MATHAI 12
12
Sabbath Kawng Lokduenghhaih
(Mrk 2:23-28; Luk 6:1-5)
1Topacoeng akraa ai na-ah Jesuh loa Sabbath ni ah lawk thung hoitoah a caeh dok. A hnukbangnawk zok amhlam o boah pongah cangqui to pahoeh o moa a cak o.#Deut 23:25 2Farasinawk mah a hnuk o na-ah Jesuh khaeah, “Khen e, na hnukbangnawk mah Sabbath ni ah hitiah a sak o hae kaicae ih Tawklok a phraek,” a naa pae o.
3Jesuh mah anihcae khaeah, “David hoi angmah ih kaminawk zok amhlam o na-ah timaw a sak o tito na kroek o maw?#1 Sam 21:1-6 4David mah Sithaw im thungah akun moa, angmah hoi angmah ih kaminawk mah, Sithaw khaeah tahlang o ih takaw, qaihmanawk khueh mah a cak o hankoi a cak o to anihcae mah Mosi ih Tawklok a aek o na ai maw?#Lev 24:9 5Tolaep ah qaihmanawk mah Tempal thungah Sabbath ni kruekah Sabbath tawk a aek o toemoe e zae ah om o ai tito Mosi ih Tawklok thungah na kroek o vaih ai maw?#Nam 28:9-10 6Loktang kang thuih: Tempal pongdoeh kalen koek hiah hae a oh. 7Cabu Kacai mah, ‘Boii hoiah angbawnhaih sak pongdoeh tahmenhaih to ni ka koeh koek,’ tihae thuihkoehhaih ih to panoek o nahaeloa kazae ainawk to zae ah na net o mak ai;#Mat 9:13; Hos 6:6 8Kawmawtiah Kami Capa loa Sabbath nuiah Angraeng ni,” tiah a thuih.
Ban Kamkhawn Longto A Hoihsak
(Mrk 3:1-6; Luk 6:6-11)
9Jesuh loa to hmuenh hoitoah caeh moa Sinakok ah akun. 10To ih sinakok ah ban kamkhawn longto a oh. Toah to Jesuh zaenet han ka koeh kami thoemto a oh. Anihcae mah Jesuh khaeah, “Sabbath ni ah kami hoihsak hanah aicae ih Tawklok mah a koeh maw?” tiah a duengh pae o.
11Jesuh mah anihcae khaeah, “Nangcae thungih kami longto mah tuu maeto a tawnh moa Sabbath ni ah tangqom thungah krah ving nahaeloa tuu to tathok ueloa la aiah om tih maw?#Luk 14:5 12Kami hae tuu pongdoeh pahlai zawt ah atho oh. Topongah sabbath ni ah kami longlongto abom hanah aicae ih Tawklok mah a koeh,” tiah a naa pae. 13Topacoengah ban kamkhawn khaeah, “Na ban to pazang tahang ah,” a naa pae. Anih mah ban to pazang na-ah banghap bangih ban batih toengah a hoih let.
14Topacoengah Farasinawk mah caeh o moa Jesuh to paduek han angcaeng o.
Sithaw Mah Qoih Ih Tamtoeh
15Totiah hum hanah tamqu lamah angcaenghaih o ih to Jesuh mah a thaih na-ah to hmuenh hoitoah a caeh ving. Tona-ah mipui paroeai mah ahnuk ah baang o. Jesuh mah ngoina kaminawk to a hoihsak. 16Angmah ih kawng to minawk khaeah thuih han aiah lok a paek. 17Hitiah a sak hae tahma Isaiah pakhaa ah Sithaw mah:
18“Hi loa kaimah ka qoih ih tamtoeh ni.#Isa 42:1-4
Ka palung moa kai ih mik kacop kami ni.
Anih ih nuiah Pakhra ka suek moa,
Kai ih lokcaekhaih loa
caeng kaminawk boih khaeah taphong tih.
19Anih mah loa lokaek mak ai ueloa hang romram mak ai.
Lam sungqum ah hang romram mak ai.
20Tara thuemhaih to pazawkhaih iah
a phaksak airoek loa toeng sut aiah thaueng tih.
Anih mah loa sakrung kung kangkoi to doeh khaek lawt mak ai ueloa,
hmai-im ka dueh tom to doeh paduek dip mak ai. 21Anih to caeng bum boih mah oepdoeng o tih,” tiah a thuih ih to akoephaih hanih ni.
Jesuh hoi Beelzebul
(Mrk 3:20-30; Luk 11:14-23)
22Moa Jesuh khaeah taqawk mah naeh pongah mikmaengh moa lok kapae thaih ai longto, kami thoemto mah angzoh o haih. Jesuh mah to kami to a hoihsak moa lok apaeh thaih moa mik doeh a hnuk thaih let. 23Jesuh mah a sak ih pongah mipuinawk mah a dawnrai o moa, “Hi kami hae David capa ah om thaih tih maw vai?” ti o.
24Farasinawk mah to lok to a thaih o na-ah anihcae mah, “Anih mah taqawk haekhaih thaih ih loa anihcae ka ukkung Beelzebul mah hmuensak thaihaih ih a paek pongah ni,” a naa pae o.#Mat 9:34; 10:25
25Anihcae dawnhaih to Jesuh mah panoek moa anihcae khaeah, “Kawbatih prae doeh a thungah a bubu ah kampraek moa angmah hoi angmah to misa ah kangtuh loa ka sawk ah angcak mak ai. Kawbatih vangpui doehsoe, imthungtako doehsoe kampraek moa angmah hoi angmah to misa ah kangtuh loa angdoe thaih mak ai. 26Topongah Setan prae thungah bu maeto hoi maeto misa ah coeng nahaeloa to prae to ampraek hlak boah pongah amro palang tih. 27Nangcae mah, ‘Kai taqawk haekhaih thaih ih loa Beelzebul mah hmuensak thaihaih ih a paek pongah ni,’ na ti o. Totibaloa nangcae ih hnukbangnawk khaeah taqawk pathok hanah hmuensak thaihaih ih loa mimah maw ka paek? Nangcae ih hnukbangnawk mah ni na sak pazaehaih ih to amtuengsak. 28Na thuih ih hae na ai ni, taqawk pathok hanah hmuensak thaihaih ih ka paekkung loa Beelzebul na ai moa Sithaw ih Pakhra ni, taqawk pathokhaih thaih ih mah Sithaw Poenghaih ih loa nangcae nuiah a phak boah tito amtuengsak.
29“Tha kaom kami to loa taoeng hmaloe ai nahaeloa mimah doeh im to muk ueloa hmuenmae to la thaih mak ai; angmah to taoeng pacoengah ni loa hmuenmae to la thaih vop tih.
30“Kai kangpang haih ai loa kai ih misa ni. Ami doeh kaimah kami takok na-ah ka takok haih bom ai loa ka tapraekkung ni.#Mrk 9:40 31Topongah kang thuih o: Mimah kawbatih zaehaih doeh ka sah moa loksae lokkhaa kapae langla cadoeh#12:31Loksae lokkhaa kapae langla cadoeh tihae Sithaw thuihsaehaih loksae lokkhaa ka pae langla cadoeh tiah doeh oh thaih. tahmen thai tih; to-e ami doeh Cai Pakhra to kasae ah ka thui loa tahmen thaih mak ai. 32Ami doeh Kami Capa to ka thuisae loa tahmenhaih om thaih tih, to-e ami doeh Cai Pakhra to ka thuisae loa vaihi doehsoe, hmabang khoekto natuek doehsoe, tahmenhaih om thaih mak ai.#Luk 12:10
Thingkung hoi Athaih
(Luk 6:43-45)
33“Athaih kahoih hnuk hanah thingkung kahoih tawnh han angtoeng. Thingkung kasae na tawnh nahaeloa athaih doehsoe sae toengh tih. Kawbatih thingkung maw tito athaih ranghoiah panoek thaih.#Mat 7:20; Luk 6:44 34Nangcae pahuinawk! Na set o tomah kawbangmaw lok kahoih na thuih o thaih? Kawmawtiah palung thungih ka koi to pakhaa mah a thuih.#Mat 3:7; 23:33; 15:18; Luk 3:7; 6:45 35Kami kahoih mah loa hmuen kahoih pakuemhaih thung hoi-ih hmuen kahoih to amtuengsak; kami kasae loa hmuen kasae pakuemhaih imthung hoi-ih hmuen kasae to amtuengsak.
36“Loktang ta-ah kang thuih o: Lokcaekhaih Ni ah ka vanglang ai lok apaeh ih kawng to mi boih mah thuih let han om tih. 37Nangmah na paeh ih lok mah na taang hoi na zawn to lokcaekhaih han patoh tih,” tiah a thuih.
Dawnraihaih Sak Hanah A Nguek O
(Mrk 8:11-12; Luk 11:29-32)
38Topacoengah Tawklok patukkung thoemto hoi Farasi thoemto mah, “Patukkung, dawnraihaih maemaeto na sak ih hnuk han ka koeh o,” a naa pae o.#Mat 16:1; Mrk 8:11; Luk 11:16
39Jesuh mah anihcae khaeah, “Vaihi dung ih kami kahoih ai hoi Sithaw tamu ka suem ai kaminawk ah na oh o! Dawnraihaih sak hanah maw nang pacae o? Ka sah mak ai mue. Tahma Jonah ih dawnraihaih tih khueh tiaialoa kalah dawnraihaih na hnuh o mak ai.#Mat 16:4; Mrk 8:12 40Jonah loa tangaa zok thungah ni thumto hoi qum thumto a oh batiah Kami Capa doeh ni thumto hoi qum thumto long thungah om toeng tih.#Jhn 1:17 41Lokcaekhaih Ni ah Nineveh kaminawk angdoe ueloa nangcae to zaenet o tih, kawmawtiah anihcae loa Jonah lokthuih ih a thaih o na-ah zaehaih a dawnpakhuem o. Loktang kang thuih o: Jonah pongdoeh kalen kue to hiah oh.#Jhn 3:5 42Lokcaek Ni ah Sheba Sangpahrang nongpui to angdoe ueloa nangcae to zae na net o tih, kawmawtiah Solomon ih ciinghaih to tahngaih koeh ah lam kahla parai hoitoah angzoh. Loktang kang thuih o: Solomon pongdoeh kalen koek to hiah oh,” tiah a naa.#1 Sang 10:1-10; 2 Dung 9:1-12
Taqawk Kasae Amlaem Let
(Luk 11:24-26)
43“Taqawk kasae to kami longto tako thung hoi-ih tacawt na-ah praetanghaeng ah to amkaeh moa anghakhaih ahmuenh to pakrong. Anghakhaih ahmuenh to hnuh ai na-ah, 44‘Ka im ah amlaem let han,’ a ti. Topongah amlaem let moa im ka kongroek, kacaipin ah pahuih moa huem poeng ih to a hnuk. 45Topacoengah a caeh let moa angmah pongdoeh ka nung saek taqawk kasae sarihto angzoh haih moa to im ah to a oh o. Totiah oh pacoeng na-ah ato kami loa tangsuek ih pongdoeh hnukkhuem ah loa a nung aep. Tobatiah vaihi dung ih kami kasaenawk nuiah pha toengh tih” tiah a naa pae.
Jesuh Ih Amno hoi Amnauknawk
(Mrk 3:31-35; Luk 8:19-21)
46Jesuh loa mipui khaeah lok a thuih li na-ah amno hoi amnauknawk to angzoh o. Tasabang ah angdoet o moa anih hoiah lok apaeh han ka koeh o, a ti o. 47Topongah mipui thungih kami longto mah Jesuh khaeah, “Khen e! Nam no hoi nam nauknawk loa tasabang ah angdoet o, nang hoiah lok apaeh han koeh o,” a naa pae.#12:47 Thoemto banrikcabu ah kacai 47 hae om ai.
48Jesuh mah, “Mimaw kam no loa? Mimaw kam nauknawk loa?” tiah a pathim. 49Topacoengah a hnukbangnawk to takhih moa, “Khen e! Hinawk hae kam no hoi kam nauknawk ni! 50Ami doeh van ih kaom Pa mah sak han a koeh ih ka sah kami boih loa kam nauk, ka tanu hoi kam no ni,” tiah a naa pae.
Tällä hetkellä valittuna:
MATHAI 12: AKNT2023
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Asang Khongso New Testament in Eastern Khumi © Bible Society of Myanmar, 2023.
