Maluko 8

UYesu iiliisa avaanu mbilima dzitayi

(Matayo 15:32-39)

1Mu figono ifyo, ililugu ilingi lya vaanu avasaali ni kyakuliya lyalundiine. Neke uYesu avakemeelage avanyigendwa vaakwe, avalongelage atigilage, 2“Ndikuvawonela lusungu avaanu ava, pakuva víikalile naane figono fidatu, lino vasili ni kyakuliya. 3Ngana ndivatawule vawuyage ku kaaya dzaawo nu musale, viisunga vadzilike mu ngʼaasi, kangi avangi váhumile kutaali.”

4Avanyigendwa vaakwe viitigilaga, “Umuunu akugiwona kwiya imikaate igiikwila ililugu lyonda ili padaasi apa?” 5UYesu akuvawuudzaga iitigilaga, “Muli nagyo mikaate gilinga?” Avanyigendwa viitigilaga, “Mufungʼati (7).”

6UYesu akuvalagidzaga avaanu vonda viikale paanyi. Iinyamulaga imikaate gyonda igyo, iihongedzaga kwa Nguluvi, iimegulingʼasaga nu kuvapeela avanyigendwa vaakwe vavagavile avaanu, navo vakuvagavilaga. 7Kangi vaali nu tusomba tudebe tukeefu, akutufuunyililaga, akuvalongelaga avanyigendwa vaakwe vavagavile. 8Avaanu vonda viiliyaga nu kwiguta. Utuwuluwulu utwasigiye twalundiiswe, fiimemaga ifihiivi mufungʼati. 9Avaanu avaaliye vaakwiliye imbilima dzitayi (4,000). Neke uYesu iilagage navo. 10Iikwingilaga mu waato pamwinga na vanyigendwa vaakwe, iihelelaga ku Dalumanuta.

AVafwalisayo viinyilika kangi ikimanyilo

(Matayo 16:1-4)

11Pe vaaviye váfikile uko, aVafwalisayo vakumuhelelelaga uYesu viibeedzanaga nave, vakumugemya viinyilika ukutigila, avahuufihidze ikimanyilo ukuhuma kukyanya ukutigila, átumiilwe nu Nguluvi. 12UYesu iihuguvalaga hiilo mu numbula iitigilaga, “Kye kiki ikivegalo iki kiisaka ikimanyilo? Ndakyene ndikuvalongela ndiitigila, ikivegalo iki kisilaapeelwa ikimanyilo kikivedzaga.” 13Akuvalekaga, umwene na vanyigendwa vaakwe viikwingilaga mu waato, viivangaga ulugendo ukulowoka ku mwambu.

Uwuviifu wiitagalila ngita luhaafu

(Matayo 16:5-12)

14Avanyigendwa vaaseemiilwe ukunyamula imikaate, mu waato vaali nu mukaate gumwinga hela. 15UYesu akuvalagidzaga iitigilaga, “Mwiyangalilage nu luhaafu#8:15 Luhaafu Ulu lwihula ilihaagi lya mukaate litupe. AVayahudi vaatigilaga uluhaafu lukeefu lwitupiilidza ilihaagi lyonda, kusoonela uwutagalidzi wa kiinu kidoodo kuvedza kiinu kikomi, ngana kiviifu enewuli kinofu. UYesu aahwananiidze uluhaafu nu wutagalidzi wa mbulanidzo idza wudesi, Matayo 16:12. lwa Vafwalisayo nu luhaafu lwa Helode.” 16Neke viibeedzage veene vatigilage, “Iilonga ewo, pakuva tuli hela imikaate.” 17UYesu adzidzeeliye dze viibeedzaga, akuvalongelaga iitigilaga, “Kye kiki mukwibeedza nyiveene ulwa mikaate gye musili nagyo? Mwave musiilola nambe kulufika? Inumbula dzeenyo ngʼiliitafu? 18Amiiho muli nago, ukulola musiilola? Amasiikidza muli nago, ukupulika musiipulika?#Maluko 4:12 Nambe kwiwuka musiikwiwuka? 19Pe ndaameguwe imikaate gihaanu neke valiyage vaanu mbilima dzihaanu (5,000), mwalundiise utuwuluwulu utwasigiye gaamemile mahiivi galinga?” Viitigilaga, “Mahiivi ganyikyumi na gavili (12).” 20“Kangi pe ndaameguwe imikaate mufungʼati, vaaliye vaanu mbilima dzitayi (4,000), mwalundiise utuwuluwulu utwasigiye gaamemile mahiivi galinga?” Viitigilaga, “Mahiivi mufungʼati.” 21Neke umwene avalongelage atigilage, “Mwave musinaa mulufika?”

UYesu akumunaniya umubofu

22UYesu na vanyigendwa vaakwe viifikaga ku mwambu iyingi, ku wudzenge wa Betisayida. Neke avaanu vamuleetelage umuunu mubofu, vanyilikage amupamye. 23UYesu akumukoleelaga iliwoko umubofu, iihegaga nave mu luvala. Pe aaviye ámufuunyiye amati mu miiho nu kuviika amawoko pakyanya apaakwe, akumuwuudzaga iitigilaga, “Ukukiwona kiki?” 24Umubofu uyo iilolaga, iitigilaga, “Ndikuvawona avaanu ngita mabiki, viigenda!” 25UYesu iiviikaga kangi amawoko ku miiho ga mubofu, ingufu dza miiho gaakwe dziipilukaga, neke afiwonage ifiinu fyonda wunofu.#Isaya 35:5-6 26UYesu pe amutawulaga ukuhelela ku kaaya yaakwe, amulongiye iitigilaga, “Utane ukuhelela mu luvala.”

UPetulo iikwidika ukutigila uYesu ye Mesiya

(Matayo 16:13-20; Luka 9:18-21)

27UYesu na vanyigendwa vaakwe vaahegile viihelelaga ku mbala dzonda idza ku Kayisalya Filipi. Pe vali mu ngʼaasi, akuvawuudzaga avanyigendwa vaakwe iitigilaga, “Avaanu pe viilonga, viitigila yuune ani?” 28Avanyigendwa viihigaga viitigilaga, “Vamwinga viitigila ye Yohana uMudzabisi, avangi viitigila yuuve Eliya,#8:28 Eliya AVayahudi vaahuuvilaga ukutigila, uEliya ahadza akumulongola uYesu ukupiluka. Ikisina kya lufuuwo lwawo kiimilaga mu wuvidzi wa Malaki 4:5-6. avangi viitigila ye yumwinga va vavidzi.” 29Neke uYesu avawuudzage atigilage, “Unyeenye mwitigila yuune ani?” UPetulo iitigilaga, “Uveeve ye Mesiya.”#8:29 Mesiya Ilitaawa ili pamwinga ni litaawa Kilisiti, gonda gali kiganulo kimwinga. Lole UKilisiti ku Figanulo. 30UYesu akuvakiitaga, vatane ukulonga kwa muunu yungi imola idzo wiimila wa mwene.

UYesu iilonga ulwa kufuwa nu kudzulubuka kwakwe

(Matayo 16:21-23; Luka 9:22)

31UYesu iivangaga ukuvawulanidza avanyigendwa vaakwe iitigilaga, “Ndakyene uMuswamuve va Muunu munya kupumuswa mbandu, nu kukaanwa na vavaha va Vayahudi pamwinga na vateekedzi avakomi#8:31 Vateekedzi avakomi Lole Avateekedzi ku Figanulo. na vawulanidzi va milagililwe, ukukomwa, kangi pa kigono ikya wudatu ukudzulubuka.” 32Ilidzwi ilyo aalongaga kitafiha. Neke uPetulo amukemeelelage uYesu pa lubali, avangage ukumukenyela.#8:32 Ukumukenyela UPetulo amukenyiye uYesu, pakuva aVayahudi vaahuuvilaga ukutigila, uMesiya vaawo ye mwene umutwa mukomi, ye alavadeludza avatavangwa vaawo vonda. Vasaadzeelaga ukutigila, alaapumuswa nu kukomwa. 33UYesu iiseedukaga akuvalolaga avanyigendwa vaakwe, akumukenyelaga uPetulo iitigilaga, “Uhege apa ve Setanoave, pakuva usiihoodza imikeelelele gya Nguluvi, nda haamu, imikeelelele gya vaanu hela.”

Ukumuniniila uYesu

(Matayo 16:24-28; Luka 9:23-27)

34Neke akemeelage ililugu lya vaanu pamwinga na vanyigendwa vaakwe, avalongelage atigilage, “Ngana umuunu ye avedzaga iisaka ukuuniniila, iitawulilage ngʼaani, ategulage ikipindulihidzo kyakwe,#8:34 Ategulage ikipindulihidzo kyakwe Kwe kutigila, avedzage íitawuliye ngʼaani nde kuvedzage kufuwa, pakuva imisika igyo, avaanu vaakomwaga wugendela wa kutovelelelwa pa kipindulihidzo. aaniniilage. 35Pakuva umuunu ye iisaka ukupoka uwuumi waakwe, uyo alawuyadza. Neke kangi umuunu ye akuwuyadza uwuumi waakwe wiimila wangu ni Mola iNofu, uyo alawupoka uwuumi waakwe. 36Lukumuwumbulila kiki umuunu ngana avedze nu wumosi wonda wa lidugulu lyonda, neke kangi ayadze uwuumi uwa mbeepali? 37Enewuli umuunu atawule kiki, ukuta aanukile uwuumi uwa mbeepali? 38Umuunu ye avedzaga ye akuumbonela nyoni uneene na madzwi gangu, mu kivegalo iki kya wuhosi#8:38 Kivegalo iki kya wuhosi Ikikelo pa kikelo, kivegalo iki kya wudumuli-noolane. Mu Lufingo uLulovela, imipuliingʼanile gya Nguluvi na Vayahudi gyahwananiidzwe ni mipuliingʼanile gya mugoosi nu mudala vaakwe. Kwe kutigila, ulwa kitamufuuwa uMesiya va Nguluvi, aVayahudi vali ngita umudala umudumuli-noolane. ni ndzanangifu, uMuswamuve va Muunu nave alamuwonela nyoni umuunu uyo, pe alaadza mu ndolo dza Daadiye pamwinga na vanyamwandza aviimike.”

Tällä hetkellä valittuna:

Maluko 8: BEZ

Korostus

Jaa

Kopioi