हाङ् साइटानऎ ठाःगुर कामानुङ् निवाँहाङ्‌मि लावाऎ येसु आसास पेम्‍मिनिहा ठालबि लाखॆटु। आक्‍कुबि येसु रिपङ् लेन्‍टा हाङ् रिपङ् सेन्‍टा साक्‍नेरा, हाङ् आक्‍क डॆङ्‌पि खो एट्‌टान सागॆ सिमिम्‍पा लॆटा। आक्‍रल साइटान खोबि टाआहाङ् लोसु, “चाइबान आना निवाँहाङ्‌मि पासाना हाङ्‌ग इघा लुङ्‌कॽवा चारेपा लिर कामानुङ् लोसॆ हाङ् ग चारेपा लिर।” टर येसुऎ खानावाँ ऎम्‍पिसे लोसु, “निवाँनेन् साब्‍चिराबि गरहाङ् साब्‍डा, ‘चारेपाऎ टेःॽन याॽमि हिङ्‌चानि, टर निवाँहाङ्ऎ यामुमिम्‍पा चोब्‍न खानावाँऎ हिङ्‌चा’।”
हाङ् साइटानऎ येसु सॆङ्‌सॆङॆ हाटा यारुसालेमबि लाखॆटु हाङ् निवाँहाङ्‌मि खिम्‍मि वाचेन्‍टु टॆटु हाङ् लोसु “आना चाइबान निवाँहाङ्‌मि पासाना हाङ्‌ग, गबाङ् चेढिन्‍टॆ मान्‍ठाभनॆ निवाँनेन् साब्‍चिराबि गरहाङ् साब्‍डा
‘खोसॆ आना खोम् निवाँखाटॆखुबाचिम् हुक्‍पि पि हाङ् आक्‍खाचिऎ आना हुक्‍हुक्‍पिॽन टाबुक्‍मि
मसॆ आनाम् लाङ् लुङ्‌कॽवाबि टःक्‍सिॽनि’।”
येसुऎ साइटान लोसु, “निवाँहाङ्‌मि खानावाँबि गर सङ्‌क साब्‍डा, आनॆ आनाम् पारभु निवाँहाङ्‌मि निवाँ ठाःग्‍मा फॆन्‍नि।”
होइखेपा साइटानऎ येसु एक्‍क टक्‍भॆऎ पङ्‌पङ्‌माबि लाखॆटु हाङ् बाखाटेम्‍पिहा चोब्‍न हाङ्‌डाम् हाङ् निङ्‌लावा खाङ्‌मिटु हाङ् लोसु, “हुहु पोप्‍से का स्‍यामिटिङ्‌ना हाङ् काम् निङ् ठेरुना हाङ्‌ग इघा चोब्‍न कॆ आना पिःॽना।” हाङ् येसुऎ लोसु, “ओ साइटान गबाङ् खाइहाङ् इट्‌टॆ, मान्‍ठाभनॆ निवाँहाङ्‌मि साब्‍चिराबि गरहाङ् साब्‍डा ‘आनॆ आनाम् पारभु निवाँहाङ् टे स्‍यामिटॆ हाङ् खोमि टेःॽन योम्‍पक् मुसॆ’।”
हाङ् साइटानऎ खो याइडाउ हाङ् निवाँखाटॆखुबाचि टाआमि हाङ् येसु खाङुचि।


बाप्‍टिस्‍मा पिक्‍खुबा युहान्‍ना सॆक्‍चिम्‍पि सॆक्‍ढाङ्‌सुचि लोमॆ खानावाँ येसुऎ खेमुहाङ् गालिलबि खारा। हाङ् खोसॆ नासाराट याइडाउ हाङ् काफारनुहुम् हाटाबि खाराहाङ् बासा पोबा। म हाटा चाइ टोम्‍पलिॽवामि कॆक्‍पि जाबालुन हाङ् नाप्‍टालिमि ठालबि सिॽयुक्‍सा। यासाइया लोमॆ निवाँहाङ्‌मि खानावाँ लोखुबाऎ लोमिम्‍पा खानावाँ गरहाङ् टङा,
“टोम्‍पलिॽवा कॆक्‍पिऎ लाम्‍फु नुङ् यारडान हङ्‌मा गॆअङ्‌मॆअङ्‌बिऎ जाबुलुन हाङ् नाप्‍टालिमि ठावाँ
हाङ् गालिलबिहा होइढा हॆॽनिबारेक्‍चि,
माॽयाक्‍टबि पेन्‍खुबा याॽमिचिऎ एक्‍क ढ्‌या ओऎ खाङ्‌टडुचि।
हाङ् सिखॆॽमवाँमि लावाऎ डॆक्‍खॆॽमिम्‍पा हाङ्‌डाम्‍पिहा याॽमिचिम् लुम्‍पि एक्‍क ढ्‌या ओऎ खाङ्‌ङुटाडा।”
आक्‍कबाङ्‌न येसुऎ गर कामानुङ् खेम्‍मिपक्‍कुचि, “टाङ्‌पा टाङ्‌पामि हिङ्‌वाबाङ् ऎम्‍पकानॆ मान्‍ठाभनॆ पारुबिऎ हाङ्‌डाम् मुबिॽन चु।”


इॽया येसु गालिल टोम्‍पलिॽवामि कॆक्‍पि लाङ्‌ढुमे सिसार पाट्‌रुस लोमॆ सिमोन हाङ् उम् नुसा आन्‍डेरेयासऎ जाला कक्‍मे पाइमिम्‍पा खाङ्‌टकुचि, मान्‍ठाभनॆ खोचि ङाः लाब्‍खुबा लॆटाचि। खोसॆ आक्‍खाचि लोसुचि, “डाबाचॆ, हाङ् का टिङ्‌ङॆचॆ, कॆ आन्‍चिना याॽमिचि लाप्‍टॆखुबा मुक्‍चिना।” मरक्‍लन उम्‍चि जाला याइडाआचु हाङ् खोचिऎ येसु टिङ्‌पकाचु।
आक्‍कबाङ् खॆॽमॆ सिसार खोसॆ जाब्‍डियामि पासा याकुब हाङ् उम् नुसा युहान्‍ना उम्‍चि आपा जाब्‍डियानुङ् जाला उब्‍मॆ पाइमिम्‍पा खाङ्‌टकुचि हाङ् खोचि सङ्‌क सेःरुचि। मरक्‍लन खोचिऎ सिङ्‌खङ नुङ् उम्‍चि आपा याइडाआचु हाङ् येसु टिङ्‌पकाचु।


हाङ् येसु गालिल भोरि वाइसे याहुडिचि खोम्‍ठाम् खिम्‍पि चिन्‍से हाङ् निवाँहाङ्‌मि हाङ्‌डाम्‍मि नुऎ खानावाँ खेम्‍मिटुचि। हाङ् चोब्‍न टुक्‍मावा हाङ् टुक्‍मावाऎ नुक्‍फॆम्‍पाचि नुबक्‍मिट्‌टुचि। हाङ् येसुमि निङ् सिरिया हाङ्‌टेम् भोरि फुबका। हाङ् याॽमिचिऎ डिरिक् खालाहा टुक्‍मावाऎ टुगुक्‍मिहा टुक्‍खाचि, खारिॽमाङ्‌ऎ लाप्‍मिम्‍पाचि, चाबॆरःक्‍मॆ टुक्‍मावाऎ लाप्‍मिम्‍पाचि, लाङ् हुक् ऎटाखुबाचि खोबि लाटॆटुचिमि हाङ् खोसॆ आक्‍खाचि चोब्‍न नुबक्‍मिट्‌टुचि। हाङ् गालिल, एपङ् हाटा लिॽमॆ डेकापोलिस, यारुसालेम, याहुडिया हाङ् यारडान हङ्‌मा मॆआरेङ्‌पिहा डिरिक् याॽमिचिऎ खो टिङुचि।

Kuuntele मट्‌टि 4