Luke 17
17
Sése alɔngese baate mu tchambe lelebi na la chinge kɔkɔle
1Sése nàlɛle baate bɛndi ndé: «Maambe mamasade ti baate bàsade mabi machitoge kambe vɛ. Tɔ mimbɔnde gulidi mutu wuwasade ti mbɛgi asade tchambe lelebi. 2Buédi ti bagade ndɛ lemani lelenéni mu lekinge bakatɛte ndɛ gutsɔ nzɛli mu bo ndɛ akabarémbele baate.» 3Rambelani: «Wɛ mɔne muane a taate a wɛ asade tchambe lelebi, sɛmbe ndɛ. Ndɛ chinge tchambe lelebi le ndɛ chidi, bɔgele ndɛ. 4Mu letsuge, ndɛ sade wɛ tchambe lelebi masade tsaambe, ayade mayade tsaambe gu fule wɛ kɔkɔle, bɔgele ndɛ.»
Sése alɔngese mu tchambe la Lebiɔge
5Baate ba Sése nibàlɛle ndɛ bo: «Kumu sade ti lebiɔge la bése lebade lelenéni.» 6Sése nàkale bɔ ndé: «Lebiɔge la béne lebade lelenéni ngane a mulonde a muti wu batɛde mutarede, béne latoge lɛle muti wu batɛde sikomɔre ti dubuge, yɛnde gu yirarene gu mutéme a nzɛli. Muti muɛne ayogele béne.»
Muséli wu mubuɛ
7Sése nàbàlɛle bɔ ndé: «Vatsɔ béne ti mutu alidi na muséli a ndɛ wu waboke tɔtɔ voki wuwakɛle bibodi, amɔne ndɛ amate gu manungi alɛle ndɛ ndé yade gu tchade?» 8Tchavɛ. Ndɛ ndɛ akilɛle ndé: «Gɛle mangoyi, wɛ lambe mɛ biéle biatchade. Mɛ mane tchade na niɔde, tsɔvane wɛ nawɛ wɛ kakise gu tchade na niɔde. 9Mutu muɛne achikakese muséli a ndɛ mu tchambe le ndɛ léli ndɛ mu sade vɛ.» 10Va béne na béne lasade maambe ma batome béne mu sade, lɛlengani ti: «Bése ndile baséli. Bése lasade ndile maambe ma batome bése mu sade.»
Sése abɛlese lekumi la baate ba ngua makédi
11Va Sése àyɛndenge gu Sérusalɛme, nàviɔge va mandile ma kɛse a Samari na Ngalilé. 12Ndɛ sote va tsɔmbe a bole, lekumi la baate babàde na makédi bàkɛsele ndɛ, nibàtɛmene vale na ndɛ, 13Bɔ bàbuamege, nibàlɛle ndɛ bo: «Kɔkɔle a wɛ Kumu, mɔne bése tinge.» 14Sése amɔne bɔ tinge, nàlɛle bɔ ndé: «Yɛndani gu mboge bavédi ba malage, béne lemuɛse maniute ma béne. Va bɔ bàyɛndenge, bɔ nibàkémege maniute ma bɔ mamabɛlege. 15Vatsɔ bɔ, mutu mumochi amɔne ndé ndɛ amabɛlege, nàgabege mbise nàkakese Nzɛmbi. 16Ndɛ kundege lebunze va busu bua Sése, ndɛ nàkàkese Sése. Mutu muɛne muchi Samari àbade.» 17Avane, Sése nàlɛle ndɛ ndé: «Béne botchi ba lekumi lebéligi, tɔ ba wa bane ka guni bayéndi? 18Vatsɔ bɔ mutu ti mumochi asatéchi mu gabage mbise mu kakese Nzɛmbi vɛ. Mukabe na mutu wa lekake lekime wa muchi Samari wunewu.» 19Avanekaniva, Sése àlɛle muchi Samari ndé: «Tɛmene, yɛnde, wɛ bélegi mu lebiɔge le wɛ buli mu mɛ.»
Leyade la Buyumune bua Nzɛmbi
20Baate ba lebuli la Bafarichi nibàfule Sése bo: «Letsuge le Buyumune bua Nzɛmbi bukáyade naa?» Sése nákale bɔ ndé: «Leyade la Buyumune bua Nzɛmbi busalidi na ilémbe vɛ.» 21Bachitoge lɛle bo: «Buyumune bua Nzɛmbi buobu vaneve, voki buone bone gone vɛ. Yabani ti béne lemabage Buyumune bua Nzɛmbi.» 22Sése nàlɛle baate bɛndi ndé: «Lekɛse nigone lelidi le béne lekátɔnde mɔne Mɛ Wuwàbɔnge ndjime a baate, tɔ béne lesákabamɔne mɛ vɛ.» 23Baate nibálɛle béne bo: «Mɛ Wuwàbɔnge ndjime a baate gone mɛ lidi, voki ndoge wunewu.Yarɔkani na muénde yɛnde.» 24Bu muvédiavédi avɛdene, bakamɔne iyalele chɛndi ngule a tande na ngule a bande mikɔnge, abone nibubukábade letsuge le mɛ Wuwàbɔnge ndjime a baate mɛ káyade. 25Tɔ buédi mɛ kapamɔne mimbɔnde mia lotele, baate ba mvuɛgi bakatone mɛ. 26Maambe màmàbade va lekɛse la Nowé, mɔ nimámákábade va lekɛse le mɛ Wuwàbɔnge ndjime a baate mɛ káyade. 27Va lekɛse la Nowé, baate bàbade ndile tchadenge, na niɔdenge, na kuɛlenenge, na kuɛlesenge baane babɔ kuange nachi Nowé àningele gutsɔ mbuunge. Vayulavane, tonde yiyade, niyàguduse baate botchi. 28Tchambe muɛne lekábade ndile ngane a tchambe lelàbade va lekɛse la Lɔte. Baate bàbade ndile tchàdenge na niɔdenge na sombenge na sombesenge na vadenge na tongenge manzɔ. 29Tɔ letsuge le Lɔte àmate musɛnge a Sodɔme, mvulu muludi a mbuage na wa pfule bimate gu yulu, nibiàgudese baate botchi. 30Maambe muɛne nimámákabade letsuge le mɛ Wuwàbɔnge ndjime a baate mɛ káyade. 31Letsuge muɛne, mutu wu wukábade gu mbɛdi, ásákábabage lekɛse la ningele gutsɔ nzɔ mu pose bitsale biɛndi vɛ. Namoni a mutu wu wukábade gutsɔ manungi, asakabágabege gu bole vɛ. 32Bangelani tchambe la mukɛdi a Lɔte. 33Mutu wuwatɔnde fuade moyi mu bungudi buɛndi ndɛ muɛne, návide moyi a ndɛ. Tɔ mutu wuwavide moyi a ndɛ mu mɛ, náfuade moyi wa mubunamubu. 34Mumbuli mɛ lɛle béne mé: «Na butsuge bua letsuge muɛne, baate bɔli nibálase tɛngi imochi, bamase mumochi, awone ákasale. 35Bakaase bɔli nibátɔke mbunge imochi, bamase mumochi, awone ákasale. 36Babagele bɔli nibábade gutsɔ nungi, bamase mumochi, awone ákasale.» 37Baate ba Sése nibàfule ndɛ bo: «Tchambe muɛne guni lekáviɔge?» Sése nákale bɔ ndé: «Va béne lamɔne banionge bakokene, yabani ti mvumbi va kɛse yéne alidi.»
Tällä hetkellä valittuna:
Luke 17: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
