JAŊ 3
3
Yeso wo de Nikodem
1Jobo yaŋ yoo Farisiyẽẽ wo ni, à ɗen ga Nikodem, á diŋ waŋ jar Jwif wo lay. 2Á raw nduugi see Yeso de suŋ, kal ɗege ɓe ga : Waŋ, wùr yaŋ de koge ga Baa ɓoʼ mo le had wùri, werga jobo kãã ma joŋ fẽẽre mbuɗgi maga ndo joŋ ra mo deŋ gà. Say ni je sen diŋ je ma Baa. 3Yeso raw fer wããre ne hẽn ga : Kidolgi ndi riŋ ndo, je maga fer biŋ gi we defay tigriŋ gà no, á kãã ma ko twaywaŋ mani Baan de nen ɓe gà hase. 4Nikodem raw wiigi ɓe ga : Day je maga go de tããbe kãã ma ferge biŋ gi defay tigriŋ biŋ gi pa? Á fer kal ge ɓil man ɓe ma ferge le go biŋgi tigriŋ pa? 5Yeso raw fer wããre ne hẽn ga : Kidolgi ndi riŋ ndo, je maga fer biŋgi we de bii wo de Nenterse gà no, kãã ma kalge ti twaywaŋ mani Baan gà hase. 6Je maga biŋ we de pan ɓe je tabay, diŋ je tabay, je maga Baa fer we biŋ gi ɓe de Nenterse diŋ ma Nenterse. 7Wããre maga ndi fer mo ga nday mo fer biŋgi tigriŋ ɓuy mokay, ngris ti sen wa. 8Leege fid doo maga ɓil ɓe da, ndo laa sug fidgi maga á fid mono. Ama ndo ko ga á a le genla noga á wo naa genla gà mokay diŋ fen maga joŋ ge jar maga Baa biŋ ra de Nenterse ɓen mo ɓuy so no. 9Blam sen Nikodem raw riŋgi ɓe ga : Day re sen mokay kãã ma joŋ ge joŋ ge ne? 10Yeso raw riŋgi ɓe ga : Ndo diŋ waŋ jar Jwif wo ɓuy yaw, day ndo bay de ko re sen wo mokay wa yawla? 11Kidolgi ndi riŋ ndo, wùr wãã go diŋ fen maga wùr de ko ge ɓe, wùr sii go diŋ fen maga wùr ko ne, ama nday bay yãã wããre wùrn wa. 12Wããre maga ndi wãɗ de ngaɓge de fen maga wo de joŋge gesiŋ la, nday bay yãã wããre sen wa pa, day hayga ndi yaŋ riŋ we ge diŋ ti fen maga wo le de joŋge ciŋ, day nday yãã sen yãã ge an so ne? 13Jobo bay de ɗii gi wo ciŋ ti boŋ wa hase, say ni se diŋ Wel je táabay maga ɗii le go gesiŋ mono.
14Doo maga Moyis hay hag cwe go ciŋ ti koo ti puuli nono, à hag ge Wel je táabayn yaŋ go ciŋ de ngaɓge degaʼ doosen no lay, 15wosela maga yãã wããre sen we mo ɓuy no, go de kolge tenen caw tum. 16Werga Baa da jar ma ti tamsir la wo debaŋ, raw hã Wel ɓe ma boŋ go, ga wosela ɓuy yãã wããre ɓe we mo huu wa so hase, ama á mo kol go tenen caw tum. 17Baa bay le de ɓoʼ Wel ɓen ti tamsir la ma age baw jar ma ti tamsirn wo de wããre wa, ama maga jar ma ti tamsirn mo daʼ wo see ɓaara wer ɓe.
18Wosela maga yãã wããre Wel we, reen bay de bagge ɓe wa, ama je maga yãã wããre ɓen we gà no, reen go de bagge ɓe yaw, wer maga á laa yãã wããre Wel Baa ma boŋ gà mono. 19Laa we wããre maga nduu baw jar mokay no, je ler ngel gon a we go ti tamsiri, ama jar téebeere raw wo da nen suŋgun daŋ ngel maga go poɗag mono, werga á wo de joŋge diŋ ɓlagge. 20Wosela maga joŋ diŋ ɓlagge mo ɓuy hee de ngel maga go de lerge poɗag mono. Werga á day age nen ngel maga go de lerge poɗagn mo gà doo hẽẽne maga day la joŋre se ma de ɓlaggen naa nen go tinoo poɗage. 21Ama je maga joŋ ɓen diŋ joŋre ma ti ngel ɓe, á nen ngel maga go de lerge poɗag mbe, maga à mo ko ga se de yãã jag Baa de joŋre ɓe maga se joŋ ne mono.
Yeso wo de Jaŋ
22Blam sen Yeso wo de jar ma wer ɓen raw wo rawge ɓi sir Jude. Se raw iggi wo de ɓaara ni smagga : Á hay joŋ batem ne jar lay. 23Jaŋ hay joŋ batem jar de bii Enoŋ ɓiŋ Salim mbaŋ, werga bii hay ti ngel sen ni debaŋ. Jar hay wo á ge see ɓe debaŋ maga á mo joŋ batem go ne saara. 24(Jaŋ hay bay de baage ti daŋgay wa ɗa.)
25Blam sen jar ma wer Jaŋ po raw wo tĩĩ wer faa kããra de je Jwif po ti wããre fãɗge see ɓaara go no. 26Á kal wo rawge see Jaŋ raw wo ɗege ɓe ga : Waŋ, ndo yaŋ mbo ɗig ti ti bloo maga hay le see ɓo faale Jurdẽẽ ɓaŋla mo ge? Bloo maga ndo hay riŋ wùr ti ɓe mo ɓa, á de joŋ batem ne jar patala lay, day ngaɓan wo go de naage diŋ see ɓe buy. 27Jaŋ raw fer wããre ne hara ga : Hayga Baa hã faage re sen we ne wosela gà no, jobo boŋ kãã ma daʼ ge ɓe de see ɓe gà hase. 28Nday de see ɓay nday kãã ma wãã ge yaŋ ga ndi hay wãã we go ga Ndi bay diŋ Mesi wa, ama à ɓoʼ me le pel ɓe. 29Je maga wãyn diŋ ɓe, diŋ war wãy no, ama ma bar war wãyn raw ooge see ɓe mbaŋ coʼ sug wããre ɓe, ɓil ɓe joŋ go feh debaŋ ma laa gẽẽge war wãyn lay. Day go mo feh kay diŋ ɓil ɓi, ɓil ɓi go patala de fug gi feh ɓuy. 30Daga joŋre ɓen mo see pele, ma ɓin ndi mo fer go klee.
Je maga a le ciŋ
31Je maga a ɓen le ciŋ, á go ciŋ ti fẽẽren ɓuy, je maga ɓen ti sir la mono, á diŋ ma sir no, á wãã go diŋ ti re ma gesiŋ wo la lay, je maga a ɓen le ciŋ, á go ciŋ ti fẽẽren ɓuy. 32Á wãã go diŋ fen maga á ko ne, maga á laa ne, ama jobo day yãã wããre ɓen boŋ gà. 33Je maga yãã wããre ɓen we, raw koge tuu ga Baa wãɗ wããre ti cwãy ɓe. 34Je maga Baa ɓoʼ le, wãɗ go diŋ wããre Baa, werga Baa wùu ne de Nenterse ɓen debaŋ debaŋ. 35Pããben da Weln debaŋ, á raw hã egre ne hẽn wãã re fẽẽren wo ɓuy. 36Je maga yãã wããre Weln we, kol go tenen caw tum, je maga yãã jag Weln we gà kol ge tenen caw gà has hase, ama ɓil Baa de sõõge ne je sen ti.
Tällä hetkellä valittuna:
JAŊ 3: TUP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tupuri Bible © Bible Society of Cameroon, 2016. All rights reserved.
