MATEU 6
6
Pëtseend baranj ko
1 #
Mat 23.5
Nda wëtan përo ngëko bëmabal tsi bërun bañaan pa nda winaa! Uci nda ro ank ba, Asin ind nan cii di batsi di ka luk ind. 2Aja kuu tseend naranj ko, tsë teaa. Par unk di banguungu kë ro run di ito-ijuki ni tsi iga, pa bañaan bëndan bukul. Mán leents ind ucär: Bú yank ba bëluk bukul. 3Maa wi, aja kuu tseend naranj ko, kañanu kamay tsë me ko wi kañanu kariir kë ro wi, 4pa përits piban m ci tsi pë bëtseend; din Asinu ni ka wini tsi kambeku kee luku.
Bëñaan bi Ajug jukan bi
(Lúk 11.2-4)
5 #
Lúk 18.10-14
Aja nduu ñaan, ind tsë ci pi banguungu, par bu ŋal pëja bu kë ñaan bu ka nats di ito-ijuki, ni tsi injëkënts iga, pa pëpibandar tsi bañaan. Mán leents ind ucär: Bë yank ba bëluk bukul. 6Maa wi, aja kuu ñaan, niajan pëfëru, kë ric pëlëmanu, kë ñaan Asinu nan cii di tsëko tsan beka tsi; din nii luku, nul ni ka wini di kambeku. 7Aja nduu ñaan, ind tsë mob tsi puu ja irim in kaats yi bëkat, pi bameets-nasien-batsi kë ro bi; bë ja tsi ibats bukul ne, Nasien-batsi ka niiran bëñaan bukul uci ba cuman irim tsi bëñaan. 8Ind tsë ro pi bukul, par Asin ind ame ba ko wi nda ŋal wi, tsini nda ruka ka yepul. 9Bi u ci bank, iink di nda ka run puu ñaan:
Asin wund nan cii di batsi! Katimu ka rëmbanaa.
10Tsuun pësienu pa bili; uŋalu u roaan tsi umundu, bi u ci bi di batsi.
11Tseend wund ntsari bariala unu un ci wi.
12Jampësaan wund ngëjuban, bi wund jampësabi ba lac wund biki.
13Tsë wët wund, wund yër tsi mteen-teenana; maa buerani wund tsi kañan nakaalam.
Par pësien aci piicu, ni ufosa ni përëmb, pa sandëndën. Ameen!
14 #
Mar 11.25,26 Uci nda jampësa bañaan ba lac ind biki, Asin ind nan cii di batsi ka jampësa ind buts; 15maa uci nda jampësaats bañaan ba lac ind biki, Asin ind nan cii di batsi di ka jampësa ind buts ngëlaci ind.
Kabër-mlik
16Aja nduu bër-mlik, ind tsë piban nda juatsan; banguungu ka ro bukun unk, par përoñatsan urostu, pa pëpibanaan ba ci tsi kabër-mlik. Mán leents ind ucär: Bë yank ba bëluk bukul. 17Maa wi, uci m ci tsi kabër-mlik, këran ulicar tsi beenu, kë ñawan këkësu, 18pa përits piban bañaan ne m ci tsi kabër-mlik, maa Asinu nan cii di tsëko kabeku; a nuu win tsi kambeku kee luku.
Bëka di batsi
(Lúk 12.33-34)
19 #
Jak 5.2,3 Ind tsë wúkandar iyeen ind bëka tsi umundu wi, tsi krus ni ngëwëj kë cok tsi bul, ni tsi bakiej kë jëp tsiba lúŋan, bu ka kiej. 20Maa, nda wúkandari iyeen ind bëka di batsi, di krus ni ngëwëj dits ri ka cok bul, a bakiej di ka jëp ba lúŋan. 21Par, tsi bëkau ci tsi, rul ri uwaasu kë ci run buts.
Ulamp uliaf
(Lúk 11.34-36)
22Pëkës ci pun ulamp uliaf. Uci pëkësu ci pëwar, uliafu bëlieng ka ci tsi ufac; 23maa, pëkësu waraatsa ba, din uliafu bëlieng ka ci tsi kërëm. Unk, uci ufac un ci wi tsi wi ci kërëm, din kërëm ka ci kawiak!
Nasien-batsi, ni bëka
(Lúk 16.13)
24Kaats ñaan nan yëlani pëleempar bawiak batëb. Par, na ro ank ba, në ka ni nu bëri, në ŋal nacints; oo në mob tsi nalon, në be nacints. Nda yëlants pëleempar Nasien-batsi, ndë tankëlaand pëleempar Bëka.
Ngëwejats tsë cum ind ibats
(Lúk 12.22-31)
25Wul ka wun ndu nja ind: Ind tsë lënkar ubiira ind, tsi ko wi nduu re wi, oo tsi ko wi nduu raan wi; te ind tsë lënkar iyeen ind tsi ko wi nduu tiema wi. Par, ubiira ñaan peets bariala a, a uliaf peets kaŋí-katiem-a? 26Nda teenan-e ngëko-ngëyits: di ka wayan, di ka cët, di ka wúkandar ilëpats. Maa, a Asin ind nan cii di batsi ka rialan un ngul. Te ind, nda pe ngul pëka bëkat. 27Naom tsi ind ka lënkar un beenul, a në yëlan pëlak ko tsi ubiiraul? 28A we ka wun nduu lënkar iŋi-bëtiem? Nda teenan-e mkekalets, bi muu wiaka bi: Di ka ro ko, te ri ka ñingëts. 29#1Bas 10.4-7; 2Bën 9.3-6Maa man ja ind: Ŋal Salomon, nasien, ni përëmb pi na rëmb pi, tiemaatsa kaŋí ka wara ki pi bëkekalets. 30Ko wi nda tienkëts wi uwak! Uci u ci unk di Nasien-batsi kë tiemandun pëtsats bëreeŋ, pan ci pink ntsari, maa faan pë gutsa di bërua, a ind, di ka pe këpe pëtieman ind-a? 31Wul ka wun, ind tsë ci tsi puu wejats koo ja: ‘Wee wi wund kë re wun?’ ‘Wee wi wund kë raan wun?’ Oo: ‘Wee wi wund kë tiema wun?’ 32Par, ngëmënts ngan bëlieng, aci ban cits biki Bajudeu, ja bukun ba roon bu kë tsas ngul. Ngëmënts ngan bëlieng, Asin ind ame nda fier ngul. 33Nda tsasan bërun pësienul ni bëmabalul, din ngëmënts ngan bëlieng kee watsësa ind. 34A bi u ci bank, ind tsë wejatsar unu faan, par unu faan ka wejatsar wun been. Kara unu ni mcibi.
Tällä hetkellä valittuna:
MATEU 6: KPKNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Le Nouveau Testament en langue Manjaku © Alliance Biblique du Sénégal, 2020.
