ယောဟန် 4
4
ယေရှုနှင့် ရှမာရိအမျိုးသမီး
1-3ယေရှုသည် ကိုယ်တိုင် နှစ်ခြင်းမင်္ဂလာပေးတော်မမူ။ တပည့်တော်တို့ကသာလျှင် ပေးကြ၏။ သို့သော်လည်း ယေရှုသည် ယောဟန်ထက် ပို၍များသောသူတို့ကို တပည့်တော်ဖြစ်စေ၍ နှစ်ခြင်းမင်္ဂလာပေးတော်မူလျက်ရှိသည်ဟု ဖာရိရှဲတို့ကြားသိကြောင်းကို ယေရှုသိတော်မူသောအခါ ယုဒပြည်မှ ထွက်ခွာ၍ ဂါလိလဲပြည်သို့ ကြွတော်မူ၏။
4ထိုလမ်းခရီးတွင် ရှမာရိပြည်ကို ဖြတ်၍ ကြွရ၏။ 5ဤသို့ဖြင့် ရှမာရိပြည်ရှိ ရှုခါမြို့သို့ ရောက်တော်မူ၏။ ထိုမြို့သည် ယာကုပ်က သားဖြစ်သူယောသပ်အား ပေးခဲ့သောမြေကွက်အနီးတွင် တည်ရှိ၏။ 6ထိုနေရာတွင် ယာကုပ်၏ ရေတွင်းရှိ၏။ ယေရှုသည် ခရီးပန်းတော်မူသဖြင့် ရေတွင်းအနီး၌ ထိုင်တော်မူ၏။ ထိုအချိန်သည် မွန်းတည့်ချိန်ခန့်#4:6 မူရင်းဂရိကျမ်းမှ တိုက်ရိုက်ပြန်ဆိုလျှင် “ဆဋ္ဌမနာရီ” ဖြစ်သည်။ ဂျူးလူမျိုးများသည် အချိန်နာရီကို နံနက်ခြောက်နာရီမှ စတင်၍ ရေတွက်သောကြောင့် “ဆဋ္ဌမနာရီ” ဟု ဆိုရာတွင် မွန်းတည့် ဆယ့်နှစ်နာရီကို ဆိုလိုခြင်းဖြစ်သည်။ဖြစ်၏။ 7ထိုစဉ် ရှမာရိအမျိုးသမီးတစ်ဦးသည် ရေခပ်ရန် ရောက်လာ၏။ ယေရှုက “သောက်ရေအနည်းငယ်တိုက်ပါ” ဟု မိန့်တော်မူ၏။ 8ထိုအချိန်သည် တပည့်တော်တို့မှာ အစားအစာဝယ်ရန် မြို့ထဲသို့ သွားနေခိုက်ဖြစ်၏။
9ထိုရှမာရိအမျိုးသမီးက “သင်သည် ဂျူးလူမျိုးဖြစ်လျက်နှင့် ရှမာရိအမျိုးသမီးဖြစ်သော ကျွန်မထံမှ သောက်ရေကို အဘယ်ကြောင့်တောင်းသနည်း” ဟု အံ့အားသင့်စွာ မေးလေ၏။ ထိုသို့မေးရခြင်းမှာ ဂျူးလူမျိုးတို့သည် ရှမာရိလူမျိုးတို့နှင့် ပေါင်းသင်းဆက်ဆံခြင်းမပြုကြသောကြောင့်ဖြစ်၏။
10ယေရှုက “သင့်အတွက် ဘုရားသခင်ပေးတော်မူမည့် လက်ဆောင်ကိုလည်းကောင်း၊ သင့်ထံမှ သောက်ရေကို တောင်းသောသူသည် မည်သူဖြစ်ကြောင်းကိုလည်းကောင်း သင်သိပါက သင်သည် ငါ့ထံမှ ရေကို တောင်းလိမ့်မည်။ ငါသည်လည်း အသက်ရေကို သင့်အား ပေးလိမ့်မည်” ဟု ဖြေတော်မူ၏။
11အမျိုးသမီးက “သခင့်မှာ ရေခပ်စရာပုံးလည်း မရှိပါ။ ဤရေတွင်းသည်လည်း အလွန်နက်၏။ အသက်ရေကို အဘယ်မှ ရမည်နည်း။ 12သခင်သည် ဤရေတွင်းကို ပေးသော ကျွန်မတို့၏ ဖခင်ကြီးယာကုပ် ထက်ပင် ပို၍ ကြီးမြတ်သလော။ သူအပါအဝင် သူ၏သားသမီးများနှင့် တိရစ္ဆာန်များသောက်ကြသည့် ဤရေထက် ပို၍ကောင်းသောရေကို သခင်သည် မည်သို့ပေးနိုင်မည်နည်း” ဟု မေးလျှောက်၏။
13ယေရှုက “ဤရေကို သောက်သောသူသည် နောက်ထပ်ရေငတ်ဦးမည်။ 14ငါပေးသောရေကို သောက်သောသူမှာ မည်သည့်အခါမျှ ရေငတ်တော့မည်မဟုတ်။ ထိုရေသည် သူ့အတွင်း၌ အစဉ်စီးထွက်သော စမ်းရေဖြစ်၍ သူ့ကို ထာဝရအသက်ရှင်စေလိမ့်မည်” ဟု မိန့်တော်မူ၏။
15အမျိုးသမီးက “သခင်… ထိုရေကို ကျွန်မအား ပေးတော်မူပါ။ သို့ဖြစ်လျှင် ကျွန်မသည်လည်း နောက်ထပ် ရေငတ်တော့မည်မဟုတ်ပါ။ ဤနေရာသို့ လာ၍ ရေခပ်ရန်လည်း လိုတော့မည်မဟုတ်ပါ” ဟု လျှောက်၏။
16ယေရှုက “သင့်ခင်ပွန်းကို သွား၍ ခေါ်ခဲ့လော့” ဟု မိန့်တော်မူ၏။
17အမျိုးသမီးက “ကျွန်မတွင် ခင်ပွန်းမရှိပါ” ဟု လျှောက်၏။ ယေရှုကလည်း “သင်က ‘ကျွန်မတွင် ခင်ပွန်းမရှိပါ’ ဟု ပြောသည်မှာ မှန်၏။ 18အမှန်တွင် သင်၌ ခင်ပွန်းငါးယောက် ရှိခဲ့ဖူးပြီ။ ယခု သင်နှင့် နေသောသူသည် သင်၏ခင်ပွန်း မဟုတ်။ ထို့ကြောင့် သင်သည် မှန်ကန်စွာ ပြောပြီ” ဟု မိန့်တော်မူ၏။
19အမျိုးသမီးက “သခင်သည် ပရောဖက်တစ်ပါးဖြစ်ပေမည်။ 20ကျွန်မတို့၏ ဘိုးဘေးများသည် ဤတောင်ပေါ်တွင် ဘုရားသခင်ကို ကိုးကွယ်ခဲ့ကြ၏။ သို့သော် ဂျူးလူမျိုးဖြစ်သောသခင်တို့က ဂျေရုဆလင်မြို့၌သာ ဘုရားသခင်ကို ကိုးကွယ်ရမည်ဟူ၍ ပြောဆိုကြ၏” ဟု လျှောက်၏။
21ယေရှုက “အမျိုးသမီး… ငါ့စကားကို ယုံလော့။ ဤတောင်တွင်လည်းမဟုတ်၊ ဂျေရုဆလင်မြို့တွင်လည်း မဟုတ်ဘဲ ခမည်းတော်ကို သင်တို့ကိုးကွယ်ရမည့်အချိန် ရောက်လာလိမ့်မည်။ 22ကယ်တင်ခြင်းသည် ဂျူးလူမျိုးများမှတစ်ဆင့် ဖြစ်လာသဖြင့် ဂျူးလူမျိုးဖြစ်သော ငါတို့သည် မိမိသိသောဘုရားကို ကိုးကွယ်ကြ၏။ ရှမာရိလူမျိုးဖြစ်သော သင်တို့မှာ မိမိမသိသောဘုရားကို ကိုးကွယ်ကြ၏။ 23သို့သော်လည်း စစ်မှန်သောကိုးကွယ်သူတို့သည် ခမည်းတော်ကို စိတ်ဝိညာဉ်နှင့်လည်းကောင်း၊ သစ္စာတရားနှင့်လည်းကောင်း ကိုးကွယ်မည့်အချိန် ရောက်လာလိမ့်မည်။ စင်စစ် ယခုပင် ရောက်လျက်ရှိ၏။ ခမည်းတော်သည် မိမိအား ထိုကဲ့သို့ကိုးကွယ်သူများကို အလိုရှိတော်မူ၏။ 24ဘုရားသခင်သည် ဝိညာဉ်ဖြစ်တော်မူ၍ ဘုရားသခင်ကို ကိုးကွယ်သူတို့သည် နာမ်ဝိညာဉ်နှင့်လည်းကောင်း၊ သစ္စာတရားနှင့်လည်းကောင်း ကိုးကွယ်ကြရမည်” ဟု မိန့်တော်မူ၏။
25ထိုအခါ အမျိုးသမီးက “ခရစ်တော်#4:25 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏ အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။ဟု ခေါ်သော မေရှိယကြွလာမည်ကို ကျွန်မသိပါ၏။ ထိုအရှင် ကြွလာသောအခါ ကျွန်မတို့အား အရာခပ်သိမ်းကို ရှင်းလင်းဖော်ပြတော်မူမည်” ဟု လျှောက်၏။
26ယေရှုက “ယခု သင်နှင့် စကားပြောနေသော ငါသည် မေရှိယပင် ဖြစ်၏” ဟု အမျိုးသမီးအား မိန့်တော်မူ၏။
27ထိုအချိန်၌ တပည့်တော်တို့သည် ပြန်ရောက်လာကြ၏။ ယေရှုသည် အမျိုးသမီးတစ်ဦးနှင့် စကားပြောတော်မူသည်ကို တပည့်တော်တို့မြင်သောအခါ အံ့သြကြ၏။ သို့သော်လည်း “မည်သည့်အရာ အလိုရှိတော်မူသနည်း” သို့မဟုတ် “အဘယ်ကြောင့် ထိုအမျိုးသမီးနှင့် ပြောဆိုတော်မူသနည်း” ဟူ၍ မည်သူမျှ မမေးဝံ့ကြပေ။ 28ထိုအမျိုးသမီးသည် ရေအိုးကို ရေတွင်းအနီး၌ ထားခဲ့၍ မြို့ထဲသို့ ပြန်ပြီးလျှင် 29“ကျွန်မပြုခဲ့သမျှကို အကုန်အစင်ဖော်ပြနိုင်သောသူကို လာကြည့်ကြပါ။ သူသည် ခရစ်တော်ဖြစ်မည်လော” ဟု လူတို့အား ပြောလေ၏။ 30ထိုအခါ သူတို့သည် မြို့ထဲမှ ထွက်၍ ယေရှုထံတော်သို့ သွားကြ၏။
31ထိုစဉ် တပည့်တော်တို့က ယေရှုအား “ဆရာတော်#4:31 မူရင်းဂရိကျမ်းတွင် “ရဗ္ဗိ” ဟု ဖော်ပြထားသည်။… အစာကို သုံးဆောင်တော်မူပါ” ဟု တောင်းပန်ကြ၏။
32သို့သော် ယေရှုက “သင်တို့မသိသောစားစရာ ငါ၌ ရှိသည်” ဟု မိန့်တော်မူ၏။
33ထို့ကြောင့် တပည့်တော်တို့က “တစ်စုံတစ်ဦးသည် ဆရာတော်အတွက် စားစရာယူလာပေးပြီလော” ဟု အချင်းချင်းမေးကြ၏။
34ယေရှုက “ငါ့ကို စေလွှတ်တော်မူသောဘုရားသခင်၏ အလိုတော်ကို လိုက်နာ၍ ထိုအရှင်၏ အမှုတော်ကို ပြီးဆုံးသည်အထိ ဆောင်ရွက်ခြင်းသည် ငါ့စားစရာဖြစ်၏။ 35သင်တို့က ‘ရိတ်သိမ်းချိန်ရောက်ရန် လေးလလိုသေး၏’ ဟု ဆိုတတ်ကြသည်မဟုတ်လော။ သို့သော် သင်တို့အား ငါပြောဆိုသည်မှာ လယ်ပြင်တို့ကို မျှော်ကြည့်လော့။ ရိတ်သိမ်းရန် သီးနှံတို့သည် ဝင်းမှည့်လျက်ရှိ၏။ 36ရိတ်သိမ်းသူသည် လုပ်အားခကို ရ၏။ သူသည် ထာဝရအသက်အတွက် သီးနှံတို့ကို ရိတ်သိမ်း၏။ ထို့ကြောင့် စိုက်ပျိုးသူနှင့် ရိတ်သိမ်းသူတို့သည် အတူတကွ ဝမ်းမြောက်ကြလိမ့်မည်။ 37‘တစ်ဦးက စိုက်ပျိုး၍ တစ်ဦးက ရိတ်သိမ်း၏’ ဟူသော ဆိုရိုးစကားသည် အမှန်ဖြစ်၏။ 38သင်တို့စိုက်ပျိုးမထားသော လယ်မှ သီးနှံများကို ရိတ်သိမ်းရန် သင်တို့ကို ငါစေလွှတ်ပြီ။ အခြားသူတို့သည် စိုက်ပျိုးထားကြပြီး သင်တို့မှာ ထိုသူတို့စိုက်ပျိုးထားသောသီးနှံတို့ကို ရိတ်သိမ်းရ၏” ဟု မိန့်တော်မူ၏။
ရှမာရိလူမျိုးများစွာ ယုံကြည်လာကြခြင်း
39ရှမာရိအမျိုးသမီးက “သူသည် ကျွန်မပြုခဲ့သမျှကို အကုန်အစင်ဖော်ပြနိုင်သောသူဖြစ်၏” ဟု ဆိုသဖြင့် ထိုမြို့၌ နေသော ရှမာရိလူမျိုးများစွာသည် ယေရှုကို ယုံကြည်လာကြ၏။ 40ထိုရှမာရိလူမျိုးတို့သည် ယေရှုထံတော်သို့ ရောက်လာကြသောအခါ ယေရှုကို မိမိတို့၏မြို့တွင် တည်းခိုတော်မူရန် တောင်းပန်ကြ၏။ ထို့ကြောင့် ယေရှုသည် ထိုမြို့တွင် နှစ်ရက်တည်းခိုတော်မူ၏။ 41ထိုအခါ ယေရှု၏ စကားတော်ကို ကြားနာရသဖြင့် ယခင်ထက် သာ၍များသောလူတို့သည် ယုံကြည်ကြကုန်၏။ 42ထိုသူတို့က အမျိုးသမီးအား “ယခု ငါတို့ယုံကြည်ကြသည်မှာ သင့်စကားကြောင့်မဟုတ်တော့ဘဲ ငါတို့ကိုယ်တိုင် ကြားနာရသောကြောင့်ဖြစ်၏။ ဤအရှင်သည် ကမ္ဘာလောက၏ကယ်တင်ရှင် အမှန်ဖြစ်ကြောင်း ယခုငါတို့သိရပြီ” ဟု ဆိုကြ၏။
အမတ်တစ်ဦး၏သားကို ကျန်းမာစေတော်မူခြင်း
43နှစ်ရက်ကြာသော် ယေရှုသည် ထိုအရပ်မှ ဂါလိလဲပြည်သို့ ကြွတော်မူ၏။ 44အဘယ်ကြောင့်ဆိုသော် ယေရှုကိုယ်တိုင်က “ပရောဖက်သည် မိမိနေရပ်မြို့တွင် ဂုဏ်အသရေမရှိ” ဟု မိန့်တော်မူခဲ့ဖူးသောကြောင့် ဖြစ်၏။ 45ဂါလိလဲပြည်သို့ ရောက်တော်မူသောအခါ ဂါလိလဲပြည်သားတို့သည် ကိုယ်တော်ကို ကြိုဆိုကြ၏။ အဘယ်ကြောင့်ဆိုသော် ဂျေရုဆလင်မြို့တွင် ကျင်းပသည့်ပသခါပွဲတော်သို့ သူတို့ကိုယ်တိုင် သွားကြစဉ် ထိုပွဲ၌ ယေရှုပြုတော်မူသမျှသော အမှုတို့ကို မြင်တွေ့ခဲ့ကြသောကြောင့်ဖြစ်၏။
46ထို့နောက် ယေရှုသည် ရေကို စပျစ်ဝိုင်အဖြစ် ပြောင်းလဲစေတော်မူခဲ့ရသော ဂါလိလဲပြည်ကာနမြို့သို့ တစ်ဖန်ကြွတော်မူ၏။ ထိုအခါ ကပေရနောင်မြို့၌ အမတ်တစ်ဦးရှိ၍ သူ၏ သားသည် အပြင်းဖျားလျက်ရှိ၏။ 47ယုဒပြည်မှ ဂါလိလဲပြည်သို့ ယေရှုကြွလာတော်မူကြောင်းကို ထိုအမတ် ကြားသောအခါ ယေရှုထံတော်သို့ သွားလျက် “အကျွန်ုပ်၏သားသည် သေလုနီးပြီ။ ကပေရနောင်သို့ ကြွ၍ အကျွန်ုပ်၏သားကို ကုသပေးတော်မူပါ” ဟု တောင်းပန်လေ၏။
48ထိုအခါ ယေရှုက “သင်တို့သည် နိမိတ်လက္ခဏာများနှင့် အံ့ဖွယ်ဖြစ်ရပ်များကို မမြင်ရလျှင် ယုံကြည်ကြမည် မဟုတ်” ဟု မိန့်တော်မူ၏။
49ထိုအမတ်က “သခင်… အကျွန်ုပ်၏သား အသက်မဆုံးမီ ကြွတော်မူပါ” ဟု လျှောက်လေ၏။
50ယေရှုက “သွားလော့။ သင်၏သား ကျန်းမာပြီ” ဟု မိန့်တော်မူ၏။ ထိုအမတ်သည် ယေရှု၏ စကားတော်ကို ယုံကြည်လျက် အိမ်သို့ ပြန်လေ၏။
51အပြန်လမ်း၌ပင် သူ၏ အစေခံများနှင့် တွေ့ဆုံရာ သူတို့က သားဖြစ်သူသည် ကျန်းမာပြီဖြစ်ကြောင်း ပြောကြားကြ၏။ 52ထို့ကြောင့် အမတ်က “မည်သည့်အချိန်တွင် စတင်ကျန်းမာလာသနည်း” ဟု မေး၏။ ထိုအခါ သူတို့က “မနေ့က မွန်းလွဲ တစ်နာရီ#4:52 မူရင်းဂရိကျမ်းမှ တိုက်ရိုက်ပြန်ဆိုလျှင် “သတ္တမနာရီ” ဖြစ်သည်။ ဂျူးလူမျိုးများသည် အချိန်နာရီကို နံနက်ခြောက်နာရီမှ စတင်၍ ရေတွက်သောကြောင့် “သတ္တမနာရီ” ဟု ဆိုရာတွင် မွန်းလွဲ တစ်နာရီကို ဆိုလိုခြင်းဖြစ်သည်။တွင် အဖျားကျသွားပါသည်” ဟု ဖြေကြ၏။ 53ထိုအခါ ဖခင်ဖြစ်သူက ထိုအချိန်မှာ “သင်၏သား ကျန်းမာပြီ” ဟု ယေရှုမိန့်တော်မူသောအချိန်ဖြစ်ကြောင်းကို သိလေ၏။ ထို့နောက် အမတ်ကိုယ်တိုင်မှစ၍ အိမ်သူအိမ်သား အားလုံးတို့သည် ယေရှုကို ယုံကြည်ကြကုန်၏။ 54ဤနိမိတ်လက္ခဏာသည် ယုဒပြည်မှ ဂါလိလဲပြည်သို့ ကြွလာတော်မူပြီးနောက် ယေရှုပြုတော်မူသော ဒုတိယနိမိတ်လက္ခဏာဖြစ်၏။
Tällä hetkellä valittuna:
ယောဟန် 4: BCB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
