Mattayo 18
18
1Pa saa yiyilayila wanafunsi wakanchilili Yesu, kujowa, Wila nani ayii nkulungu pa utwa wa kunani? 2Na akakemili kamwana, akakayimisi pagati pawe, 3na akajowiti, Chakaka niwajowela, Wona mulemiti kung’anamuka, ni kupata kuya ngati tuwana, yamuyingile lepa pa utwa wa kunani. 4Mumu uyu nayombe yayiselese ngati kamwana aka, yuyu yaaye nkulungu pa utwa wa kunani. 5Ni ayi yoha uyu yakayupe kamwana kamonga ka ntundu uwu pa lihina lyangu aniyupa nenga: 6koma ayi yoha uyu yankuwase yumonga wa awa wachoko wakuyitakila pa nenga, yimnogela kukita liganga likulungu liyingasike pa singo yake, na ayiwasike pa fina fya luchi. 7Ling’aho pa ndima ndawa ya fya kukuwasa! nakuleka lepa kuyicha fya kukuwasa; koma ling’aho kwa uyu kwa ndawa ya yombe kya kukuwasa kihicha! 8Leka wona kiwoko kyako pangi kigulu kyako kikukuwasa, ukidumule, ukitage kuhuma pa wenga: kinofu kwa wenga uyingile pa kulama mbimbi pangi nchipi, kulutila mwene mawoko gawili pangi magulu gawili kutagika pa mwoto wa miaka yangamala. 9Na wona liho lyako likukuwasa, ulikolombole, ulitage kuhuma pa wenga: kiyii kinofu kwa wenga kuyingila ni liho limonga pa kulama, kulutila mwene miho gawili kutagika pa gehena ya mwoto. 10Mulole musihepa yumonga wa awa wachoko; pakuya niwajowela kukita, wakamalaika wawe uku kunani magono goha walola kyene kya Dadi wangu uyu ayii kunani. 11Pakuya Mwana wa adam achiti nausi ayokole wakutagika. 12Muhola wuli? mundu wona ayii na mambelele mia, na limonga lya aga linsowa, nakuleka ati mambelele tisaini na kenda, na abita mwanja ku fidunda, na alonda‐londa lila linsowiti? 13Na wona ayikolili, chakaka niwajowela, ahekelela pa lila kulutila pa gagala tisaini na kenda gangasowa. 14Wiwila nukuya kilondo kya Dadi winu uyu ayii kunani, kukita yumonga wa awa wachoko atagike.
15Leka wona ndongowo akuhokela, bita, undase lihoko lyake pagati pa wenga nuyombe wakape: wona akuyufwana, umpatiti ndongowo. 16Leka wona akuyufwana lepa, untole pamonga nawe yumonga pangi wawili wangi, nausi pa ndomo pa walungamakiso wawili pangi wadatu liyimikike lilowe liyi lyoha. 17Na wona abela kuwayufwana, ulitawalile kanisa: na wona abela kuliyufwana kanisa kawili, aye kwako ngati mundu wa kunja na wakuyupa nsongo. 18Chakaka niwajowela, Ifi fyoha yamufikunge pa ndima yafikungike kunani: na ifi fyoha yamufiwopole pa ndima yafiwopoleke kunani. 19Pa kawili niwajowela kukita, wona wawili wa mwenga wayitakisana pa ndima uwu pa kindu kiyi kyoha yawakiluwe, yakipate kuya kwawe nu Dadi wangu uyu ayii kunani. 20Pakuya uku wawili pangi wadatu wawungana pamonga pa lihina lyangu, bahalapala niyii pagati pa wombe.
21Bahalapala akachiti Petro, nakajowiti kwa yombe, Bambo, kalinga ndongo wangu yanihokele, leka nenga yanindekelekese? mpaka kahano na kawili ati? 22Yesu anjowela, Nenga nikujowela lepa, Mpaka kahano na kawili; koma, Mpaka kahano na kawili kakumi kahano na kawili. 23Ndawa iki utwa wa kunani uhwanangana ni mundu mutwa, uyu akalonditi kuwalanga na wawanda mundu. 24Leka apa akatumbwili kuwalanga, yumonga akatoliki kwake, wa misigilo ya matalanta maelfu kumi. 25Koma ndawa yombe akayili lepa ni kindu kya kulipa, bambo mundu akapawili kukita wamhemele yombe, nu mhanumundu, ni wana mundu, ni fyoha akayili nafyo, ni kulipila. 26Mumu mbanda yula akagwili pasi kungwilakimbo, kujowa, Bambo, mwisinge nu nenga, ni yanilipile goha. 27Leka bambo wa mbanda yula, akatoliki ni lipyana, akambopwili, ni akandekalakisi nsigilo wake wula. 28Koma mbanda yula akapititi, na akawonangini nu yumonga wa wawanda wayini, uyu akayili ni nsigilo kwake wa madenario mia: leka akankamwili, na akanfinyiti pa singo, kujowa, Ulipe nsigilo wako. 29Mumu mbanda njini akagwili, akampembesi kujowa, Mwisinge nu nenga, ni yanikulipile. 30Koma akabeliti: leka akagenditi, na akambikiti pa kukungika mpaka apa yalipe nsigilo wake. 31Mumu pala wawanda wayini wakaweni kila kikakitiki, wakanionganiki muni, na wakachiti kuntawalila bambo wawe ifi fyoha fikakitiki. 32Bahalapala bambo mundu akankemili kwake, kunjowela, Wenga mbanda mbifu, nenga nikakulekalakisi nsigilo wula woha, ndawa ukanipembisi: 33ati si wenga kawili ngaumpwelakili lipya na mbanda njako, ngati umu nenga nani nikakupwe lakili lipyana wenga? 34Nu bambo mundu akadaditi, na akampeliki kwa wakuwinisa, mpaka pala yalipile ngani nsigilo wake woha. 35Wiwi kawili Dadi wangu wa kunani yawakitile mwenga, wona mulekelekesa lepa ayi yoha ndongo mundu kuhumila pa mioyo yinu.
Tällä hetkellä valittuna:
Mattayo 18: MGS1937
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
First published by the British and Foreign Bible Society in 1937.
