MATHAI 11
11
Baptiskung Johan Khaeih Laicaenawk
(Luk 7:18-35)
1Jesuh loa a hnukbang hlaihnet tonawk khaeah hi loknawk taquk boih pacoeng na-ah, to hmuenh to tacawt tak moa a taenghaek ih avangnawk thungah patuk han hoi tamthang lok thuih hanah a caeh.
2Baptisma paekkung Johan mah thongim hoitoah Khrih toksakhaih kawng to a thaih na-ah, anih loa a hnukbang thoemtonawk to Jesuh khaeah patoeh. 3Anihcae mah Jesuh khaeah, “Angzo tih, a ti o ih to Nang boah maw, tiaibaloa, mi kalah longlongto maw ka zing o han vop?” tiah duengh pae o.
4Jesuh mah, “Amlaem o let aloa na thaih hoi na hnuk ih hae Johan khaeah thui pae oah. 5Mikmaeng mah mikhnuk thaih, khokbai mah takat thai, ngansae ka man kaminawk doeh a thoengcai o,#11:5 Thoengcai o: 8:2 khen ah. naapangnawk doeh naa a thaih o, kadueh kaminawk doeh pathawk let ah oh moa kamtang kamlainawk khaeah Tamthang Kahoih taphong ah oh.#Isa 35:5-6; 61:1 6Kai ih kawng ah oepvawthaih ka tawn ainawk loa taham a hoih o,” tiah pathim pae.
7Johan ih hnukbangnawk to amlaem o li na-ah Jesuh mah angmah kawng to mipuinawk khaeah a thuih pae: “Praetanghaeng ah Johan khaeah na caeh o na-ah timaw hnuk hanah na dawn o? Takhi mah hmuh ih sakrung kung kangkoi henhawn to khet hanah maw? 8Tih khet hanih maw na caeh o? Khukbuenh kahoih hoiah kamthoep kaminawk khet hanih maw? Tobatih khukbuenh kang khuk loa angraeng im ah ni loa a oh. 9Na thui oah, tih hnuk hanih maw na caeh o? Tahma khet hanih maw? Ahlong, na hnuk o tangak. 10Kawmawtiah Johan kawng hae Cabu Kacai mah, ‘Sithaw mah nang hanih lam ka tuh hanah nangcae ih hma-ah laicae kang patoeh,’ tiah a thuih.#Mal 3:1 11Kamnoek ta-ah kang thuih o. Nongpui mah zah ih kaminawk thungah Baptisma paekkung Johan tanto kalen mi doeh om vaih ai. To-e van Poenghaih thungih kacai koek kami to Johan pongdoeh a lenh. 12#Luk 16:16Johan mah tamthang lok thuih amtong hoitoah vaihni karoekto van Poenghaih loa saengprangnawk ih tukhaih to a tongh#11:12 Saengprangnawk ih tukhaih to a tongh o tihae Saengprangnawk ih tukhaih to ang phak boah tiah doeh oh thaih. o moa saengprang kaminawk loa ato Poenghaih to lomh han angcaeng o. 13Johan tue phak airoek to tahmanawk boih hoi Mosi Tawklok mah Poenghaih kawng to a thuih o. 14To tamthang lok thuih ih to na taang hanah koeh o nahaeloa Johan hae Elijah boah ni, angzo tih, tiah thuih coek o ih to ni.#Mal 4:5; Mat 17:10-13; Mrk 9:11-13 15Topongah naa na tawnh o nahaeloa thaih oah.
16“Vai tahang kaminawk hae tihoiah maw ka patah han? Anihcae loa hmuenmae zawhhaih hmuenh ih kanghnu nauktanawk hoiah ahmong. Naukta kangkom maeto mah kalah kangkom maeto khaeah, 17‘Nangcae hanah zupaluen poi tuenkamding kang ueng kang tum pae o, to-e na hnawh o ai, qahninglung kang thuih o, to-e na qah koeh o ai,’ tiah kang zoeh o. 18Johan angzoh na-ah, anih loa buhzah moa misurtui doeh nae ai. Mi boih mah, “Anih loa taqawk a tawnh,” a naa o. 19Kami Capa angzoh na-ah anih mah a cak a naek pongah mi boih mah, “Hi kami hae khen o e! Kapam kadah mu antha kanae kami ni, tamut congkungnawk hoi kami kazaenawk ih ampui ni! To-e Sithaw ih ciinghaih loa amsoem tiah a toksakhaih ih mah amtuengsak” a naa.
Kataang Ai Vangnawk
(Luk 10:13-15)
20Jesuh mah dawnrai hmuen ka pop koek a sak ih vang kaminawk loa a zaehaihnawk dawnpakhuem o ai roe pongah ato vang kaminawk to a zoeh. 21“Khorazin vang, natanmaw maw palungset han oh! Bethsaida vang, natanmaw maw palungset han oh! Nangcae khaeah dawnrai hmuen ka sak ihnawk hae Tair hoi Sidon vang ah sak nahaeloa, to vang kaminawk loa zae dawn pakhuemhaih amtuengsak hanah buri kahni to angkhuk o ueloa hmaiphu angphuihhaih o ih to akraa parai tih boah.#Isa 23:1-18; Ezk 26:1—28:26; Jol 3:4-8; Amo 1:9-10; Zek 9:2-4 22Topongah kamnoek ta-ah kang thuih o, Lokcaekhaih Ni ah Sithaw mah nangcae pongdoeh Tair hoi Sidon kaminawk nuiah tahmenhaih pop kue tih. 23Nang Kapernaum vang! Nangmah hoi nangmah to van khoekto angtoeng tahang hanah na koeh maw? Hell thungah vah ah om tih. Kawmawtiah nang thungah kang sak ih dawnraihaih hmuennawk hae Sodom vang ah sak nahaeloa vaihni setto om tih.#Isa 14:13-15; Gen 19:24-28 24Kamnoek ta-ah kang thuih: Lokcaek Ni ah nang ponghdoeh Sodom vang nuiah Sithaw mah tahmenhaih amtuengsak kue tih,” tiah a naa.#Mat 10:15; Luk 10:12
Kai Khaeah Angzo Oloa Anghak Oh
(Luk 10:21-22)
25Tona-ah Jesuh mah, “Pa, long hoi van Angraeng! Kacing kaminawk hoi cakopnawk khae hoitoah na hawk ih to cakop ainawk khaeah namtuengsak pongah kang kawn parai. 26Ahlong, Pa, hitiah oh hanah na koeh ih roe ni.
27“Kam Pa mah kai khaeah hmuen boiboih ang paek boah. Pa tiaialoa ami doeh Capa to panoek thaih ai, ami doeh Capa hoi Capa mah taphong pae ih kaminawk tiaialoa Pa to panoek o thaih ai.#Jhn 3:35; 1:18; 10:15
28“Hmuenzit ka phaw moa kangpho kabainawk boiboih kai khaeah angzo oah, anghakhaih kang paek o han. 29Kai ih hmuenphawh hae phaw oloa kai khaeah amtuk oah. Kawmawtiah kai loa pakhra bangah tuinom kahoih hoi palungthin kathuk ah ka oh pongah anghak thadamhaih na hnuh o tih.#Jer 6:16 30Kawmawtiah kang phawhsak hanih hmuenphawh loa phawh hnaep moa kang phawhsak hanih hmuenzit doeh tahoep,” tiah a naa.
Tällä hetkellä valittuna:
MATHAI 11: AKNT2023
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Asang Khongso New Testament in Eastern Khumi © Bible Society of Myanmar, 2023.
