo dyendi. 2Ko kumuretera kwawo murume ghokughara kuyikorwa yomuyu. Pakumona Jesusi matawero ghawo, ha ningi kwamurema eshi: “Muhakwa, tjimape, maharawero ghoye ghana pu kuthigherera.”
3Hakamarukwaro hamweya, ha ghambathanine mumwawo hathinda eshi: “Oyu, Nyambi ghana kushedhaghura.”
4Ene Jesusi gha dimukire yighayara yawo, no gha wa tongwerire eshi: “Nye mwa karera noyighayara yondhanyi mumitjima dhenu? 5Nye yoyiredhu po, kuninga eshi: ‘Maharwero ghoye ghana pu kuthigherera,’ endi kuninga eshi: ‘Wimane ghu ka yende’? 6Ene pan̂anyi‐n̂anyi, na kumudimukitha shemwa eshi, Mwanamunu gha kara nongcamu dhokuthigherera maharwero.”
Ha ningi kwamurema eshi: “Wimane tumbure thirongo thoye ghu ka yende kukwenu.”
7Naye ghemanine no gha hukire kudighumbo. 8Apa dha yi monine mbunga dhawanu, dha tutukwire ghu kugha Nyambi nowoma, oyu gha tapire ngcamu dhokemo kwawanu.
Methero ghaMateghusi
(Mark 2:13–17; Luk 5:27–32)
9Oku shime ha runduruka Jesusi kuyendaghura kemo, ko kumona kwendi murume ghodina dyoMateghusi ghana hungumana mundhugho dhodiketo, no gha ningire kukwendi eshi: “Ni kuthe!”
Naye ghemanine no gha mu kuthire.
10Jesusi gha yendire gha ka dye mundhugho dhendi. Haketethi hohengi nawakamaharwero, heyire ha dye pofotji nawakathishongero waJesusi. 11Apa ha yi monine Hafarasayi, ha ningire kwawakathishongero wendi eshi: “Nye ghana kudyera Muhongi wenu pofotji nawaketethi nawakamaharwero?”
12Ene Jesusi gha yi yuvire no gha ningire eshi: “Oyu gha kara ndjewa‐ndjewa, mbadi gha nyanda nganga, mukatjitju ndani. 13Mu yende mukakuhonge edi ya ninga yi: ‘Na haka thin̂eke, kadi muyambo.’ Yoyishi mbadi neyire kukwitha hahunga, ne hakamaharwero ndani.”
Makuporero ne ghana pu
(Mark 2:18–22; Luk 5:33–39)
14Munako dhi, heyire hakathishingero waJohannesi kwaJesusi no ha mwipurire eshi: “Nye tuna kudhirerekedheranga twe naWafarasayi, hakathishongero woye ne, kadi wa kudhirera?”
15Jesusi gha wa huthi eshi: “Ku kona kutokota mugenda wawakamukandi, oku thindashamukandi nawo gha di ndi? Ne mbo dhi neya nako edhi mbo gha wa tunditha thinda shamukandi, ndani po mbo ha dhirerekedha.
16“Noyofotji temba ghokuriveka thirivo thothipya pathidjova. Yoyishi thirivo thi, thina kuyononona thivata no dituywera dina kuyaghaya. 17Munu mbadi gha kona kutera vinyu mukandimbe kokakuru‐kuru, vinyu ghana kuvinya no kandimbe kana kupayuka. Munu gha pake vinyu mukandimbe kokapya, kemo sho yi kurikanye.”
Mukamadighana ghomwana mukamuragho waWajuda. Mukamadi ghon̂ongoro
(Mark 5:21–43; Luk 8:40–56)
18Oku shime gha karera Jesusi mukutongwera hanu yi, ko kwiya mukamuragho ghomasinagoge, no gha tongamenine kughutho wendi ghuninga eshi: “Mwanange n̂anyi‐n̂anyi ghana kufa. Wiye ghu ka mu kambeke nyara dhoye, ngo n̂anyi gha kare karo muyumi.”
19Jesusi ghemanine no gha yendire pofotji nawakathishongero wendi namurume yu.
20Mukamadi yu gha nyandire kun̂ongoro myaka dikumi nodhiwadi, naye gha pindurukire kumughongo waJesusi, ha kunyuna kumukungo ghothivata thendi. 21Yoyishi thinda gha ghayarire eshi: “Ngo ni kunyune vene kumukungo ghothivata thendi, ho niruke keho.”
22Jesusi gha pirukire no gha mu monine, ho gha ningire eshi: “Tjimape mwanange, matawero ghoye, ghana kughamwena.” Kapupi podigho popo ko kwiruka mukamadi.
23Munyima Jesusi ghengenine mundhugho dhamukamuragho. Apa gha monine mo hakakushigha mapori, no hana kukara hanu muthurungu mundhugho, 24gha ningire eshi: “Mu shwaghe, yoyishi mukamadighana ne mbadi ghana fu, kurara vene ghana rara.” Awo ne ko kumuheka rugharwera. 25Pakumana kutjidha hanu, ghomupinuko kungoda, ha kwata mukamadighana padyoko gha mu tumune.
26Mbudhi dhi ne dha pupanine muthiko thothiheya.
Merukitho ghawakunga hawadi
(Mat 20:29–34)
27Kutunda po eshi gha yende Jesusi shime kughutho, ko kumukutha hakunga hawadi. Awo ha kughererire kughererire eshi: “Ghu tu fere n̂eke Mwana Davita!”
28Jesusi ghengenine mundhugho, nawakunga nawo ko kwingena. Ha wepure kwendi eshi: “Muna tawa eshi kukona kuyitenda me yi ndi?”
Ko kuhutha wo eshi: “Kemo Fumu.”
29Ha kundama kumeho ghawo ghuninga eshi: “Eyi muna tawa, yina kukara kemo.” 30Ko kukona kwawo kumona. Ene Jesusi gha wa shingire thikuma eshi: “Noyofotji temba sho gha yuve yinu yino.”
31Pa kutunda po kwawo po, ko kutanga kuthimwetwedha muthiko thothiheya yokukwendi.
Merukitho ghamurume ghothipuru‐puru
32Pakushwagha hakunga hawadi wa, hanu ha mu reterire murume ghothipuru‐puru yoyi gha karire mungcamu dhashatani. 33Apa gha manine kumutjidha shatani, ha tanga kughamba murume ghothipuru‐puru. Mbunga dha tetukire ghuninga eshi: “Thinu thi ne mbadi tha hokoka panganyi muIsragheli.”
34Ene Hafarasayi ne pakuninga eshi: “Ke, nomaghamweno ghamuyendithi wawashatani ghana kushwaghitha hashatani hamweya.”
Mukesho ghushokuru
35Jesusi gha yendaghurire mumaghumbo ghomahe no mumangoghana. Gha hongire hanu mumasinagoge ghawo, no gha wa yuvithire mbudhi dhoghufumu, no gherukithire kehe dihamba no kehe yikorwa.
36Apa gha monine mbunga, gha dhi fererire n̂eke thikuma, yoyi dha karire yira hakakukumwaghadhara, no yira ndjwi dhokupira mudithi wadho. 37Ko kuninga kwendi kwawakathishongero wendi eshi: “Mukesho ne ghukuru, havereki ne hapu. 38Mu kumbere ne kwaFumu, ghothinda shamukesho, eshi gha tume havereki kumukesho wendi.”
Tällä hetkellä valittuna:
Mateghusi 9: MHW1986
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Mbunga dhoBayibili dhaNamibia (Bible Society of Namibia) 1986
