مادتھا 10

حضرت عیسیٰ سی رسُول چوگنییس سکوا زادس۔

1حضرت عیسیٰ مسیح لوبٹوگس چوگنییسپوا بودّا زادتے، کھونگونلا ردود جوگسکھانگونّی نانگنے ردود پھینگچیس تانگ ناد تانگ زوموے ریگس تشانگما گیالچوگچیسّی وانگچھا سالّا زادس۔ 2رسُول چوگنییسّی مینگّون، تانگپوحضرت شمعُوؔن (کابوا حضرت پطرؔس سانگ زیرّاد)۔ یانگ کھوے نوحضرت اندرؔیاس، زبدی بُوژا حضرت یعقُوبؔ تانگ کھوے نو حضرت یُوؔحنّا ، 3حضرت فِلپُس، حضرت برتلما، حضرت توما، ٹھالّینکھان حضرت متّی، حلفئی سی بُوژا حضرت یعقُوبؔ ، حضرت تَدی، 4حضرت شمعُوؔن (یولدادچان) تانگ یہُوداؔہ اِسکریوت پا، کھوے حضرت عیسیٰ سی ستینگنے نگولوگ چوس۔

حضرت عیسیٰ سی رسُول چوگنییسپو لامچوگا زادس۔

5حضرت عیسیٰ مسیح رسُول چوگنییسپوا ای لابجاگون سالّا زادتے لامچوگا زادس، ”یہُودی مانکھان گُونی ٹوا ماچھا یا سامریہ ڈونگکھیرگونّی نانّگا ماجوگس، 6خُدے ستورکھانّی لُوگ، بنی اِسرائیل پاگونّیکا سونگ۔ 7کھیوجا چھا زانے ’نامکھے گیالثید نیموا دوگ‘ زیرین لون زانگپوبو شود۔ 8یانگ نادپاگون گیالچوگ، شیکھانگون سونچوگ، دزیناد یونگکھانگون گیالچوگستے ژانگما چوس، ردود جوگسکھانگونّی نانگنے ردودگون پھینگ۔ تے وانگچھا کھیوجاگونلا چھونلا تھوبستے این پاسانگ لاسگون چھونلا چوس۔ 9بیسلا چھا زانے سکیگوی نانّگا سیر یا مول یا راگانّی پینے، 10یا جولا یا کوسلاگ تھیبا یا پابُو یا ڈولچیسّی پھیا بیرگا ماکھور چیازیرنا لاس چوکھانگونلا گھوسدومگون تھوبچیس اوسپا اینوگ۔“

11”ڈونگکھیر تانگ گامیول کارُو لیبنانگ، تھادپو نیامپو گاسوس جوکھانجیک ژالتے تے ڈونگکھیرنے چھاچھا تشوگپا کھوے کھانگپے نانّگا دوگ۔ 12تے کھانگپے نانّگا ژوگس زانے خُدا کھونگونلا جیدے برکت سالچیسلا جْوس ۔ 13کالتیس کھونگون تیبوے اوسپا یودنا خُدے جیدے سالّا زادِین، اِین نانگ اوسپا میدنا تے جیدیبو کھیوجا سالّا زادِین۔ 14کالتیس کھانگپا یا ڈونگکھیرجیکّی نانّگا سوجیکّیانگ کھیوجا گاسوس ماچونا یا کھیوجے زیرکھانبوا مانیانّا، تے ڈونگکھیر یا کھانگپانے بینگ زانے رانگی کانگپے تھالبا سروک۔ 15نگے کھیوجاگونلا لدینبا زیرّاد خُدے ٹھیمسچادّی جاگّا، سدُوؔم تانگ عمورہ ڈونگکھیرّی می نگانپاگونّی سانگ تے ڈونگکھیرّی میگونلا چھادپا مانّگا ثانٹے پھوگین۔“

حضرت عیسیٰ سی لوبٹوگس گونلا ردوگنگال تھونگچیس۔

16حضرت عیسیٰ مسیح مولس، ”نگے کھیوجا شانگکوی ٹوا لُوگ تسوگسلا لامچوگاد۔ تیبویپھیا رُول ژوگس کھاسپا تانگ نودپا ماتانگکھان پھورگون ژوگس گیور۔ 17میگونّی کانے شانگ چوستے دوگ، چیازیرنا کھیوجا تینّا یولّی ٹھیمسکھون گُونی لاگا ستادتے مجلِس گُونی نانّگا کھیوجا ستالچاگ گیابچوگین۔ 18نگیکا ایمان یودچیسپوے ٹھیمسچادّالا کالون تانگ گیالپو گونّیکا کھیوجا کھیرین۔ طِطُس کھیوجا نگا سو اینکھانبوے گوا وانگثولپا تانگ ایمان میدکھان گُونلا تانگچیسّی سکابس تھوبین۔ 19کھونگونی کھیوجا وانگثولپے لاگا ستادّاچیگ، چی زیرین یا کازوگی زیرین سامتے تشیر ماتشیر، چیازیرنا تینّا توسلا کھیوجا ریریا زیرچیسّی تشیگسگون سالّا زادِین۔ 20طِطُس سپیرا زیرکھانبو کھیوجا مانپا کھیوجے نانّگا یودکھانّی یاب خُدے رُوح بوے کھیوجا گیُودتے مولّانوگ۔“

21” فونو گونّی نوگونلا یانگ ابے بُوژا یانگ ٹھوگوی پھاماگونلا نگولوگ چوستے سادچوگاین۔ 22کھیوجا نگیکا ایمان یودچیسپوے می تشانگمے کھیوجاگونلا ناپھراد چوانوگ۔ اِین نانگ تھاما تشوگپا ایمانی نانّگا ستانپو لوسکھانگونلا خُدے تھامیدپے میتشے سالین۔ 23یولجیکّی نانّگا کھیوجا ناگھسباردو ستانّا یانگ یولجیکّا شورتے سونگ۔ نگے کھیوجا لدینبا زیرّاد، بنی اِسرائیلی ڈونگکھیر تشانگمے نانّگا کھیوجا لاس چوتشارّی سانگ سنگونلا اِبنِ آدم لوگستے یونگین۔“

24حضرت عیسیٰ سی مولس، ”لوبٹوگس لوبپونّی سانگ ٹاگا، یانگ یوگپو سپونبوے سانگ ٹاگا مانوگ۔ 25اِین نانگ لوبٹوگس لوبپون ژوگس یانگ یوگپو مالِک ژوگس گیورنیانّانوگ۔ کالتیس نگا مالِک این اِین نانگ نگا بیلزیبول یانگنا ردودّی گوبا زیرّادنا، تینے کھیوجا نگے لوبٹوگس اینچیسپوے مانّگا نگانپا میزیرّا؟“

میگونلا مانپا خُدا جیگ۔

26”کھیوجا جیگسنانگ ستانکھانگونلا ماجیگس، چیازیرنا توسپو لیباین نام خُدے کابستے بورکھان تشانگما پھینّگا زادِین یا واستے بورکھان تشانگما میگونلا سنگون چوگّا زادِین۔ 27نگے کھیوجاگونلا مونڈیگی نانّگا شادکھانگون نییمے اودّی نانّگا شود، کھیوجے نامچھوگی نانّگا شوبستے نگے شادکھانگون کھانگپے کھیتھوگنے کُوچو تانگستے شود۔“

28”سروک مانپا لوس چیگپو ساد نیانکھانگونلا ماجیگس، اِین نانگ نیالوے نانّگا پھانگستے لوس تانگ سروک نیسکو میدکھان زادنیانکھانّی خُدا جیگس۔ 29چیپا نیس پینچُونگ چیگّا تھوبامیدوگّا؟ اِین نانگ نامتشوگپا نامکھے یابّی گونگسپا میسال چیپا چیگّانگ سیکا میبود۔ 30کھیوجے گویکا یودکھانّی ثے ڈانگسکھان کھونگی کھیینّا زادّانوگ۔ 31تینّابویپھیا جیگس ماجیگس، خُدے سکوندونلا چیپا مانگپوے سانگ کھیوجا چیگ مانّگا رینچھیا اینوگ۔“

32”میگونّی لدُونلا، حضرت عیسیٰ سی نگے مسیح این زیرکھان تشانگما نگیانگ نگے یاب نامکھے نانّگا جوگسکھانّی سکوندونلا کھونگون نگے لدینبے لوبٹوگس این زیرین۔ 33اِین نانگ میگونّی لدُونلا نگا میشیسزون تانگکھان تشانگما نگیانگ نگے یاب نامکھے نانّگا جوگسکھانّی سکوندونلا کھونگون میشیس زیرین۔“

جیدے مانپا نولچیس۔

34”کھیوجے نگا دُنیائیکا جیدے کھیونگا یونگستے اینوگ ماسام۔ نگا جیدے مانپا نولچوگّالا یونگستے این۔ 35چیازیرنا، نگا ایمان چوچیسپوے

بوتشے رانگی ابا نگولوگ چوین،

یانگ بوموے رانگی اما نگولوگ چوین،

یانگ بوتشے نامے رانگی ماگپے اما نگولوگ چوین،

36میجیکّی ڈاو ، کھورانگی نانگمی گُون گیورین۔ 37رانگی ابا یا اما نگے سانگ مانّگا یاشا چوکھانبو نگے لوبٹوگس گیورچیسّی اوسپا مان، یانگ رانگی بُوژا یا بوموا نگے سانگ مانّگا یاشا چوکھانبو نگے لوبٹوگس گیورچیسّی اوسپا مان۔ 38رانگی ردوگنگالّی کیانگشینگ کھورتے نگے ستینگرانگنے ماڈانگسکھانبو نگے لوبٹوگس گیورچیسّی اوسپا مان۔ 39رانگثوگ تھامستے دوگکھانگونّی لدینبے میتشے سکیالاین، اِین نانگ نگے پھیا کھورانگی سروک سکیالکھانگونلا لدینبے میتشیبو تھوبین۔“

شزدے ۔

40”کھیوجا گاسوس چوکھانگونّی نگا گاسوس چوستے اینوگ، یانگ نگا گاسوس چوکھانگونّی، نگا کالا زادکھانبوا گاسوس جْوس تے اینوگ۔ 41خُدے حُکم شادکھان اینچیسپوے پیغمبر گاسوس جوکھانگونلا پیغمبر تھوبکھان ژوگس شزدے تھوبین۔ یانگ ٹانگپو اینچیسپوے میجیکّا گاسوس جوکھانگونلا می ٹانگپوجیکّا تھوبکھان ژوگس شزدے تھوبین۔ 42نگے کھیوجا لدینبا زیرّاد نگے لوبٹوگس نیامشونگجیکّا چھو ٹانگمو کورے گانگ تانگکھانگونلا تانتانلا شزدے سالّا زادِین۔“

Tällä hetkellä valittuna:

مادتھا 10: LBJNT

Korostus

Jaa

Kopioi