LUG 16
16
Jagjõõ ma de ngaɓ ge de bloo ma de taw gi no
1Yeso raw riŋ jar ma wer ɓen wo ga : Je horog po hã fẽẽre ɓen wo ne jobo doo, ga á mo wãã re ɓaara, day á raw age riŋ bloon ga je wãã re fẽẽren go de ɓlag fẽẽre ɓen wo. 2Je kluu ɓen raw ɗe ge ɓe le ga : Ɓa ndi laa wããre sen ti ɓo nà gahãy ɓa. Keɗ fẽẽre maga ndo joŋ joŋre de ɓe go me, werga ndo kãã ma joŋ ge diŋ je wãã re fẽẽre ɓin wo ga so hase. 3Je maga á hã wããre fẽẽren ne hẽn doo la, raw wãã ge de ɓil ɓe ga : Je kluu ɓin go de nii mege ti joŋre ɓe no, ndi bay de egre nen jee sir wa lay, wiɗ gi fẽẽre joŋ sõõre me lay, ndi joŋ nà joŋ ge la? 4Yoo, ndi daʼ fen maga ndi joŋ we. Ndi wo we men ngel ɓin go no, ni jar yãã wo ndi yaŋ liŋ ni ɓaara. 5Á raw ɗe jar maga ɓèere je kluu ɓen ti ɓaara le go boŋ boŋ ɓuy. Á raw riŋ ma taŋgun ga : Ndo nen poɗ je kluu ɓin gãy ɓa? 6Je sen raw ga : Noo olif ti hoole kisi. Je wãã re fẽẽren raw ga : Ko nen ɓo ndo poɗ doo kayn no, hay gesiŋ deparday yer ge doo dwee. 7Blam sen á raw riŋ je ma tigriŋ pa ga : Ɓon ndo nen poɗ ge gãy lay? Á raw ga : Coore sag kis kis dwee, bloon raw ga Ko nen ɓo ndo poɗ doo kayn no, yer kis kis naa. 8Je kluu raw kee je wãã re fẽẽre ɓe se ma de taw gi no, werga á joŋ joŋre de ɗeŋ. Doo ga jar maga wo diŋ ma jar ma ti tamsir la wo de joŋ joŋre de ɗeŋ ti yoo kããra de el daŋ jar maga wo diŋ ma Baa mono.
9Yeso raw riŋ rage ga : Ma ɓi, ndi de riŋ we ge ga bag we barge kããre ɓay jar jag Baa wo de horog ma doo ɓay ma ti tamsirn lan wo, nen maga á wo ge wo we go taw ge doo ɓay, ni Baa yãɗ we yaŋ wo lagge ti ngel lagge ma tum no. 10Je maga mopo doo ɓe meʼ se joŋ joŋre de ɓe ti ngel ɓe de el mono, joŋ joŋre de ma purn doosen no lay, je maga bay joŋ joŋre de fen ma meʼ ti ngel ɓe de el wa mono, joŋ joŋre de fen ma purn gà doosen no lay. 11Wersen, hayga ma doo ɓay ma ti tamsirn lan nday bay we joŋ joŋre de ɓe ti ngel ɓe wa, day wose kãã ma hã horog ma cwãyn we doo an ne? 12Hayga horog maga bay diŋ ma ɓay wa, nday bay we joŋ joŋre de ɓe ti ngel ɓe wa no, horog maga Baa hay de ɗaw ge ɓe we ciŋ, Baa hãn we gà so lay.
13Waŋre wo ɓog, jobo boŋ joŋ wejõõ ɓaara ɓog ɓuy ga : Hayga á leʼ we ga se joŋ mbe ni no mono, á caa ge hee de maapo boŋ, da lan lay, hoo sug ti maapo boŋ, mbuɗ foo lan go lay. Nday kãã ma hã ɓil ɓay ne Baa lay, ne solay lay ɓog ɓuy gà.
Yeso fer wããre sar sar debaŋ
(Mat 11.12-13; 5.31-32; Mark 10.11-12)
14Farisiyẽẽ, jar da solayn wo wo laa wããre sen mo ɓuy no, á raw wo feg ge ti Yeso. 15Yeso raw riŋ rage ga : Nday diŋ jar maga nday joŋ de el ɓayn diŋ nen jar ga á mo ko wo we, ama Baa ko ɓen diŋ jiili ɓay. Werga re maga jar téebeere kon wo doo re ma kluu mokay, se ko nen Baa bay diŋ mopo go hala wa hase.
16Wããre Baa maga Moyis yer ne de wããre maga jar ndar nen wããre ma jag Baa go yer wo mo ɓuy, à le de had rage le ni hãã, Jaŋ ma joŋ batem jarn raw naa nene. Le ti de sen ni, á de sii Wããre ma de Cõõren go ti twaywaŋ mani Baan lay so, wosela ɓuy raw ɓoʼ ɗee durgi de see ɓe ga se mo kal ni de egre girgiri. 17Ngel ma ciŋ wo de sir ɓog ɓuy kãã wo ma taw ge go bay gaali, ama ma wããre Baa, ko wer wããre ɓe po ma meʼ meʼ layblaʼ sen taw go ga hase.
18Je maga bus wãy ɓe we go day raw we da ma tigriŋ no, ni á lengãɗ diŋ de wãy jobo, day je maga da wãy maga bus we le go wer jobo mo lay no, lengãɗ de wãy jobo lay.
Je horogn wo de Lasar
19Je horog debaŋ hay yaŋ le ɓaa, lag õõbe ma de woore maga yeɗ solay pur ti tum, mbe de hayle ti naw tum re rege ma de cõõre ti wer ga yeʼe. 20Je ma de co coo po, à ɗen ga Lasar, wããge gwẽẽ go see ɓe ɓuy, se de suuli jag tiŋ ni je ma de horog debaŋ no. 21Hoole maga gwaɗ go doo je horogn ɓil ɓe da ga se mo re ne, ama se bay daʼ ge doo ɓe wa, wayre kol wo age seɗ nen wããge gwẽẽ ɓen wo go ne hẽn yaw. 22Je co coo sen la raw huu gi go, jar peele Baa raw wo maŋ nenterse ɓe wo go ciŋ se Abraham. Je horog debaŋ la raw huu gi go lay, à raw teege ɓe go. 23Nenterse je horogn wo daʼ bon yoo jar ɓi tuu wo wo ni debaŋ, á raw maŋ nen ɓe ciŋ raw ko Abraham, daʼ Lasar de hayle ti jeŋ ɓe, wo wo go hãã lage. 24Ti ngel sen á raw ɗe Abraham go kloŋ ga : Baba Abraham, ko decoo ɓi ɗa la, ɓoʼ Lasar hee jag we doo ɓe nen bii ma desãy mo a woo trum ɓi ɗa la, werga ndi de joŋ bon nen wùu sen la debaŋ. 25Ama Abraham raw ɗe ge ɓe ga : naʼã, ɗig ti see ɓo, ga ndo hay daʼ fẽẽre we le debaŋ de maga ndo hay le tenen caw ɗa mono, ma Lasar hay daʼ ɓen debaŋ diŋ bone, ma patala Lasar daʼ ngel woo see ɓe we lay so, ɓon ndo joŋ bon lay so. 26De daŋ sen ɓuy pa, tuu ma kuɗum debaŋ go ti yoo naa de kããra, jar maga wo wo se wur la ga da wo ga saara wo wo see ɓay, kãã wo ga : Jobo kãã ma ur gi le see ɓay, à go se wùr la ga lay. 27Je horogn raw ga : baba Abraham, kam kam ɓo, ɓoʼ Lasar wo liŋ ni pan ɓi, 28hẽẽre ɓi yaŋ wo le liŋ ni dwee, á mo wo riŋ rage, maga á mo joŋ wo nen a ge ti ngel bon maga ndi la ni mo wa so. 29Abraham raw riŋgi ɓe ga : Moyis wo de jar siɗ wããre Baa yaŋ wo wo see ɓaara ni, ma riŋ rage, hẽẽre ɓon mo coʼ mbaara sug wããre ɓaara no. 30Je horogn raw ga, baba Abraham sen mokay kãã ga : ama hayga je maga hay huu go fer we wo see ɓaara no, ni á raw wo yaŋ coo ɗiggi ɓaara ma de ɓlaggen de deele tigriŋ. 31Ama Abraham raw riŋgi ɓe ga : Hayga á day wo we yãã wããre Moyis wo de jar ndar nen wããre Baa go wo we ga no, je maga hay huu go, mo fer bà mbe wo see ɓaara layblaʼ, á day mbaara yãã ge ɓe ga pa.
Tällä hetkellä valittuna:
LUG 16: TUP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tupuri Bible © Bible Society of Cameroon, 2016. All rights reserved.
