Mattayo 17
17
1Na panyuma pa magono sita, Yesu awatola nayombe Petro nu Yakobo nu Yohana nung’una mundu, na akwela nawo ku kidunda kitali pa mweya; 2na akang’amwiki palongolo pawe: ni kiwungi kyake kikawaliti ngati lijuwa, ni fyakufwata fyake fikakitike fiwalafu mbee ngati lulangalila. 3Na lola, wakawawonakili Musa na Eliya wakulongela nako. 4Nu Petro, pakahigiti akanjowili Yesu, Bambo, kiyii kinofu tenga tiyii apa: wona ulonda, yanijenge apa fikonjo fidatu; kimonga kwa wenga, na kimonga kwa Musa, na kimonga kwa Eliya. 5Akona kulongela yombe, lola, lifundi lya kuwala likawalekalili kifwili: na lola, kajoweko kuhumila pa lifundi, kujowa, Uyu ayii mwanangu wakuganika, pa yombe niganisiki; munjufwanilaye yombe. 6Na apa wakayufwini wanafunsi, wakagwili kupama, kuyogopa kulutila. 7Nu Yesu akachiti na akawakwafiti kujowa, Muyimuke, mukotoke kuyogopa. 8Na apa wakanyanyamwili miho gawe, wakambweni lepa mundu, lema Yesu wakape.
9Na pakuselela wombe pa kidunda, Yesu akawataukili kujowa, Musintawalila mundu lingumbisi ili, mpaka apa Mwana wa adam yamale kusyuka pa wakufwa. 10Na wanafunsi wake wakankotiti, kujowa, Mumu wakulembela wajowa wuli kukita Eliya ngalongwili kuhicha? 11Leka yombe pakahigiti akajowiti, Eliya ahicha muni‐muni, na yayimike kawili fyoha: 12leka niwajowela kukita, Eliya amaliti kuyicha, na wakambalalili lepa, koma wakankitili fyoha fila wakafilonditi. Wiwi Mwana wa adam yahumbusike nawombe kawili. 13Bahalapala wanafunsi wakawalalili kukita akawatawalili fya Yohana Wakubatisa.
14Na apa wakachiti ku lipuga, mundu akanchilili kunfugamila ni kujowa, 15Bambo, umpwelekele mwanangu lipyana: ndawa ayii wa ligoji, na ahumbusika nyahope: pakuya pingi agwila pa mwoto, na pingi mu machi. 16Na nikantolili wanafunsi wako, na wakahotwili lepa kumponesa. 17Leka Yesu pakahigiti akajowiti, Kihogosi kyangali kiyitakiso ni kya mibidu‐mibidu, mpaka lili yaniye pamonga nu mwenga? mpaka lili yaniyisinge nu mwenga? muntole yombe kwa nenga apa. 18Nu Yesu akandakalili; ni daimon yikapititi pa yombe: nu nsongolo akalwasiki kitumbulile saa yiyilayila. 19Bahalapala wanafunsi wakanchilili Yesu ku mweya, kujowa, Ndawa kiki tenga tikahotwili lepa kwitaga kunja? 20Na akawajowili, Kwa ndawa ya kukepa kiyitakiso kinu: pakuya chakaka niwajowela, Wona muyii ni kiyitakiso ngati lungele lwa karadali, ngamukijowili kidunda iki, Hegelelaye apa mpaka kula; na yakihegelele; na nukuya kindu yakitame kyangahotoleka kwinu. 21Lema ntundu uwu upita lepa, lema pa kusali na pa kwinota kyakulya.
22Leka apa wakatemi mu Galilaya, Yesu akawajowili, Mwana wa adam yafumbulike mu mawoko ga wandu; 23na yawankome, ni ligono lya kadatu yasyukike. Na wakanionganiki nyahope.
24Leka apa wakafiki pa Kapernaum, wakuyupa didrakma wakanchilili Petro, kujowa, Wila Bambo winu alipa lepa didrakma? 25Ajowa, Ena. Na pakayingili mu nyumba, akatumbwili Yesu kunjowela, Uwona wuli, Simon? watwa wa ndima, wayupa lipilo pangi nsongo kwa nani? kwa wana wawe pangi kwa wageni? 26Leka apa akajowiti, Kwa wageni, Yesu akajowiti kwa yombe, Mumu wana wayii wakamba. 27Koma nausi tisiwakuwasa, bita wenga ku nyanja, uyimbilise ndowani, ni utole somba iyi yikwela pakutumbula; na apa yaudindule mu ndomo, yaukolele statera: yiyilayila utole, uwapele wombe kwa nenga na kwa wenga.
Tällä hetkellä valittuna:
Mattayo 17: MGS1937
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
First published by the British and Foreign Bible Society in 1937.
