LUG 21

Wãy dwur hã solay ɓen go ma joŋ joŋre Baa

(Mark 12.41-44)

1Yeso raw ko nen ɓe go ti ɓe degar, raw ko jar ma de horog debaŋ wo de lag solay ɓi fen lag solay ma ɓi tiŋ Baa no. 2Á raw ko wãy dwur ma de coocoo laa solay ma kleere ni ɓoge. 3Á raw wãã ge ga : Kidolgi ndi de riŋ we ge ga wãy dwur se ma de coocoo mo deŋ, laa daŋ jar lan wo ɓuy. 4Werga jar lan hã wo ne Baa mo deŋ ɓuy diŋ solay maga gwaɗ go doo ɓaara ni ga lag lagge, ama ma ɓe de coocoo ɓen ɓuy, hã ɓen go diŋ solay maga se de yeɗ rege de ɓe mo ɓuy tuu.

Yeso de wãã ge ga á mbug gi tiŋ Baa go

(Mat 24.1-2; Mark 13.1-2)

5Jar po raw wo wãã ge ti tiŋ Baa ga : kay, á de boo ge de el de húulì ma de woore wo de fẽẽre maga á hã ra boo ge ɓe ne Baa mo kaʼ ɗa. Wersen Yeso raw riŋ rage ga : 6Wur po a ge yaŋ le, húulì maga nday ko ra mo kaʼ gwaʼ ge de jag ge ti kẽẽ la ni boŋ draʼ ga : á srog rage go gesiŋ ɓuy.

Fẽẽre maga a ge wo go taŋgu taw ge sir no

(Mat 24.3-14; Mark 13.3-13)

7Á raw wo wii Yeso ga : Waŋ, á joŋ ge nà wur hon ɓa? Fen maga kaŋ ge nen jar ti a ge fẽẽre sen wo diŋ may la?

8Yeso raw wãã ge ga : Joŋ we see ɓay de ele, hãy we see ɓay wa. Werga jar debaŋ a ge wo yaŋ de ɗúu ɓi jage, day wosela ɓuy yoo ɓaara wãã yaŋ ga : Se diŋ Mesi. Se diŋ Mesi. Wur maga Baa hay ngaɓn á we go. Ama maŋ we blam ɓaara wa hase. 9Nday leʼ laa re dur gi wo de re ma hãy hãy we no, ni nday mo joŋ we hẽẽne wa, nen da ga sen mo á go taŋgu ɗa yaw, day sen joŋ ge diŋ taw ge tamsirn ga ɗa ane. 10Blam sen á raw wãã ge ga : Wer jar ma baapo dur wo yaŋ de wer jar ma lan wo, waŋ po ur yaŋ dur gi de waŋ ma lan wo, 11fĩɗ gi sir joŋ ge yaŋ ɓi sir ma tigriŋ wo sar sar lay, koŋne joŋ wo yaŋ de cege wo debaŋ lay, fẽẽre ma joŋ hẽẽne de fẽẽre mbuɗgi maga jar mo ko see ɓe joŋ ge wo yaŋ le ciŋ debaŋ lay.

12Ama taŋgu fẽẽre sen wo ɓuy á bag we ge yaŋ, á joŋ ge bon ɓay yaŋ, á hã we yaŋ wo go cag re ɓay ɓi tiŋ tosge wo, á wo ge lag we ge ti daŋgay, á wo ge yaŋ de ɓay pel waŋre wo, de goforne wo ti re ɓi. 13Sen day joŋ ge diŋ faage ma joŋ sedewa ɓin ne jare. 14Wersen hãy we ɗiggi ɓay go taŋgu de ɓoɗ ge faare wããre maga nday wo ge fer ge ɓe mo wa, 15werga ndi de see ɓi, ndi hã ge wããre wo de ɗeŋ yaŋ we maga ko yoo jar hee ɓayn wo boŋ layblaʼ kãã ma ẽg we ge, noga faa we ge gà. 16Haybà pan ɓay wo de man ɓay, de hẽẽre ɓay wo, de kawre ɓay wo, de bar ɓay wo, hã wo nday yaŋ go, á id wo jar po yaŋ wo go yoo ɓay debaŋ lay. 17Jar caa hee yaŋ de ɓay ɓuy ti re ɓi. 18Ama hayba riŋ ma ti ɓay draʼ yee ge go boŋ gà. 19Lag we ngiŋ, Baa yãã we ge go diŋ doo sen no so no.

Yeso ga à ɓlag Jerusalem yaŋ go

(Mat 24.15-21; Mark 13.14-19)

20Sooden wo wo we go yiŋ ti Jerusalem cwẽẽ no, ni nday ko we go tuuseŋ ga á ɓlag ne wo yaŋ go gusi. 21Wersen jar maga á wo we go daʼ rage Jude no, ni á mo daŋ wo ge ciŋ ti húulì wo, jar maga á daʼ rage Jerusalem mo lay no, mo yaʼ wo see ɓaara wo go hãã lay, jar maga joŋ ge wo wo go ɓi progren wo mo lay no, mo fer wo le ɓi leegen wa lay. 22Werga wur sen joŋ ge diŋ wur bon ma baa jag re maga á yern ra go mo ɓuy go. 23Re ma de gaali joŋ yaŋ debaŋ wur sen ti naare ma de ɓiilin wo de maga wo de weere jiili mono. Werga jar ko wo de coo yaŋ debaŋ ɓi sir sen la mono, blam sen Baa naa ge nen ɓil ɓe ma de sõõgen go ti wer jar sen wo lam lay. 24Á id rage yaŋ go de moslam, hoo te maapo wo, raw de ɓaara lagge ti daŋgay ɓi sir jar po wo wo go hãã hãã ɓuy, day wer jar maga bay wo ti jag Baa wa dag ge wo Jerusalem yaŋ go de ɓaale hãã naw ɓaaran wo go baa jage.

Fer ge wel je táabayn le

(Mat 24.29-31; Mark 13.24-27)

25Fẽẽre mbuɗgi maga jar mo ko see ɓe joŋ ge wo yaŋ le nen wuri, ti few wo de gér wo lay, ti sir la, wer jar law wo see ɓaara yaŋ debaŋ, á kol ge wo yaŋ go de hẽẽne, daw ge wo yaŋ go doo sam ge maarog wo de mbar ge kaŋngaw bii wo. 26Jar huɗ gi wo yaŋ go de hẽẽne doo ɗig gi ti re maga le de a ge go ti sir krub ɓuy mono. Werga egre ma ciŋ fĩɗ gi wo le. 27Day blam sen ko ge wel je táabay le a ge ti swaare de egre debaŋ de gragge deŋ. 28Fẽẽre sen mokay leʼ wo we joŋ ge no, ni nday lag we de deele, hoo we nen ɓay ciŋ, werga je yãã we gen go yaŋ le a ge gusi.

Hadge maga jar kon se gum mono

(Mat 24.32-35; Mark 13.28-31)

29Blam sen Yeso raw wãã jagjõõ sen mokay ga : Ko we gum wo de te koore ma lan wo ɓuy ɗa la. 30Nday ko sug ɓaara we goɗ ge, nday raw koge tuu ga jag tob kos we go. 31Wersen, nday leʼ ko re sen wo mo deŋ we ɓuy so no, ni nday ko we go ga twaywaŋ mani Baan kos we go. 32Kidolgi ndi riŋ we ge ga wer jar maga wo tenen patalam, huɗ gi wo go taŋgu a ge re sen wo ɓuy gà. 33Ngel ma ciŋ wo de tamsirn ɓog ɓuy taw ge wo go, ama ma wããre ɓin taw go ga hase.

Lag go de pũygi

34Yeso ga : Koɗ we see ɓay de ele. Men we ɗiggi ɓay de kaŋ ge sagsag ti kurwuy wo de taɗ ge de yii wa, hãy we see ɓay ɗig fẽẽre ma patalan wo wa, hayga nday yaŋ joŋge no, naw sen wo nduu gi ti ɓay gug tuu. 35Werga á leʼ ge le ne jar ma ti sir wo ti krub ɓuy doo bày maga caa cẽẽ ɓil nono. 36Leɗ we naa wa, tos we sagsage, maga nday mo daʼ egre ma daŋ re maga joŋ ge wo mo ɓuy go, maga wel je táabay wo le fer ge, nday mo lag ge de el pel ɓe.

37De cege Yeso had jar ɓi tiŋ Baa, ama de law se kal rawge wo go nà ge ciŋ ti húulì maga koore Olif wo ti ɓe mono. 38Jar ɓuy á wo ɓi tiŋ Baa de jag toŋ crum coʼ sug wããre ɓe no.

Tällä hetkellä valittuna:

LUG 21: TUP

Korostus

Jaa

Kopioi