Tuima 5
5
1Alege nuru ale jam boro. Wa yuei ale Ananaiyas. Wa powa yuei ale Safira, a yaa pai ba tɛŋ a da. 2Ba yaa maa chaab a poori ligraŋa gela a ta badek ale ge nŋala a te tuimtomdɔma.
3Ba ale ta ligraŋa a jam tuimtomdɔma jigi la, Piita yaa bek wa ayen, <<Ananaiyas, ka boa ale soa ate fi basi ate Sitaana paasi fu ate fi velim ale Wen Chiika alege tali tɛŋka ligraŋa gela? 4Diipo ate fi an diem pai ka a da la, daa fi ale jam soa ka? Fi be ale pai ka mɛ a da la, ligraŋa mɛ daa fi ale soa? Be ka boa ale soa ate fi poli a nye wanni de? Nya de, fi an velim a te daa nuru biiga, fi velim a te ka Wen.>>
5Ananaiyas ale wom nna la, wa yaa deri lo tɛŋ a kpi ate yɔgsum nna yegayega yaa yik baai meena ale jam wom nya kude la. 6Nidoa paaluk baai ale jam bo dula la yaa pai garuk pali a vili wa nyiŋka a ji wa ta nyini cheŋ a ga gu.
7Ku ale ga beni magadek la, wa powa yaa jam jo. Wa jam zɛ dii ale nye la. 8Piita yaa weeni wa ayen, <<Weeni a sak mu, fi ale fi chorɔwa ale pai ni tɛŋka da la, ka ligraŋa meena ale la ate nama a ta jam?>> Nipowa yaa tulisi Piita ayen, <<Mm, ŋa meena ale la.>>
9Piita yaa bek wa ayen, <<Be ka boa ale soa ate fi ale fi chorɔwa a maa chaab ayen ni chamsi Naawen Chiika a nya? Nya de, nidoa baai ale ta fi chorɔwa a ga gu la, a ŋman cheena kama dɔkku nɔi yɔgyɔgla de. Ba be le ji fi mɛ kama a ta nyini ga gu.>>
10Wa yaa deri lo Piita naŋsa tɛŋ a kpi. Nidoa paalukku a yaa jam jo nya ale wa kpiya ate ba yaa ji wa a ta nyini a ga gu wa chorɔwa tɛŋ. 11Yɔgsum nna yegayega a yaa jam yik Kirisita bisaŋa meena ale baai meena mɛ ale jam wom wieŋa de la.
12Tuimtomdɔma kasim jam a nye ka wakperikaliisa ale wakinkagla nna yegayega nuruma po. Baai ale ta siaka la, a kasim jam a nye tuka ale chaab ka Solomon Pɔsuku jigini Wen yenni po.#5:12 Nya fotowa, Jɔɔn 10:23. 13Nuru mbala waai an jam a yaali ayen ba gum ba po, ba meena jaa zuli ba kama. 14Nuru boari nna yegayega nidoaba ale nipooba baai ale jam ta siaka ale ti Naawenni la a jam gum siarɔma po. 15Tuimtomdɔma ale jam a nye diila a basi kama ate nuruba ji yɔgnyieŋsa ale gaduata ale taasa a ta ba nyini suitaŋa niŋsa ayen Piita daa taam abe wa yisuŋku a jɔk va ba zuk a taam. 16Nuru boari ale jam nyini tɛŋ sii ale kala gilim Jerusalem tɛŋka la a ta nuru baai ale a yuak yaase chichirik baata a bo ba po la a jam. Ba meena jam nya nyiŋyɔgsa kama.
17Alege kaabteerɔ kpioŋku ale baai ale jam bo dula ale wa la, Sajusiima beŋka yaa jam a dɛ nyuri. 18Ba yaa yik tuimtomdɔma a lik, dɔk kuui po ate ba a lik waai meena ku po la. 19Yok kuui ate ba lik ba la, Naawen maarɔ yaa jam lak likka diinaŋa noaŋa a ta tuimtomdɔma a nyini a yaa weeni ba ayen, 20<<Ni cheŋ a ga jo zaani Wen yenni po a weeni nuruma nyuvuri paani de kiri ale ka diila.>> 21Tuimtomdɔma yaa siak wa nɔnni a yaa yiti saluik yokyok a ga jo Wen yenni po a sak nuruma. Dila powa kaabteerɔ kpioŋku ale wa vaanchaama yaa wi nisɔmma meena ale Izirali nuru kpientaŋa a tom ayen ba ga ta ba nyini likka dɔkku po a jam. 22Alege nuru baai ate ba tom ayen ba ga ta ba a jam la yaa cheŋ ga paari alege tuimtomdɔma ka likka dɔkku po ate ba pilim ŋman jam weeni a sak ba ayen, 23<<Tama ale ga a paari likka dɔkku la ku jam lik kama nalimnyiini ate baai ale za a limisi la a diem za a limisi. Alege tama ale ga lak dɔkku nɔnni la, tama an nya nuru du.>> 24Wen yenni limisidɔma kpagni ale kaabteerɔ kpaŋŋa ale ga wom dila la, ba yaa butim ale a poli jabuui ate wanni de ta cheen la. 25Nuru wanyi a yaa jam jo ba jigi a weeni ba ayen, <<Ni wom de, nuru baai ate ni yik lik la, a za ka Wen yenni po a sak nuruma.>> 26Limisidɔma kpagni ale wa nuruma yaa maa chaab a cheŋ a ga ta tuimtomdɔma a ŋman jam. Ba an jam nye pagrim a yik ba dii nyiŋla ba jam a chali ka yɔgsum ayen nuruma nin zaan yuk ba ale tintana.
27Ba ale ta ba jam la, ba yaa kali tigsuŋku niŋ ate kaabteerɔ kpioŋku yaa bek ba ayen, 28<<Tama an weeni ni ale nin muna ayen, ni kan pai Yeezu yuenni nyiŋ a sak nuruba? Alege nama dek abe nya ni ale kasim a pai ni sinsaŋŋa a sueri Jerusalem tɛŋka po diila. Ni be a yaali kama ayen ni weeni ayen ka tama ale soa ate wa kpi?>>
29Piita ale tuimtomdɔ mbala yaa tulisi ayen, <<Ku a fɛ kama ayen ti siak Wen nɔi a gaam nurubiik nɔi. 30Ni ale yik Yeezu a kpi jabarimu nyiŋ a ko wa la, tama ale ti koma Wenni a nak wa a yiti kum po kama. 31Wen zak wa kama a kali wadek juga ase Niŋdeerɔ ale Varibasidɔ la ayen ku te Izirali demma basi ba wabaataŋa tomka ate ba nya vɔŋteka. 32Tama abe chim ka seerɔba a te wieŋa de, ku be ka dila ale Wen Chiika, waai ate Wen a pai wa a te baai ale a wom wa nɔi la.>>
33Kpaŋŋa ale wom nna la, ku yaa puuri ba sue ate ba jam a yaali ayen ba ko ba. 34Alege kpaŋŋa po wanyi a jam ka Farisii. Wa yuei ale Gamaliil. Wa jam ka Juuma Sinsak sagrɔ. Waai meena a kasim jam a te wa zula ka nna yegayega. Wala yaa yiti zaani kpaŋŋa po a weeni ayen ba ta tuimtomdɔma a nyini peelim ate ku nye maga dega. 35Wa yaa weeni ba ayen, <<Izirali demma, ni kpesi nidek ale ni ale nye nuruma de dii la. 36Nama dek baga a teeri ayen nuru waai ate ba a wi ayen Teudasi la a jam pai wadek a sak kama ayen wa ka nuru kpioŋ ate nuruba yaa jam paari nidoaba kobsinaansi a pai badek a te wa. Alege Aroom demma ko wa kama ate wa ŋaaŋviirɔma meena a jam waaŋ chaab ate wa wanni mɛ a bɛ. 37Dila ŋaaŋnyiŋ ate Judas Galili denɔwa mɛ a jan jam diipo ate ba jam boro a chiini nuruma la. Wa ale jan jam la, nuru boari ale jam va wa mɛ. Alege ba ko wa mɛ kama ate wa nuruma meena a waaŋ chaab. 38Dila mi a weeni kama ayen dii ate nuruma a nye yɔgyɔgla de la, ni basi ba badek ba nyiini, ale zɔŋŋa de yaase dii ate ba a nye la a dan nyini ka nurubiik jigi ŋa kan ga jigiya, 39alege ku dan nyini ka Wen jigi, ni kan baga a kasi ba. Ni be kpesi nidek kan daa di ni le tulim a kpaliŋ ale ka Wen.>> 40Ba yaa siak wa le kaam ba dii la, a wi ate tuimtomdisaŋa a jo ate ba nak ba ale weeni ba ayen ba kan ŋman sak Yeezu yuenni nyiŋŋa, ale basi ate ba cheŋ. 41Tuimtomdɔma ale jam basi ba la, ba sue a jam peenti kama dii nyiŋla, ka Naawen ale pai ba a chim nuru baai ale magsi ayen ba nam a nya chivie Yeezu yuenni nyiŋla. 42Daa meena Wen yenni po ale ba yieŋa po ba kasim jam a sak nuruba kama ale a mooli ayen Yeezu ka Kirisitawa.
Tällä hetkellä valittuna:
Tuima 5: BWU
Korostus
Jaa
Kopioi

Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation