مادتھا 11
11
حضرت عیسیٰ تانگ غوتا سالکھان حضرت یُوؔحنّا ٰ۔
1حضرت عیسیٰ مسیح لوبٹوگس چوگنیسلا لابجا سال تشارتے ستینگنے، کھونگ تیکانے لابجا سالچیس تانگ تبلیغ سلا گلِیلی یولجونگسّی ڈونگکھیرگونلا سکیودس۔
2یوحنّانی تسونکھانگی نانّگا، مسیح معجزہ زادکھان گُون تشورّاچیگ، کھونگرانگی لوبٹوگسگون حضرت عیسیٰ سی یودسا، ای ٹیوابو ٹیالا لامچوگس، 3”پیغمبر گونّی سکیودین مولکھان مسیحا نیرانگ جُوگستے اینّا یا نگاجا یانگجیکّا ثونگ؟“
4حضرت عیسیٰ سی لانسالس، ”لوگستے سونگ یانگ کھیوجے تشورکھان تانگ تھونگکھان گُون حضرت یُوؔحنّا ٰ شود۔ 5جارا گونلا تھونگ، جاؤ گُون ڈولس، دزینادچانگون گیالتے ژانگما سونگ، ماتشورکھانگونّی تشور، شیکھانگون سونتیا لانگس، یانگ نیالباچانگونلا گاموےناتسُول شادس۔ 6کھوا شود، نگے چوکھانگونّی جاستے نگا ماپھانگکھانگونلا برکت سالّا زادِین۔“
7یوحنّانی لوبٹوگسگون لوگستے چھاچیگ، حضرت عیسیٰ سی میتشوگسلا یوحنّانی سکورلا مولچیس گوزوگس، ”کھیوجا ریستونگی نانّگا کازوگ میجیکّا ستالا سونگپین؟ چھوی تھامے لجانگسپا لونگسپوے سکولّا تسوگسلا، لابجے نانّگا توسگیون گیورجا کھیونگکھان جیکّا؟ 8کالتیس مانّا کھیوجاگون چی ستالا سونگپین؟ می کوسلاگ جامپو تانگ رینچان گونکھانجیک کھیوجاگونّی تھونّگا؟ ماتھونگ۔ کوس رینچان گونکھانگون گیالپوے کھارلا دوگّانوگ۔ 9کھیوجا پیغمبر جیکّا ستالا سونگپینّا؟ اونا، کھو پیغمبر سانگ ٹاگّاجیک این۔ 10ہلژخمہ شوقبُو بوے نانّگا کھوے سکورلا خُدے مولّا زادتے دوگ،
’ستوس، کھیرانگی سانگ سنگونلا نگے نگارانگی لونکھیرکھانبو کالین ۔
کھوے کھیرانگی پھیا لام ڈالڈیگ چوین۔‘“
11”نگے کھیوجا لدینبا زیرّاد، داگسا تشوگپا سکییسکھان میگونّی نانگنے حضرت یُوؔحنّا ٰ غوتا سالکھانّی سانگ ٹاگّاجیک سوانگ میدپا اینوگ، اِین نانگ نامکھے گیالثیدّی نانّگا چھونگشوگپو یوحنّانی سانگ ٹاگا این۔ 12غوتا سالکھان یوحنّانی چھوسشادچیس گوزوگسپانے داگسا تشوگپا خُدے وانگ نیامپو کھونگرانگی گیالثیدپو گیاسشوگّا زادِین اینوگ، اِین نانگ نودسکیال می نگانپاگونّی تیبوے گیابگالّا نولاین اینوگ۔ 13حضرت یُوؔحنّا ٰ یونگی سانگ سنگونلا نامکھے گیالثیدّی سکورلا شریعتی شوقبُو تانگ پیغمبر تشانگمے لونگستان شادّا زادس۔ 14کالتیس نگے زیرچیسپوا ایمان چوا تھادنا، حضرت یُوؔحنّا ٰ نی حضرت اِلیاس این کا بو پیغمبر گونّی یونگین مولتے اِنپین۔ 15نامچھوگ یودکھانگونّی نگے زیرکھانلا نیونشیگ۔“
16”نگے ای میرابسپو سو نیامپو لدور؟ ٹھومسّی نانّگا دوگکھانّی ٹھوگوگون ژوگس کاگونّی دزاوگونلا بودین زیردوگ،
17نگاجے لینگبو پھوستیانگ کھیوجا ماسیس۔
نگاجے شادپا تانگ زانے کھیوجے نیانگان ماچوس۔
18تینّا تسوگسلا حضرت یُوؔحنّا ٰ یونگستے زان مازوس یا چھانگ ماتھونگسپا میگونّی کھوے نانّگا ردود جُوگستے اینوگ زیرس۔ 19اِبنِ آدم یونگتے زان زوستے چھانگ تھونگسپا، کھیوجے کھو زین دُوگکھان تانگ راروستے دُوگکھان یانگ ٹھالّینکھان تانگ دِیگپاچان گُونی دزاو اینوگ زیرس۔ اِین نانگ نگاجا خُدے شیسرابسّی لامیکا ڈولکھانبو نگاجے لاسّی ڈاسبوگونّی ستانین۔ #11:19 یُونانی سکادّی نانّگا ”اینّانگ شیسرابس لدینبا اینکھانبو تیبوے ڈاسبوی ستانین“ زیرتے ڈِیستے دوگ۔
تادپامیدکھانگونلا ٹھیمسچادّا زادِین۔
20تینے حضرت عیسیٰ مسیح کھونگی معجزہ مانگپو ستانّا زادکھانّی گیالساگونّی گیابگالّا مولس، چیازیرنا تینانّگا یودکھانگونّی دِیگپا سپانگستے گیودپا ماچوس۔ 21لے خُرازِین پا گون، لے بیت صیدا پا گون، کِینتانگاگیودپہ، کالتیس کھیوجے نانّگا ستانکھانّی معجزہ گون، صُور تانگ صیدا ڈونگکھیر نگانپاگونّی نانّگا ستانپینّا، کھونگونی دِیگپا سپانگستے گیودپا چوستے بُوری گونتے، گوگتھال یوگین ردوگپو چوستے یودڈو۔ 22اِین نانگ نگے کھیوجاگونلا زیرّاد خُدے ٹھیمسچادّی جاگّا، صُور تانگ صیدا ڈونگکھیرّی میگونّی سانگ کھیوجا چھادپا مانّگا ثانٹے پھوگین۔“
23وا کفرنحُوم پاگون چی کھیوجا سیوا تانگستے نامکھا تھینّا زادّانوگ سامّا راگا؟ مانے میتھین۔ کھیوجاگون نیالوے نانّگا پھانّگا زادِین۔ کالتیس کھیوجاگونلا ستانّا زادکھانّی معجزہ نگانپا سدُوؔم پاگونلا ستانپینّا گیودپا چوستے کھونگون داگسا تشوگپا ای دُنیائیکا لوستے یودڈو۔ 24اِین نانگ نگے کھیوجاگونلا زیرّاد، خُدے ٹھیمسچادّی جاگّا، سدُوؔم ڈونگکھیرّی میگونّی سانگ کھیوجا چھادپا مانّگا ثانٹے پھوگین۔
نگالکھانگونلا آرام سالین۔
25تینّا توسلا حضرت عیسیٰ مسیح دُعا جوین مولس، ”نگے یاب نامکھا تانگ دُنیائی مسیح لے، نگے نیرانّگا ستودپا پھولّاد چیازیرنا نیرانگی ٹانگپو لامبو کھاسپا تانگ یونتانچانگونّے واستے، ٹھوگو ژوگس یودکھانگونلا سنگون چوگّا زادس۔ 26اونا یابلے تیزوگ زادچیسپوا نیرانگ تھوگستھاد۔“
27”نگے یاب خُدے وانگچھا تشانگما نگا ستادا زادتے این۔ یابّی مانے جانسوانگ بُوژا میشیس، یانگ بوتشے مانے جانسوانگ یاب میشیس، اِین نانگ نگے لدامکھانگونلا یاب سنگونچوگین۔“
28”سیمسّی نانّگا نگالکھان تانگ کھورو لچینتے کھورکھان تشانگما نگا یودسا یونگ، یانگ نگے کھیوجا آرام تانگین۔ 29نگے نیاشینگبو کھور یانگ نگے کانے لوب چیازیرنا نگا نی سیمسّی نانّگا بولمو تانگ نیامشونگ این، یانگ کھیوجاگونّی سیمسلا آرام تھوبین۔ 30نگے نیاشینگبو کھورّالا لامو یانگ نگے کھوروبو یانگمو یود۔“
Tällä hetkellä valittuna:
مادتھا 11: LBJNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ladakhi Bible by The Love Fellowship is licensed under Creative Commons Attribution-ShareAlike 4.0 License.
