Mateo 10
10
Jesupa doce peedarã
Marco 3:13-19; 6:7-13; Luca 6:12-16; 9:1-6
1Jesupa ichi ome p'ɨrrɨapataɨrã doce p'anɨ ará t'ɨ̃sima. Maapae ãchiá jua chaarea teasima jaore mietá ãyá jeret'aadamẽrá mãɨnepa k'ak'ua piawẽa be mãɨnepa k'ak'ua p'ua be jɨpa beepidamẽrá. 2Jesupa peedaɨrã doce p'anɨrã nãɨrã pasima: Simón, Pedro apataɨ; chi ũpẽa André; Zebedeo warrarã Santiago mãɨnepa Juan; 3P'elipe; Bartolomé; Tomá; Romanepema pae erreara jɨrɨp'eparí pada Mateo; Alp'eo warra Santiago; Tadeo;#10:3 Tadeo. Griego pedeade chi eda waapẽarã k'art'ade mãɨ t'ɨ̃ k'aepẽra bɨ bɨma Lebeo, Tadeo apataɨ. Mãɨ Tadeo Santiago warra Juda pasima. 4mãɨnepa Simón Cananeo.#10:4 Simón Cananeo. Lucapa nãɨya bɨ bɨma: Simón Celote. Luca 6:15. Ichiaba basima Juda Iscariote, chi Jesú jitapida. 5Mãɨrã doce p'anɨrã Jesupa peesima. Maamina wãnai naena ichia jarasima:
—Judiorãwẽmá, Samaria p'uuru bemá pida wãrãt'ɨ. 6Mãɨpari judiorãmá, Israel ĩjũa oveja atua be jĩra p'anɨmá wãt'ɨ. 7Mãra wãutamá jarat'ɨ: “Tãaraawẽa bɨde Pajãne Bɨpa ichidirã ichi juade ua baipɨ”. 8Mãɨpuru k'ak'ua piawẽa be jɨpa beepit'ɨ, piudada chok'ae p'irabaripit'ɨ, aidapa k'ɨdade be jɨpa beepit'ɨ, jaore mietá ãyá jeret'aat'ɨ. Mɨa mãrá jua chaarea pari tearuma mãɨya oodamẽrá. Mãɨpuru ẽpẽrarã pari k'aripat'ɨ. 9-10Mãrapa oo p'anɨpari Tachi Ak'õrepa ne teaipɨ. Mãɨ k'orea erreara mi ãpia pida ateewãrãt'ɨ, chi mimiaparipa ichi erreara jitai pia bɨẽra.#10:9-10 Erreara. Griego pedeade nãɨya bɨ bɨma: Nee, p'arat'a wa cobre k'ɨrrɨde ateewãrãt'ɨ. Mãra wãutade neet'á yaaparí ateewãrãt'ɨ. Ichiaba neet'á ume, jĩrune jɨ̃pataɨ mãɨnepa tuma ateewãrãt'ɨ.
11»Mãra p'uuru waibɨade mãɨyawẽpɨra p'uuru k'aepeade cheutade mãrapa ẽpẽra sõpia be jɨrɨt'ɨ. Mãɨ ẽpẽra tede p'aneet'ɨ aba mãɨ p'uurudepa wãutadea. 12Mãɨ tiida eda wãutade Tachi Ak'õre t'ɨ̃ne chi ẽpẽrarã́ jarat'ɨ ne k'ɨ̃risiadawẽa p'ananamẽrá. 13Mãɨ tedepemarãpa mãrá pia chesidade adaipɨra, ãchi mãra ome ne k'ɨ̃risiadawẽa p'ananaipɨ. Maamina mãɨyanaepɨra, ãchi p'ue ne k'ɨ̃risiadawẽa p'ananaiwẽma. 14Abaɨpa mãrá pia chesiade aepɨra, mãɨyawẽpɨra mãra pedea ũri k'ɨ̃riaepɨra, mãmãɨpa wãt'ɨ. Ãchi tiidaɨpa mãɨyawẽpɨra p'uurudepa wãutade yooro jora mãra jĩrunepema jãrap'et'at'ɨ. 15Mɨa piarã jararuma: Tachi Ak'õrepa ɨtɨai ewaride Sodoma, Gomorra p'uuru k'aepẽra mãɨ p'uuru atepe ɨtɨaipɨ.#10:15 Sodoma, Gomorra p'uuru. Génesi 19:1-29.
Jesupa jarada ichi k'orea ĩjãapataɨrã mĩanai
Marco 13:9-13; Luca 21:12-19
16»Mɨa mãra ẽpẽra k'achia t'ãena peeruma. Ãchia mãra piawẽa oodaipɨ usa k'achiapa oveja orrabaripari jĩra. Mãɨpuru ãchi t'ãena p'anɨne taama jĩra k'ɨ̃risia k'awaa nipat'ɨ, maamina p'aloma jĩra ɨmɨmɨrã́ nipat'ɨ. 17Ẽpẽrarã t'ãena jĩrak'aua p'anat'ɨ. Ãchia mãra chi ak'ɨpataɨrãmá ateewãnak'ari maapae judiorã ará pedeapataɨ tede soapa p'edaipɨ. 18Mɨne ĩjãa p'anɨ k'orea mãra chi poro chaarearã k'ĩrari mãɨnepa chi poro jũra jɨ̃parí jɨ̃ p'anɨrã k'ĩrari ateewãnaipɨ. Mãɨne mãrapa ãchi k'ĩrari mãɨnepa judiorãwẽ k'ĩrari pida mɨ k'orea pedeadaipɨ. 19Mãra jita enemeeutade k'ɨ̃risia paraarãt'ɨ k'ãret'a jaradai k'orea. Chi chaarearã k'ĩrari p'anɨne Tachi Ak'õrepa k'awapiipɨ k'ãre jaradai p'anɨ. 20Mãɨ pedeautade mãra k'ɨ̃risiadepa pedeadaiwẽma, mãɨpari Tachi Ak'õre Jaorepa mãra k'ak'uadepa pedeaipɨ.
21»Abaɨpa ara ichi ũpẽa peapiipɨ mɨne ĩjãa bɨ k'orea. Chi ak'õrepa ichi warra peapiipɨ mãɨnepa chi warrarãpa ãchi ak'õrerã k'ĩruunak'ari peapidaipɨ. 22Ãareaɨrãpa mãra unuemaanaipɨ mɨne ĩjãa p'anɨ k'orea. Maamina mãrapa mãɨ ewari chaareade mɨne ĩjãa p'anɨ itu bɨdaepɨra, Tachi Ak'õrepa k'aripaipɨ. 23P'uuru abaɨde ẽpẽrarãpa mãra piawẽa oodai k'orea ẽp'ẽnaipɨra, awara p'uurudea mĩruwãt'ɨ. Mɨa piarã jararuma: mãra Israeldepema p'uuru becha jõma p'ɨrrɨadai naena mɨ, chi Ẽpẽra Warra cheipɨ.
24-25»Chi jarateaparí ome baparí, chi jarateaparí k'aepẽra atepe k'awa bɨwẽma. Maamina chi jarateaparí jĩra baipɨra, pia bɨma. Chi chipari pae pari mimiaparí sida ichi chipari k'aepẽra atepe bɨwẽma. Maamina ichi chipari jĩra baipɨra, pia bɨma. Mɨ jaore mietaarã minachia k'awa bɨ Beelzebú a p'anɨpɨra, mãra ara mãɨ jĩra jaradaipɨ.#10:24-25 Griego pedeade nãɨya bɨ bɨma: Te chipari jaore mietaarã chi chaarea bɨ Beelzebú a p'anɨpɨra, ichi ẽpẽrarã ara mãɨ jĩra jaradaipɨ.
¿K'ai wap'eadai p'anɨma?
Luca 12:1-9
26»Ẽpẽrarã wap'earãt'ɨ. Ne ãarea jĩp'a bɨwẽ jĩra bɨt'a mẽra beeiwẽma. Tachia k'awadawẽa p'anɨt'a, Tachi Ak'õrepa mãɨ ãarea jĩp'a k'awapiipɨ. 27Mɨa mãrá p'ãrione jara bɨ, ɨnaane jarat'ɨ. Mɨa mãra k'ɨɨrɨk'á jarada te ɨ̃rɨpa jĩk'ua jarat'ɨ. 28Chi nãɨ k'ak'ua peapataɨrã wap'earãt'ɨ. Ãchia nãɨ k'ak'ua p'ue peadaima maamina tachi jaore p'ue peadaiwẽma. Mãɨpari nãɨ k'ak'ua mãɨnepa tachi jaore mietade paai bɨt'a wap'eat'ɨ. 29¿Netopatawẽk'ãra ĩpana chae ume p'anɨ erreara tau aba bɨ pari? Maamina mãra Ak'õre pajãne bɨpa mãɨ itu bɨepɨra, aba pida ĩpana piuiwẽma. 30Mãɨ awara Tachi Ak'õrepa k'awa bɨma mãrapa puda jõmasã́ uru p'anɨt'a. 31Tachi Ak'õrepa mãra ĩpana chok'ará p'anɨ k'aepẽra pia ak'ɨ bɨẽra ne wap'eadawẽa p'anat'ɨ.
Jesú k'orea k'ĩra p'erawẽa bai
Luca 12:8-9
32»Abaɨpa ẽpẽrarã k'ĩrari mɨne ĩjãa bɨade aipɨra, mɨ Ak'õre pajãne bɨ k'ĩrari mɨa ichi mõréane aipɨ. 33Ara mãɨ jĩra abaɨ pida ẽpẽrarã k'ĩrari mɨ atua bɨade aipɨra, mɨa pida mɨ Ak'õre pajãne bɨ k'ĩrari ichi atua bɨade aipɨ.
¿K'ai pia k'ɨ̃rianai?
Luca 12:51-53; 14:26-27
34»Mɨ nãɨ ĩjũanea chesiade a k'ɨ̃risiarãt'ɨ ẽpẽerã ne k'ɨ̃risiadawẽa p'anapii k'orea. Mɨ mãɨ k'orea chewẽa bɨma, mãɨpari che bɨma ẽpẽrarã tausia k'ĩruu p'ananamẽrá.#10:34 Mãɨpari che bɨma ẽpẽrarã tausia k'ĩruu p'ananamẽrá. Griego pedeade nãɨya bɨ bɨma: Mãɨpari che bɨma k'ĩruuparí nek'o enemeei k'orea. 35Mɨ chesima chi warra chi ak'õre ome nepɨra pará bapii k'orea, chi k'au chi nae ome nepɨra pará bapii k'orea mãɨnepa chi ãyo chi p'ak'õre ome nepɨra pará bapii k'orea. 36Mãrapa mɨne ĩjãa p'anɨ k'orea piarã machi tiida chi nek'ĩramá beadaipɨ.#Mik'ea 7:6. 37Abaɨpa chi ak'õre wa chi nae mɨ k'aepẽra atepe k'ɨ̃ria bɨpɨra, mãɨ mɨ ome p'ue nipaiwẽma. Abaɨ pida chi warra wa chi k'au mɨ k'aepẽra atepe k'ɨ̃ria bɨpɨra, mãɨ mɨ ome p'ue nipaiwẽma. 38Minachia mĩa bai k'orea bɨwẽpɨra, mɨ ome p'ue p'ɨrrɨaiwẽma.#10:38 Minachia mĩa bai k'orea bɨwẽpɨra, mɨ ome p'ue p'ɨrrɨaiwẽma. Griego pedea bɨ bɨma: Mãɨ chi piuda pak'uru k'urusu ateewãk'ari, mɨ k'aade wãepɨra, mɨ ome p'ue baiwẽma. 39Abaɨ pida nãɨ ĩjũane itu ichi k'orea k'ɨ̃risia bɨpɨra, mãɨ atuaipɨ. Maamina abaɨ pida mɨ k'orea piuipɨra, mãɨ Tachi Ak'õre ome ewaricha chok'ae baipɨ.
Jesupa jarada ĩjãapataɨrãpa nepia jitadai
Marco 9:41
40»Chi mãrá pia chesidade a bɨpa, mɨá pia chesiade a bɨma. Chi mɨá pia chesiade a bɨpa chi mɨ Peedá pia pedea bɨma. 41Abaɨ pida Tachi Ak'õre pari pedeaparí pia chesiade aipɨra, Tachi Ak'õrepa peeda pẽra, nepia jitaipɨ Tachi Ak'õre pari pedeaparipa jitai pada jĩra. Ẽpẽra jĩp'a bɨa pia chesidade aipɨra piarã jĩp'a bɨẽra, Tachi Ak'õrepa ẽpẽra jĩp'a bɨa nepia teapari jĩra mãɨ ẽpẽrá ara mãɨya teaipɨ. 42Mɨa jararuma: abaɨ pida chi mɨ ome p'ɨrrɨapataɨrã chi k'ɨ̃risia ãpia k'ɨrɨa pania k'õresã́ teaipɨra, Tachi Ak'õrepa piarã mãɨ ẽpẽrá nepia teaipɨ».
Tällä hetkellä valittuna:
Mateo 10: tdc
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© (Active), Wycliffe Bible Translators, Inc. All rights reserved.
