Malékuse 2

Yěsô gÿǒ ngàŋa kwʉ́’te zeŋe

(Matio 9.1-8; Lukase 5.17-26)

1É cʉa lyɛ̌’ shÿɔ́’ɔ tsɔ́ wɔ́, Yěsô gíŋ ḿbiŋe Kapernawúm. Mé jú’ ngie aa ndá, 2alá’ pú ńcú’te wó tà ntÿɔgɔ́ kwò tè gíŋe ńgwɔ́ wó wɔ́, tà mbɔɔ ncwò ndá, Yěsô zye léshwóŋó wɔ́b nò Ssé. 3Tsɔ́ pʉ̀a tó, ńgẅiin ngàŋa kwʉ́’te, mbà mbàŋa lekùa tsetsɛ̀ɛ pɔ́b leŋé yé, lélɔg ńtó ńgyá Yěsô. 4Alá’ piŋ ńgyɔ́ɔn gyɔ́ɔn, tà pɔ́ té ku’u lényɛɛ yé mbwo Yěsô wɔ́, ńgyá kékáŋ, ńcʉ́’ ḿpfó pɔ́ nzsè gie e gee tÿǒ ndá, ńdeŋte ńtsɔ́’ɔ jʉ’, á gwɔ́ jʉ’ gie Yěsô aa wó, éfó wó sẅé’e nguɔ wɔ́b nê kǔ wé, ńtÿɔ́gɔ mvfò yé. 5Yěsô gyá ntí gie mbàŋa ŋwɛ́ lɔ̌g ńzáb ntʉ́m ná yé, ńgɔɔn né ngàŋa kwʉ́’te ngie: Míŋ wɔ̀ɔn, mé legé menò tepòŋ mú ńnáa mbwo gù. 6Etsɔ́ *pàkyàgte lepʉ̌ Mǒsê gwɔ́ jʉ’ó, ńjú’, ńkwaŋte lóŋ pɔ́b ngie: 7Nyìŋ wɔɔn shwóŋó lêkɔ́ lɛ? À zoonté Ssé. E Ssé gílé yé zɔ ku’u lélege menò tepòŋ nyìŋ. 8Yěsô gwóon ńzsé mmó gie pɔ́ ne ńkwaŋa, ńzɛ́te wɔ́b ngie: Pi gǎ ńgẅiin yɛ̂ ntí nkwaŋá ntʉ́m pi? 9Pi gyǎ gí ngie á zeŋe pɔ́ légɔɔn né ngàŋa kwʉ́’te ngie mé legé menò tepòŋ mé, kà pɔ́ légɔɔn ngie à lu ssé ńkaa kǔ wé ńdɔg ńgʉa? 10Mèŋ n ge ké nyɛɛ gẅi ngie, áa ndùmo Ssé tsetsá’, mbà mé la ná tʉ̀ né *Míŋ Nyìŋ, lélɔg ńdege menò tepòŋ pʉ̀a mesoŋ ńnáa mbwó pɔ́b. Yěsô zɛ́te pɛ́’ɛ̀, ńdeen ńké ńgɔɔn né ngàŋa kwʉ́’te ngie: 11Lu ssé, ńkaa páŋte gù ńdɔg ńgʉa né mbʉ̀a gù. 12Á gwóon ńdu ssé, ńkaa páŋte we, ńdɔg ńně ńgee, alá’ ne ńdíe, á pú ńně ńkʉ’ʉ wɔ̌ɔwɔ́ɔ. Pɔ́ ne ńgu’te Ssé ńgɔɔn ngie: Peg laa zɔɔn ńgyá yɔɔn ntí nò wɔ́!

Yěsô toŋó Lěvi

(Matio 9.9-13; Lukase 5.27-32)

13Yěsô la gíŋe ḿbiŋ nzèm nkwɔ’ɔ́ ntse Galilea. Alá’ ne ńtóo ńkẅɛ́te yé, á ne ńzí’i wɔ́b nò Ssé. 14Á ne ńgiŋe, ńgyá Lěvi míŋ Alfe, á ńnéŋe jʉ’ gie mé kẅé ncùb pà *Roma wó. Yěsô gɔɔn né yé ngie: Tóo pɔgɔ zɔ cʉ́’ʉ ńgiŋe. Lěvi lu ssé ńcʉ́me nzèm yé.

15Yěsô pâ *ngàŋa kwò yé gÿo ńgʉa mbʉ̀a Lěvi léjÿó mmó, pâ pʉ̀a tà ńgyɔ́ɔn ne ńjÿó mmó, lelÿò gwɔ́ *pàkẅé ncùb, tà mbɔɔ pʉ̀a pie pà Yuda lɔ́ɔn ńtóŋo wɔ́b lé pʉ̀a tepòŋ, ńtí pʉ̀a ápɛ̌ laa nzèm Yěsô tɛ’. 16*Pàkyàgte lepʉ̌ Mǒsê pie é laa nà nùɔ pà *farisay, gyá pá’ Yěsô pâ pʉ̀a ápɛ̌ ne ńjÿó mmó, ńzɛ́te *ngàŋa kwò yé ngie: Á gÿo lêkɔ́ tá gẅi pâ ńtí pʉ̀a pɛ̂ tem ngwʉ̌ŋ? 17Yěsô jú’, ésaga mbwo pɔ́b ngie: Ńgwɔ́ nyìŋ le gwɔ́ ntentʉ́, ńgʉa fa’a ngÿo meffò wɔ́. Nyìŋ guɔ tá fa’a yé. Mèŋ n ka tè tó pɔ́ létóŋ pʉ̀a pie pɔ́ kwaŋ ngie pɔ́ ée pʉ̀a membòŋo ngie pɔ́ piŋe mbwo Ssé wɔ́. Mèŋ n ka tǒ ńtí pɔ́ megàŋ mefʉ̀a.

Mé zɛté Yěsô nò nà lekwoŋ kwoŋ ńnéŋe nzyè, ésẅíŋte Ssé

(Matio 9.14-17; Lukase 5.33-39)

18Á láa tsɔ́ lyɛ̌’, *ngàŋa kwò Jâŋ Mbabtis pâ pà *farisay ne *ńkwoŋo kwoŋ ńnéŋe nzyè, ésẅíŋte Ssé. Etsɔ́ pʉ̀a tó ńzɛ́te Yěsô ngie: *Ngàŋa kwò Jâŋ pâ pé pà *farisay kwoŋ kwoŋ ńnéŋe nzyè, ésẅíŋte Ssé. E pú piŋ ńké tè gÿo yɔ́b pú’u wɔ́, mélà’a kɔ́? 19Yěsô tsɔ́’ɔ mbwo pɔ́b ngie: Tà à lɔɔn ńgwɔ́ mé gʉa ńzíŋ leluŋó nyìŋ, á nyé ńnéŋe ńnéŋe, pʉ̀a pie mé ně ńtóŋ ńnéŋe nzyè lêkɔ́? Pâ pɔ̌ lɔɔn ńnyé ńnéŋe ńnéŋe, mbà pɔ́ ge ké pfɛ́ pɔ́ mmó. 20Tá’, mé ge lá’ fó mbwo pɔ́b tsɔ́ lyɛ̌’, ésa’a yé, pɔ́ leen ńké ńnéŋe nzyè fʉ̀’ó.

21À lɔɔn ńgwɔ́ nyìŋ le lɔgɔ mmó nzsǒ sẅé, ńdɔg ńtsɛ́ lepÿé ná nzẅìŋe nzsǒ wɔ́. Nyìŋ gÿo pú’u, mbà mmó nzsǒ sẅé ge kẅi’i shʉa nzsǒ, lepÿé pú fáŋ.

22Mé lɔɔn ne ńgee ńde’e melù’ tsɛ̀ɛ ntú’ *ngùb#2.22 Mé ee Israel, ésẅiŋ ngùb nɔ̀ɔn, ḿvfo ńdɔg ńnyɛte ntú’. , mbà mé té néŋ melù’ mie mé nyé ńtsɔ́’ɔ tsɛ̀ɛ nzẅìŋe ntú’ wɔ́. Mé lɔɔn ńgÿo pú’u, mbà melù’ sẅé ge fu’, éshʉ́a nzẅìŋe ntú’, mé sɔ́ɔn melù’, ésɔ́ɔn ntú’. Á ne ńzɛ́te ngie mé néŋ mélù’ me sẅé pɔ́ tsɛ̀ɛ ntú’ ye sẅé.

Yěsô zɔ póŋo nò nà lyɛ’ɛ́ nzsè pà Yuda

(Matio 12.1-8; Lukase 6.1-5)

23Á gÿo ńgwɔ́ *lyɛ’ɛ́ nzsè pà Yuda, Yěsô pâ *ngàŋa kwò yé ne ńcʉa tsɛ̀ɛ nká’a ngesáŋ ntsíŋ, *ngàŋa kwò yé zye lésẅe ngesáŋ. 24Tsɔ́ pà *farisay gyá, ńgɔɔn né Yěsô ngie: Líe jú tá ńgyá! *Ngàŋa kwò ɔ́ gÿo mmó gie *lepʉ̌ ségè tɔ’ɔ légÿo nà lyɛ’ɛ́ nzsè mélà’a kɔ́? 25Yěsô tsɔ́’ɔ mbwo pɔ́b ngie: Pi laa fó ńtóŋo jʉ’ʉ ŋwà’ne Ssé gie á la’te mmó gie fùɔ Ndavíd la gÿo wɔ́ kà? Mèŋ n gɔɔn fʉ̀’ gie nzyè la gyáŋa yé, anò cʉa wɔ́ba pʉ̀a pé. 26Á laa fʉ̀’ó, Abiatar gwɔ́ *tándá pànùŋe pwɔ́’, Ndavíd kúu jʉ’ gie mé nuŋo pwɔ́’ wó, ḿbí mbelég gie mé náa mbwó Ssé, ḿpfɛ́ tà ńná ye pʉ̀a pé, tá *lepʉ̌ ségè zɛ́te ngie ndà’ *pànùŋe pwɔ́’ zɔ pfɛ́. Tá’, fùɔ Ndavíd la pí ḿpfɛ́ tà ńná yé *ngàŋa kwò yé. 27Yěsô gíŋe ńgɔɔn né pɔ́b ngie: E Ssé la gÿo lyɛ’ɛ́ nzsè ńnáa mbwo nyìŋ mesoŋ, à lɔ̌ɔn tě ńgÿo nyìŋ mesoŋ ńnáa mbwo lyɛ’ɛ́ nzsè wɔ́. 28Áa pú’u, tá *Míŋ Nyìŋ zɔ zɔɔn ńgẅiin légɔɔn mmó gie à lɔɔn ńgwɔ́ mé gÿo tà mbɔɔ ná *lyɛ’ɛ́ nzsè pà Yuda.

Tällä hetkellä valittuna:

Malékuse 2: NGBM

Korostus

Jaa

Kopioi