Tuima 6
6
1Va ŋala po ate Yeezu ŋaaŋviirɔma a jam piisi a gum du la, Juuma baai ale jam a biisi Girik demma biika la, a jam a ŋuuni kama a ŋma Juuma ayen ba pukɔŋŋa a kan jam a nyo ba charuku. 2Tuimtomdɔma pi ale bayewa yaa wi ŋaaŋviirɔma meena ate ba jam jigi yeŋ a weeni ba ayen, <<Ku an magsi ayen ti basi Wen wamaŋsaŋa sakka abe ti a chari ŋandiinta. 3Dila nyiŋ m suata, ni lueri nuruba bayopɔi baai dek ate nama a seba ayen ba nye a magsi ate Wen Chiika ale yam sueri ba la, ate tama yaa pai tuimaŋa de a nyo ba nisima po. 4Abe tama a pai tidek a te puusa ale wa wamaŋsaŋa sakka.>>
5Ba meena sue yaa kasim jam peenti kama ale tuimtomdɔma ale weeni dii la. Ba yaa lueri Sitiven waai ale jam ta siaka nalimnyiini la ale ta Wen Chiika mɛ la, ale Filip ale Porokorus ale Nikano ale Timon ale Paminas ale Nikolasi. Nikolasi jam nyini ka Antiok a yaa tagri wadek maa va Juuma suiku alege wa daa Juu. 6Ba yaa pai ba a sak tuimtomdɔma ate ba pai nisima a vi ba zuk a puusi te ba.
7Wen wanni a jam tagli Jerusalem meena ate ŋaaŋviirɔma ale bo dula la a jam piisi a gum du. Kaabteerɔma yegayega mɛ a jam ta siaka ale sinsaŋŋa kama.
8Sitiven ate ŋmanteka ale pagrim a sueri wa la, yaa jam tom wakperikaliisa ale wakinkagla nna yegayega nuruma nina po. 9Alege tuka dɔkku po nuruba ale jam boro a te badek yue ayen Aŋmandaayom. Juuma ale jam maa nyini Sairini ale Alezandiria ale Silisiya ale Asia tɛŋsaŋa la a maa ka ba po a yaa jam ta nanpaga ale Sitiven. 10Alege Wen Chiika a jam te Sitiven ka yam ate wa biisi ate ba an baga a tulisi wa. 11Ba yaa suk paasi nuruba ayen ba weeni ayen, <<Tama wom ale wa a lɛ Moosis ale Wen.>> 12Ba yaa siti nuruma ale niŋdeerɔma ale sagrɔma, ate ba jueli wa zuk a yik wa a ta cheŋ tigsuŋku jigi, 13a basi ate nuruba a velim ayen, <<Nuruwa de an basi jigi weleŋka ale sinsaŋŋa leeta. 14Tama wom kama ale wa weeni ayen Yeezuwa de ale daasi Wen yenni a lɔnsi abe wa tagri Sinsak ŋaai ate Moosis a te ti la.>> 15Baai meena ale bo tigsuŋku po la, yaa zak nya wa ale wa nimbidiaka a nye ase Wen maarɔ nimbidiak la.
Tällä hetkellä valittuna:
Tuima 6: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
