Mateo 11
11
1Jesupa ichi ome p'ɨrrɨapataɨrã doce p'anɨa mãɨya jarak'ari mãmãɨpa p'uurucha jarateade wãsima.
Jesupa Juan chi Porochoaparí k'orea jarada
Luca 7:18-35
2Juan chi Porochoaparí eda jɨ̃a nɨbɨsidaɨde, ũrisima Tachi Ak'õrepa Tachi K'aripaparí teai jaradapa ne oomaa bɨt'a. Mãɨ k'orea ichi ome p'ɨrrɨapataɨrã ume peesima Jesua nãɨya ididamẽrá:
3—¿Pɨt'u chi chei badak'ãra? Wa ¿abaɨ nɨnai p'anɨk'ãra?
4Jesupa ãchiá nãɨya p'anoosima:
—Mãrapa unu p'anɨ mãɨnepa ũri p'anɨ Juaná nepɨrɨde wãt'ɨ. 5Tau p'ãrio beadapa unu p'aneesidama, bɨɨrɨ sorek'ea beada t'ɨa p'aneesidama; aidapa k'ɨdade bada jɨpa p'aneesidama; k'ɨɨrɨ k'ii beada ũri p'aneesidama; piudada pada chok'ae p'aneesidama. Mãɨ awara chupuria k'edea chi pedea pia Tachi Ak'õrepa ãchi k'aripai k'orea ũri p'anɨma.#Isaía 26:19; 35:5-6; 61:1-3. 6Chi mɨ itu bɨwẽa ĩjãa bɨt'a pia baipɨ.
7Juanpa peedarã wãnak'ari Jesupa chi arí p'ananarã́ Juan k'orea nãɨya jarasima: «Ĩjũa pania newẽa bɨdea mãrapa Juan ak'ɨde wãsidaɨde ¿k'ãre ununai k'ɨ̃risiasidama? ¿Nãupa p'ũajãra p'õat'ɨ pari jĩra bɨ? 8Mãɨya k'ɨ̃risiadaé pasima. Mãɨ ¿k'ãre ununai k'ɨ̃risiasidama? ¿Ẽpẽra neet'á pia k'ak'apia jɨ̃ bɨt'a ununai k'ɨ̃risia p'anasik'ãra? Mãɨyawẽma; chi ẽpẽra neet'á pia k'ak'apia jɨ̃pataɨrã minachia k'awa p'anɨrã tede p'anapatama. 9Mãɨ ¿k'ãre ununai k'ɨ̃risiasidama? ¿Tachi Ak'õre pari pedeaparí ununai k'ɨ̃risia p'anasik'ãra? Ãjã, Tachi Ak'õre pari pedeaparí ak'ɨde wãsidama. Juan Tachi Ak'õre pari pedeaparí waapẽarã k'aepẽra chi atepe k'awa bɨma. 10Ichi k'orea Tachi Ak'õre pedeade nãɨya bɨ bɨma:
“Chi mɨ pari pedeaparí pɨ naa peeipɨ pɨ pae o jarimẽrá”.#Malak'ia 3:1.
11»Mɨa piarã jararuma: nãɨ ĩjũane Juan chi Porochoaparí k'aepẽra ẽpẽra aba pida atepe newẽma.#11:11 Griego pedeade nãɨya bɨ bɨma: Wẽerãpa t'õnaananepema. Maamina Pajãne Bɨpa ichidirã ichi juade ua bɨdepema chi wariwẽa k'ɨrɨt'a ichi k'aepẽra chi atepe k'awa baima. 12Juan chi Porochoaparipa jaratea beesiedapema waa idi Pajãne Bɨpa ichidirã ichi juade ua bɨdepemarã atepe mĩa p'anɨma. Ẽpẽra k'achiarãpa ãchi k'achia oo k'ɨ̃ria p'anɨma.#11:12 Griego pedeade mãɨ versículo k'ɨ̃risia awara jara k'ɨ̃ria bɨma. Waapẽarãmá nãɨya jara bɨma: «Juan chi Porochoaparipa jaratea beesiedapema ɨt'aa Tachi Ak'õre p'uurudepemarã k'ĩruupatama eda wãnai k'orea. Piarã ẽpẽrarãpa ãarea oo p'anɨma Tachi Ak'õre p'uurudepemarã padai k'orea». 13Tachi Ak'õre pari pedeapataɨrãpa mãɨnepa Moisé pida Tachi Ak'õre ichidirã ichi juade ua bɨ k'orea pedeapachidama aba Juan chi Porochoaparí ewaridea. 14Ãchia jarasidama aba Elía jĩra bɨt'a cheipɨ. Mãrapa k'awa k'ɨ̃ria p'anɨpɨra, chi chei pada jara p'anana; mãɨ Juanpɨ.#Malak'ia 4:5. 15Chi k'ɨɨrɨ pará bɨpa jĩrak'aua ũrise.
16»Mɨmá, idiapaepema ẽpẽrarã ¿k'ãre jĩra p'anɨma? P'uurude warrarã jemena p'anɨne nãɨya k'ĩruu pedeapataɨ jĩra p'anɨma:
17“Taipa siru chaasidaɨde mãra paeradaé pasima.
Sõp'ua k'arisidaɨde mãra jẽanaé pasima”.
18»Juan chi Porochoaparipa nek'ok'apɨ́ ewari oopachima mãɨnepa it'ua tok'a pasima. Maamina ẽpẽrarãpa jarapachidama ichi jaore mietá pará bɨt'a. 19Mãɨpari mɨ, chi Ẽpẽra Warrapa ne ãarea k'oparima mãɨnepa ne ãarea toparima. Maamina ãchia jarapatama mɨ miak'ãe nek'oparipɨ mãɨnepa it'ua minachia toparipɨ. Mãɨ awara jarapatama mɨ nemietá oopataɨrã ome mãɨnepa Romanepema pae erreara jɨrɨp'epataɨrã ome nipapariade apatama. Maamina Tachi Ak'õre k'ɨ̃risia jĩp'a bɨt'a k'awa p'anɨma, chi ichide ĩjãapataɨrãpa jĩp'a oopata pẽra».
Jesupa p'uurudepemarã ichide ĩjãanak'a berã ɨtɨada
Luca 10:13-15
20Maapae Jesupa waapẽarã p'uuru ɨtɨa beesima. Mãɨrã p'uurude ichia chi ẽpẽrarãpa ne p'ue oodak'apɨ́ mãma ãarea oodamina ãchia nemietá oopataɨ amaanaé pasima. 21Nãɨya jarasima:
—¡Corazín p'uurudepemarã mãɨnepa Betsaidadepemarã chupuri p'anɨma, Tachi Ak'õrepa ɨtɨai pẽra! Mɨa ẽpẽrarãpa ne p'ue oodak'apɨ́ mãra t'ãena Tirode mãɨnepa Sidone oodapara, mãɨ p'uurudepemarãpa isapea nemietá oopataɨ itu bɨdak'ari Tachi Ak'õrene ĩjãanai pasima.#11:21 Tachi Ak'õrepa Tiro mãɨnepa Sidón ɨtɨasima. Amó 1:9-10. Mãɨ k'orea neet'á sõp'ua p'anɨne jɨ̃pataɨ jɨ̃nai pasima, mãɨnepa et'abarra jora ɨt'aa p'odai pasima ãchi poro ɨ̃rɨ.#11:21 Neet'á sõp'ua p'anɨne jɨ̃pataɨ jɨ̃nai pasima, mãɨnepa et'abarra jora ɨt'aa p'odai pasima ãchi poro ɨ̃rɨ. Judiorãpa mãɨya oopachidama, ãchi piarã sõp'ua p'anapachida pẽra ãchi nemietá oodada k'orea. 22Maamina mɨa mãrá jararuma: Tachi Ak'õrepa jõmãɨrã ɨtɨai ewaride Tirodepemarã mãɨnepa Sidonepemarã k'aepẽra mãra atepe ɨtɨaipɨ.
23¿Capernaunepemarã ɨt'aa pajãnea wãnaik'ãra? ¡Wãnaiwẽma! ¡Tachi Ak'õrepa mãra piudaadarã p'anapataɨmá peeipɨ!#11:23 Piudaadarã p'anapataɨmá. Griego pedeade nãɨya bɨ bɨma: Hades. Mɨa ẽpẽrarãpa ne p'ue oodak'apɨ́ mãra t'ãena Sodoma p'uurude oodapara, jãɨ p'uuru wapida bai pasima.#11:23 Sodoma. Mãɨ p'uuru mãɨnepa Gomorra Tachi Ak'õrepa ɨtɨasima. Génesi 18:16—19:29. 24Maamina mɨa jararuma: Tachi Ak'õrepa ãareaɨrã ɨtɨai ewaride Sodomanepemarã k'aepẽra mãra atepe ɨtɨaipɨ.
Jesupa ẽpẽrarã ɨ̃apaapiparii k'orea jarada
Luca 10:21-22
25Mãɨ ewaride Jesupa jarasima: «Ak'õre, pɨ pajãnepema Chiparipɨ mãɨnepa nãɨ ĩjũanepema Chiparipɨ. Pɨa ne atua berã́ mɨa jarateada k'awapida pẽra mɨa pɨá pia pedeaipɨ. Mãɨt'u chi minachia k'awa berã́ pɨa k'awapié pasima. 26Ãjã, Ak'õre, pɨa mãɨya oosima jãɨya oo k'ɨ̃ria bada pẽra.
27»Mɨ Ak'õrepa mɨá ara ichidepema ne ãarea k'awapisima. Abaɨ pida atua p'anɨma mɨ, chi Warra sãmaasã́ bɨ; aba mɨ Ak'õrepuru k'awa bɨma. Ara mãɨ jĩra abaɨ pida atua p'anɨma mɨ Ak'õre sãmaasã́ bɨ; abapuru mɨ, chi Warrapuru mãɨ k'awa bɨma. Mɨa abaɨa mɨ Ak'õre k'awapisira mãɨ ẽpẽra pida k'awaipɨ.
28»Ãarea sẽ p'anɨpɨra, mɨmá chet'ɨ. Mɨa mãra ɨ̃apaapiipɨ.#11:28 Ãarea sẽ p'anɨpɨra. Judiorã Moisepa bɨda jarateapataɨrãpa ne chɨk'ɨa at'oopi p'anɨ jĩra, ẽpẽrarã́ chi t'aju oopipachidama. Mateo 23:4. 29Mɨá itu ateewãpit'ɨ. Mɨa ne jara bɨ ũrit'ɨ. Mɨa ãarea choaparima mãɨnepa mɨ sõnepa waapẽarã k'aepẽra atepe k'awa bɨade a k'ɨ̃risiak'ama. Mɨmá chedaipɨra mãra piarã ɨ̃apaadaipɨ. 30Mɨa jaratea bɨ t'ajuwẽa bɨma. Mɨa oopi bɨ sida oo t'ajuwẽa bɨma».
Tällä hetkellä valittuna:
Mateo 11: tdc
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© (Active), Wycliffe Bible Translators, Inc. All rights reserved.
