Malékuse 3

Yěsô gÿǒ nyìŋ zeŋe lyɛ’ɛ́ nzsè pà Yudas

(Matio 12.9-14; Lukase 6.6-11)

1Yěsô gÿo ńgíŋe ńgʉa tsɛ̀ɛ tsɔ́ *ndá cú’tè pà Yuda, atsɔ̌ nyìŋ gwɔ́ yé ndá ŋwɛ́, mbà pwó yé léen ńkwé. 2Epʉ̀a gwɔ́ jʉ’ó, ńně ńdeŋe yé légyá kà à ge gÿo nyìŋ ŋwɛ́ zeŋe *lyɛ’ɛ́ nzsè wɔ́, pɔ́ fó mǒ, ésẅiŋe yé. 3Yěsô gɔɔn mbwo kwè pwó ŋwɛ́ ngie: Lu ssé ńtó ńtyé mvfò, 4ńdeen ńké ńgɔɔn mbwo pʉ̀a ŋwɛ́ ngie: *Lepʉ̌ ségè ée pé’e ńtsẅi ngie mé gÿo kɔ́ lyɛ’ɛ́ nzsè? Ńgie mé gÿo nò mbòŋo kà nò tepòŋ? Ńgie mé gÿo nyìŋ tsẅɛ́ kà pɔ́ ngie mé zẅé yé? Tsoon nyìŋ wɔ́b tè tsɔ́b. 5Yěsô paŋ lejÿɔ́g ńdɔg ńdíe wɔ́b, mbùm yé ne ńtsyɛte ńtí tʉʉ twó yɔ́b, á leen ńké ńgɔɔn mbwo mámbàŋa ŋwɛ́ ngie: Siŋe pwó ɔ, á siŋ. Mé gyá á tʉte. 6Pà *farisay leen fó *ndá cú’tè ńkẅɛ, pâ pʉ̀a *Herôd gwóon ńcú’te léfa’ shÿó pá’ pɔ́ ge gÿo tá zẅé Yěsô.

Alá’ ne fóo shÿó shÿó ńtóo, ńgyá Yěsô

7Yěsô pâ *ngàŋa kwò yé gÿo ńgʉa lê ngʉ̀ŋe máamáa letʉ̀ŋ Galilea. Menùɔ lá’ tà ńgyɔ́ɔn cʉ́me nzèm yé, éfóo ngwòŋ Galilea mbɔɔ ngwòŋ Jẅidea, 8tà mbɔɔ tÿǒsoŋo Yerósalem. Petsɔ́ fóo gwoŋó Idẅime, etsɔ́ fóo tà mbɔɔ nzǐŋ ntse Jurdeŋ, ńgÿo pʉ̀a pie é ńnéŋe ḿbɔ́ɔnte Tir pɔ́ Sidoŋ. Pɔ́ tóo pú’u, légyá Yěsô, mélà’mie pɔ́ la ne ńjú’u kɔ̀ɔkɔ́ɔ gie à ne ńgÿo. 9Yěsô gyá pú’u, ńgɔɔn mbwo *ngàŋa kwò yé ngie, pɔ́ cwoŋte mûɔ mékanú’, à kúu tsoló, ḿbɔ́gɔ lá’ lésẅɛ́ɛ yé. 10Á gwaa gwɔ́, mbà à pǔ ńgÿo pʉ̀a tà ńgyɔ́ɔn sẅéte, tà pʉ̀a metsèm pie guɔ laa ná pɔ́b nɔ́ɔnte yé, ńzába pwó nà yé, mélà’mie à la ne gÿo pʉ̀a tà ńgyɔ́ɔn zeŋe. 11Epʉ̀a pie *messé tepòŋ la ne ḿbue wɔ́b lɔ́ɔn ńgwɔ́ tà ńgyá Yěsô, ńnuŋe mekwò yé, ńdɔgɔ ngyè tetʉʉ ńgɔɔn ngie: «Ɔɔ Míŋ Ssé». 12Tá’ Yěsô ne ńtɔ’ɔ wɔ́b tà ḿbʉ́ʉ tɛ’ ngie pɔ́ pɔ́ɔn légÿo mé zsé nyìŋ gẅie aa wɛ̌.

Yěsô tsɔ̌’ ngàŋ ntúm yé ntsɔ́b pʉ́a lê legém

(Matio 10.1-4; Lukase 6.12-16)

13Yěsô gÿo ńkwɔ́’ɔ ndùm lekwɔ’ɔ́, ńtóŋ pʉ̀a pie à tsɔ’ɔ́ wɔ́b. Pɔ́ tó, 14á gʉa tsetsɛ̀ɛ pɔ́b ńdɔg pʉ̀a ntsɔ́b pʉ́a nê legém, légwɔ́ gie pâ pɔ́ ge gwɔ́, ḿbiŋ ńtsẅi lezíŋ sɔ́b lé *ngàŋ ntúm, léneŋe ńtúmo wɔ́b pɔ́ shwóŋó nò Ssé, 15ḿbiŋ ńku’u léjwoŋ *messé tepòŋ mie é pue pʉ̀a. 16Pʉ̀a pie à la tsɔ́’ɔ wɔ́b, e pɔɔn: Wɔɔn laa Símo, á tsẅi lezíŋ sé lé Piɛ, 17wɔɔn gwɔ́ Jâg pɔ́ fɛ́ we Jâŋ, é gwɔ́ gubé zebede. Yěsô tsẅi lezíŋ sɔ́b lé Mboanergès, é lɔgɔ ńgɔɔn ngie, epúɔ lefàŋ sie é vɛ́te. 18Yěsô gíŋe ńtsɔ́’ɔ Ndeléya, pɔ́ Filib, ńgÿo Patelemî nê Matio, pɔ́ Tomáse, ńgÿo Jâg míŋ Alfe, ńgÿo Tadé nê Símo mûɔ ngwòŋ, 19ḿbiŋ ńgÿo Jẅidas Iskariod gẅie à la táa sẅiŋe Yěsô.

Epʉ̀a é zoonté Yěsô ngie aa ngàŋa kwò Sátà

(Matio 12.22-32; Lukase 11.15-23; 12.10)

20Yěsô kúu ndá, alá’ gíŋe ńcú’te ńgyɔ́ɔn gyɔ́ɔn tà pâ *ngàŋa kwò yé té gyá fʉ̀’ tà ḿpfɛ́ɛ mmó wɔ́. 21Epʉ̀a tsìŋe ndá pà Yěsô jú’u yɔɔn nò, ńdu ssé, ńcʉ́me mánzsè pá’ pɔ́ ge gʉa gwoon yé, ńně ńkwaŋa ngie twó yé cʉŋté.

22Mbà tsɔ́ *pàkyàgte lepʉ̌ Mǒsê ně fó Yerósalem ńcwóŋ ńtó, ńgɔɔn yɔ́b ngie: E *Ssé tepòŋ gie mé tóŋo lé Mbelzebùl zɔɔ ná yé. À lɔgɔ pɔ́ metʉ̀ tándá *messé tepòŋ. 23Yěsô tóŋo wɔ́b pɔ́ tó, á saga mbwo pɔ́b ngie: Tà áa nénʉ́ ngie à lɔɔn ńgwɔ́ Sátà sele ńjwoŋo twó mbùm yé lá? 24Epʉ̀a tà’a lá’ lɔɔn sele ńdÿɔ́’ ncù tsetsɛ̀ɛ pɔ́b, mbà yɛ̌ lá’ ge pyé. 25Epʉ̀a tà’a tsìŋe ndá piŋ sele ńtág mélà’ tsetsɛ̀ɛ pɔ́b, mbà yɛ̌ tsìŋe ndá ge tága. 26Sátà lɔɔn sele ńdÿɔ́’ɔ twó mbùm yé, kà fagte zɔ̌ gwɔ́ tsɛ̀ɛ sé lefùɔ wɔ́, mbà lefùɔ sé ŋwɛ́ té ge tyé wɔ́, mbà à yé nò ge mag. 27Atsɔ̌ nyìŋ té wó gẅie à lɔɔn ńgwɔ́, á pwɔ́’ ndá tántʉ̀, ńkaa shúm sé té gwɔ́ gie à vɔg ńkwɛ́ɛ yé wɔ́. À vɔg tà ńkwɛ́ɛ yé, á ku’u lékúu ndá, ḿbú ńkaa shúm sé ntsèm.

28Tà mèŋ ńke shwóŋó gẅí, kwà’ nénʉ́, à lɔɔn ńgwɔ́ Ssé lá’ ḿbú ńdege menò tepòŋ pʉ̀a mesoŋ ntsèm ńnáa mbwo pɔ́b, tà mbɔɔ meshwóŋè ntsèm mie pɔ́ lɔgɔ ńzoonte yé. 29Tá’, nyìŋ lɔɔn ńzoonte Zẅìge Ndʉalʉ̌a, mbà tsɔ̌ lélá’ ńdege ńnáa mbwo ngàŋ à tè gíŋe ńgwɔ́ wó wɔ́, mélà’mie à gẅiin menò tepòŋ mie é téen ńdá’a ḿmaga wɔ́. 30Yěsô lɔ̌ɔn ńgɔɔn mbwo pɔ́b pú’u, mélà’mie pɔ́ la ne ńgɔɔn ngie metʉ̀ mé fóo pɔ́ mbwo *Ssé tepòŋ.

Kwà’ tsìŋe ndá pà Yěsô aa Yɛ̌

(Matio 12.46-50; Lukase 8.19-21)

31Má pà Yěsô pâ mefɛ́ pé leen ńke ńtó, ńtyé ncwò ndá, ńtúmo nyìŋ ngie à gʉa ńtóŋo yé ńná né pɔ́b. 32Alá’ pú ńnéŋe Ssé, ńtÿɔ́’te Yěsô ńnéŋe soŋ, mé gɔɔn mbwo yé ngie: Mé gɔ̌ɔn ngie má ɔ pâ mefɛ́ pú ée pi ńně fa’a ɔ. 33Á tsɔ́’ ngie, má wɔ̀ɔn aa wɔ̌, mefɛ́ pɔ́ɔn gwɔ́ pàwɔ̌? 34Ńgɔɔn pú’u, ésele ńdíe pʉ̀a pie é tÿɔ́’te yé ńnéŋe soŋ, ńgɔɔn ngie: Má wɔ̀ɔn pâ mefɛ́ pɔ́ɔn pɔ̀ɔn pie pɔ́ ńnéŋe lɔɔn. 35Pi zsé ngie nyìŋ lɔɔn ńgÿo mmó gie Ssé ne ńkwoŋo, mbà ngàŋ aa má wɔ̀ɔn, mbà aa fɛ́ wɔ̀ɔn, we mámbàŋa mbɔɔ we manzwě.

Tällä hetkellä valittuna:

Malékuse 3: NGBM

Korostus

Jaa

Kopioi