Luke 18
18
Kokome a mukuili a mukaase na mupéchi a mipame
1Sése nàtadele baate bɛndi kokome mu ndé bɔ babɔndenge Nzɛmbi lekɛse lotchi rɔke vɛ. 2Ndɛ nàlɛle bɔ ndé: «Gutsɔ musɛnge niguàbade na mupéchi a mipame wuwusàbade na bɔɔme bua Nzɛmbi vɛ namoni a baate àsàgɔbesenge vɛ. 3Gutsɔ musɛnge muɛne, niguàbade nagɔ na mukuili mukaase wuwàyɛndenge lekɛse lotchi gu lɛle mupéchi a mipame ndé, pase mupame a tchambe la bése a mbɛne a mɛ. 4Mupéchi a mipame nàbisenge pase mupame a mukaase muɛne. Avane mupéchi mipame nàlɛle ndé, mumbuli mɛ yɛbi mé mɛ salidi na bɔɔme bua Nzɛmbi vɛ namoni a baate mɛ sagɔbese vɛ. 5Mɛ marɔke nàyoge mikayi mia mukaase mukuili wunewu. Ka buédi ti mɛ pase mupame a tchambe lɛndi, akɔle bayade gu yiyongese mɛ mataase.» 6Sése nàbàlɛle bɔ ndé: «Tchikesani maambe ma mupéchi a mipame wuwusayɛbene vɛ àlɛle.» 7Béne latase ti Nzɛmbi ásákápase mipame mia baate bɛndi ba ndɛ sɔle bababɔnde ndɛ butsuge na niange vɛ? Ndɛ ásákátamene bɔ vɛ. 8Mumbuli mɛ lɛle béne mé: «Nzɛmbi nápáse mipame mia baate muɛne. Tɔ va mɛ Wuwàbɔnge ndjime a baate mɛ kábáyade, mɛ nibákese baate bababole lebiɔge mu Nzɛmbi?»
Kokome a mutu wa lebuli la bafarichi na mubongi a mapaga
9Sése nàlɛle baate bàbàtasenge bo bɔ baate babayɛbene va busu bua Nzɛmbi, bàbàvɔngelenge bambɛgi balidi ndé: 10«Letsuge lemochi, baate bɔli nibàyɛnde gu bɔnde Nzɛmbi gutsɔ nzɔ yibàbɔndenge Nzɛmbi. Mutu mumochi, mutu wa lebuli la bafarichi awone mubongi a mapaga.» 11Mutu wa lebuli la bafarichi atɛmene, abɔnde, nàlɛle ndé: «Mɛ wɛ mɛ kakese Nzɛmbi, muti mɛ salidi ngane a baate ba bulɔnge bunebu babalidi bayibi, na ba ngua bubi bua maambe, na baata bababuise makɛli voki mubongi a mapaga wunewu vɛ. 12Mɛ mine kugi mamine mɔli mu tsɔne. Gutsɔ mabuɛ motchi ma mɛ bage, mɛ vɛde Nzɛmbi imochi gutsɔ lekumi.» 13Mubongi a mapaga atɛmene va itchige cha lepémbe mise na yulu chimbele vɛ, àbɔnde nadume tule, nàlɛle nde: «Kɔkɔle a wɛ Nzɛmbi mɔne mɛ tinge mɛ mutu wu mubi.» 14Mumbuli mɛ lɛle béne mé mubongi mapaga niwàbénge va busu bua nzɛmbi va ndɛ gabege gu nzɔ ndɛ. Tɔ a mutu wa lebuli la bafarichi vɛ. Mutu wuwakomese niute a ndɛ, Nzɛmbi akolese ndɛ. Namoni a mutu wu wakolese niute a ndɛ, Nzɛmbi akomese ndɛ.
Buyumune bua Nzɛmbi ngane a baane babangɛbe bulidi
15Baate nibàbétenge baane babangɛbe gulidi Sése mu ndé ndɛ vɛde bɔ misaange. Baate ba Sése bàmɔne tchambe muɛne, nibàkubusenge bɔ. 16Sése atɛde baane babangɛbe, nàlɛle baate bɛndi ndé: «Niagani kubuse baane babangɛbe mu yade gulidi mɛ. Muti Buyumune bua Nzɛmbi baate babalidi ngane a baane babangɛbe buafuane. 17Mumbuli mɛ lɛle béne mé mutu wuwabise chinge Buyumune bua Nzɛmbi ngane a muane a ngɛbe, ásákábage miyumune bua Nzɛmbi vɛ.»
Utamene gua maambe ma bulɔnge mu bage Buyumune bua Nzɛmbi
18Ivonde cha bachife nàdume Sése ndjide ndé: «A Mulongichi wumubuɛ wunewu, mu bage moyi wa mubunamubu maambe ka mɛni mɛ kisáde?» 19Sése nàkale ndɛ ndé: «Wɛ muki wɛ lɛle mɛ wo mɛ Mulongichi wu mubuɛ? Wulidi wu mubuɛ ndile Nzɛmbi ndɛ pénze.» 20Wɛ yébi buni mangidi ma Nzɛmbi malɛle: «Yabuise makɛli, yabome baate, yakutule bambɛgi maambe ma bɔ bavɛsade, yimbese taate a wɛ na ngu a wɛ.» 21Ivonde cha bachife nàkale Sése ndé: «Bande bungɛbe buɛme, mɛ kɛle mangidi muɛne motchi.» 22Sése àyoge mabige ma mutu muɛne àlɛle, nàkale ndɛ ndé: «Tchambe lemochi lekɛmbi nawe. Sombese mabuɛ ma wɛ lidi na mɔ, badɔle ba wɛ ki bage, wɛ vɛde baate babavɛ na matsɔnge. Tsɔvane wɛ kábage musɛnde gu mboge a Nzɛmbi gu yulu. Vayulavane, wɛ duke mɛ.» 23Va ivonde cha bachife àyoge maambe ma Sése àlɛle ndɛ, ndɛ niute yotchi niyàvɔle muti ndɛ bàde ichine. 24Sése àmɔne mutu muɛne ndile ka nimene, nàlɛle ndɛ ndé: «Page gulidi bichine mu bage Buyumune bua Nzɛmbi. 25Mumbuli mɛ lɛle béne mé niame wu munéni wu batɛde chamo, achitoge ningele va leyule la tsongi vɛ, namoni a ichine page mu bage Buyumune bua Nzɛmbi.» 26Baate bàbàyoge maambe muɛne, nibàlɛle Sése bo: «Mutu wu káfuade moyi wa mubunamubu ka naa?» 27Sése nàkale bɔ ndé: «Maambe motchi ma baate bachitoge sade vɛ, Nzɛmbi asakɔnde mɔ sade vɛ.» 28Piɛre nàlɛle Sése ndé: «Bése letɛmini maambe motchi ma bése lebédi namɔ mu duke wɛ.» 29Sése nàkale bɔ ndé: «Mumbuli mɛ lɛle béne mé ti mutu atamene nzɔ ndɛ na mukɛdi a ndɛ na baane ba taate a ndɛ na ngage a ndɛ voki baane bɛndi mu bage Buyumune bua Nzɛmbi, 30mutu muɛne nábage tsɔnge ambuli na fuade moyi wa mubunamubu.»
Sése alɛle baate bɛndi buni ndɛ kákuade na buni ndɛ kásoge
31Sése àbɔnge baate bɛndi ba lekumi na bɔli, nàlɛle bɔ ndé: «Bése a béne ka gu Sérusalɛme layɛnde gu kuanise maambe ma babigi ba mabige ma Nzɛmbi bàkome mu mɛ Wuwàbɔnge ndjime a baate. 32Bɔ bákabe mɛ kase na baate ba makake makime. Bɔ básɛbe mɛ. Bɔ bávɔngele mɛ. Bɔ bátutule mɛ matɛ. 33Bɔ bágobe mɛ mibɛmbi. Bɔ bábome mɛ, mɛ kákuade. Tsuge yɔli yiviɔge, mu lamutate, mɛ kásoge.» 34Tɔ baate bɛndi básáditege na tchikese maambe ma Sése àyambelenge muti ndɛ àsàpandele bɔ mɔ vɛ.
Sése atɛndele mupɛpidi mise gu Sériko
35Va Sése àbade kabɛle nàtɔde gu musɛnge a Sériko, niguàbade na mupɛpidi wuwàbade atsagele va mbade a ndjile na vɔndenge. 36Ndɛ yoge makɛle ma baate bàbàviɔgenge, nàfule ndé tchambe le mɛ yoge makɛle ma baate naa? 37Baate bakɛ nibàkale ndɛ bo: «Awone ngɛ Sése wa muchi Nasarɛte aviɔge.» 38Ndɛ nàbuamege ndé: «A Sése mutégede a Davide. Kɔkɔle a wɛ mɔne mɛ tinge.» 39Baate bàbàyɛndenge busu nibàkubusenge ndɛ bo bade lingi.Tɔ ndɛ nàbuamage mbuliambuli ndé: «A Sése mutégede a Davide, kɔkɔle a wɛ mɔne mɛ tinge.» 40Sése atɛmene, nàlɛle baate bɛndi ndé tsualani mɛ ndɛ guni. Ndɛ kukule va pédi a Sése, Sése nàdume ndɛ ndjide ndé: «Tchambe lini wɛ tɔnde wo mɛ sadele wɛ?» 41Ndɛ nàkale Sése ndé: «A Kumu mɛ tɔnde mé wɛ batɛndele mɛ mise.» 42Sése nàkale ndɛ ndé: «Wɛ béligi mu lebiɔge le wɛ buli mu mɛ.» 43Vakɛtiavane, mise mɛndi matɛndege, nàduke Sése na kakese Nzɛmbi. Baate botchi bàbàdukenge Sése bàmɔne buni ndɛ tɛndele mupɛpidi mise, bɔ nabɔ nibàkakese Nzɛmbi.
Tällä hetkellä valittuna:
Luke 18: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
