JAŊ 4
4
Yeso wo de wãy jar Samari po
1Farisiyẽẽ raw wo laage ga Yeso joŋ go de jar wer debaŋ, de joŋ batem jar debaŋ dedaŋ Jaŋ lay. 2(Paga ti cwãy ɓen Yeso hay bay joŋ batem jar diŋ se de see ɓe wa, hay joŋ batem jar diŋ jar ma wer ɓen wo no.) 3Yeso wo laa sen mokay, raw men Jude le go, raw ferge Galile. 4Á wo rawge mokay, á hay nen cegaɗge ɓi sir Samari taw.
5Á raw age ɓiŋ ɓi leege po à ɗen ga Sikar ɓi sir Samari, see pay maga Jakob hay hãn ne wel ɓe Josef mbaŋ. 6Gutug mani Jakob yaŋ ti ngel ni lay, Yeso gay doo see le, kal hay ge jag gutugn ni, wur hay go de kos ɗeger lay.
7Wãy jar Samari po raw age ɗaa bii, Yeso raw riŋgi ɓe ga : Hã bii ma jo ge me ɗa ɓa. 8(Jar ma wer ɓen hay raw wo ɓi leege yeɗ rege.) 9Wãy jar Samarin raw riŋgi ɓe ga : Ndo diŋ je Jwif, ndo wii bii doo ɓi ndi wãy jar Samarin mokay wii gi ne? (Werga jar Jwif bay wo tayge de jar Samari wo wa.) 10Yeso raw riŋgi ɓe ga : Hayga ndo de ko fen maga Baa hãn ne jar we, de je maga de wii bii doo ɓo mo yeʼ we no, ndo de hay wii bii doo ɓe diŋ ndo yaw, á de hay hã bii ma kol mo ge tenen mo yaw. 11Wãyn raw ɗege ɓe ga : Waŋkluu ɓi no, hãn gutug bay doo ɓo wa lay, gutugn kuɗum lay, day ndo kãã ma ɗaa bii ma kol ndi tenen ɗaage la? 12Moo wùr Jakob hã gutugn mo kaʼ ne wùri, á de see ɓe jo bii ɓen lay, weere ɓe wo de horogre ɓe jon wo lay, ndo ɗig ga ndo daŋ Jakob kluu? 13Yeso raw fer wããre ne hẽn ga : Wosela maga jo bii sen mo kaʼ we ɓuy, jwaale fer kaŋge ɓe tigriŋ pa. 14Ama wosela maga jo ge bii maga ndi hãn ge ne hẽn we no, jwaale kaŋ ge je sen gà so hase, werga bii maga ndi hãn ge ne hẽn, kol ge ɓil ɓe diŋ kããge bii ma kol jar tenen tum. 15Wãyn raw ɗege ɓe ga : Waŋ ɓi no, hã bii sen me maga jwaale mo kaŋ me wa so ɗa la, maga ndi mo joŋ de sãy age go ɗaa bii ti la wa so ɗa la.
16Yeso raw riŋgi ɓe ga : See wo ɗe war ɓo le, ni ndo fer le so. 17Wãyn raw fer wããre ga : Ndi bay de war wa. Yeso raw riŋgi ɓe ga : Ndo wãã ga ndo bay de war wa, ndo wãã mbo ni. 18Werga ndo dog werpiiri dwee, bloo maga ndo de hayle wer ɓe patala mono, á bay diŋ war ɓo wa ɗa pa, ndo wãã mbo kidolgi we me. 19Blam sen wãyn raw ɗege ɓe ga : Waŋ, ndi ko we ga ndo diŋ je ndar nen wããre Baa go. 20Moore wùr jar Samari goŋ wo Baa ti húulì ma kaʼ mo kaʼ no, day nday jar Jwif nday wãɗ ɓayn ga ngel maga à nen goŋ Baa ni diŋ Jerusalem. 21Yeso raw ɗege ɓe ga : Wãy, yãã wããre maga ndi de wããge ɓe mokay no, wurpo a ge yaŋ le maga nday goŋ ge Pããben bay diŋ ti húulì ma kaʼ mo kaʼ wa lay, bay Jerusalem wa lay. 22Nday jar Samari nday bay de ko je maga nday goŋ ne mo wa, ma wùr jar Jwif, wùr de ko je maga wùr goŋ ne mono, werga je yãã jar gon nduu le diŋ ni Jar Jwif wo. 23Ama wurpo a ge yaŋ le, day á go de age yaw, maga jar goŋ Baa cwãyn goŋn ge wo Pããben diŋ de ɓil ɓaara wo ɓuy ti cwãy ɓe. Werga Pããben da diŋ jar maga goŋ wo ne diŋ doosen no mono. 24Baa diŋ nenterse, daga jar maga goŋ wo ne mo goŋ wo ne diŋ ti nenterse, lay ti cwãy lay.
25Wãyn raw wiigi ɓe ga : Ndi yaŋ mbi de koge ga Mesi (wer ɓe ga Krisi) Á ge yaŋe. Á nduu gi we no, á ɓoɗ ge wer wããren yaŋ wo go ne wùr ɓuy. 26Yeso raw riŋgi ɓe ga : Á diŋ ndi je maga de wãã re ne ndo mo yeʼ yaw no.
27De sen ni, jar ma wer Yeso fer wo we le lay, á raw wo ngrisgi, wer maga á wo wo koge ɓe ndalge de wãy mono. De sen ɓuy, jobo boŋ yoo ɓaara kãã ma wiigi ɓe ga : Ndo da may doo ɓe la? Noga ndo wãã re de ɓe ti may la? Gà hase.
28Blam sen wãyn raw men hoole bii ɓen ti ngel ni, kal rawge ɓi leege riŋ jar ga : 29Jar ɓi, a we mbay le ko bloo po lam ɗa. Á sii re maga ndi hay joŋ ra le mo ɓuy go ne ndi. Á joŋ ge mo hãʼ bay diŋ Mesin wa hase? 30Jarn raw wo hoo ɗeere le ɓi leege, raw wo raw ge see Yeso.
31De sen ni, jar ma wer ɓen raw wo teb Yeso ga á mo re mopo. Á wo ga : Waŋ, re mopo meʼ ɗa, re mopo meʼ ɗa. 32Ama Yeso raw fer wããre ne hara ga : Ndi go de re rege maga nday bay de koge ɓe wa mono. 33Jar ma wer ɓen raw wo riŋ kããra ga : Wose nduu de rege ne hẽn la ɓa?
34Yeso raw riŋ rage ga : Rege ɓin diŋ maga ndi mo yãã jag je maga ɓoʼ me le mono, maga ndi mo taw joŋre maga á ɓoʼ me le ti ɓe joŋge ɓe go lay. 35Nday de wãɗge de see ɓay ga : Few gwaʼ naa, wur werge fẽẽren a ge yaŋ. Ma ɓin ndi de riŋ we ge ga ko we payn de ele, cooren go de ruggi go mbaŋ ma we ge yaw. 36Je we cooren daʼ poɗge ɓen go tuu, coore ɓe maga á we ne tay ti ɓe go mo taʼ diŋ ma kolge ɓe go tenen tum, wersen je kabgen wo de je weegen raw wo tayge joŋ fruygi de kããra ɓog ɓuy so. 37Werga wããre maga wãã ga : Jobo kab coore, je ma tigriŋ a weege ɓe mono, á cwãy. 38Ndi laa we we we pay maga nday bay de joŋ joŋre ɓe wa, jar ma tigriŋ joŋ wo joŋre ɓe, nday kol daʼ bii ti ngel joŋre ɓaara no.
39Jar Samari ma ɓi leege sen wo ni debaŋ raw wo yãã wããre Yeso, wer maga wãyn riŋ ra ga á sii re maga se hay joŋ ra mo ɓuy go se mono. 40Jar Samari wo wo age see ɓe mokay lay no, raw wo kam ge ɓe ga á mo ig see saara meʼ ɗa. Yeso raw nà ge ni ɓaara ni ɓoge. 41Jar tigriŋ raw wo yãã wããre ɓe debaŋ pa wer wããre maga á siɗ ne hara de see ɓe mo lay. 42Á raw wo riŋ wãyn ga : Wùr yãã wããre ɓe patala bay wer maga ndo siin ne wùr mo tawa wa so, ama wer maga wùr laa wããre ɓen de sug wùr, wùr ko we lay ga á diŋ Je yãã jar ma ti tamsir lan wo go cwãy lay.
Yeso pẽẽ wel je kluu joŋre po go
43Blam naw ma ɓog mono, Yeso raw kalge go, kal rawge Galile. 44Werga Yeso de see ɓe hay wãã we go ga : À bay hoo sug ti je ndar nen wããre Baa go ɓi sir maga á biŋ ni mo wa. 45Á wo age Galile mokay, jar ma ɓi sir sen ni raw wo yããge ɓe de el yaw, werga á hay hay wo le ti few Pag Jerusalem, hay ko wo fẽẽre maga á hay joŋ ra le ti few ni mo lay.
46Á raw ferge le Kana ma ɓi sir Galile ti ngel maga á hay kol bii go yii ni mono, paga je kluu joŋre goforne yaŋ ni maga wel ɓe le de cegè Kapernam.
47Á wo laage ga Yeso ur le Jude raw we Galile mokay, á kal rawge see ɓe, raw kamge ɓe ga á mo wo Kapernam pẽẽ wel se maga go de huu gi go ne se. 48Yeso raw riŋgi ɓe ga : Tum nday ko fẽẽre mbuɗgi wo de re ma joŋ hẽẽne we gà nday day yãã re sen gà has mo la. 49Je kluun raw ɗege ɓe ga : Waŋ, a le liŋ ni ɓi taŋgu húulí wel ɓi no. 50Yeso raw riŋgi ɓe ga : See mbo liŋ, wel ɓon yaŋ tenene. Bloon raw yãã wããre maga Yeso wãã ne hẽn mono, kal rawge. 51Á wo day ge liŋ mokay, weere jõõre ɓen raw wo le caa pel ɓe le, raw wo riŋgi ɓe ga : Wel ɓon yaŋ mbe tenene.
52Á raw wii rage ga de wur komay maga wel sen joŋ ɗawa la. Á raw wo fer wããre ne hẽn ga : Cegèn men go suu de maga wur go de haw soole meʼ mono. 53Pan weln raw mbe koge tuu ga á diŋ de wur maga Yeso riŋ ga wel sen yaŋ tenen mono. Á raw wo yãã wããre Yeso de jar ma liŋ ni ɓen wo ɓuy.
54Mokay diŋ fen mbuɗgi ma de ɓog maga Yeso joŋ de maga á ur le Jude, raw age Galile mo so no.
Tällä hetkellä valittuna:
JAŊ 4: TUP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tupuri Bible © Bible Society of Cameroon, 2016. All rights reserved.
