Mateghusi 8
8
Merukitho ghamukayin̂ondwe
(Mark 1:40–45; Luk 5:12–16)
1Jesusi gha shurukire kudirundu, nombunga dhodhikuru dhawanu dha yendire nendi pofotji. 2Mukayin̂ondwe gha tongamenine kughutho wendi ghuninga eshi: “Fumu ngeshi ghuna himi, ghu nirukithe.”
3Po gha ghonyononine Jesusi dyoko dyendi no gha ningire eshi: “Na himi. Wiruke!” Popo vene ko kumutunda yin̂ondwe yendi. 4Munyima gha mu tongwerire Jesusi eshi: “Perere poye eshi ghu ka yi tongore kwaghumweya, ene yende ghu ka kuneghe kwamupristeri, ho ka rete muyambo ghu gha tjangire kare Mosesi. Tho sho thi kare thidimukitho kwawanu eshi ghuna kushaka.”
Merukitho ghamupika wanduna wawakayita
(Luk 7:1–10; Joh 4:43–54)
5Apa gha kumine Jesusi muKafarnaghumu, gheyire nduna gha mu kumbere maghamweno, 6no gha ningire eshi: “Mukadikuto, mupikange gha hendama mudighumbo dyange tjitju thikuma.”
7Aye gha mu huthire eshi: “Na kwiya ni ka mwirukithe.”
8Nduna ne gha ningire eshi: “Mukadikuto, mbadi na fumana eshi wingene mundhugho dhange, ghambe n̂ando keho namupikange ghana kwiruka. 9Name nomunu na kara nomahimeno ghongcamu, no na kara nawamashorondate. Ngeshi ha ni ningi kwaghumweya eshi: ‘Yende!’ ghana kuyenda. No kwaghumweya eshi: ‘Wiye!’ naye ghana kwiya. Ngambi kwamupikange eshi: ‘Tende yi!’ ghana kuyitenda.”
10Jesusi gha tetukire apa gha yuvire yi, no gha tongwerire wa ha mu randa‐randire eshi: “Ghushemwa na kumutongwera yi: Mbadi na wanine muIsragheli matawero ghokemo. 11Ho na kumutongwera: Hengi homuDiva no homuDitokera awa mba kara naAbrahamu naIsaka naJakopu kuthidyero thoghufumu ghodiwiru. 12Ene wa ha ninga eshi wo hathinda shaghufumu ghodiwiru, wo mbo hapwa kunatwera mudikokore dyopanunda, oku mbo ha dira nomahumangayegho.”
13Ko kuninga Jesusi kwanduna eshi: “Yende ghu huke, eyi ghuna tawa, yina kukara kemo.”
Namupikendi gherukire popo.
Merukitho ghangumwenya Petrusi nawamweya
(Mark 1:29–34; Luk 4:38–41)
14Pakwingena Jesusi mundhugho dhaPetrusi, ha mono ngumwenya Petrusi ghana rara mukuthatha thikuma. 15Ko kumukwata kwendi padyoko, no yikorwa ya mu thighire. Naye ko kwimana gha mu yumbure.
16Eyi dina kutokera diyuwa, ko kumuretera kwawo hashawingi awa ha karire nongcamu dhawashatani. Popo ko kutjidha kwendi mipepo non̂ando, no gherukithire hakakukorwa wahe. 17Kemo sho yi rikanye eyi gha ningire muporofeta Jesaya eshi:
“Gha kukambeka ghukashu wetu,
no gha shimba yikorwa yetu.”
Ngepi di ghokumukutha Jesusi
(Luk 9:57–62)
18Apa gha monine Jesusi oku dhina mu dhingi mbunga dhodhikuru, ha raghura kwendi eshi ha tjinaghane thambodiya. 19Mukamarukwaro gha henyine kukwendi no gha ningire kukwendi eshi: “Muhongi, na kukukutha kokuheya ku ghuna kuyenda.”
20Jesusi gha mu tongwerire eshi: “Mbwawa dha kara nomakwina ghadho, yinyunyi noyitunguru yayo. Ene Mwanamunu, gha pira pa sho gha thateke mutwi wendi.”
21Ghumweya ghopawakathishongero wendi gha ningire kukwendi eshi: “Fumu, ni thighe tango ni yende ni ka vumbeke tate.”
22Jesusi ne gha mu huthire eshi: “Ni kuthe, thighe hafu ha vumbeke hafu wawo.”
Jesusi ghana kuporeritha dingundunga
(Mark 4:35–41; Luk 8:22–25)
23Munyima pa gha peramine Jesusi muwato, ko kumukutha hakathishongero wendi. 24Kambiru‐mbiru, ko kukuyungera dingundunga dishokuru padikuruviya, kate gha shanine mangumbi kurovedha wato. Oku Jesusi ye ne ghana rara.
25Ha mu henyena kwawo ha mu pinduthe eshi: “Fumu, tu ghamwene, ko kurowera twe!”
26Aye gha wa huthire eshi: “Nye muna kuyapera, mwakamatawero ghomambiru mwe.” Ko kupinduka kwendi gha shinge dingundunga no dikuruviya. Nayo ya karire nyiki.
27Hanu ha tetukire no ha ghambire eshi: “Munu munye yu, oyu ghokutegherera kukwendi dingundunga no dikuruviya?”
Merukitho ghaMukagadara yu wa nyikire mupepo ghoghumango
(Mark 5:1–20; Luk 8:26–39)
28Apa gha tjinaghanine Jesusi thambodiya muditunga dyaWakagadara, ko kumuhangana wa ha nyikire hashatani, awo ne muyipiro ha shwaghire. Hanu wa ha karire hayi thikumenena. Kuninga eshi, noyofotji temba ghokukona kwimana kumbadi dhondhira dhi. 29Ko kutanga kwawo kwarumuka eshi: “Nye sho tende netu, ghoMwana Nyambi? Eyi ghu neyera kuno ne, kukututjitjupitha ndi?”
30Kayenda nawo kamanana, ko kushokomoka kathundhu koyinguru. 31Hashatani ha mu kandereri Jesusi eshi: “Ngeshi ngo ghu tu shwaghithe, tu tume twingene muyinguru.”
32Ha wa tongwera eshi: “Mu ka yende!”
Nawo ha shwaghire mwawanu no ha kengenine muyinguru. Kathundhu kokahe ko ka ndandumuka mukaghurumuko ka were mudikuruviya no ka fire. 33Hakakuditha ha dhondokire kudighumbo, no ha ka tongorire yoyiheya, no yi ya hokokire kwa wa dha nyikire mipepo dhodhimango. 34Dighumbo dyodiheya dya mu tjingawerire Jesusi, no pa ha mu monine, ha mu kandererire thikuma eshi gha thighe mukunda wawo.
Tällä hetkellä valittuna:
Mateghusi 8: MHW1986
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Mbunga dhoBayibili dhaNamibia (Bible Society of Namibia) 1986
