LUG 20
20
Yeso daʼ egre ɓen le nà gene?
(Mat 21.23-27; Mark 11.27-33)
1Ti wurpo Yeso de had jar ɓi tiŋ Baa, á raw sii Wããre ma de Cõõren ne jare, waŋre jar siɗ jag wo de jar ma ndar wer wããre Baa raw wo age de jar kluurin wo, 2á raw wo riŋ Yeso ga : Kaŋ nen wùr ti egre maga ndo joŋ fẽẽre sen wo de ɓe mo ɗa, je hã egre sen mo diŋ wo ne? 3Yeso raw riŋ rage ga : Ndi wii jag ɓay ti wããre po boŋ lay, fer we wããre me ti ɓe. 4Wose ɓoʼ Jaŋ ma joŋ batem jarn le ne? Diŋ Baa yaw, noga diŋ jar téebeere wo? 5Ama á raw wo faa kããra ga : Hayga naa wãã we ga : Ɓoʼn le diŋ Baa no, á kal riŋ naa ga : Wer may ga nday yãã wããre Jaŋ ga la? 6Ama Hayga naa wãã we ga : Ɓoʼn le diŋ jar téebeere wo lay no, jar ɓuy ɓoɗ ge wo naa de húulì ma id naa go, werga jar de ko ge ɓuy ga Jaŋ diŋ je ndar nen wããre Baa go. 7Á raw wo riŋ gi ɓe ga : Wùr ko je ɓoʼ ge ɓen le joŋ batem jarn gà. 8Yeso raw riŋ rage ga : Mbe de ele. Ndi doo sen no lay, ndi kaŋ nen ɓay ti egre maga ndi joŋ fẽẽre sen wo de ɓe mo gà lay.
Jagjõõ ma de ngaɓ ge de jar joŋre pay tlalum wo
(Mat 21.33-46; Mark 12.1-12)
9Blam sen Yeso raw tĩĩ wer riŋ jar wo de jagjõõ sen mokay ga : Jobo peɗ tlalum ɓi pay ɓe, raw hã wããre ɓe go ne jar joŋre payn wo doo, kal rawge raŋ ge ma ig gi wo go ni wolaŋ. 10Wur rug gi tlalum wo a ge mokay, á raw ɓoʼ wejõõ ɓe le se jar joŋre payn wo boŋ ga á mo hã wo nen ma sen wo le ne se. Ama jar joŋre payn raw wo mbar wejõõ se no, raw wo nii gi ɓe wo go doo koɗe. 11Pan payn raw ɓoʼ wejõõ ma tigriŋ wo pa, ama jar joŋre payn raw wo mbar ge ɓe, ɗar wo ne, raw wo nii gi ɓe wo go doo koɗe. 12Á raw ɓoʼ wejõõ ma de swaʼn wo pa, je ma sen la á raw wo kaŋ wããge ne hẽn se, raw wo ɓoʼ ge ɓe wo go faale làɓe. 13Blam sen pan payn raw ga : Ndi mo joŋ nà joŋ ge la? Patala ndi ɓoʼ wel dage ɓin wo, sen á joŋ wo sõõre ɓe yaŋ so layblaʼa. 14Ama jar joŋre payn wo wo ko ge ɓe le mo caw, á raw wo riŋ kããra ga : Ko we nen ɓay, je maga kol ge wurpo diŋ pan payn mo caw le so no. Naa ʼwarn we go, pay mo gwaʼ go diŋ ma naa. 15Á raw wo ɓoʼ ge ɓe wo go faale pay no, raw wo ʼwar ge ɓe go.
Yeso raw wiigi ga : Pan payn day joŋ rage joŋ ge la? 16Á a ge, id gi jar joŋre payn wo go, hã ge payn go ne jar tigriŋ wo lay. Jarn wo wo laa wããre sen mokay, á raw wo wãã ge ga : Sen mokay joŋ ga has. 17Ama Yeso raw ko rage, raw riŋ rage ga : Wer wããre se maga á yern go ga :
Húulì maga jar bor tiŋ ɓoʼn wo go,
Raw kol ge de ɗaw cõõ tiŋ diŋ sen yaw,
wer ɓe nà gahãyla? 18Wosela ɓuy maga leʼ we ti húulì sen, guɗub ge nen go ni, day húulìn leʼ we ne jobo ti lay no, húulìn waŋ ge nen je sen go doo puduf no lay.
Hã targe ne Sesar
(Mat 22.15-22; Mark 12.13-17)
19Jar ma ndar wer wããre Baa wo de waŋre ma siɗ jag raw wo kiɗ gi ga saara mo baa Yeso de wur sen ni tuu, werga á kon wo go ga á wãã jagjõõ sen ti saara, ama á raw wo joŋ hẽẽne doo jare. 20Á raw wo tĩĩ wer beg Yeso, raw wo laa jar ma de taw gi po wo wo see ɓe, jar sen raw wo joŋ see ɓaara doo ga saara diŋ jar ma de deelen no, á raw wo kiɗ faage doo sen no kay ma kii wããre ne hẽn ti, maga saara mo hãn go ne waŋ ma kluun doo. 21Á raw wo wii gi ɓe de wããre ma kay ga : Waŋ, wùr de koge ga wããre maga ndo wãɗ ne de maga ndo had ne mo ɓuy de deele, jar nen ɓo ɓuy degaʼ lay, ama ndo yaŋ had kidolgi maga Baa de wiigi ga á mo see doo sen no mono. 22Sii ne wùr ɗa, wããre Baa de hã faage maga hã targe ne Sesar waŋ Rom yaw, noga bay wa? 23Ama Yeso raw ko jag tawgi ɓaaran go, raw riŋ rage ga : 24Maŋ we solay le me boŋ ɗa, á raw wo maŋ ge ɓe le ne hẽne, á raw ga Nenceere wose mo taʼ ne, ɗúu wose de yerge ɓil ɓe mo taʼ la? Á raw wo ga : Diŋ Sesar waŋ Rom no. 25Blam sen Yeso raw riŋ rage ga : De ele. Hã we fen maga diŋ ma Sesar ne hẽne, hã we fen maga diŋ ma Baa ne Baa lay. 26Blam sen á kãã wo ma baa Yeso de wããre maga á wãɗ pel jarn ni mo deŋ ga so. Wããre ɓe maga á fer ne, raw ngris rage go pa so yaw, á raw wo lagge go seɗem.
Wããre bir gi jar ma de húulí wo
(Mat 22.23-33; Mark 12.18-27)
27Sadusiyẽẽ po raw wo age see Yeso (diŋ jar maga wãɗ wo ga jar ma de húulí fer wo go bir gi ga mono). Á raw wo wii gi ɓe 28doo kay ga : Waŋ, Moyis bag wããre Baa sen ne wùr de yerge ga : Hayga jobo maga wegeman ɓe huu we go, men wãy we go bay weere no, ni wegeman ɓen mo hoo wãy no, mo biŋ weere de ɓe ne hẽn ɓe maga huu go mono. 29Day jar po hay wo we ɓaa hẽẽrebe renam, ma taŋgun raw da wãy, raw huu gi go bay biŋ wele. 30Ma de ɓog ɓen raw hoo wãy no. 31Blam sen ma de swaʼn raw hooge ɓe hãã á wo wo go horge ɓe renam ɓuy, biŋ wo weere de ɓe gà ɓuy lay. 32Blam ɓaara ɓuy wãyn raw huu gi go lay. 33Wur maga jar ma de húulín wo wo go bir gi mokay, wãyn joŋ ge diŋ wãy wo se yoo ɓaara la, werga á gusn wo go wer ɓaara renam ɓuy mono?
34Yeso raw riŋ rage ga : Werpiiri wo de naare ma ti tamsir wo la kaŋ wo mbaara kããra wãy wo de war kããra ane, 35ama werpiiri wo de naare maga wo de kããge ma laa ge go ciŋ tenen, wo ge ɓi sir ma wurpon, kaŋ wo kããra ga so. 36Á kãã wo ma huɗ gi ga so lay, á kol ge wo doo jar peele Baa wo nono, á kol wo diŋ weere Baa, werga á fer wo le go bir gi mono. 37Moyis yaŋ de kaŋ nen jar go poɗag ga jar ma de húulí fer wo yaŋ go bir gi. Wããre maga á wãã yoo lírí, á ɗe Baa Waŋkluu ga Baa maga Abraham, Isag wo de Jakob goŋ wo mono. 38Baa diŋ Baa ma jar ma tenen wo, bay ma jar ma de húulí wo wa, werga jar nen Baa ɓuy tenene. 39Blam sen jar po ma ndar wer wããre Baa raw wo maŋ wããre ga : Waŋ, ndo wãã mbo ni. 40Blam sen á laa wo wii gi ɓe ti wããre ga so has.
Mesi wo de Dafid
(Mat 22.41-46; Mark 12.35-37)
41Yeso raw riŋ rage ga : Wer may ga jar wãɗ wo ga Mesi diŋ moo Dafid ɓa? 42Werga Dafid wãã go de see ɓe ɓil Siŋri ma togoɗ Baa ga :
Baa Waŋkluu raw riŋ Waŋkluu ɓin ga :
Hay ɓo go ti ɓaŋ war ɓi la,
43Hãã ti wur maga ndi kaŋ ɓaale ɓo ge go ti jar hee ɓon wo ɗa.
44Dafid ɗen Waŋkluu ɓe so lay, day Mesi diŋ moo Dafid moo ge pa?
Yeso ga jar mo koɗ wo see ɓaara de el doo jar ma ndar wer wããre Baa wo
(Mat 23.1-36; Mark 12.38-40)
45Jar ɓuy wo wo laa wããren mokay, Yeso raw riŋ jar ma wer ɓen wo ga : 46Koɗ we se ɓay doo jar ma ndar wer wããre Baa wo no, jar da raŋ ge de õõbe ma kluuri tin wo, da wo ga jar mo her jag ne saara de lag kõyõgre gesiŋ ɓi lumo, kiɗ wo ngel lagge ma pel ɓi tiŋ tosge wo, de ngel lagge ma de woore daŋge ti ngel maga á ɗe jar we rege ni ngaɓa lay mono. 47Á yãɗ wo fẽẽre ma doo naare dwur wo go ɓuy ɓuy pa, da wo tos ge de pããrege maga saara mo ko nen jar de ele. Baa joŋ ge bon ɓaara yaŋ de hãã debaŋ.
Tällä hetkellä valittuna:
LUG 20: TUP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tupuri Bible © Bible Society of Cameroon, 2016. All rights reserved.
