मट्टि 4
4
साइटानऎ येसुमि निवाँ ठाःक्मिम्पा
(मारकुस १:१२-१३; लुका ४:१-१३)
1हाङ् साइटानऎ ठाःगुर कामानुङ् निवाँहाङ्मि लावाऎ येसु आसास पेम्मिनिहा ठालबि लाखॆटु। 2आक्कुबि येसु रिपङ् लेन्टा हाङ् रिपङ् सेन्टा साक्नेरा, हाङ् आक्क डॆङ्पि खो एट्टान सागॆ सिमिम्पा लॆटा। 3आक्रल साइटान खोबि टाआहाङ् लोसु, “चाइबान आना निवाँहाङ्मि पासाना हाङ्ग इघा लुङ्कॽवा चारेपा लिर कामानुङ् लोसॆ हाङ् ग चारेपा लिर।” 4टर येसुऎ खानावाँ ऎम्पिसे लोसु, “निवाँनेन् साब्चिराबि गरहाङ् साब्डा, ‘चारेपाऎ टेःॽन याॽमि हिङ्चानि, टर निवाँहाङ्ऎ यामुमिम्पा चोब्न खानावाँऎ हिङ्चा’।”#यायेॽमा ८:३
5हाङ् साइटानऎ येसु सॆङ्सॆङॆ हाटा यारुसालेमबि लाखॆटु हाङ् निवाँहाङ्मि खिम्मि वाचेन्टु टॆटु 6हाङ् लोसु “आना चाइबान निवाँहाङ्मि पासाना हाङ्ग, गबाङ् चेढिन्टॆ मान्ठाभनॆ निवाँनेन् साब्चिराबि गरहाङ् साब्डा
‘खोसॆ आना खोम् निवाँखाटॆखुबाचिम् हुक्पि पि हाङ् आक्खाचिऎ आना हुक्हुक्पिॽन टाबुक्मि
मसॆ आनाम् लाङ् लुङ्कॽवाबि टःक्सिॽनि’।”#खोम्मिम्पासाम् ९१:११-१२
7येसुऎ साइटान लोसु, “निवाँहाङ्मि खानावाँबि गर सङ्क साब्डा, आनॆ आनाम् पारभु निवाँहाङ्मि निवाँ ठाःग्मा फॆन्नि।”#यायेॽमा ६:१६
8होइखेपा साइटानऎ येसु एक्क टक्भॆऎ पङ्पङ्माबि लाखॆटु हाङ् बाखाटेम्पिहा चोब्न हाङ्डाम् हाङ् निङ्लावा खाङ्मिटु 9हाङ् लोसु, “हुहु पोप्से का स्यामिटिङ्ना हाङ् काम् निङ् ठेरुना हाङ्ग इघा चोब्न कॆ आना पिःॽना।” 10हाङ् येसुऎ लोसु, “ओ साइटान गबाङ् खाइहाङ् इट्टॆ, मान्ठाभनॆ निवाँहाङ्मि साब्चिराबि गरहाङ् साब्डा ‘आनॆ आनाम् पारभु निवाँहाङ् टे स्यामिटॆ हाङ् खोमि टेःॽन योम्पक् मुसॆ’।”#यायेॽमा ६:१३
11हाङ् साइटानऎ खो याइडाउ हाङ् निवाँखाटॆखुबाचि टाआमि हाङ् येसु खाङुचि।
येसुऎ खोम् योम्पक् मुबक्मिम्पा
(मारकुस १:१४-१५; लुका ४:१४-१५)
12बाप्टिस्मा पिक्खुबा युहान्ना सॆक्चिम्पि सॆक्ढाङ्सुचि लोमॆ खानावाँ येसुऎ खेमुहाङ् गालिलबि खारा। 13हाङ् खोसॆ नासाराट याइडाउ हाङ् काफारनुहुम् हाटाबि खाराहाङ् बासा पोबा। म हाटा चाइ टोम्पलिॽवामि कॆक्पि जाबालुन हाङ् नाप्टालिमि ठालबि सिॽयुक्सा। 14यासाइया लोमॆ निवाँहाङ्मि खानावाँ लोखुबाऎ लोमिम्पा खानावाँ गरहाङ् टङा,
15“टोम्पलिॽवा कॆक्पिऎ लाम्फु नुङ् यारडान हङ्मा गॆअङ्मॆअङ्बिऎ जाबुलुन हाङ् नाप्टालिमि ठावाँ
हाङ् गालिलबिहा होइढा हॆॽनिबारेक्चि,
16माॽयाक्टबि पेन्खुबा याॽमिचिऎ एक्क ढ्या ओऎ खाङ्टडुचि।
हाङ् सिखॆॽमवाँमि लावाऎ डॆक्खॆॽमिम्पा हाङ्डाम्पिहा याॽमिचिम् लुम्पि एक्क ढ्या ओऎ खाङ्ङुटाडा।”#यासाइया ९:१-२
17आक्कबाङ्न येसुऎ गर कामानुङ् खेम्मिपक्कुचि, “टाङ्पा टाङ्पामि हिङ्वाबाङ् ऎम्पकानॆ मान्ठाभनॆ पारुबिऎ हाङ्डाम् मुबिॽन चु।”
येसुऎ ङाः लाप्खुबाचि सेःॽमिम्पा
(मारकुस १:१६-२०; लुका ५:१-११)
18इॽया येसु गालिल टोम्पलिॽवामि कॆक्पि लाङ्ढुमे सिसार पाट्रुस लोमॆ सिमोन हाङ् उम् नुसा आन्डेरेयासऎ जाला कक्मे पाइमिम्पा खाङ्टकुचि, मान्ठाभनॆ खोचि ङाः लाब्खुबा लॆटाचि। 19खोसॆ आक्खाचि लोसुचि, “डाबाचॆ, हाङ् का टिङ्ङॆचॆ, कॆ आन्चिना याॽमिचि लाप्टॆखुबा मुक्चिना।” 20मरक्लन उम्चि जाला याइडाआचु हाङ् खोचिऎ येसु टिङ्पकाचु।
21आक्कबाङ् खॆॽमॆ सिसार खोसॆ जाब्डियामि पासा याकुब हाङ् उम् नुसा युहान्ना उम्चि आपा जाब्डियानुङ् जाला उब्मॆ पाइमिम्पा खाङ्टकुचि हाङ् खोचि सङ्क सेःरुचि। 22मरक्लन खोचिऎ सिङ्खङ नुङ् उम्चि आपा याइडाआचु हाङ् येसु टिङ्पकाचु।
येसु डिरिक् याॽमिचिऎ टिङ्मिम्पा
(लुका ६:१७-१९)
23हाङ् येसु गालिल भोरि वाइसे याहुडिचि खोम्ठाम् खिम्पि चिन्से हाङ् निवाँहाङ्मि हाङ्डाम्मि नुऎ खानावाँ खेम्मिटुचि। हाङ् चोब्न टुक्मावा हाङ् टुक्मावाऎ नुक्फॆम्पाचि नुबक्मिट्टुचि। 24हाङ् येसुमि निङ् सिरिया हाङ्टेम् भोरि फुबका। हाङ् याॽमिचिऎ डिरिक् खालाहा टुक्मावाऎ टुगुक्मिहा टुक्खाचि, खारिॽमाङ्ऎ लाप्मिम्पाचि, चाबॆरःक्मॆ टुक्मावाऎ लाप्मिम्पाचि, लाङ् हुक् ऎटाखुबाचि खोबि लाटॆटुचिमि हाङ् खोसॆ आक्खाचि चोब्न नुबक्मिट्टुचि। 25हाङ् गालिल, एपङ् हाटा लिॽमॆ डेकापोलिस, यारुसालेम, याहुडिया हाङ् यारडान हङ्मा मॆआरेङ्पिहा डिरिक् याॽमिचिऎ खो टिङुचि।
Tällä hetkellä valittuna:
मट्टि 4: LBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Wycliffe Bible Translators, Inc. and Nepal Bible Society
