Tuima 17
17
1Pɔɔl ale Silas yaa ŋman va Amfipolise ale Apoloniya tɛŋsaŋa po a taam cheŋ Tesalonika tɛŋka. Juuma tuka yeri dinyi ale jam bo dula. 2Pɔɔl yaa ga jo ase wa nyiem ale a nye diila. Wa jam bo dula ka Vuusum Daa ŋata a sak ba a nyini Wen Gbaŋka po, 3tɔgi Gbaŋka wieŋa kie a sak ba ayen ku sak ba ayen ku jam a fɛ kama ayen Kirisitawa ale nam abe wa ŋman yiti kum po, <<Yeezuwa de ate mi a mooli a te ni la ale Kirisitawa.>> 4Juuma ale wom nna la ba yaa sum siak ayen Pɔɔl ale a biisi diila ka wensie a pai badek a gum chaab ale Pɔɔl ale Silas po. Girik demma mɛ yegayega baai ale a chali Wen la, ale nipooba gela baai ale chim nuru kpienta la bala meena jam siak kama a maa va ba.
5Alege Juuma yaa jam a dɛ nyuri. Ba yaa tigsi gaasa nyam yabaŋa po, ate ba tigsi nuru boari a nye wɔkwɔk. Ba jam cheŋ Jeesin yenni a gisi Pɔɔl ale Silas ayen ba ta ba jam te nuruma. 6Alege ba ale jam nye dila ale ge ba an nya ba la, ba yaa yik Jeesin dek ale Kirisita bisaŋa gela a vuuri a ta ba jam tɛŋka kpaŋŋa jigi a nuemu ate ku a jueli a weeni ayen, <<Nuruma de a ta ka daanika a jam jigi meena. Yɔgyɔgla de, ba ale nna a jam tama tɛŋka po 7ate Jeesin yaa basi ate ba bo wa yenni po. Ba meena a kaasi ka Aroom tɛŋka naab kpioŋku Siiza sinsaŋŋa. Ba a weeni kama ayen naab kpioŋ ku choa ale boro. Wa yuei ale Yeezu.>> 8Tɛŋka po kpaŋŋa ale nuruma ale wom nna la, ku yaa puuri ba sue. 9Kpaŋŋa yaa basi ate Jeesin ale mbala a tuni ligra ŋaai ale magsi ba tuni la, ale basi ba ate ba yaa cheŋ.
10Tɛŋ ale jam sobri la, Kirisita bisaŋa a yaa basi ate Pɔɔl ale Silas a cheŋ Beria tɛŋka. Ba ale jam paari dula la, ba yaa ga jo Juuma Tuka Yenni po. 11Tɛŋ kala demma a jam zunchoŋ Tesalonika demma de ale Wen wamaŋsaŋa womka kama. Ba kasim jam lak ba tue meena nalimnyiini kama a wom wamaŋsaŋa. Daa meena ba a karim ale a zamsi Wen gbaŋka wieŋa kama ayen ba nya ase Pɔɔl ale a biisi diila ka wensie ya. 12Juuma yega a jam ta siaka kama ale wamaŋsaŋa. Girik tɛŋka nipooma yega baai ale chim nuru kpienta la ale Girik demma nidoama a jam maa ta siaka kama. 13Alege Juuma baai ale jam bo Tesalonika la ale wom ayen Pɔɔl sak Wen wanni Beria tɛŋka mɛ po la, ba yaa ŋman jam dula mɛ a yik nuruba a nyo jigi yeŋ a paasi ba ayen ba ta daanika a jam. 14Ku an bola beniya ale ge ate Beria Kirisita bisaŋa yaa basi ate Pɔɔl a cheŋ nya kpiemu kunkɔŋni, alege Silas ale Timoti a wari Beria. 15Nuru baai ale jam ta Pɔɔl a cheŋ ayen ba basi la, a jam ta wa a cheŋ paari ka Atens ale ge pilim ŋmani Beria. Pɔɔl jam te ba ka tuntomiŋ ayen ba weeni Silas ale Timoti ayen ba dan nya suik yɔgyɔgla de ba jam wa jigi.
16Pɔɔl ale jam bo Atens tɛŋka a limisi Timoti ale Silas la, wa yaa jam nya ale bɔgta a kasim jam sueri tɛŋka de po meena. Nya kude a yaa jam te wa suipuurum nna yegayega. 17Dila wa yaa jaa nak nanpaga tuka diinaŋa po ale Juuma ale baai ale kan daa Juuba ale ta siaka la, wa jam a nye dila kama yabaŋa po ale baai ale jam bo dula la. 18Ba gela mɛ jam ka Ɛpikuriba ale Sitooyik dem, ba jam ka sagrɔba a tu chaab ale ba. Ba gela yaa weeni ayen, <<Bagbiisirɔwa de ayen ka boa?>> Ba gela ayen, <<Wa nye ase wa a mooli ka wen chaŋsa wie la.>> Dii la wa a mooli ka Yeezu ale wa kum po yitika wie. 19Ba yaa yik Pɔɔl a ta cheŋ Ariyapagus jigi ayen, <<Ti le baga a seba sagrɔ paalika de ate fi a biisi wa wie la? 20Ti wom ka wie wachansa, ti a yaali ayen fi weeni ŋa kiri a sak ti.>> 21Atens demma ale nicham baai ale maa bo tɛŋka po dula la a nyiem kasim a yaali ayen ka ba a weeni chaab abe ba a wom mɛ wa paala ale popola paala wie. Ba nyiem ŋman ka wari a nye a gum nna po.
22Pɔɔl yaa yiti zaani Ariyapagus nuruma niŋ a weeni ba ayen, <<M nya kama ale nama Atens demma a yaali Wen wie ka nna yegayega. 23Dii nyiŋla, mi ale kasim va tɛŋka po a taam la, mi nya jigi ŋaai meena ate ni a kaab la ale bɔgta ate ni se zaani a ŋmarisi kunyi nyiŋ ayen, <Wen dii ate ti zɛ la.> Ni be basi ate m weeni a sak ni ayen Wen dii ate ni a te di zula alege ni zɛ di la, ka Wen dila ate yɔgyɔgla de mi a biisi di wari a sak ni. 24Wa ka Wen dii ale nye tɛŋka meena ale jaabuuri meena ale bo ka po la. Wa ka waai ale ka wenŋmazuk ale tɛŋzuk Naawen la. Wa abe an bo daa yie ŋaai ate nurubisa sɛ la po. 25Yaase nuruba a pai ba nisima a tom a te wa, ase wa a yaali jaab ba jigi la. Dii nyiŋ la ka wala dek ale a te nuru biik meena nyuvuri ale vuusum ale jaabuuri meena. 26Wa liŋ nye ka nuru yeŋ, a yaa va nuru wala nyiŋ a nye nuru boari tɛŋzuk de meena. Ka wadek mɛ abe ale poli diipo ate tɛŋsa tɔgatɔgaka tɛŋzuk de ale boro a beni la. Wala dek me abe le daani tɛŋ banaŋa a te tɛŋsa tɔgatɔgaka tɛŋzuk de, 27ayen ba a gisi Wen, yiila ŋaai po ate ba le gisi a nya wa la. Wa an yalima ale ti wanyi meena. 28Ka wa nyiŋ ate ti vua boro a cheŋ ase nama dek wamagsimaŋa ale weeni dii la, wensie tama sum ka wa ŋaaŋbisa. 29Tama abe dan ka Wen bisa, ku a fɛ kama ayen ti kan a poli ayen wa a neensi ka kuta yaase tintana ate nurubiik a pai wadek yam a peesi ba la. 30Dila powa nurubiik an jam miŋ Wen chagi ya. Wa an jam te nurubiik waalika ase ku ale magsi ayen wa te ba diila. Alege yɔgyɔgla de, wa yaa weeni nurubiik meena jigi meena kama ayen ba tagri basi ba wabaata tuimaŋa tomka. 31Boan nyiŋŋa, wa dak ka dai ayen dai dila danni abe wa pai nuru wanyi ate wa lueri ayen wa va wala nyiŋ a bo tɛŋzuk de meena wensie buusa. Nuru wala abe ale wa nak a yiti kum po ayen ku basi ate nuru meena seba chak nalimnyiini ku le sum nye kama.>>
32Nuruma ale wom ale Pɔɔl a biisi magsi chaab ale kum po yiti ka wie la, ba gela yaa jam nye wa a la. Ba gela mɛ a weeni ayen, <<Ti ŋman a yaali kama ayen fi biisi nya kude wie ate ti wom.>> 33Pɔɔl yaa basi tuka jigini ale cheŋ. 34Nuruba gela ale jam maa gum wa po a ta siaka ale Yeezu. Nuruma de po wanyi yuei ale Daanisios. Wa jam maa ka Ariyapagus kpaŋŋa po wanyi. Nipok mɛ ale jam maa ta siaka. Wa mɛ yuei ale Damaris. Nuruba ba chaab mɛ a jam maa ta siaka a gum du.
Tällä hetkellä valittuna:
Tuima 17: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
