LUG 15
15
Jagjõõ ma de ngaɓ ge de sam maga yee go mono
(Mat 18.12-14)
1Jar tar se wo de jar maga jobo bay kee rage jag wa raw wo yaʼge see Yeso ɓuy coʼ sug wããre ɓe no. 2Farisiyẽẽ wo de jar ma ndar wer wããre Baa raw wo ngrum jag ti holaŋ kããra ga : Ɓa bloo sen yãɗ jar maga à bay kee rage jag wa see ɓe, re wo de kããra lay le ɓaa. 3Blam sen Yeso raw riŋ rage de jagjõõ ga : 4Hayga jobo yoo ɓay la, sããre ɓe kis, raw yee ge we go yoo ɓaara boŋ, á joŋ joŋ ge ne? Á men ma hwal hwal kaawaʼ ti kaawaʼn wo go ti ngel koɗ ragen ni, kal raw ge kiɗ maga yee go mono, hãã wo daʼ ge ɓe. 5Á wo we daʼ ge ɓe, á raw fruy gi debaŋ, raw ɓoʼ sam le bay ɓe, 6raw kalge liŋ ni ɓe. Blam sen á raw ɗe bar ɓe wo de jar leege ɓe wo le ga : naa joŋ we fruygi, werga ndi daʼ sam ɓi maga hay yee go mo we. 7Ndi de riŋ nday ga : Baa de jar ma see ɓen wo le ciŋ, joŋ wo fruygi yaŋ le debaŋ ti je maga mbuɗ faale we ne ɓlagge ɓen wo mono, daŋ jar ma hwal hwal kaawaʼ ti kaawaʼ maga á de horge sug ti ɓaara, day bay wo de sãy coo ɗiggi ɓaara ma de ɓlaggen de deele tigriŋ wa mono.
Solay maga yee go mono
8Doo wãy po, hayga solay boo doo ɓe hwale, raw yee ge go boŋ, á joŋ joŋ ge ne. Á raw doʼ gèere, tor tiŋman go raw kiɗ gi ɓe de el hãã wo daʼ ge ɓe. 9Á wo we daʼ ge ɓe, á raw ɗe bar ɓe wo de jar leege ɓe wo le ga : Naa joŋ we fruygi, werga ndi daʼ solay ɓi maga hay yee go mo we. 10Ndi de riŋ we ge ga : je maga fer we coo ɗiggi ɓe ma de ɓlaggen de deele tigriŋ, Baa de weere jõõre ɓe ma ɓiŋ ɓen wo le ciŋ, joŋ wo fruygi yaŋ le ti ɓe debaŋ doo sen no lay.
Wel maga yee go mono
11Yeso raw wãã ge pa ga : Jobo, weere ɓe twerpiiri ɓoge. 12Ma klee raw riŋ pan ɓe ga : Pan ɓi hã nen horog ma ɓin go me. Wersen pan ɓaara raw ɓes ɓil horogn go ne hara. 13Wo nà ge blam sen mbag, wel ma kleen raw yeɗ nen horog ma ɓen wo go ɓuy, kal rawge wo go de solay ɓen ɓi sir po hãã. Wo ni á raw joŋge go hãy hãy, wersen se raw ray horog ɓen wo go ɓuy. 14Fẽẽre ɓen wo wo go leʼ jag ɓuy mokay, koŋne raw leʼ ge ɓi sir sen ni kluu debaŋ, rege raw tĩĩ wer pẽɗ jag ɓe. 15Á raw kalge ti joŋre ni jobo ɓi sir sen ni, je sen raw ɓoʼ ge ɓe ɓi pay ɓen koɗ gaduuru wo. 16Ɓil ɓe da debaŋ ga se re leʼ ge koo maga à hãn ne gaduurun wo re ge mono, de sen ɓuy jobo bay hãge ɓe ne hẽn wa. 17Wersen á raw tĩĩ wer ɗig gi ti see ɓe, raw wãã ge ga : Jar joŋre mani pan ɓin wo ɓuy rege mbe see ɓaara debaŋ deŋ, maga re go doo ɓaara ɓuy ga : ma ɓin ndi mbi go de laɓ see ɓi de koŋne la yeʼe. 18Ndi ur ciŋ ndi fer ni pan ɓi, ndi wo wii pan ɓi ga ndi diŋ je ɓlagge nen Baa, ndi joŋ re nen ɓo pan ɓi ni ndaŋ ga lay, 19Ndi bay nen maga ndo ko me doo wel ɓo no wa so. Ama ko me doo jobo ma yoo jar joŋre ɓon wo nono. 20Blam sen á raw urgi ciŋ, raw ferge ni pan ɓe.
Á le go se tiŋ mani pan ɓen mbeɗa ɗawa ɗa mono, nen pan ɓe raw leʼ ge wo ne hẽn ti, á raw ko decoo nen Pan ɓe debaŋ. Pan ɓe raw caa pel ɓe de ɗee, raw klew ge ɓe, raw togoɗ ge ɓe. 21Weln raw ɗe ge ɓe ga : Baba, ndi diŋ je ɓlagge nen Baa, ndi joŋ re nen ɓo pan ɓi ni ndaŋ ga lay, ndi bay nen maga ndo ko me doo wel ɓo no wa so. 22Ama pan ɓe raw riŋ weere jõõre ɓen wo ga : See we hoo õõbe ma kluu de woore le deparday, laa we ne hẽn ti, hee we boo biŋni ne hẽn ti we doo, her we taarag ne hẽn ɓaale lay. 23Á we le de wedày ma de goɓre, ngaʼ we ne go, naa joŋ we few de rege de fruygi. 24Werga wel ɓin mokay hay nen ɓi doo ga á huu gon no, day fer le bir gi go, á hay yee go nen ɓi, day ndi fer we daʼ ge ɓe. Blam sen fruygi fewn raw tĩĩ wer joŋ ge so.
25De sen ni, wel ma kluun hay le go ɓi pay. Á wo le fer ge, wo kos tiŋ le mokay, á raw laa gẽẽge didil wo de dag ge jõõ le deŋ. 26Á raw ɗe ge le yoo weere jõõren wo boŋ, raw wiigi ɓe ga ngar ge jag sen ngar re may ɓa. 27Wejõõn raw riŋgi ɓe ga : wegeman ɓon fer we le liŋ, day pan ɓo raw ii wedày maga naa hay goɓ ge ɓe mono, werga wel sen fer le jam mono. 28Wel ma kluu raw tĩĩ gi go de waŋ, laa day ge kal ge wo liŋ ni gà. Pan ɓe raw kalge le go kam ge ɓe ga á mo kal le liŋ. 29Ama weln raw riŋ pan ɓe ga : Coʼ sug ɓo ɗa la, kiŋgi wara pur maga ndi de joŋ joŋre mo, ndi ɓoʼ jag ɓo go ti boŋ ga has lay, de sen ɓuy ndo bay de hã wel-fìi po me ti boŋ boŋ draʼ ga ndi mo joŋ fruygi de ɓe de bar ɓi wo wa. 30Ama wel ɓo maga fer le mo yeʼ no, á ɓlag horog ɓon wo go ne naare figliw wo ɓuy, ndo raw ii wedày maga naa hay goɓn go ne hẽne. 31Pan ɓe raw ga : Naʼã, ndo see ɓi la tum, fẽẽre ɓin wo ɓuy diŋ ɓo wo lay. 32Ama naa nen joŋ few de fruygi de woore, werga wegeman ɓon mokay hay doo ga se huu gon no, day fer bir gi go. Á hay yee go, ndi fer we daʼ ge ɓe.
Tällä hetkellä valittuna:
LUG 15: TUP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tupuri Bible © Bible Society of Cameroon, 2016. All rights reserved.
